སྤྱང་ཀི་གཉིས་ཀྱི་ལྟོ་ཟན་དུ་གྱུར་བའི་ཤ་གཟན་ཚོན་པོ་ཞིག

མི་ཞུན།    ཝཱཎའི་མཐོ་སློབ།

ཝཱཎ་མཐོ་སློབ་ཀྱི་གསོ་རིག་སྡེ་ཁག་གི་སློབ་གཉེར་བ་རྣམས་ལ་ལོ་རེ་བཞིན་རྒྱ་གར་གྱི་མངའ་ཁོངས་སུ་ཡོད་པའི་ས་གནས་ས་ཐོག་མི་འདྲ་བ་མང་པོ་ཞིག་ལ་སྔོ་སྨན་ངོས་འཛིན་གྱི་ལག་ལེན་མྱོང་གོམས་ཆེད་སྦྱོང་དུ་བསྐྱོད་པའི་ལས་གཞི་ཞིག་ཡོད།   ལོ་སྔོན་མར་ཧི་མ་ལ་ཡའི་ས་ཁུལ་གྱི་གཡས་གཡོན་མ་ན་ལི་དང་རོ་འཕྲང༌། གར་ཞ། སྤི་ཏི་ལ་སོགས་པར་སོང་བ་དང༌།  ད་ལོ་ཨ་རུ་ན་ཅལ་མངའ་སྡེའི་ཁོང་གཏོགས་མོན་རྟ་དབང་ས་ཁུལ་གྱི་གཡས་གཡོན་ལ་ཕྱིན་པ་ཡིན།  བླ་མེད་ཀྱི་བཤེས་གཉེན་ཆེན་མོ་རྒན་དགྲ་འདུལ་རྣམ་རྒྱལ་ལགས་ཀྱི་བྱམས་བརྩེ་དང་ཐུགས་འཁུར། ལྷག་བསམ་དང་སྣེ་ཁྲིད་ཀྱི་ལམ་སྟོན་བཟང་བོའི་འོད་ངོགས་སུ་ང་དང་ངའི་འཛིན་གྲོགས་ཚོ་ལ་བདེ་སྣང་གི་ཚོར་བ་ཟད་མེད་རག་ཅིང༌། སྔོ་སྨན་གྱི་གྲོགས་པོ་བརྒྱ་ཕྲག་ཐོབ།  བྱིན་ཅན་གྱི་གནས་ཆེན་མང་པོ་དང༌།  ས་གནས་ཀྱི་ལོ་རྒྱུས་མང་པོའི་སྒྲུང་གཏམ་འདྲ་མིན་གྱི་ཐོས་པ་གྲངས་མེད་བརྙེས་སུ་བཅུག 

