ཤག་རོང་པོ་དགོན་པར་དམ་དྲག

རྒྱ་ནག་གཞུང་གིས་ནག་ཆུ་ས་ཁུལ་ནག་ཆུ་རྫོང་ཤག་རོང་པོ་དགོན་གྲོང་གཉིས་ཀྱི་ཐོག་དམག་མི་དང་ལས་བྱེད་མི་སྣ་སོགས་མངགས་གཏོང་གིས། བོད་མི་མང་པོ་འཇུ་བཟུང་དང་དམ་དྲག་བྱེད་ཀྱི་ཡོད་འདུག

ཟླ་ཤས་གོང་རྒྱ་གཞུང་གིས་ནག་ཆུ་རྫོང་ཤག་རོང་པོ་དགོན་པའི་ཉེ་འཁྲིས་སུ་དམག་སྒར་གསར་རྒྱག་གིས་དགོན་གྲོང་གཉིས་ལ་དམ་དྲག་བྱེད་ཀྱིན་པ་ལྟར། ཉེ་ལམ་ཉེན་རྟོག་པ་དང་དམག་མིས་ས་གནས་བོད་མི་ ༤༠ ཡས་མས་ཞིག་སྲིད་གཞུང་དུ་འབོད་འགུག་གིས་གཅར་རྡུང་བཏང་སྟེ། བོད་མི་ཁག་ཅིག་སྨན་ཁང་དུ་འཁྱེར་ཡོད་པ་དང་། ད་དུང་དགོན་གྲོང་གཉིས་ཀྱི་ལས་བྱེད་མི་སྣ་ ༥༠ ལྷག་རྫོང་ཐོག་ཏུ་འབོད་འགུག་གིས། ཉིན་ ༢༠ ལྷག་གི་རིང་བསམ་བློའི་སློབ་གསོ་སྤྲོད་བཞིན་ཡོད་སྐོར་བཤད་དེ་སུན་གཙེར་བཟོ་བཞིན་ཡོད་པ་མ་ཟད། ཟླ་འདིའི་ཕྱི་ཚེས་ ༢༤ ཉིན་བོད་རང་སྐྱོང་ལྗོངས་ཀྱི་དམར་ཤོག་མགོ་ཁྲིད་གཞོན་པ་ཝུའུ་ཡཱང་ཅེ་དང་། ནག་ཆུ་ས་ཁུལ་གྱི་དམར་ཤོག་མགོ་ཁྲིད་རྡོ་ཐོགས། དམར་ཤོག་མགོ་ཁྲིད་གཞོན་པ་སྐལ་བཟང་ཚེ་རིང་། སྒྲུབ་ཁང་ཐུབ་བསྟན་མཁས་གྲུབ། ལྗོངས་ཏང་ཨུད་འཐབ་ཕྱོགས་གཅིག་གྱུར་ཁང་གི་རྒྱུས་ལས་མགོ་གཙོ་གཞོན་པ་བསོད་ནམས་རིག་འཛིན་སོགས་ནག་ཆུ་རྫོང་ཤག་རོང་པོ་དགོན་པར་ཡོང་སྟེ།  དགོན་སྡེའི་དོ་དམ་ཤུགས་ཆེ་རུ་གཏོང་བ་དང་གསར་གཏོད་བྱ་རྒྱུ་ཡིན་ཚུལ་བསྒྲགས་པ་དང་། ས་གནས་ཀྱི་དམར་ཤོག་མགོ་གཙོ་རྒྱལ་མཚན་དབང་གྲགས་འབོད་པས། ས་གནས་སུ་བསྡད་པའི་ལས་བྱེད་དག་གུང་ཁྲན་ཏང་ཡོན་ཤ་སྟག་ཡིན་སྟབས། བོད་མི་ཚོས་ཁོང་ཚོར་ཉེས་རྡུང་བཏང་བ་དེ་ཉེས་པ་ཆེན་པོ་ཡིན་སྐོར་སོགས་ཀྱི་གཏམ་བཤད་དང་མི་མང་ལ་འཇིགས་སྐུལ་བྱས་ཡོད་འདུག

