རྒྱ་གར་ནག་གིས་དམག་ཤུགས་ངོམ།

ཉེ་ཆར་རྒྱ་གར་གྱི་མཁའ་དམག་གིས་དམག་ཤུགས་ཕྱིར་ངོམ་སྟེ། (C-130J) རྟགས་ཅན་གྱི་དྲག་ཆས་སྐྱེལ་འདྲེན་གནམ་གྲུ་ཞིག་རྒྱ་གར་ནག་གི་རྩོད་རྙོག་ཅན་གྱི་ས་མཚམས་སུ་བབས་ཡོད།

ཁ་སང་རྒྱ་ནག་གི་པོ་ཞོན་དྲ་བའི་སྟེང་གནས་ཚུལ་སྤེལ་བར། ཟླ་འདིའི་ཚེས་ ༢༠ ཉིན་གྱི་ཞོགས་པའི་ས་གནས་ཀྱི་ཆུ་ཚོད་ ༦།༥༤  སྟེང་། རྒྱ་གར་མཁའ་དམག་གི་དྲག་ཆས་སྐྱེལ་འདྲེན་གནམ་གྲུ་ (C-130J) རྟགས་ཅན་ཞིག རྒྱ་གར་ནག་གི་རྩོད་རྙོག་ཡོད་པའི་ས་ཁུལ་བོད་དང་རྒྱ་གར་གྱི་ས་མཚམས། ལ་དྭགས་བྱང་ཐང་རྡོ་ལ་བྷེ་ཨོལ་ཌེ་(DauLat beg oldie) ཞེས་པའི་གནམ་ཐང་དུ་བབས་ཡོད་པ་དང་། གནམ་ཐང་དེའི་མཐོ་ཚད་རྒྱ་མཚོ་ངོས་ནས་(Meter 5.065)ཙམ་ཡོད་པའི་འཛམ་གླིང་གི་ཆེས་མཐོ་བའི་དམག་སྤྱོད་གནམ་ཐང་དེ་ཆགས་ཡོད་ཅིང་། གནམ་ཐང་དེ་ ༡༩༦༢ ལོའི་རྒྱ་གར་ནག་གི་དམག་འཁྲུག་སྐབས་རྒྱ་གར་གྱིས་འཛུགས་སྐྲུན་བྱས་པ་ཞིག་ཡིན་འདུག ས་ཁུལ་དེ་ནི་ད་ལོའི་ཕྱི་ཟླ་ ༤ ཚེས་ ༡༥ ཉིན་རྒྱ་ནག་མཐའ་སྲུང་དམག་མིས་ས་མཚམས་བརྒལ་ཏེ་རྒྱ་གར་བྱང་ཕྱོགས་ལ་དྭགས་ནང་བཙན་འཛུལ་གྱིས་དམག་གུར་ ༡༥ ཙམ་བརྒྱབ་སྟེ་ཕྱོགས་གཉིས་བར་རྙོག་གླེང་མང་པོ་བྱུང་བའི་ས་གནས་དེ་ཆགས་ཡོད་པ་རེད། 