ལྷག་པར་དུ།  ང་ལ་མཚོན་ན་ས་མཆོག་སྟོང་གི་ནང་སྙིང་འདྲ་བོ་དང་སྟོང་དཀྲུགས་འོ་མའི་མར་ལོ་འདྲ་བོ། ཚོན་པོ་ལུག་གི་བྲང་མགོ་འདྲ་བོ་དང་དོན་ལྔ་སྣོད་ཀྱི་སྙིང་མགོ་འདྲ་བོའི་ས་ཆ་ལྟ་ན་སྡུག་ཅིང་ཡིད་དབང་འགུག་ནུས་ཀྱི་མཛེས་པ་འགྲན་ཟླ་བྲལ་བ་ཞིག་གི་ཐོག་ལ་རྐང་པ་སྤོ་བའི་སྐལ་བཟང་ཐོབ་པ་ལ་བརྟེན་ནས་རང་གི་མེས་པོའི་རྒྱལ་ཁབ་ཀྱི་གྱོང་གུད་དང་འབྲེལ་བའི་སྐོར་ལ་ཡང་བཤད་མི་ཤེས་པའི་ཚོར་བ་རྣོན་པོ་ཞིག་བསླེབས་སོང༌།   ལར་ནས་ང་ནི་ཆབ་སྲིད་གླེང་དུས་སྙིང་ན་ཞིང་ཆབ་སྲིད་གོ་ན་མགོ་གཟེར་བའི་རིགས་སུ་གཏོགས་པ་དང་རང་གི་ཆེད་སྦྱོང་ཡང་ཆབ་སྲིད་དང་གཏན་འབྲེལ་མེད་པའི་གཞུང་ལུགས་ཤིག་ཡིན་མོད།  འོན་ཀྱང༌།  ཚོར་བ་ནི་འགོག་ཏུ་མི་ནུས་པའི་ཐུར་འདྲིལ་གྱི་རྦབ་རྡོ་ཞིག་དང་འདྲ་བས་དངོས་སུ་མིག་གིས་མཐོང་ཞིང་རྣ་ཡིས་གོ་བ་ཐམས་ཅད་ཀྱི་བདེན་པ་ལ་གཡོལ་ཏེ། ཁུ་སུམ་གྱི་བརྟུལ་ཞུགས་འཛིན་རྒྱུ་འདི་ཡང་འབྲས་ནད་ཀྱིས་མནར་བའི་ནད་རོ་བཞིན་ཤིན་ཏུ་བསྲན་དཀའ་བའི་ལས་ཤིག་རེད་ཨང༌།  དེ་ལ་བརྟེན།  ཐེངས་འདིའི་འགྲུལ་སྐྱོད་ལས་གཞིའི་མཐོང་ཐོས་དང་འབྲེལ་བའི་ཚོར་བ་རྣོན་པོ་དེ་ཡང་གཏེར་སྦས་སུ་མ་བཏབ་པར་སྐད་གདངས་མཐོན་པོས་བཤད་པ་ཡིན་ན།  ང་དང་ངའི་དགེ་གྲོགས་ཚོ་ཕྱི་ལོ་ ༢༠༡༣ ལོའི་ཟླ་ ༨ པའི་ཚེས་ ༡  ཉིན་གྱི་ཕྱི་དྲོའི་ཆུ་ཚོད་བཞི་བའི་སྟེང་ཝཱཎ་མཐོ་སློབ་ཀྱི་ར་སྐོར་ལས་ཐོན་ཏེ་ཨ་སམ་གྱི་རྒྱལ་ས་གྷོ་ཧ་ཊེ་ལ་འབྱོར་བ་དང༌།  དེ་ནས་ཐད་ཀར་དུ་བསྟན་འཛིན་པུར་ལ་བསྐྱོད།  བསྟན་འཛིན་པུར་ནས་འབུམ་སྡེ་ལ་དང༌། དེ་ནས་རྡི་རང༌། དེ་ནས་འཇང༌། དེ་ནས་སེང་གེ་རྫོང༌། དེ་ནས་ཟེ་ལ།  ཟེ་ལ་ནས་རྟ་དབང༌།  རྟ་དབང་ནས་སྨན་པ་རྒྱ་ལམ། དེ་ནས་ཇག་ཚང༌།  དེ་ནས་འབུམ་ལ།  འབུམ་ལ་ནས་སྟག་ཚང༌།  བཅས་གྷོ་ཧ་ཊེ་མ་བརྩིས་པ་ཡིན་ན་ཁྱོན་བསྡོམས་ས་གནས་ཁག་མ་འདྲ་བ་ ༡༡ ལྷག་ལ་སྐོར་སྐྱོད་བྱས་པ་ཡིན།  སྤྱིར་ང་ཚོའི་དམིགས་ཡུལ་གཙོ་བོ་སྔོ་སྨན་ངོས་འཛིན་མ་གཏོགས་ས་གནས་ལོ་རྒྱུས་ཞིབ་འཇུག་བྱེད་པ་དེ་འདྲ་རྩ་བ་ཉིད་ནས་མ་རེད་དེ།  གདོང་དམར་བོད་ཀྱི་ཁྲག་རྒྱུན་ལུས་ཟུངས་སུ་ཟིན་པའི་མི་སུ་འདྲ་ཞིག་ཡིན་ནའང་ས་འདིའི་ཐོག་ལ་བསྐྱོད་པ་ཡིན་ན། ཚོར་བ་སྐྱིད་པོ་སྐྱིད་པོ་ཞིག་སླེབས་པ་ཙམ་དུ་མི་ཟད་པ་དང་རང་གི་རྒྱལ་ཁབ་དང་མི་རིགས་ཀྱི་གྱོང་གུད། ཉམས་ཆགས། ཕམ་ཁ། སྡུག་བསྔལ། སོགས་ཀྱི་སྐོར་ལ་ཡང་ཞར་དང་ཞོར་ནས་བསམ་གཞིགས་ཀྱི་དང་ག་མ་ཕྱེས་ན་མི་འགྲིག་པ་འདྲ་བོ་ཞིག་གི་ཚོར་བ་ཏན་ཏན་སླེབས་ཡོང་གི་རེད།    ཨ་སམ་གྱི་རྒྱལ་ས་གྷོ་ཧ་ཊེ་ནས་བསྟན་འཛིན་པུར་བར་དུ་སྤྱི་ལེ་ ༡༦༦ ཚེག་གཅིག་ཡིན་པ་དང་བསྟན་འཛིན་པུར་ནས་འབུམ་སྡེ་ལ་བར་དུ་སྤྱི་ལེ་ ༡༤༨ ཡོད།  འབུམ་སྡེ་ལས་ནས་རྟ་དབང་བར་དུ་སྤྱི་ལེ་ ༢༣༦ཚེག་ ༧ ཡོད། 

