ཨ་ཁུ་རྒྱ་སྟག་ལ་ཁྲིམས་ཆད།

རྒྱ་ནག་གཞུང་གིས་ ༢༠༡༢ ལོའི་ཕྱི་ཟླ་ ༡༡ ནང་བོད་མདོ་སྨད་རྨ་ལྷོ་རེབ་གོང་དུ་རང་ལུས་མེར་བསྲེཊ་ཀྱི་གནས་ཚུལ་བྱུང་བར་རྐྱེན་བྱས་ཏེ། རེབ་གོང་མདོ་བ་ཞང་ཁྱུ་ལྔ་འཚོ་བའི་རང་ལོ་ ༦༣ ཡིན་པའི་ཨ་ཁུ་རྒྱ་སྟག་ལགས་འཛིན་བཟུང་བྱས་ཡོད་པ་མ་ཟད། ༢༠༡༣ ལོའི་ཕྱི་ཟླ་ ༢ པའི་ཚེས ༨ ཉིན་གྱི་ཕྱི་དྲོར་རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས། ཁོང་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་པའི་ཉེས་མིང་འོག་ལོ་ ༤ བཙོན་འཇུག་ཁྲིམས་ཐག་དང་། ལོ་གཉིས་ཀྱི་ཚབ་སྲིད་ཁེ་དབང་འཕྲོག་ཡོད་སྐོར་བསྒྲགས་རྗེས་མཚོ་སྔོན་ཟི་ལིང་གྲོང་ཁྱེར་གྱི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག  

འདིའི་ཐད་མཚོ་སྔོན་ཞིང་ཆེན་སྲིད་གཞུང་གི་དྲ་རྒྱའི་སྟེང་གནས་ཚུལ་ཞིག་སྤེལ་བའི་ནང་། འདི་ལོའི་ཟླ་ ༢ པའི་ཚེས་ ༨ ཉིན་གྱི་ཕྱི་དྲོར་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་གིས། རྒྱ་སྟག་གིས་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་པའི་གྱོད་གཞིར་ཁྲིམས་ར་ནས་ཞིབ་གཅོད་བྱས་པར་མ་ཟད། ཁོས་རྒྱལ་ཁབ་ཁ་བྲལ་གཏོང་བར་ངན་སྐུལ་བྱས་པའི་ནག་ཉེས་ལ་ལོ་བཞིའི་དུས་བཀག་བཙོན་འཇུག་གི་ཉེས་ཆད་བཅད་ཅིང་ལོ་གཉིས་ཀྱི་ཆབ་སྲིད་ཁེ་དབང་འཕྲོག་ལེན་བྱས་ཡོད་ཚུལ་དང་། སྐབས་དེར་རྨ་ལྷོ་ཁུལ་མི་དམངས་ཞིབ་དཔྱོད་ཁང་གིས་ཁྲིམས་རར་མི་མངགས་ནས་གཞུང་གཏུག་ལ་རྒྱབ་སྐྱོར་དང་། ཞུ་སྦྱོར་ཕྱི་མ་རྒྱ་སྟག་དང་དེའི་བཤེར་རྩོད་པ་སོགས་ཁྲིམས་རར་ཕྱིན་ནས་གཏུག་བཤེར་ནང་ཞུགས་བཅུག་ཡོད་པ་དང་། རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་བཅའ་ཁྲིམས་ཀྱི་གཏན་འཁེལ་ལྟར་གྱོད་གཞིར་ཞིབ་གཅོད་བྱས་ཏེ། ཞུ་སྦྱོར་ཕྱི་མ་བའི་གཏུག་བཤེར་དབང་ཆ་འགན་སྲུང་གང་ལེགས་བྱས་ཡོད་པ་མ་ཟད། ཁྲིམས་རར་གཏུག་བཤེར་སྐབས་བོད་སྐད་ཀྱི་ལོ་ཙཱ་བ་སོགས་ཀྱི་མཐུན་རྐྱེན་སྦྱར་ཡོད་སྐོར་བསྒྲགས་འདུག

