གླིང་ཚ་ཚེ་བརྟན་རྡོ་རྗེ་བོར་བརླག་ཏུ་ཕྱིན་ཏེ་ཉིན་ ༡༠༠ ཕྱིན་ཡོད་པ་དང་། བོད་མིའི་སྒྲིག་འཛུགས་དང་ཁོང་གི་ནང་མི་སོགས་ཀྱིས་གླིང་ཚའི་ཤི་གསོན་ཤེས་ཐུབ་ཀྱི་མི་འདུག་ཟེར།
བོད་སྐྱོད་ཞི་བའི་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས། འདི་ལོའི་ཕྱི་ཟླ་ ༦ ཚེས་ ༨ ཉིན་གྱི་ཞོགས་པར། རྒྱ་གར་ནུབ་བྷིང་གྷིལ་(West Bengal)མངའ་སྡེའི་ཀ་ལོན་སྤུག་སྲད་རྒྱུད་གྲྭ་ཚང་ནས་གར་སོང་ཆ་མེད་དུ་གྱུར་ཡོད་པ་དང་། དུས་དེ་ནས་དེ་རིང་བར་ཉིན་ ༡༠༠ ཕྱིན་ཡོད་ཀྱང་། སུ་གང་གིས་ཁོང་གར་སོང་གར་སྡོད་ཀྱི་གནས་ཚུལ་གཅིག་ཀྱང་མཐོང་ཐོས་ཐུབ་མེད་པ་དང་། བཙན་བྱོལ་སྤྱི་ཚོགས་ནང་འགའ་རེས་ཁོང་བོད་དུ་འབྱོར་ཡོད་སྐོར་དང་། འགའ་རེས་རྒྱ་མིས་བཙོན་འཇུག་བྱས་ཚུལ། ཡང་ཁག་ཅིག་གིས་རྒྱ་གར་གསང་བའི་ལས་ཁུངས་ཀྱིས་འཇུ་བཟུང་བྱས་ཚུལ་སོགས་ཚོད་དཔག་སྣ་ཚོགས་བྱེད་བཞིན་འདུག
འདི་གའི་གསར་འགོད་པས་བོད་མི་མང་སྤྱི་འཐུས་ཚོགས་གཙོ་དང་བོད་མིའི་སྒྲིག་འཛུགས་བདེ་སྲུང་དྲུང་ཆེ། མདོ་སྨད་དབུས་རྒྱུན་སོགས་ལ་གླིང་ཚའི་སྐོར་མཐོང་ཐོས་ཡོད་མེད་བཀའ་འདྲི་ཞུས་པར། ད་སྔ་ཁོང་ཅག་སུ་གང་གིས་ཀྱང་གླིང་ཚའི་སྐོར་གྱི་གནས་ཚུལ་གཅིག་ཀྱང་ཤེས་རྟོགས་ཐུབ་མེད་པ་དང་། བདེ་སྲུང་ལས་ཁུངས་བརྒྱུད་མུ་མཐུད་དུ་རྩད་གཅོད་གནང་གི་ཡོད་སྐོར་གསུངས་སོང་།
ཁ་པར་བརྒྱུད་ཀ་ལོན་སྤུག་ས་གནས་མགོ་འཛིན་བསྟན་འཛིན་ཆོས་འཕེལ་ལགས་སུ་བཅར་འདྲི་ཞུས་པར། ཁོང་གིས། “ཀ་ལིན་སྤུག་ཏུ་ཞག་གཅིག་བསྡད་རྗེས་སྒང་ཏོག་ཏུ་ཕྱིན་པ་རེད། ཁོ་རང་མི་སྒེར་གྱི་ཐོག་ནས་ཕེབས་པ་རེད། ང་ཚོ་ལས་ཁུངས་ལ་འབྲེལ་བ་གང་ཡང་གནང་མ་སོང་། ཁོ་བོར་བརླག་ཕྱིན་རྗེས་ང་ཚོ་ས་གནས་རྒྱ་གར་གསང་བའི་ལས་ཁུངས་ལ་བཅར་ནས་བཀའ་འདྲི་ཞུས་ཀྱང་། ཁོ་ཚོས་མཐོང་ཐོས་མ་བྱུང་ལ། ཀ་ལོན་སྤུག་ན་མི་འདུག་གསུངས་སོང་། གང་ལྟར་ད་ལྟའི་ཆར་སུ་གཅིག་གིས་ཧ་གོ་ཡི་མིི་འདུག”ཅེས་བརྗོད་སོང་།
དེ་རིང་ཡང་གསར་འགོད་པས་ངྷ་སར་གནས་སྡོད་གླིང་ཚའི་ཨ་མ་ལྡོམ་པོ་སྐྱིད་ལགས་སུ། གླིང་ཚའི་སྐོར་གྱི་གནས་ཚུལ་འདྲ་ཐོས་ཡོད་མེད་དང་། ད་ལྟ་ཕ་མ་གཉིས་ལ་བསམ་ཚུལ་གང་འདྲ་ཡོད་མེད་དྲིས་པར། ཁོང་མོས་“ཚེ་བརྟན་རྡོ་རྗེ་གར་སོང་ཆ་མེད་དུ་གྱུར་ནས་ཉིན་མཚན་ ༢༠༠ ཕྱིན་སོང་། ད་ལྟ་ད་དུང་ཁོང་ཤི་གསོན་གང་ཡིན་ཟུར་ཙམ་ཡང་ཤེས་ཐུབ་ཀྱི་མི་འདུག ངེད་ཕ་མ་གཉིས་ལ་སེམས་ཁྲལ་ཆེན་པོ་འདུག་ཀྱང་ཐབས་ཤེས་གང་ཡང་མི་འདུག བོད་ནང་ཡོད་པའི་སྤུན་མཆེད་དང་ཨ་ཞང་སོགས་ཀྱིས་ཀྱང་རྟག་པར་ཁ་པར་ནས་ཚེ་བརྟན་རྡོ་རྗེའི་སྐོར་སྐད་ཆ་འདྲི་བཞིན་འདུག ད་སྔ་བོད་གཞུང་དང་མདོ་སྨད་རྒྱུན་ལས་སོགས་ཀྱིས་ཁོ་ལ་ཐུགས་ཁུར་རྒྱབ་སྐྱོར་ཧང་སང་པ་གནང་སོང་བར་ཐུགས་རྗེ་ཆེ་ཞུ་རྒྱུ་ཡིན། ད་དུང་མུ་མཐུད་ཁོ་ཤི་གསོན་གྱི་གནས་ཚུལ་ཞིག་ཤེས་རྟོགས་ཡོང་རྒྱུར་རོགས་རམ་གནང་རོགས་ཞེས་རེ་སྐུལ་ཞུ་བཞིན་ཡོད ”ཅེས་བརྗོད་སོང་།
གསར་འགོད་པ། པདྨ་མཚོ།
བོད་ཁ་བ་ཅན་ཚང་གི་དཔའ་བོ་གླིང་ཚ་ཚེ་བརྟན་རྡོ་རྗེ་ལགས་ཀྱི་ཕ་མ་ནང་མི་རྣམ་པར་སེམས་གསོ་ཞུ་བཞིན་ཡོད།