རྟ་དབང་ནས་ད་ལྟའི་བོད་ཀྱི་ས་མཚམས་འབུམ་ལ་བར་དུ་སྤྱི་ལེ་ ༦༠ ཡོད།  སྤྱིར་འབུམ་ལ་མ་གཏོགས་པའི་ས་མཚམས་གཞན་པ་ཡང་ཡོད་མོད། འོན་ཀྱང༌། ང་ཚོ་འགྲོ་མྱོང་སའི་ས་ཆ་འདི་རང་ཡིན། ཁྱོན་བསྡོམས་འབུམ་སྡེ་ལ་ནས་བརྩིས་པ་ཡིན་ན་སྤྱི་ལེ་ ༢༩༦ ཚེག་བདུན་ལྷག་གི་ས་ཁྱོན་སྤྱི་ལེ་གྲུ་བཞི་མ་ ༢༠༨༥ ལྷག་ཅིག་ད་ལྟའི་རྒྱ་གར་གྱི་ལྟོ་ཟན་དུ་གྱུར་བའི་ས་ཆ་རུ་གྱུར་ཡོད།  ས་ཆ་འདི་ནི་བོད་ཀྱི་ལྷོ་ཁ་ས་ཁུལ་གྱི་མཚོ་སྣ་ཞེས་པ་དང་འདྲེས་ཡོད་ལ་རྒྱ་གར་གྱི་བྱང་ཕྱོགས་ས་ཁུལ་དུ་གནས་ཡོད།  བོད་ཀྱི་རྒྱལ་ས་ལྷ་ས་ནས་ལྷོ་ངོས་སུ་སྤྱི་ལེ་ ༥༥༩ ལྷག་བགྲོད་པ་ཡིན་ན་ས་འདི་ལ་བསླེབས་པ་ཡོད། ས་འདི་བོད་ཀྱི་གཙང་སྟོད་ས་ཁུལ་གྱི་རི་ལུང་ཐམས་ཅད་རྡོ་ཡིས་ཁེངས་པ་ལྟ་བུ་ཞིག་གཏན་ནས་མ་རེད་ལ་སྤི་ཏི་དང་ལ་དྭགས་ནང་བཞིན་སྡོང་ལོ་སྔོན་པོ་རྐང་གཅིག་ཀྱང་མཐོང་རྒྱུ་མེད་པའི་བྱེ་མ་རྐྱང་རྐྱང་གི་ལུང་པ་ཞིག་ཀྱང་རྦད་དེ་མ་རེད།  འབྲུ་རིགས་སྣ་ལྔ་གཙོས་པའི་ལོ་ཏོག་སྣ་ཚོགས་ཀྱི་ཐོན་ཁུངས་ཧ་ཅང་ཕྱུག་ཅིང༌།  འབྲས་ལྡན་གྱི་ཤིག་ཏོག་འདྲ་མིན་དང༌།  བཅུད་ལྡན་གྱི་སྔོ་ཚལ་སྣ་ཚོགས། མཛེས་ལྡན་གྱི་མེ་ཏོག་གྲངས་མེད།  དྲི་ལྡན་གྱི་ཤུག་སྡོང་དང་གསོམ་སྡོམ། སྒྲོན་ཤིང༌། སོགས་ཀྱི་ཤིང་ནགས་སྟུག་པོ། ལྷག་པར་དུ་ཕན་ནུས་རྫོགས་ལྡན་གྱི་སྔོ་སྨན་རི་ལུང་ཐམས་ཅད་ལ་མ་ཁྱབ་པ་མེད་པ་བཅས་ཀྱི་རང་བྱུང་གི་ཐོན་ཁུངས་རྩེ་གྲ་ཞིག་ཏུ་ཆགས་འདུག  