ཡང་གནས་ཚུལ་ནང་རྨ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས། ༢༠༡༢ ལོའི་ཟླ་ ༡༡ པར་ཐུན་རིན་རྫོང་མདོ་བ་ཞང་ནས་རང་སྲེག་དོན་རྐྱེན་ཐེངས་མང་བྱུང་རྗེས། རྒྱ་སྟག་གིས་མི་གཞན་དང་མཉམ་དུ་སྒོར་མོ་དང་དངོས་རྫས་ཁྱེར་ནས་རང་སྲེག་མཁན་བསྟན་ཆེ་གེ་མོ་དང་སྙིང་ཆེ་གེ་མོ། ལྷུན་ཆེ་གེ་མོ་སོགས་ཀྱི་ཁྱིམ་དུ་འཚམས་འདྲིར་ཕྱིན་སྟེ། རང་སྲེག་མཁན་གྱི་ཁྱིམ་མི་དང་དེར་ཡོད་ཀྱི་མང་ཚོགས་ལ་རྒྱལ་ཁབ་ཁ་བྲལ་གཏོང་བར་ངན་སྐུལ་བྱེད་པའི་གཏམ་བརྗོད་སྤེལ་ཡོད་པ་དང་། རང་སྲེག་མཁན་གྱི་ཁྱིམ་ནས་ “བོད་རང་བཙན” གྱི་གཏམ་བརྗོད་སྤེལ་ཏེ་རྒྱལ་ཁབ་ཁ་བྲལ་གཏོང་བའི་ནག་ཉེས་བསགས་ཡོད་སྟབས། ཉེས་པ་བསགས་པའི་དོན་དངོས་དང་ངོ་བོ། གནས་ཚུལ། སྤྱི་ཚོགས་ལ་ནག་ཉེས་བཟོས་ཚད་བཅས་ལ་གཞིགས་ཏེ་ཁྲིམས་ཐག་བཅད་ཚུལ་བསྒྲགས་འདུག

གནས་ཚུལ་འདིའི་ཐད་བོད་ནས་འབྲེལ་ཡོད་བོད་མི་ཞིག་གིས་བསོད་ནམས་ལགས་སུ། རྒྱ་ནག་གཞུང་གིས་ཨ་ཁུ་རྒྱ་སྟག་ལགས་ལ་འཛིན་བཟུང་ཁྲིམས་ཆད་བྱས་པའི་རྒྱུ་རྐྱེན་གཙོ་བོ། ༢༠༡༢ ལོའི་ཕྱི་ཟླ་ ༡༡ ཚེས་ ༡༡ ནས་མདོ་བ་ཞང་དུ་ཞིང་ཆེན་དང་ཁུལ། རྫོང་རིམ་པའི་མགོ་ཁྲིད་དང་ལས་བྱེད་མི་སྣ་ཡོང་སྟེ་རང་ལུས་མེར་བསྲེཊ་ཀྱི་དོན་རྐྱེན་དང་འབྲེལ་བའི་བོད་མིའི་ངོ་རྒོལ་ཐད་རྩད་གཅོད་བྱས་སྐབས། ཨ་ཁུ་རྒྱ་སྟག་ལགས་ཀྱིས་ཞིང་ཆེན་ནས་ཡོང་བའི་མགོ་ཁྲིད་ལ་རྣམ་འགྱུར་མི་ལེགས་པ་བསྟན་ཡོད་པ་མ་ཟད། རང་ལུས་མེར་བསྲེཊ་དང་འབྲེལ་བའི་མི་མང་འདུ་འཛོམས་དང་སྐད་འབོད་ཁྲོམ་བསྐོར་སོགས་ཀྱི་སྣེ་འཁྲིད་མཁན་ཁོ་རང་གཅིག་པུ་ཡིན་པའི་ཁས་ལེན་བྱས་པ་དང་། ད་དུང་ཁོས་བོད་ཀྱི་སྲོལ་རྒྱུན་འགྲོ་ལུགས་ལྟར་ཚེ་འདས་དག་གི་ཁྱིམ་མིར་སེམས་གསོ་བྱས་པ་དང་། མཆོད་མེ་ཞལ་འདེབས་ཕུལ་བའི་དབང་གིས་བཙོན་འཇུག་ཁྲིམས་ཐག་བཅད་པ་ཞིག་ཡིན་ཚུལ་བརྗོད་འདུག

ཕྱི་ལོ་ ༢༠༡༢ ལོའི་ཕྱི་ ༡༡ པའི་ནང་བོད་མདོ་སྨད་རེབ་གོང་མདོ་བ་ཞང་དུ། འབྲོག་སྡེ་བའི་སྐལ་བཟང་སྦྱིན་པ་ལགས་དང་། མདོ་བ་ཞང་སྒྲོ་རོང་པོ་སྡེ་བའི་སྒྲོ་ཚང་ཚོ་བའི་རང་ལོ་ ༢༣ ཡིན་པའི་བུད་མེད་རྟ་མགྲིན་འཚོ་ལགས། མདོ་བ་སྒྲོ་རོང་བོ་སྡེ་བའི་རང་ལོ་  ༢༤ ཡིན་པའི་སྙིང་དཀར་བཀྲ་ཤིསལགས།  རང་ལོ་  ༡༩ ཡིན་པའི་སྙིང་ལྕགས་བྱམས་ལགས། མདོ་བ་འབྲོག་ཡོ་ལག་སྡེ་བའི་རང་ལོ་ ༡༨ ཡིན་པའི་ཀླུ་འབུམ་ཚེ་རིང་བཅས་རྒྱལ་གཅེས་དཔའ་བོ་མང་པོ་ཞིག་གིས་སྔ་ཕྱིར་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་སྟེ་འདས་གྲོངས་སུ་ཕྱིན་ཡོད།

གསར་འགོད་པ། དོན་གོ