རྒྱ་ནག་གཞུང་གིས་ནག་ཆུ་ས་ཁུལ་ཤག་རོང་པོ་དགོན་གྲོང་གཉིས་ཀྱི་བོད་མི་ལྔ་བཅུ་ལྷག་འཛིན་བཟུང་བཀག་ཉར་བྱས་ཡོད་པ་མ་ཟད། ད་ཆར་ཡང་ས་གནས་མི་མང་ལ་སུན་གཙེར་བཟོ་བཞིན་ཡོད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཉེ་ལམ་རྒྱ་གཞུང་གིས་ཁམས་ནག་ཆུ་ཤག་རོང་པོ་དགོན་པའི་ཉེ་འཁྲིས་སུ་དམག་སྒར་གསར་རྒྱག་དང་། དམག་མི་དང་ལས་བྱེད་མི་སྣ་མངགས་གཏོང་གིས་བོད་མི་དང་རྒྱ་གཞུང་གི་བཅའ་སྡོད་རུ་ཁག་གི་ལས་བྱེད་བར་འཁྲུག་འཛིང་ཤོར་མཁན་གྱི་མི་སྣ་བརྩད་གཅོད་བྱེད་ཀྱི་ཡོད་ཚུལ་བཤད་དེ། སྟར་ཆེན་ཡུལ་ཚོ་ཡར་ཐང་མར་ཐང་གྲོང་ཚོའི་རང་ལོ་ ༢༧ ཡིན་པའི་བློ་བཟང་ཚེ་རིང་དང་། རང་ལོ་ ༢༦ ཡིན་པའི་དུང་ཕུག རང་ལོ་ ༣༥ ཡིན་པའི་ཟླ་རྒྱལ། རང་ལོ་ ༣༡ ཡིན་པའི་སྐར་མ། རང་ལོ་ ༢༨ ཡིན་པའི་རྒྱ་ལྷུག རང་ལོ་ ༢༩ ཡིན་པའི་རྒྱལ་བ། རང་ལོ་ ༣༩ ཡིན་པའི་སྲི་ཆོད། རང་ལོ་ ༢༧ ཡིན་པའི་ཆོས་དར། རང་ལོ་ ༢༡ ཡིན་པའི་བྱམས་པ་བཅས་ཁྱོན་བོད་མི་ ༥༠ ལྷག་འཛིན་བཟུང་བྱས་ཏེ་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་ཀྱི་མེད་པར་ལྷག་ཡོད་པ་མ་ཟད། སྐབས་དེར་འཛིན་བཟུང་བྱས་པའི་དུང་ཕུག་ལགས་ལ་ཉེས་རྡུང་བཏང་སྟེ་ད་ཆར་སྨན་ཁང་དུ་ཛ་དྲག་གི་གནས་སུ་ལྷག་ཡོད་འདུག
ཉེ་སྔོན་རྒྱ་ནག་གཞུང་གིས་ས་གནས་བཅའ་སྡོད་རུ་ཁག་དང་འཁྲུག་འཛིང་ཤོར་མཁན་བརྩད་གཅོད་མི་བྱེད་པའི་ཁས་ལེན་བྱས་ཡོད་ཀྱང་། ད་ཆར་ས་གནས་སུ་མུ་མཐུད་མི་མང་མང་པོ་འཇུ་བཟུང་དང་། ས་གནས་ཀྱི་བླ་མའི་ཡང་སྲིད་དུ་བཙན་དབང་གིས་ཕྲུ་གུ་ཞིག་ཐག་གཅོད་གནང་རྒྱུའི་ཁྱབ་བསྒྲགས་བྱས་ཏེ་དགོན་གྲོང་གཉིས་ལ་སུན་གཙེར་ཡང་ཡང་བཟོ་བཞིན་ཡོད་སྟབས། རྒྱ་གཞུང་གིས་འཛིན་བཟུང་བཀག་ཉར་བྱས་ཡོད་པའི་བོད་མི་བློ་བཟང་ཚེ་རིང་གི་བཟའ་ཟླ་སྒྲོལ་མ་གཡང་སྐྱིད་ཞུ་བས། རྒྱ་ནག་གཞུང་གིས་དགོན་གྲོང་གཉིས་ལ་སུན་གཙེར་མཚམས་འཇོག་དང་། འཛིན་བཟུང་བྱས་པའི་བོད་མི་རྣམས་ཀློད་གྲོལ། བཙན་དབང་གིས་བླ་མའི་ཡང་སྲིད་བསྐོ་བཞག་ཕྱིར་འཐེན་མ་བྱས་ཚེ་རང་སྲོག་གཅོད་ཀྱི་ཡིན་ཞེས་བཤད་དེ་སྲོག་གཅོད་རྩིས་བྱས་ཏེ། ད་ཆར་ནག་ཆུ་ས་ཁུལ་དུ་ཛ་དྲག་མྱུར་སྐྱོབ་བྱེད་ཀྱི་ཡོད་ཀྱང་། ས་གནས་སྲིད་གཞུང་གིས་བདག་པོ་བརྒྱབ་ཏེ་ནང་མི་ཉེ་འབྲེལ་སོགས་སུ་གཅིག་ཀྱང་སྨན་ཁང་དུ་འགྲོ་བཅུག་མེད་སྟབས། ད་ལྟ་ཁོ་མོའི་ཤི་གསོན་གྱི་གནས་སྟངས་ཅི་ཡང་གསལ་ཁ་མེད་པར་ལྷག་ཡོད་འདུག་ལ། ས་གནས་སྲིད་གཞུང་གིས་སྒྲོལ་མ་གཡང་སྐྱིད་ཀྱི་གནས་ཚུལ་དེ་མང་ཚོགས་ནང་དུ་བཤད་མི་ཆོག་པའི་བཙན་བཀའ་ཡང་བཏང་ཡོད་འདུག
སྒྲོལ་མ་གཡང་སྐྱིད་ཀྱི་ཕ་མིང་ལ་རྣམ་སྲས་དང་། མ་མིང་ལ་ཆོས་དབྱིངས་སྒྲོལ་མ་ཟེར་གྱི་ཡོད་པ་དང་། ཁོ་མོ་དང་བློ་བཟང་ཚེ་རིང་གཉིས་ལ་ཕྲུ་གུ་གཉིས་ཡོད་འདུག ཉེ་ཆར་བློ་བཟང་ཚེ་རིང་འཛིན་བཟུང་དང་མོ་སྨན་ཁང་དུ་བསྐྱལ་རྗེས་སྲིད་གཞུང་གིས་ཕྲུ་གུ་གཉིས་ས་གནས་ཀྱི་དྭ་ཕྲུག་སློབ་གྲྭར་སྐྱེལ་ཡོད་འདུག