ལར་ནས། རྒྱ་གར་གྱིས་རྒྱ་ནག་བཞིན་བོད་ལ་སིམ་འཛུལ་བྱས་ཏེ་ས་འདི་སྔར་ནས་བཙན་འཕྲོག་བྱས་པའི་སྐད་ཆ་ནི་དངོས་གནས་མ་རེད་དེ།  ཕྱི་ལོ་ ༡༩༡༤ ལོའི་ཡར་སྔོན་དུ་བོད་ཀྱི་ས་ཆ་དང་བོད་ཀྱི་མངའ་འབངས་བཀྲུས་ན་མི་དག་པ་དེ་ཡིན་པ་ནི་ཁུངས་ལྡན་རྒྱལ་རབས་ལོ་རྒྱུས་རྣམས་སུ་གསལ་གསལ་ཐིང་ཐིང་ཡིན་ལ་ད་ལྟའི་མོན་པ་བ་རྣམས་ཀྱི་ཡུལ་སྲོལ་དང་གོམས་གཤིས། སྐད་རིགས་དང་ཡི་གེ  རིག་གཞུང་དང་ཆོས་ལུགས།  འཚོ་ཐབས་དང་འཚོ་གནས་སོགས་ཀྱི་ཐད་ནས་ཀྱང་ཕར་ལ་འདྲི་མི་དགོས་པར་ཚུར་ལ་སྐད་ཆ་གསལ་བོ་བཤད་ཡོང་གི་ཡོད།

རྟ་དབང་ཟེར་བ་ནི་དུས་རབས་བཅོ་བརྒྱད་པའི་ནང་དུ་མེ་རག་བླ་མ་བློ་གྲོས་རྒྱ་མཚོ་ཡིས་མིང་གིས་བཏགས་པ་ཞིག་ཡིན་ཚུལ་བཤད་ཀྱི་འདུག་པ་དང་མོན་ཟེར་བ་ནི་བོད་ཀྱི་སྔ་རབས་ལོ་རྒྱུས་དེབ་ཐེར་རྙིང་བ་དང་གེ་སེར་རྒྱལ་བོའི་སྒྲུང་ལྟ་བུ་དག་གི་ནང་ལ་ཡང་མོན་དང་མོན་ཡུལ་ཞེས་པའི་ཐ་སྙད་འདི་མང་དུ་མཆིས། དཔེ་ན། གླིང་སྒྲུང་གི་ནང་དུ་གེ་སེར་རྒྱལ་བོས་མོན་གྱི་ཨ་གྲག་དྲུག་ཅུ་དམར་གསོད་བྱས་པ་དང༌། མོན་གྱི་ཕྱོགས་བཞིའི་རྫོང་བཞི་བླངས་པ།  ཟླ་བ་ཁྲབ་བཙན་གསོན་བཟུང་བྱས་པ།  ཤིང་ཁྲི་རྒྱལ་བོའི་སྙིང་གཏོར་བ།  གཞན་ཡང༌། མོན་བཟའ་མེ་ཏོག་ལྷ་མཛེས་ལྷ་རྒོད་འབུམ་ལུའི་ཆུང་མར་བསུས་པ་སོགས་ཀྱི་སྐོར་མང་པོ་འཁོད་ཡོད། བོད་བཙན་པོའི་སྐབས་སུ་ཡང་བོད་བྱང་ཕྱོགས་ཀྱི་གྲུ་གུ་བ་མང་པོ་ཞིག་ལྷོ་ཕྱོགས་མོན་ལ་བསྐྱལ་བ་དང༌། མོན་གྱི་མི་སྡེ་མང་པོ་ཞིག་བྱང་དུ་སྤོར་བཅུག་པའི་ལོ་རྒྱུས་ཡོད། རྒྱལ་རབས་གསལ་བའི་མེ་ལོང་ལས་ཀྱང༌། ལྷོ་ཕྱོགས་མོན་གྱི་རྒྱལ་པོ་རྣམས་ལྷ་སྲས་གཙང་མའི་གདུང་རྒྱུད་ཡིན། ཞེས་གསལ་ཡོད།

