བོད་ཀྱི་ཡིག་གཟུཊ་ཇེ་ནེ་སི་ཟིན་ཐོར་བཀོད།

ཁ་སང་གཟའ་ཕུར་བུའི་ཉིན་བོད་ནང་གི་ཡིག་གཟུཊ་འབྲི་མཁན་དགེ་མང་འཇམ་དཔལ་དང་ལྷ་བྲིས་པ་རྡོ་རྗེ་དོན་གྲུབ་གཉིས་ཀྱི་ཡིག་གཟུཊ་ལ་འཛམ་གླིང་ཇེ་ནེ་སི་ཟིན་ཐོའི་བྱ་དགའ་ཐོབ་འདུག

ཁ་སང་ཕྱི་ཚེས་ ༨ ཉིན་བོད་ལྗོངས་དངོས་མང་བཤམས་སྟོན་ཁང་དུ་འཛམ་གླིང་ཇེ་ནེ་སི་ཟིན་ཐོའི་ (World Guinness Record) བྱ་དགའ་སྤྲོད་པའི་མཛད་སྒོ་ཞིག་བསྡུས་ཡོད་པའི་ཐོག བོད་ནང་གི་ཡིག་གཟུགས་འབྲི་མཁན་དགེ་མང་འཇམ་དཔལ་ལགས་དང་། ལྷ་བྲིས་བ་རྡོ་རྗེ་དོན་འགྲུབ་ལགས་གཉིས་ཀྱིས་བྲིས་པའི་འཛམ་གླིང་ཐོག་ཆེས་རིང་བ་དང་ཡིག་གཟུགས་ཆེས་མང་བའི་བརྩམས་ཆོས་༼བོད་ཀྱི་ལོ་རྒྱུས་ཐོག་གི་ཡིག་གཟུགས་གཅེས་བསྡུས༽ཞེས་པར་འཛམ་གླིང་ཇི་ནེ་སི་ཟིན་ཐོའི་བྱ་དགའ་ཐོབ་ཡོད་འདུག

ཡིག་གཟུགས་གཅེས་བསྡུས་དེའི་རིང་ཚད་ལ་སྨི་ ༢༠༦ དང་། མཐོ་ཚད་ལ་ལི་སྨི་ ༨༠ ཡོད་འདུག་ལ། ཐེངས་འདིར་ཁོང་གཉིས་ཀྱིས་ལག་སོན་བྱུང་བའི་བོད་ཀྱི་ལོ་རྒྱུས་རིམ་བྱུང་གི་ཡིག་གཟུགས་རིགས་མི་འདྲ་བ་ ༡༧༧ འགྲེམས་སྟོན་བྱས་ཡོད་པ་དང་། ཡིག་གཟུགས་དེ་དག་ནི་ཀ་མད་སུམ་ཅུ་དང་ལེགས་བཤད། སྙན་ངག་བཅས་ལ་སྦྱར་ཏེ། གནའ་ནས་ད་བར་གྱི་བོད་ཀྱི་ལོ་རྒྱུས་ཐོག་གི་ཡིག་གཟུགས་སོ་སོ་ཕྱོགས་གཅིག་ཏུ་བསྡུས་ནས་གོ་རིམ་བཞིན་བཀོད་པ་དང་། བོད་ཀྱི་ཡི་གེ་གསར་གཏོད་མཁན་ཐོན་མི་སམ་བྷོ་ཊ་གཙོ་བྱས་པའི་ལོ་ངོ་ ༤༠༠༠ ལྷག་གི་ལོ་རྒྱུས་ཐོག་བྱུང་བའི་ཡིག་གཟུགས་གསར་གཏོད་མཁན་སོ་གཉིས་ཀྱི་སྐུ་བརྙན་གོ་རིམ་བཞིན་བཀོད་པ་བརྒྱུད་ནས། བོད་ཀྱི་ཡིག་གཟུགས་སྒྱུ་རྩལ་དང་དེའི་ལོ་རྒྱུས་ལ་ཐོས་བསམ་དབེན་པའི་མིག་སྔའི་སྟོང་ཆ་འདི་བསྐོང་ཅི་ཐུབ་བྱས་ཡོད་འདུག

ཡིག་གཟུགས་འབྲི་མཁན་དགེ་མང་འཇམ་དཔལ་དང་ལྷ་བྲིས་ཉན་ཤུལ་རྡོ་རྗེ་དོན་གྲུབ་གཉིས་ཀྱིས། ལོ་ངོ་བཞིའི་རིང་ལ་བོད་མདོ་དབུས་ཁམས་གསུམ་གྱི་གྲྭ་ས་དང་དགོན་སྡེ། བཤམས་སྟོན་ཁང་། དེ་མིན་བླ་སྤྲུལ་དང་། དམངས་ཁྲོད་ཀྱི་ཉར་ཚགས་མཁན་ལ་སོགས་པའི་སར་བཅར་ནས་རྒྱུ་ཆ་དཀོན་པོ་དེ་རིགས་འཚོལ་སྡུད་དང་ཕྱོགས་བསྡུས་བྱས་པ་དང་། ཡིག་གཟུགས་དེ་དག་གི་འབྲི་སྟངས་ལ་སྦྱོང་བ་དང་། མཚོན་དོན་ལ་ངོས་འཛིན་བྱེད་པ་སོགས་ཀྱི་དཀའ་ངལ་མང་པོ་ཁྱད་དུ་བསད་མཐར། བོད་ཀྱི་ལོ་རྒྱུས་ཐོག་གི་ཡིག་གཟུགས་གཅེས་བསྡུས་འདི་ཐོག་མར་གེགས་མེད་བདེ་བླག་ངང་ལེགས་འགྲུབ་བྱུང་བ་ཞིག་ཡིན་འདུག

ཡིག་གཟུགས་འབྲི་མཁན་དགེ་མང་འཇམ་དཔལ་ལགས་ནི། ཆེས་མཐོའི་བོད་ཀྱི་རིག་གནས་སློབ་གླིང་གི་སློབ་དཔོན་དང་། བློ་དེབ་རིག་པའི་ཉིན་བྱེད་ཞེས་པའི་སློབ་དེབ་གསུམ་དང་ཡིག་གཟུགས་མ་ཕྱི་མཁས་པའི་ཕྱག་རྒྱུན་དང་པོ་དང་གཉིས་པ་འབྲི་བ་པོ། ༡༩༩༣ ལོར་རྒྱལ་སྤྱིའི་བོད་ཀྱི་ཡིག་གཟུགས་འགྲན་བསྡུར་སྐབས་ཀྱི་ཨང་དང་པོ།   བོད་ཀྱི་ལོ་རྒྱུས་ཐོག་གི་ཡིག་གཟུགས་གཅེས་བསྡུས་འབྲི་མཁན་གྱི་མི་སྣ། ཀྲུང་གོའི་སྒྱུ་རྩལ་མཉམ་ཞིབ་ཁང་དང་སི་ཁྲོན་ཞིང་ཆེན་རིག་གནས་ཐེན་ལྷོ་ནུབ་མི་རིགས་སློབ་གྲྭ་ཆེན་མོ་སོགས་ཀྱིས་བསྒྲུབས་པའི་ཐེངས་དང་པོའི་བི་ཤྭ་ཀརྨ་བུམ་པའི་ཕུལ་བྱུང་རི་མོ་དང་ཡིག་གཟུགས་བཤམ་སྟོན་གདན་ཞུའི་ཚོགས་འདུའི་སྐབས་ཡིག་གཟུགས་ཨང་དང་པོའི་བྱ་དགའ་ཐོབ་མཁན་བཅས་ཡིན་འདུག