ལྷོ་ཕྱོགས་ཞུ་གཏུག་ལས་འགུལ་ཚོགས་ཆུང་གི་ཚོགས་མི་རྣམ་པ་གྷུ་རྗི་ར་ཏི་མངའ་སྡེའི་གྲོས་ཚོགས་ཚོགས་གཙོ་དང་། མངའ་སྡེ་སྲིད་སྐྱོང་། མངའ་སྡེའི་སྤྱི་ཁྱབ་བློན་ཆེན་( Mr Narendra Mmodi )བཅས་ལ་མཇལ་འཕྲད་ཀྱིས་བོད་དོན་ངོ་སྤྲོད་གནང་འདུག
བོད་མི་མང་སྤྱི་འཐུས་ལྷན་ཚོགས་ཀྱི་རྒྱ་གར་ལྷོ་ཕྱོགས་ཁུལ་གྱི་ཞུ་གཏུག་ལས་འགུལ་ཚོགས་ཆུང་གི་ཚོགས་མི་སྤྱི་འཐུས་བློ་བཟང་ཡེ་ཤེས་ལགས་དང་ཚེ་རིང་གཡུ་སྒྲོན་ལགས། འཇིགས་མེད་འབྱུང་གནས་ལགས། ཨ་ཀྲུག་ཚེ་བརྟན་ལགས་བཅས་ཟླ་འདིའི་ཚེས་ ༦ ཉིན། གྷུ་རྗི་ར་ཏི་མངའ་སྡེ་ཡི་རྒྱལ་ས་ཨེམ་རྡ་བྷ་རྡིར་ས་གནས་སུ་འབྱོར་སྐབས་མངའ་སྡེ་གཞུང་གི་འགྲོན་ཁང་དུ་གནས་ལེན་ཞུས་ཡོད་པ་དང་། སྔ་དྲོའི་ཆུ་ཚོད་ ༡༡།༣༠ ཙམ་ལ་མངའ་སྡེ་གྲོས་ཚོགས་ཀྱི་ཚོགས་གཙོ་(Mr Vajubhai Vala )མཆོག་དང་མཇལ་འཕྲད་ཀྱི་ཐོག་མར། དེ་གའི་ཚོགས་དྲུང་ལས་བྱེད་ཁག་གཅིག་གིས་གནས་ལེན་གྱི་གྲོས་ཚོགས་ཚོགས་ཁང་དང་། གྲོས་ཚོགས་འགྲེམ་སྟོན་ཁང་། དཔེ་འཛོད་ཁང་བཅས་ལ་གཟིགས་སྐོར་དུ་ཁྲིད་ཡོད་པ་མ་ཟད། བོད་མི་མིང་སྤྱི་འཐུས་རྣམས་ཚོགས་གཙོའི་འཕེབ་སྒོ་ནས་གྲོས་ཚོགས་ཚོགས་ཁང་དུ་གདན་འདྲིན་ཞུས་ཏེ། དེ་ནི་ཆེ་མཐོང་མཚོན་ཆེད་ཡིན་སྐོར་བརྗོད་ཡོད་འདུག
དེ་ནས་ཚོགས་གཙོ་མཆོག་དང་མཇལ་ཀྱིས་བོད་དོན་ལ་རྒྱབ་སྐྱོར་ཡོང་བར་འབོད་སྐུལ་ཞུས་སྐབས། ཁོང་གིས་ཏཱ་ལིའི་བླ་མ་དང་བོད་ནི་ང་ཚོའི་རྒྱལ་ཁབ་ཀྱི་སྐུ་མགྲོན་གལ་ཆེན་ཡིན་ལ། ལོ་རྒྱུས་ཐོག་ང་ཚོའི་རྒྱལ་ཁབ་མགྲོན་ལ་བརྩི་བཀུར་ཆེན་པོ་ཡོད། མ་འོངས་པར་ང་ཚོ་ཕར་མགྲོན་པོ་ཡོང་དུས་ཁྱེད་རང་ཚོས་ཀྱང་བརྩི་མཐོང་ཆེན་པོ་གནང་གི་རེད། དེ་བཞིན་བོད་དོན་ཐབས་རྩོད་བྱེད་པར་སེམས་ཤུགས་ཆེན་པོ་དགོས་པ་རེད། སྔོན་ཇིའུ་མི་རིགས་ཁྱེད་རང་ཚོ་ལྟར་འཛམ་གླིང་གང་སར་ཁ་འཐོར་ནས་ལོ་སྟོང་ཕྲག་མང་པོ་གནས་ཀྱང་། མཐའ་མར་རང་དབང་ཐོབ་ནས་ད་ལྟ་རྒྱལ་ཁབ་ཆེན་པོ་ཆགས་ཡོད། ཁྱེད་རང་ཚོས་ཐབས་རྩོད་བྱེད་སྐབས་སྙིང་སྟོབས་ཆེན་པོ་དང་། རྡོག་རྩ་གཅིག་སྒྲིལ་དགོས་པ་གལ་ཆེན་རེད། ཅེས་དང་། ཇིའུ་ཚོས་ཐབས་རྩོད་སྐབས་ལོ་རྗེས་མ་ཕ་ཡུལ་ནས་ཡིན་ཟེར་གསོལ་ཡོད་རེད། ཅེས་སོགས་བརྗོད་ཡོད་འདུག