ྋརྒྱལ་དབང་ཐམས་ཅད་མཁྱེན་པ་ལྔ་པ་ཆེན་པོས། ཁམས་ཡེ་སང་དཀར་པོ་གནམ་གྱི་འཇུ་ཐག་ཅན་དང་གཅིག ཡེ་སྨོན་ནག་པོ་ཁྲོ་ཆུའི་ཕ་བོང་འདྲ་བ་དང་གཉིས། སྤྱང་ཁྲིག་ཡེ་ཤེས་ལྷའི་སྒྲོན་མེ་དང་གསུམ། མོན་རྫུ་ནག་པོ་ཁྱིའི་རྔ་ལྗང་ཅན་དང་བཞི། ཞེས་གསུངས་པ་དང༌། གཞན་ཡང་བོད་ཀྱི་ཡིག་ཚང་མཁས་པ་དགའ་བྱེད་དུའང་དེ་ལྟར་གསལ་བ་དང༌། དེ་ལས། མོན་ཞེས་པ་ནི། བོད་ཀྱི་ཐོག་མའི་རུས་མིང་ཞིག་ཡིན་པར་བསྟན་ཡོད་པས། ཐོག་མར་མོན་བོད་གཉིས་ནི་ཕ་གཅིག་ལས་མཆེད་པའི་སྤུན་དང༌། ཁྱིམ་གཅིག་ནས་གྱེས་པའི་རུས་མཚེས་ཡིན་ཞེས་སྦས་ཡུལ་སྐྱིད་མོ་ལྗོངས་ཀྱི་ཆོས་འབྱུང་དུ་གསལ་ཡོད།  

ྋརྒྱལ་མཆོག་དྲུག་པ་ཆེན་པོས་མཛད་པ། འཁོར་བའི་རྒྱ་མཚོ་སྒྲོལ་བའི་གྲུ་ཆེན་ཞེས་བྱ་བ་ལས། འབྲོམ་གྱིས་མཛད་པའི་བོད་ཀྱི་བཤད་པ་ལས། སྤྱི་མིང་ཁ་བ་ཅན་ལྗོངས་ལ། སྒོས་མིང་དབུས་གཙང་ཁམས་གསུམ་ཟེར། དྭགས་ཀོང་ལོང་པོ་ཉང་དང་བཞི། མཐའ་འཁོབ་བྱང་ཐང་འབྲོག་དང་ལྔ། ཡུལ་གྱི་ས་བཅད་བརྒྱད་དུ་གནས། མངའ་རིས་ལ་ཡང་རྣམ་པ་གསུམ། གཙང་ལ་གཡས་རུ་རུ་ལག་གཉིས། ཟར་དང་འབྲི་མཚམས་ལྷོ་མོན་གསུམ། ཧད་དང་རུ་མཚམས་འོད་ཡུག་ཤངས། ལུང་ལག་ལུང་ཕན་ཉིས་བརྒྱ་བདུན།  ཞེས་དང་མོན་འདི་སྔར་དགའ་ལྡན་ཕོ་བྲང་གི་མངའ་ཞབས་སུ་མཆིས་སྐབས། རྟ་དབང་བཞི་སྦྲེལ་དང་དྲུག་སྦྲེལ་གྱི་འོག་ཏུ་གྱང་མཁར་རྫོང་དང༌། སེངྒེ་རྫོང༌། རྡི་རང་རྫོང༌། སྟག་ལུང་རྫོང་བཅས་རྫོང་ཁག་བཞི་དང༌།  ཚོ་ལྡིང་སོ་གཉིས་སུ་དབྱེ་ནས་ཡོད་ཅེས་སྦས་ཡུལ་སྐྱིད་མོ་ལྗོངས་ཀྱི་ཆོས་འབྱུང་ན་གསལ་ཡོད།