གོང་གི་གནས་ཚུལ་དེར་རྒྱ་གར་རྒྱལ་སྲུང་ལྷན་ཁང་གི་གསལ་བསྒྲགས་སྤེལ་བ་ཞིག་ལུང་འདྲེན་བྱས་ཡོད་པའི་ནང་། “ (DauLat beg oldie)ཞེས་པའི་གནམ་ཐང་དེར། གལ་ཆེའི་དམག་དཔུང་ཞིག་གི་མདུན་སྐྱོད་སློབ་སྟོན་ཁང་ཟེར་གྱི་ཡོད་པ་དང་། ཐེངས་འདིར་ (C-130J)རྟགས་ཅན་གྱི་དྲག་ཆས་སྐྱེལ་འདྲེན་གནམ་གྲུ་དེ་ལམ་ལྷུང་ལྡན་པའི་ངང་འབབ་ཐུབ་པ་བྱུང་པ་ནི། འཛམ་གླིང་གི་ཟིན་ཐོར་འགོད་རིན་ཡོད་པ་ཞིག་ཆགས་ཡོད་པ་མ་ཟད། འདི་ལྟ་བུའི་ས་མཐོར་ཆུ་ཚད་ངེས་ཅན་ལྡན་པའི་གནམ་གྲུ་བདེ་ལེགས་ངང་བབས་པ་དེ་ནི་ལོ་རྒྱུའི་སྟེང་ཐེངས་དང་པོ་ཆགས་ཡོད། ཐེངས་འདིར་མཁའ་དམག་སྐྱེལ་འདྲེན་ལེགས་གྲུབ་བྱུང་བ་བརྒྱུད་དེ། མ་འོངས་པར་རྒྱ་གར་གྱི་གནམ་དམག་གིས་སྐམ་སའི་དམག་དཔུང་ལ་དགོས་མཁོ་བསྒྲིབ་པར་སྔར་ལས་ལྷག་པའི་ནུས་པ་འདོན་ཐུབ་པ་དང་། ལྷག་པར་དུ་ས་བབ་མཐོ་ས་དང་། ཉེན་ཁ་ཡོད་པའི་ས་ཆ་ཁུག་ཀྱོག་དག་གི་དམག་དཔུང་ལ་དགོས་དངོས་རིགས་མཁོ་སྤྲོད་བྱེད་པར་ནུས་པ་ཆེན་པོ་ལྡན་ཡོད” ཅེས་སོགས་བརྗོད་འདུག

གནས་ཚུལ་དེའི་ནང་མུ་མཐུད་དུ་བཀོད་དོན། རྒྱ་གར་མཁའ་དམག་གིས་དྲག་ཆས་སྐྱེལ་འདྲེན་གནམ་གྲུ་ཚོད་ལྟ་བྱས་པའི་ཉིན་དེར། ཀྲུང་གོའི་བཅིངས་འགྲོལ་དམག་ཟེར་བས་ཆེད་མངགས་ཐོག གསར་ཐོན་ལྕགས་འཁྲབ་འཁོར་ལོ་ ༩༦ ཙམ་གྱིས་བོད་ཡུལ་མཐོ་སྒང་ནས་དངོས་སུ་འཁྲབ་སྦྱོང་བྱས་ཡོད་འདུག ཀྲུང་གོའི་དཔོན་ཕྱོགས་བརྡ་འཕྲིན་ནས་བརྗོད་པ་ལྟར་ན། ཁྲིན་ཏུའུ་དམག་ཁུལ་གྱི་དམག་སྡེ་ག་ཀོ་མོ་ཞིག་གིས་བྲེལ་འཚུབ་ངང་གསལ་བསྒྲགས་སྤེལ་ཏེ། ཀྲུང་གོའི་ཕྱོགས་ནས་འཆར་གཞི་དང་གོ་རིམ་ལྡན་པའི་ཐོག་ནས་འཐབ་འཁྲུག་དངོས་ལ་ཞུགས་པ་ལྟ་བུའི་སྐམ་དམག་གི་དངོས་སྦྱོང་བྱེད་དགོས་པ་མ་ཟད། མ་འོངས་པར་ཛ་དྲག་གི་གནས་ཚུལ་བྱུང་འཕྲལ་དཀའ་སྡུག་དང་ཉེན་ཁ་བརྒྱུད་དེ། མགྱོགས་མགྱུར་ངང་རྒྱ་མཚོ་ངོས་ནས་མཐོ་ཚད་(Meter 4,000)ཙམ་ཡོད་པའི་བོད་ནུབ་ཕྱོགས་མཐོ་སྒང་གི་སྦྱོང་བརྡར་ར་བར་སྤོ་ཐུབ་པ་ཞིག་དགོས་ཤིང་། གྲང་ངར་ཆེ་བའི་མཐོ་སྒང་རི་ཁུལ་དུ་དངོས་འཐབ་ཀྱི་ནུས་ཤུགས་ཆེ་རུ་བཏང་སྟེ་མཁྲེགས་པོར་ཐོ་བས་བརྡུང་སྟེ་རྒྱལ་ཁ་ལེན་དགོས་ཟེར།

