འབའ་བ་ཕུན་ཚོགས་དབང་རྒྱལ་ཀྱི་དཔེ་དེབ་དབུ་འབྱེད།

དེ་རིང་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གིས་འབའ་པ་ཕུན་ཚོགས་དབང་རྒྱལ་གྱིས་བརྩམས་པའི་དཔེ་དེབ་ཅིག་དབུ་འབྱེད་གནང་ཡོད་པ་དང་། དཔེ་དེབ་དེར་རྒྱ་ནག་གཞུང་གིས་མི་རིགས་གནད་དོན་སྐོར་གྱི་སྲིད་ཇུས་དང་། བཀས་བཀོད་རྒྱུད་འཛིན་སྲིད་དབང་སྒེར་གཅོད་སྐོར། དབང་སྒྱུར་མི་རིགས་དང་དེའི་བཙན་དབང་སྲིད་གཞུང་གི་སྐོར་སོགས་བཀོད་ཡོད་འདུག

དེ་རིང་ཉིན་རྒྱབ་ཆུ་ཚོད་ ༣།༠༠ སྟེང་། ངྷ་ས་བོད་ཀྱི་གསོལ་མགྲོན་ཁང་དུ་ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གིས་འབའ་བ་ཕུན་ཚོགས་དབང་རྒྱལ་ལགས་ཀྱིས་བརྩམས་གནང་མཛད་པའི་<<རང་རྒྱལ་གྱི་མི་རིགས་གནད་དོན་དང་མི་རིགས་ལས་དོན་སྐོར་གྱི་ཕྱིར་རྟོག་>>ཅེས་པའི་དཔེ་དེབ་ཅིག་དབུ་འབྱེད་གནང་སོང་། དབུ་འབྱེད་མཛད་སྒོར་བོད་མི་མང་སྤྱི་འཐུས་ཁག་ཅིག་དང་རྩོམ་པ་པོ་དང་མཉམ་ཞིབ་པ་ཁག་ཅིག་ལྷན་འཛོགས་ཐོག ཁ་བ་དཀར་པོ་བོད་ཀྱི་རིག་གཞུང་སྲི་ཞུ་ཁང་གི་འགན་འཛིན་གསེར་རྟ་ཚུལ་ཁྲིམས་ལགས་ཀྱིས་ངོ་སྤྲོད་གནང་བ་ལྟར་ན། དཔེ་དེབ་དེ་ནི་འབའ་བ་ཕུན་ཚོགས་དབང་རྒྱལ་ལགས་ཀྱིས་ཐོག་མར་རྒྱ་ཡིག་ཏུ་བྲིས་ཡོད་པ་རྗེས་སུ་བོད་སྒྱུར་བྱས་ཡོད་ཀྱང་། རྒྱ་ནག་དང་བོད་ནང་དཔར་སྐྲུན་ཞུ་མ་ཐུབ་པར་བོད་ཡིག་གི་མ་ཕྱི་འབྲེལ་ཡོད་མི་སྣ་ཞིག་བརྒྱུད་དེ་ཁོང་ཚོར་འབྱོར་སོན་བྱུང་བ་ཤོག་གྲངས་ ༨༢༠ ཙམ་ཡོད་པའི་དེབ་དེ་པར་སྐྲུན་བྱས་ཡོད་པ་དང་། དགུང་ལོ་ ༩༠ ལྷག་སོན་པའི་རྩོམ་པ་པོ་ཁོང་འཚོ་བཞུགས་སྐབས་དཔར་སྐྲུན་བྱེད་ཐུབ་པ་བྱུང་བ་ནི་དམིགས་བསལ་དོན་སྙིང་ལྡན་ཡོད་སྐོར་བརྗོད་བྱུང་།

