རྒྱ་གཞུང་གིས་ཁམས་རྫ་སྟོད་མི་མང་གིས་ངོ་རྒོལ་བྱས་མིན་ལ་མ་ལྟོས་པར། ཉེ་སྔོན་ནས་བཟུང་དམག་མིའི་དམ་དྲག་འོག་ས་གནས་སུ་གཏེར་ཁ་སྔོག་བཞིན་ཡོད་འདུག
རྒྱ་གཞུང་གིས་ཟླ་སྔོན་མའི་ཕྱི་ཚེས་ ༡༦ ཉིན་ཡུལ་ཤུལ་རྫ་སྟོད་རྫོང་མི་མང་གིས་ངོ་རྒོལ་བྱས་མིན་ལ་མ་ལྟོས་པར། ཕྱི་ཚེས་ ༢༢ ཉིན་ནས་བཟུང་གཏེར་རྐོ་རུ་ཁག་དང་འཕྲུལ་ཆས་སོགས་ས་གནས་སུ་དབོར་འདྲེན་བྱས་ཏེ། ཚེས་ ༢༧ ཉིན་ནས་བཟུང་དྲག་ཆས་དམག་མིས་དམ་དྲག་འོག་རྫ་ཆེན་ར་འདྲའི་མགར་བ་མཆེད་བརྒྱད་དང་། སྤྱི་རྫ་ལ་སྔོན་ཕུ་བཅས་སུ་གཏེར་ཁ་སྔོག་འདོན་བྱེད་ཀྱི་ཡོད་པ་མ་ཟད། གལ་སྲིད། མི་མང་ནང་གཏེར་ཁ་སྔོག་འདོན་བཀག་འགོག་བྱེད་མཁན་ཡོད་ཚེ་ཐད་ཀར་འཛིན་བཟུང་བྱ་རྒྱུ་ཡིན་སྐོར་བསྒྲགས་ཡོད་འདུག་ལ། ཉེ་སྔོན་འཛིན་བཟུང་བྱས་པའི་བོད་མི་མང་ཆེ་བ་ཀློད་གྲོལ་བཏང་ཡོད་ཀྱང་། ཁེ་ཚེའི་བསོད་རྡོ་ཞུ་བ་ད་ཆར་ཡང་གར་སོང་ཆ་མེད་དུ་གྱུར་ཡོད་འདུག
ཉེ་སྔོན་མི་མང་གིས་ངོ་རྒོལ་བྱས་རྗེས། ཟླ་སྔོན་མའི་ཕྱི་ཚེས་ ༢༦ ཉིན་ནས་བཟུང་རྫ་སྟོད་རྫོང་རླུང་འཕྲིན་ཁང་གིས་ རྫོང་དང་ཡུལ་ཚོའི་མགོ་ཁྲིད་རྣམས་རྫོང་ཐོག་ཏུ་སྐོང་འགུག་བྱས་ཏེ། ཟླ་ ༣ རིང་ཆབ་སྲིད་ཟབ་སྦྱོང་སྤྲོད་མགོ་ཚུགས་འདུག་ལ། རིམ་པས་མི་མང་ལ་ཆབ་སྲིད་ཟབ་སྦྱོང་སྤྲོད་རྒྱུ་ཡིན་ཚུལ་བརྗོད་ཡོད་འདུག
ཟླ་འདིའི་ཚེས་ ༢ ཉིན་རྫ་ཆེན་མི་མང་གི་མགོ་ཁྲིད་དང་། ས་གནས་ཁོར་ཡུག་སྲུང་སྐྱོབ་ཚོགས་པའི་ཚོགས་མི་བཅས་མི་ ༡༢ ཙམ་ལ་ཉིན་གཅིག་རིང་རྫོང་ཉེན་རྟོག་ལས་ཁུངས་དང་དམག་མི། ཁྲིམས་ཁང་བཅས་ཀྱི་མི་སྣས་དེང་ཕྱིན་གཏེར་རྐོ་རུ་ཁག་ལ་ངོ་རྒོལ་བྱས་ཚེ་ཐར་ཀར་འཛིན་བཟུང་བྱ་རྒྱུ་ཡིན་པའི་འཇིགས་སྐུལ་དང་སྡིགས་ར་སོགས་སྐུལ་ཡོད་འདུག