ངག་དབང་ཐར་པ་ལགས་ཀྱིས་བཏང་བའི་གནས་ཚུལ་ནང་བཀོད་དོན་ལྟར་ན། ཉེ་ལམ་བོད་རང་སྐྱོང་ལྗོངས་ཀྱི་མགོ་ཁྲིད་ས་གནས་སུ་མ་འབྱོར་བའི་ཉིན་ཤས་སྔོན་དེར། རྒྱ་ནག་གཞུང་གིས་གདན་ས་སེ་འབྲས་དགེ་གསུམ་སོགས་ཀྱི་དགེ་བཤེས་ཁག་ཅིག་ཆོས་ཁྲིད་བྱེད་མཁན་ཡིན་ཚུལ་བཤད་དེ་འཁྲིད་ཡོང་རྗེས། མགོ་ཁྲིད་ཚོ་ས་གནས་སུ་ལྟ་སྐོར་ཡོང་སྐབས་མཇལ་བཅར་ཞུ་མཁན་དུ་མངགས་གཏོང་བྱས་ཡོད་པ་མ་ཟད། མགོ་ཁྲིད་དེ་དག་ས་གནས་སུ་མ་ཕེབས་སྔོན་ཤག་རོང་དགོན་གྱི་དགེ་འདུན་པ་ཁག་ཅིག་ལ་མིང་འདོགས་བྱས་ཏེ་དཔོན་རིགས་ཚོར་ཕེབས་བསུའི་ཁ་བཏགས་ཕུལ་དགོས་ཚུལ་བརྗོད་ཡོད་འདུག ཕྱིས་སུ་མགོ་ཁྲིད་དངོས་སུ་བསླེབ་སྐབས་གྲྭ་བ་ཚོས་མི་འདོད་པའི་རྣམ་འགྱུར་བསྟན་པར། ལྟ་སྲུང་མི་སྣ་སོགས་ཀྱིས་འཇིགས་སྐུལ་བྱས་ཏེ་བཙན་དབང་གིས་ཁ་བཏགས་སྒྲོན་དུ་བཅུག་པ་དང་། མཉམ་དུ་བརྙན་ལེན་སོགས་བྱས་བཅུག་ཡོད་འདུག   

ད་ལྟའི་ཆར་རྒྱ་ནག་གཞུང་གིས་དེ་སྔོན་ནག་ཆུ་ས་ཁུལ་གྱི་ཤག་ཆུ་དང་ཤོ་ར་བཅས་ཉེ་འཁོར་ས་གནས་ཁག་ནང་གསར་རྒྱག་བྱས་ཡོད་པའི་དམག་སྒར་ཁག་ལས་གཞན། ཟླ་ཐང་དང་དགོན་པ། གེ་སོའི་མདོ། འུམ་རྐྱང་སུམ་མདོ་བཅས་སུ་དམག་སྒར་ ༥ ལྷག་བརྒྱབ་ཏེ་དམག་མི་ ༢༠༠༠ ལྷག་གནས་སྡོད་དང་། ས་གནས་སུ་བདེ་འཇགས་མི་སྣ་དང་ལས་བྱེད་ ༤༠༠ ཙམ་གནས་སྡོད་ཀྱིས། དམག་མི་ཚོས་ནམ་རྒྱུན་ལག་ཏུ་མེ་མདའ་སོགས་འཁྱེར་ཏེ་ས་གནས་སུ་སྐོར་བསྐྱོད་ལྟ་རྟོག་བྱེད་ཀྱིན་པ་མ་ཟད། ཉེ་འཁོར་གྱི་འབྲི་རུ་རྫོང་དང་སོག་རྫོང་བཅས་ཀྱི་འགྲིམ་འགྲུལ་ཁག་ལ་ཞིབ་བཤེར་དང་། མི་མང་གི་འགྲོ་འོང་དང་བརྒྱུད་ལམ་ལ་སྟངས་འཛིན་དང་ལྟ་རྟོག་བྱེད་ཀྱི་ཡོད་འདུག