ཡང་ཁོང་གིས་རྒྱ་ནག་གི་ཁྲིམས་ལུགས་སུ་གསལ་བའི་མི་རིགས་ཀྱི་སྐོར་དང་། རྒྱ་ནག་དམར་ཤོག་ཚོགས་པས་དུས་སྐབས་སོ་སོར་མི་རིགས་ཀྱི་ལས་དོན་བྱེད་ཕྱོགས། བོད་དང་ཤིན་ཅང་། སོག་པོ་སོགས་གྲངས་ཉུང་མི་རིགས་ཀྱི་གནད་དོན་རྩལ་དུ་བཏོན་ནས་ཁྲིམས་ལུགས་དང་ལས་དོན་དངོས་ཀྱི་བར་ཐག་སྐོར་ལ་དབྱེ་ཞིབ་གནང་འདུག་པ་དང་། ལྷག་པར་དུ་བོད་རྒྱ་གཉིས་ཀྱི་ལོ་རྒྱུས་འབྲེལ་བའི་གནས་བབ་དང་། མ་འོངས་པར་བོད་དོན་ཐག་གཅོད་ཀྱི་ཁ་ཕྱོགས་འཛིན་སྟངས་སོགས་ཀྱི་སྐོར་ཁོང་ཉིད་ཀྱི་དངོས་མཐོང་དངོས་མྱོང་གི་བདེན་དཔང་གཞི་རྩར་བཞག་ཐོག་ཞིབ་འཇུག་མཐིལ་ཕྱིན་གནང་འདུག་སྟབས། ཆབ་སྲིད་ཀྱི་ཐད་ནས་དཔེ་དེབ་འདི་གལ་ཆེན་ཆགས་ཡོད་སྐོར་དང་། གནད་འགག་ཅིག་ལ་ ༡༩༥༡ གོང་བོད་དེ་སུ་གང་གི་དབང་སྒྱུར་འོག་མེད་པ་གསལ་བོར་བསྒྲུབས་ཡོད་སྐོར་སོགས་བརྗོད་སོང་།

དེའི་རྗེས་དཔྱད་གླེང་སྐུ་མགྲོན་དུ་གདན་འདྲེན་ཞུས་པའི་འབའ་བ་ཕུན་ཚོགས་དབང་རྒྱལ་ཀྱི་མི་ཚེ་ལོ་རྒྱུས་<<བོད་མི་གསར་བརྗེ་པ་ཞིག་>>ཅེས་པ་བོད་སྒྱུར་གནང་མཁན་རྩོམ་པ་པོ་ཆུང་ཚེ་རིང་ལགས་ཀྱིས། མི་མང་པོ་ཞིག་གིས་འབའ་པ་ཕུན་ཚོགས་དབང་རྒྱལ་ལགས་ཀྱིས་རྒྱ་དམར་བོད་དུ་ཁྲིད་ཡོང་མཁན་གྱི་རྒྱལ་བཙོང་པ་ཞིག་ཡིན་པའི་ལྟ་ཚུལ་འཛིན་མཁན་ཡོད་ཀྱང་། ཁོང་གི་ལངས་ཕྱོགས་དང་ལྟ་བར་བལྟས་ན་ཁོང་གིས་རྒྱ་དམག་བོད་དུ་ཁྲིད་ཡོང་པ་དེ་བཙན་འཛུལ་བ་མ་ཡིན་པར་བཅོས་སྒྱུར་བ་ཞིག་ཁྲིད་ཡོང་པའི་བསམ་བློ་ཡོད་སྐོར་དང་། དཔེ་དེབ་ཀྱི་ཐད་ནས་འཛམ་གླིང་སྤྱིའི་མི་རིགས་ཞིབ་འཇུག་དང་བྱེ་བྲག་ཏུ་བོད་རྒྱའི་མི་རིགས་ཀྱི་གནད་དོན་ཞིབ་འཇུག་གི་ཁ་སྐོང་གལ་ཆེན་ཞིག་ཡིན་སྐོར་བརྗོད་སོང་།