གནས་ཚུལ་དཔྱད་བརྗོད་པ་ཚོས། ཀྲུང་གོའི་ལྕགས་འཁྲབ་འཁོར་ལོ་ ༩༦ ཙམ་མཐོ་སྒང་དུ་མངོན་པ་འདི་ནི་ཐེངས་དང་པོ་མ་ཡིན་པར། ཉེ་བའི་ལོ་ཤས་ནང་བཅིངས་འགྲོལ་དམག་གིས་ཐབས་ཤེས་སྣ་ཚོགས་སྤྱད་དེ། མཐོ་སྒང་དུ་ལྕགས་འཁྲབ་འཁོར་ལོའི་གདོང་ལེན་ཚུར་སྣང་མང་པོ་བྱུང་ཡོད་ཅིང་། དེའི་ནང་དོན་ནི་གྲང་ངར་ཆེ་བའི་མཐོ་སྒང་རི་ཁུལ་དུ་དམག་དཔུང་གི་འཐབ་འཛིང་ནུས་པ་མཐོ་རུ་གཏོང་གི་ཡོད་པ་མཚོན་ཡོད་ཅེས་བརྗོད་འདུག གནས་ཚུལ་དེའི་ཐད་གསར་འགོད་པས་བརྗོད་རྒྱུར། དེང་སྐབས་ཀྲུང་གོ་ཕྱོགས་ཀྱིས་གཞི་རྒྱ་ཆེ་བའི་དམག་དོན་རྒྱ་སྐྱེད་གཏོང་བཞིན་པའི་སྒང་རེད།  ༢༠༠༠ ལོ་ནས་བཟུང་ཀྲུང་གོའི་ཕྱོགས་ནས་བོད་ལྗོངས་སུ་རྙོག་འཛིང་ཅན་གྱི་དམག་དོན་རྨང་གཞིའི་སྒྲིག་བཀོད་ ༡ དང་། མཁའ་དམག་གི་རྟེན་གཞི་ ༥ ། ཐད་འཕུར་གནམ་གྲུ་འབབ་ཐང་ཁ་ཤས། ལྕགས་ལམ་དྲ་བ་རྒྱ་ཆེན་པོ་ ༡ ། རིང་ཚད་(Mile 36000)ཡོད་པའི་གཞུང་ལམ་བཅས་འཛུགས་སྐྲུན་བྱས་འདུག་ཟེར།

གསར་འགྱུར་དེའི་མཇུག་ཏུ། འདི་ལྟར་ཕྱིན་པ་ཡིན་ན། མཐའ་མཚམས་ཁུལ་དུ་བཅིངས་འགྲོལ་དམག་མི་ཧྲི་ཤོག་ ༣༠ མགྱོགས་མྱུར་གྱིས་བཀོད་སྒྲིག་བྱེད་ཐུབ་པ་དང་། ཧྲི་ཤོག་རེ་རེ་ལ་འཐབ་མོ་བ་ཁྲི་ (1.5) ཙམ་རེ་ཡོད་སྟབས། རྒྱ་གར་དང་བསྡུར་ན་ ༣ དང་ ༡ གི་ཁྱད་པར་ཆགས་ཡོད། ཀྲུང་གོའི་དཔལ་འབྱོར་དང་དམག་གྲོན་ནི་རྒྱ་གར་ལས་ལྡབ་ ༣ ཙམ་ཟིན་གྱི་ཡོད་ཅིང་། གཞན། ཀྲུང་གོས་པཱ་ཁུ་སི་ཐན་མངའ་འོག་གི་ཀ་ཤི་མར་དང་བལ་ཡུལ། འབར་མ། བྷིང་ལ་ངྷེ་ཤི་སོགས་དང་འབྲེལ་ཡོད་པའི་གཞུང་ལམ་དང་ལྕགས་ལམ་ལྟེ་བ་དག་ལེགས་བཅོས་བྱས་པ་དང་བསྟུན་ཏེ། མ་འོངས་པར་བཅིངས་འགྲོལ་དམག་གིས་རྒྱ་གར་གྱི་འཐབ་ཇུས་ལ་ཁ་གཏད་གྱི་གདམ་ག་ཇེ་མང་དུ་འགྲོ་རྒྱུ་རེད།

འབྲུག་བྷེ་ཡིས་བསྡུ་སྒྲིག་བྱས།