ཁ་སང་ཞོགས་པར་ཨ་རིའི་རྒྱལ་ས་ཝ་ཞིན་ཊོན་གྱི་མཚོ་དམག་རྟེན་གཞི་ཞིག་ཏུ་མེ་མདའི་དོན་རྐྱེན་བྱུང་སྟེ་མི་ ༡༢ དམར་གསོད་བཏང་ཡོད་འདུག
ཁ་སང་ཕྱི་ཚེས་ ༡༦ ཉིན་གྱི་ཨ་རིའི་ཞོགས་པའི་ཆུ་ཚོད་༨།༢༠ ཙམ་ལ། ཨ་རིའི་རྒྱལ་ས་ཝ་ཞིན་ཊོན་མཚོ་དམག་ས་ཚིགས་ཤིག་ཏུ། རང་ལོ་ ༣༤ ཡིན་པའི་མཚོ་དམག་ཟུར་བ་ཨད་ལེ་སི་(Aaron Alexis)ཟེར་ཞིག་གིས། དམིགས་ཡུལ་གང་ཡིན་ཁ་གསལ་མེད་པར་གང་བྱུང་མེ་མདའ་བརྒྱབ་སྟེ་མི་ ༡༢ ཙམ་དམར་གསོད་བཏང་ཡོད་ཅིང་། ཁོང་ཅག་རང་ལོ་ ༤༦ ནས་ ༧༣ བར་ཡིན་པ་དང་། གཞན་མི་ ༨ ལ་རྨས་སྐྱོན་ཕོག་ཡོད་འདུག དེའི་རྗེས་ཉེན་རྟོག་པ་དང་མེ་མདའ་རྒྱག་རེས་བྱས་མཐར་ཁོ་བསད་ཡོད་འདུག
ཨ་རིའི་རྒྱལ་ནང་གསང་བ་རྟོག་ཞིབ་ལས་ཁུངས( FBI) ཀྱི་འགན་འཛིན་ལས་རོགས་སྐུ་ཞབས་ཝེ་ལེ་རེ་ཡིས་གསར་འགོད་པར་བརྗོད་པ་ལྟར་ན། ཨད་ལེ་སི་ནི་ཨ་རིའི་མཚོ་དམག་གི་དྲ་ཚིགས་སྡེ་ཚན་ནང་། ཆོད་གན་ཐོག་ལས་ཀ་བྱེད་མཁན་ཞིག་ཡིན་པ་དང་། ཁོ་ལ་ལས་བྱེད་ཀྱི་ལག་ཁྱེར་ཡོད་སྟབས། ཝ་ཞིན་ཊོན་མཚོ་དམག་གི་ས་ཚིགས་ནང་འཛུལ་ཏེ་དམར་གསོད་དོན་རྐྱེན་དེ་བསླངས་པ་ཡིན་ཞིོང་། ཁོས་ཐེངས་འདིར་དྲག་སྤྱོད་སྤེལ་དགོས་པའི་རྒྱུ་མཚན་ད་སྔ་གསལ་བོ་ཤེས་རྟོགས་ཐུབ་མེད་སྐོར་བརྗོད་འདུག
དོན་རྐྱེན་ཁྲོད་འདས་གྲོངས་སུ་ཕྱིན་པ་དག་ལ་གུས་འདུད་མཚོན་ཆེད། སྲིད་འཛིན་ཨོ་བྷ་མས་ཨ་རིའི་ཕོ་བྲང་དཀར་པོ་དང་གྲོས་ཚོགས་མདུན་གྱི་རྒྱལ་དར་ཕྱེད་ཙམ་མར་ཕབ་དགོས་པའི་བཀའ་བཏང་ཡོད་པ་དང་། དོན་རྐྱེན་འདི་ནི་མི་སྡར་མའི་བྱ་སྤྱོད་ཅིག་ཡིན་ཚུལ་སོགས་ཀྱི་སྐྱོན་བརྗོད་ཀྱང་བྱས་འདུག
ཨ་རིའི་གསར་འགྱུར་བརྒྱུད་ལམ་ཁག་ཏུ་ཨ་རིའི་གྲོས་ཚོགས་ཀྱིས་མཚོན་ཆ་ཉོ་ཚོང་བཀག་སྡོམ་མ་བྱས་ཚེ། མ་འོངས་པར་མུ་མཐུད་དུ་ཨ་རིའི་ནང་དམར་གསོད་དོན་རྐྱེན་རྒྱུན་ཆད་མེད་པར་འབྱུང་རྒྱུ་ཡིན་པ་སོགས་བརྗོད་དེ། སྲིད་འཛིན་ཨོ་བྷ་མ་དང་ཁོའི་གཞུང་ལ་སྐྱོན་བརྗོད་ཤུགས་ཆེན་བྱེད་ཀྱིན་འདུག
ཨད་ལེ་སི་ནི། ༡༩༧༩ ལོར་ནེའུ་ཡོག་གྲོང་ཁྱེར་ནང་སྐྱེས་ཞིང་། ཨ་རིའི་མཚོ་དམག་ནང་ཞུགས་ཏེ་འཇིགས་སྐུལ་རྒོལ་རྡུང་དམག་འཁྲུག་དང་རྒྱལ་ཁབ་སྲུང་སྐྱོབ་ཞབས་ཞུའི་རྟགས་མ་གཉིས་བླངས་མྱོང་ཡོད་པ་དང་། དེ་སྔོན་མཚོན་ཆ་དང་འབྲེལ་བའི་གནས་ཚུལ་ཐོག་ཉེན་རྟོག་པས་ཁོ་ཐེངས་གཉིས་ལ་འཛིན་བཟུང་བྱས་མྱོང་ཡོད་འདུག གསར་ལམ་འགའ་རེའི་ནང་ཁོ་རང་ཨ་རིའི་མཚོ་དམག་ལས་རྩ་དགོངས་ཞུས་རྗེས་ཨ་རིའི་ནང་གི་ཐཱད་ལན་ཊིའི་ལྷ་ཁང་ཞིག་ཏུ་ནང་པར་བསྒྱུར་ཡོད་ཚུལ་ཡང་བཀོད་འདུག
ཝ་ཤིན་ཊོན་མཚོ་དམག་ས་ཚིགས་འདི་ནི་དུས་རབས་ ༡༩ ནང་གསར་འཛུགས་བྱས་ཞིང་། དོན་རྐྱེན་བྱུང་ཡུལ་གྱི་ཁང་བརྩེགས་དེའི་ནང་ཨ་རིའི་མཚོ་དམག་ལ་བཀོད་འདོམས་དང་། མཚོ་དམག་གྲུ་གཟིངས་འཛུགས་སྐྲུན་དང་བསྐྱར་གསོ་སོགས་གནད་འགག་ཅན་གྱི་ས་ཚིགས་ཞིག་ཡིན་འདུག
གསར་འགོད་པ། ལྷ་སྐྱབས་རྒྱལ།