མཐར་དཔྱད་གླེང་བ་བུ་ཆུང་བསོད་ནམས་ལགས་ཀྱིས། བོད་མིའི་ཁྲོད་འབའ་བ་ཕུན་ཚོགས་དབང་རྒྱལ་ནི་རྒྱའི་དམག་མདའ་བཅོ་བརྒྱད་པ་བོད་དུ་ཁྲིད་ཡོང་མཁན་དང་། རྒྱལ་བཙོང་པ་སོགས་ཡིན་པར་གླེང་མཁན་དང་། རིགས་གཅིག་གིས་ཁོང་ནི་རྒྱལ་གཅོས་པ་དང་མི་རིགས་རིང་ལུགས་པ་ཡིན་པར་གླེང་མཁན་གཉིས་ཡོད་ཀྱང་། རང་ཉིད་ནི་ལོ་རྒྱུས་པ་ཞིག་མིན་པས་དེ་གཉིས་ཀྱི་གང་ཡིན་བཤད་དཀའ་ཡང་། གནད་དོན་གཉིས་གསལ་བོར་རྟོགས་ཐུབ་པ་ནི་ཁོང་ནི་བོད་རྒྱའི་དཀའ་རྙོག་གནད་དོན་ཐད་ནས་ལོ་རྒྱུས་ཀྱི་མི་སྣ་གལ་ཆེན་ཞིག་དང་། གཉིས་ནས་ཐོག་མའི་དུས་ནས་ད་ལྟའི་བར་སོ་སོའི་མི་རིགས་ལ་གོད་ཆག་དཀའ་ངལ་མང་པོ་འཕྲད་ཡོད་ཀྱང་། སྤྱི་ཚོགས་རིང་ལུགས་དང་དམར་པོའི་ལམ་ལུགས་ཀྱི་ལྟ་བར་དུས་ནམ་ཡང་འགྱུར་བ་ཐེབས་མེད་སྐོར་བརྗོད་སོང་།

དཔེ་དེབ་ཀྱི་དཔར་སྐྲུན་གཏམ་གླེང་ནང་། “ད་ལན་རྒྱ་ནག་ཏུ་གནས་བཞུགས་བོད་མི་གསར་བརྗེ་བ་དང་མཁས་དབང་འབའ་བ་ཕུན་ཚོགས་དབང་རྒྱལ་མཆོག་གིས་ <<རང་རྒྱལ་གྱི་མི་རིགས་གནད་དོན་དང་མི་རིགས་ལས་དོན་སྐོར་གྱི་ཕྱིར་རྟོག་>>ཅེས་པའི་དཔེ་དེབ་འདི་ཉིད་རྒྱུན་རིང་ཞིབ་འཇུག་དང་། དངོས་ཡོད་རྒྱུས་མྱོང་གི་བརྒྱུད་རིམ་བཅས་ལ་བརྟེན་ནས་གསར་རྩོམ་གནང་འདུག་པ་ནི། བོད་ཀྱི་ཆབ་སྲིད་ཀྱི་གནད་དོན་ཐོག་ནས་ཧ་ཅང་གལ་འགངས་ཆེ་བའི་སྟོང་ཆ་ཞིག་ཁ་བསྐངས་གནང་འདུག་པ་མ་ཟད། དེབ་འདིའི་ཐོག་ནས་བོད་ཀྱི་ཆབ་སྲིད་ཀྱི་ལོ་རྒྱུས་སྤྱི་དང་། བྱེ་བྲག་གྲོས་མཐུན་དོན་ཚན་བཅུ་བདུན་བཞག་ཟིན་རྗེས་ཀྱི་དངོས་མྱོང་ལོ་རྒྱུས་ཀྱི་བརྒྱུད་རིམ་སོགས་ཁ་ཚ་དགོས་གཏུགས་ཀྱིས་གསལ་བོ་བཟོས་འདུག”ཅེས་བཀོད་འདུག

