དེ་རིང་སྔ་དྲོ་རྒྱ་ནག་གཞུང་གིས་ཁྲོན་ཆིན་གྲོང་ཁྱེར་གྱི་སྤྱི་ཁྱབ་ཟུར་པ་པའོ་ཞི་ལེ་ལ་ཚེ་བཙོན་གྱི་ཁྲིམས་ཐག་དང་། ཚེ་གང་གི་ཆབ་སྲིད་ཀྱི་དབང་ཆ་འཕྲོག་ཡོད་ཚུལ་བསྒྲགས་འདུག
དེ་རིང་ཕྱི་ཚེས་ ༢༢ ཉིན་གྱི་ཞོགས་པ་པེ་ཅིན་གྱི་ཆུ་ཚོད་ ༡༠ ཐོག རྒྱ་ནག་ཧྲན་ཏུང་ཞིང་ཆེན་ཅི་ནན་འབྲིང་རིམ་མི་མང་ཁྲིམས་ཁང་གིས་ཁྲོན་ཆེན་གྲོང་ཁྱེར་གྱི་སྤྱི་ཁྱབ་ཟུར་པ་པའོ་ཞི་ལེ་ཡི་ལྐོག་ཟ་རུལ་སུངས་དང་ལྐོག་རྔན་ཧམ་ལེན། དབང་ཆ་ལོག་སྤྱད་ཀྱི་ནག་ཉེས་ལ་ཁྲིམས་ར་ཐེངས་ ༥ པ་ཚོགས་པའི་ཁྲིམས་བཤེར་གྱི་མཇུག་འབྲས་ཕྱི་བསྒྲགས་བྱས་ཏེ། པའོ་ཞི་ལེར་ཚེ་བཙོན་གྱི་ཁྲིམས་ཐག་དང་། ཚེ་གང་གི་ཆབ་སྲིད་ཀྱི་དབང་ཆ་འཕྲོག་ཡོད་པ་མ་ཟད། སྒེར་གྱི་རྒྱུ་ནོར་ཆ་ཚང་གཞུང་བཞེས་བཏང་ཡོད་འདུག
ཐེངས་འདིའི་ཁྲིམས་རྭར་པའོ་ཞི་ལེ་ཡི་ནང་མི་ཉེ་འབྲེལ་མི་ ༣ དང་། ཁོང་ལ་རོགས་འདེགས་བྱེད་མཁན་མི་ ༢། གསར་འགོད་པ་ ༢༢ ། སྤྱི་ཚོགས་ཁྲོད་ཀྱི་མི་སྣ་ ༨༩ བཅས་ཁྱོན་མི་ ༡༡༦ འཛོམས་ཡོད་འདུག་ལ། སྐབས་དེའི་ཁྲིམས་བསྒྲགས་སྐབས་ཅི་ནན་འབྲིང་རིམ་མི་མང་ཁྲིམས་ཁང་གིས། ལྐོག་ཟ་རུལ་སུངས་ཀྱི་ནག་ཉེས་འོག་ལོ་ ༡༥ ཚེ་བཙོན་དང་སྒེར་གྱི་རྒྱུ་ནོར་རྒྱ་སྒོར་ཁྲི་ ༡༠༠ གཞུང་བཞེས་བཏང་ཡོད་པ་དང་། དབང་ཆ་ལོག་སྤྱོད་བྱས་པའི་ནག་ཉེས་འོག་ལོ་ ༧ ཚེ་བཙོན་བཅས་ཀྱི་ཁྲིམས་ཐག་དང་། ཆབ་སྲིད་ཀྱི་ཁེ་དབང་འཕྲོག་ཡོད་ཚུལ་བསྒྲགས་ཡོད་པ་མ་ཟད། ཁོང་གིས་རྒྱུ་ནོར་ཆ་ཚང་གཞུང་བཞེས་བཏང་ཡོད་ཚུལ་བསྒྲགས་འདུག
ད་དུང་ཁྲིམས་ཁང་གིས་པའོ་ཞི་ལེ་ཏུང་ཅེ་གྱོད་གཞི་དང་འབྲེལ་བའི་ལྐོག་ངན་ཧམ་ལེན་དང་ལྐོག་ཟ་རུལ་སུངས་བྱས་པའི་སྤྱི་དངུལ་བསྡོམས་རྒྱ་སྒོར་ཁྲི་ ༢༡༧༩།༠༥༨༧ ཡོད་པ་དེ་རྒྱ་ཁབ་ཀྱི་དངུལ་མཛོད་ལ་དབང་བ་དང་། ལྐོག་ཟ་རུལ་སུངས་བྱས་པའི་རྒྱ་སྒོར་ཁྲི་ ༥༠༠ ཁྲིམས་གཞིར་བཟུང་ཕྱིར་ལའོ་ཉིན་མི་མང་སྲིད་གཞུང་ལ་རྩིས་སྤྲོད་བྱ་རྒྱུ་ཡིན་པ་མ་ཟད། དེ་ལས་ལྷག་པའི་མི་སྒེར་གྱི་རྒྱུ་ནོར་ཆ་ཚང་གཞུང་བཞེས་བཏང་ཡོད་ཚུལ་བསྒྲགས་ཡོད་འདུག་པ་དང་། པའོ་ཡིས་ལྐོག་རྔན་ལས་ཉོས་པའི་ཧྥ་རན་སའི་ཞཱ་ནཱ་སོན་གཞུང་ལམ་ ༧ པར་ཡོད་པའི་སྡོད་གནས་ཡང་གཞུང་བཞེས་བཏང་ཡོད་འདུག
གལ་སྲིད། པའོ་ཞི་ལེ་ཡིས་ཁྲིམས་ཁང་གི་ཐག་གཅོད་ངོས་ལེན་མ་བྱས་པ་ཡིན་ན། ཁྲིམས་གཞི་ཐག་གཅོད་ཀྱི་ཡིག་ཆ་འབྱོར་བའི་ཉིན་ ༢ པ་ནས་ ༡༠ ནང་ཚུད་ཅི་ནན་འབྲིང་རིམ་ཁྲིམས་ཁང་དང་། ཡང་ན་ཐད་ཀར་ཧྲན་ཏུང་ཞིང་ཆེན་ཆེས་མཐོའི་ཁྲིམས་ཁང་ལ་གཏུག་བཤེར་བྱེད་ཆོག་ཚུལ་བཤད་ཡོད་འདུག
གསར་འགོད་པ། དོན་གོ
གུང་ཁྲན་ཏང་གི་མཐོ་རིམ་དཔོན་པོའི་ནང་ན་ཆེ་ཆུང་ཙམ་མ་གཏོགས་ཉེས་པ་དེ་རིགས་མེད་པ་ཞིག་མེད་ཅེས་བཤད་ཆོག་ གལ་ཏེ་མུ་མཐུད་རུལ་སུངས་གཙང་སེལ་སོགས་ཀྱི་དག་ཐེར་ཅིག་བྱེད་དགོས་བྱུང་ན། བྱེད་ཐུབ་ན་ཀྲུང་གོའི་གུང་ཁྲན་ཏང་གི་ཚེ་མྱུར་དུ་ཟད་རྒྱུ་རེད།
པའོ་ལ་ཚེ་བཙོན་ཁྲིམས་ཐག་བཅད་པ་འདིས་དེང་གི་རྒྱ་ནག་ནི་ཁྲིམས་ཀྱིས་བདང་སྒྲུར་བྱེད་པའི་རྒྱལ་ཁབ་ཅིག་ཡིན་པར་སྟོན་བཞིན་ཡོད་པ་མིན་ནམ།
རྒྱ་ནག་ལ་འདི་ལྟ་བུའི་ཁྲིམས་ཀྱིས་དབང་སྒྱུར་ཞིག་ཅི་ནས་ཀྱང་ཡོང་དགོས་པ་འདུག
“ལྐོག་ཟ་རུལ་སུངས་ཀྱི་ནག་ཉེས་འོག་ལོ་ ༡༥ ཚེ་བཙོན་” ཟེར་ན་ཅི་རེད། པོའོ་ལ་ལོ་ ༡༥ མ་གཏོགས་ཚེ་མེད་པ་ཡིན་ནམ།
བོད་ཀྱི་དུས་བབ་ཚང་གི་རླུང་རྟ་དར་བར་ཤོག གནས་ཚུལ་དུས་ཐོག་ཏུ་སྤེལ་བར་ཐུགས་རྗེ་ཆེ། ལྷག་པར་དུ་གསར་འགྱུར་གྱི་སྤུས་ཚད་མཐོ་རུ་འགྲོ་བཞིན་འདུག
རྒྱ་རྒན་འདི་ལ་དེ་ཙམ་གྱིས་ནག་ཉེས་ཨེ་ཡོད་སྙམ། དངོས་གནས་ཁོ་ལ་ནག་ཉེས་དེ་འདྲ་ཞིག་ཡོད་ན། རྒྱ་གཞུང་གིས་ཐག་གཅོད་འདི་ཧ་ཅང་གི་འོས་འཚམ་ཞིག་རེད། འོན་ཀྱང་དོན་དངོས་ལ་ཁོང་ལ་དེ་འདྲེའི་ཉག་ཉེས་ཡོད་མེད་ཐེ་ཚོམ་ཆེ། ཅིས་ཀྱང་རྒྱ་རྒན་འདི་ལ་མ་ཉེས་ཁག་གཡོགས་མིན་པར་ཤོག