ཉིན་གུང་ཆུ་ཚོད་ ༡།༣༠ ཐོག་མངའ་སྡེ་སྲིད་སྐྱོང་འབུམ་རིམ་པ་( Kamala Beniwal )མཆོག་དང་མཇལ་འཕྲད་གནང་ཡོད་འདུག་ལ། ཁོང་གིས་བོད་མི་རིགས་ཀྱི་དཀའ་སྡུག་ཆེན་པོ་འདི་འདྲ་ཞིག་གི་འོན་ནས་བཟོད་བསྲན་གྱི་སྙིང་སྟོབས་ཆེན་པོས་རྩ་དོན་ཐབས་རྩོད་བྱས་པ་ནི་ཧ་ཅང་གཟི་བརྗིད་རེད། ངས་བསྔགས་བརྗོད་ཞུ་རྒྱུ་དང་། ཁྱེད་རང་ཚོའི་བདེན་མཐའ་མྱུར་དུ་གསལ་བའི་སྨོན་ལམ་ཡོད། རྒྱ་ནག་གཞུང་ནི་ཡ་ང་དང་ཀུན་སྤྱོད་མེད་པའི་གཞུང་ཞིག་རེད། འོན་ཀྱང་ཁྱེད་རང་ཚོས་སེམས་ཤུགས་མ་ཆགས་པར་མུས་འཐུད་ནས་ཐབས་རྩོད་གནང་ན་བདེན་པའི་མཐའ་མར་རྒྱལ་ཁ་ཡོད་པ་རེད། ཅེས་བརྗོད་ཡོད་འདུག
ཕྱི་དྲོའི་ཆུ་ཚོད་ ༥།༡༥ སྟེང་མངའ་སྡེ་སྤྱི་ཁྱབ་བློན་ཆེན་མཆོག་དང་། ཡོང་ལ་ཉེ་བའི་རྒྱ་གར་སྲིད་བློན་གྱི་འོས་མི་( Mr Narendra Mmodi )མཆོག་དང་བཅས་ལ་མཇལ་འཕྲད་གནང་ཡོད་པ་དང་། སྐབས་དེར་བོད་མི་མང་སྤྱི་འཐུས་རྣམ་པར་ཧ་ཅང་ཆེ་མཐོང་ལྡན་པའི་ཐོག་ནས་གནས་ལེན་གནང་ཡོད་འདུག ང་ཧེ་མ་ཅར་མངའ་སྡེ་ནས་ལོ་ལྔ་ལ་བསྡད་པ་ཡིན་བོད་ཀྱི་གནད་དོན་ཡག་པོ་ཤེས་ཀྱི་ཡོད། ལོ་མང་པོའི་སྔོན་ནས་ཁྱེད་རང་ཚོ་ལ་རྒྱབ་སྐྱོར་ཞུས་པ་ཡིན་ལ་ད་ལྟ་ཡང་རྒྱབ་སྐྱོར་ཡོད། ང་བོད་ལ་གངས་རིན་པོ་མཇལ་དུ་སོང་མྱོང་ཞིང་། དེ་དུས་བོད་ནང་གི་བོད་མི་ཚོར་ཐུག་གི་རེད་བསམ་ནས་༸གོང་ས་མཆོག་གི་སྐུ་པར་འཁྱེར་བ་ཡིན། ངའི་རོགས་པ་ལས་བྱེད་ཚོས་ཉེན་ཁ་ཆེ་བར་གསུངས་བྱུང་ཡང་ངས་མི་མངོན་པར་ཁྱེར་བ་ཡིན། བོད་མི་ཚོ་ལ་སྤྲོད་སྐབས་ཧ་ཅང་དགའ་པོ་བྱེད་ཀྱི་འདུག་སྟབས་དེ་ནི་ངའི་ལག་རྟགས་ཡག་ཤོས་དེ་ཆགས་སོང་། ཅེས་དང་། མཐར་ཁོང་གི་ཏཱ་ལའི་བླ་མ་ལ་ངའི་འཚམས་འདྲི་ཞུ་རོགས་ཅེས་གསུངས་རོགས་ཞེས་སོགས་བརྗོད་ཡོད་འདུག