དེབ་ཀྱི་མདུན་ངོས་ཤོག་གྲངས་ ༡༢ འདྲ་པར་རིགས་དང་། དེབ་ཀྱི་བརྗོད་བྱའི་ཚན་པ་དང་པོ་རང་རྒྱལ་གྱི་མི་རིགས་གནད་དོན་དང་མི་རིགས་ལས་དོན་སྐོར་ཞེས་པར། གཙོ་བོ། ༡༽མི་རིགས་གནད་དོན་ཐད་ཀྱི་ལྟ་ཚུལ་མི་འདྲ་བའམ་རྦད་དེ་ལྡོག་པའི་ལངས་ཕྱོགས་དང་ལྟ་ཚུལ། ༢༽བཀས་བཀོད་རྒྱུད་འཛིན་སྲིད་དབང་སྒེར་གཅོད་ཀྱི་བཙན་དབང་རིང་ལུགས་དང་དེའི་རྒྱལ་ཁབ་ལྟ་ཚུལ་གྱིས་མི་རིགས་གྱི་གནད་དོན་དང་ལས་ཀར་ཐེབས་པའི་ཤུགས་རྐྱེན། ༣༽ དབང་སྒྱུར་མི་རིགས་དང་དེའི་བཙན་དབང་སྲིད་གཞུང་གི་རྒྱལ་ཁབ་མཆོག་འཛིན་ལྟ་ཚུལ་དང་མེས་རྒྱལ་ལྟ་ཚུལ་གྱི་འབྱུང་རྩ། ༤༽ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས་རྗེས་ཀྱི་མི་རིགས་ལས་དོན་ཁྲོད་ཀྱི་གནད་དོན། ༥༽ བོད་ལྗོངས་དང་བོད་ཁུལ་གཞན་དག་གི་གནད་དོན་འགའི་སྐོར། ༦༽ བོད་ལྗོངས་དང་མོང་གོལ་གོང་མའི་རྒྱལ་ཁབ་དང་ཀྲུང་གོའི་རྒྱལ་རབས་རིམ་བྱུང་བར་གྱི་འབྲེལ་བ། ༧༽ ཀྲུང་ཧྭ་དང་ཀྲུང་གོ་ཞེས་པའི་ཐ་སྙད་ཀྱི་གོ་དོན་གསར་རྙིང་གཉིས། ༨༽ ཨུ་རུ་སུ་ཆེན་པོའི་ཧྲ་ཝུན་རིང་ལུགས་དང་སུའུ་ལེན་སིལ་བུར་འཐོར་བ་ལས་ཀྲུང་གོར་ཐོབ་པའི་བསླབ་བྱ། ༩༽ སིང་ག་པོར་གྱི་མི་རིགས་དང་ཆོས་ལུགས་སྲིད་ཇུས་ཀྱི་གྲུབ་འབྲས་ལས་རང་རྒྱལ་གྱི་མི་རིགས་ལས་དོན་ལ་ཐོབ་པའི་བློ་སྐྱེད། ༡༠༽ རང་རྒྱལ་གྱི་མི་རིགས་བར་གྱི་འབྲེལ་བ་དང་མི་རིགས་ལས་དོན་ཁྲོད་གནས་པའི་གནད་དོན། ༡༡༽ ཕྱི་རྟོག་གི་སྤྱི་སྡོམ། ཀྲུང་ཧྭ་བཙན་རྒྱལ་གྱི་ལམ་ལ་བགྲོད་མི་རུང་། ༡༢༽ ཟུར་མཆན་ཅེས་དང་། ཚན་པ་གཉིས་པ་མི་རིགས་འདྲ་མཉམ་དང་མཐུན་སྒྲིལ་ཐད་ནས་ནང་གསེས་དོན་ཚན་ ༡༩ འདུག

གཞན། བློ་མཐུན་བཀྲ་ཤིས་དབང་ཕྱུག་ལ་རྗེས་དྲན་ཞུ་བ། བོད་མི་གསར་བརྗེ་པ་ཞིག་ཅེས་པའི་དེབ་ཀྱི་མཇུག་བྱང་། ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་ལྷག་པ་ཕུན་ཚོགས་ལ་བསྐུར་བའི་འཕྲིན་ཡིག ཀྲུང་དབྱང་གི་རྒྱུན་ཨུ་མགོ་ཁྲིད་ལ་ཕུལ་བའི་ཞུ་འཕྲིན་བཞི། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གི་འགན་འཛིན་བློ་མཐུན་ལ་སྤྲིངས་པའི་འཕྲིན། ཀྲུང་དབྱང་རྒྱུན་ཨུ་བློ་མཐུན་ཞི་ཅིན་ཕིན་ལ་ཕུལ་བའི་འཕྲིན་ཡོག་སོགས་ཚུད་འདུག

གསར་འགོད་པ། བནྡེ་སྐྱབས།