ྋརྒྱལ་དབང་དྲུག་པ་ཚངས་དབྱངས་རྒྱལ་མཚོའི་འཁྲུངས་ས་འཁྲུངས་ཡུལ་ཀྱང་མོན་ནས་ཡིན་པ་དང་ད་ལྟ་ད་དུང་ཡང་ཁོང་གི་འཁྲུངས་ཁང་མ་བཤིག་མ་བརླགས་པར་དངོས་སུ་མཇལ་རྒྱུ་ཡོད།  གཞན་ཡང༌།  བོད་ཀྱི་རྣམ་ཐར་གྲགས་ཅན་འགྲོ་བ་བཟང་མོའི་འཁྲུངས་ས་འཁྲུངས་ཡུལ་ནི་མོན་ཡིན་ལ་རྒྱལ་བོ་ཀཱ་ལ་དབང་པོའི་བཙོན་ཁང་དང༌། བདུད་མོ་ཧཱ་ཤང་གི་གཞིས་ཁྱིམ་སོགས་ཀྱང་ད་ལྟ་དངོས་སུ་མིག་གིས་མཐོང་རྒྱུ་ཡོད།

གང་ལྟར་སྦས་ཡུལ་སྐྱིད་མོ་ལྗོངས་ཀྱི་ཆོས་འབྱུང་དུ་ལེགས་པོ་ཚོ་བཞི་དང༌། ཤ་འུག་བཅས་བཞི་རྒྱ་མིས་བཙན་བཟུང་བྱས།  མོན་ཡུལ་བྱིངས་ཕྱི་ལོ་ ༡༩༥༡ ལོ་ནས་རྒྱ་གར་གྱིས་དབང་བྱས་པ་ཡིན་ཞེས་གསལ་བར་གསུངས་ཡོད་པ་ལ་བལྟས་ན།  མོན་ཡུལ་འདི་རང་རྒྱལ་བོད་ཁམས་ཀྱི་མངའ་ཁོངས་དང་མོན་པ་རྣམས་རང་རྒྱལ་གྱི་མངའ་འབངས་གཤའ་མ་ཡིན་པ་ལ་ལུང་དང་རིག་པ་གང་གིས་ཀྱང་བསྙོན་དུ་མི་ནུས་པའི་ཚད་ཤིང་གི་དམ་རྟགས་ཤིག་ཏུ་འདོད་པ་དང་གོང་གི་ལུང་འདྲེན་རྣམས་ཀྱང་དགོས་པ་ལྷག་མ་ཞིག་ལས་མ་འདས།  འོན་ཀྱང༌། བདེན་པ་གོ་ལྡོག་གི་དུས་སྐབས་སུ་རང་ས་རང་དབང་དང་རང་ཁ་རང་སྤྱོད་ཀྱི་གོ་ཐོབ་ནི་རྟ་ཡི་རྔ་རྐང་ལས་ཀྱང་ཕྲ་བས་བོད་ཀྱི་ས་ཆ་ནི་ལུག་ཤ་གཟན་ཞིག་དང་བོད་པ་རྣམས་ལུག་རྫི་ཞིག་ཡིན་པའི་དབང་དུ་བཏང་ན་དངོས་གནས་སྙིང་རྗེ་ཞིང༌། ཡིད་མུག་པ། སེམས་སྐྱོ་ཞིང༌། སྡུག་བསྔལ་བ་ཞིག་རེད་ཨང་བསམ་པ་དྲན་བྱུང༌།

ས་འདི་ག་འདྲ་བྱས་ནས་རྒྱ་གར་གྱི་མངའ་ཁོངས་སུ་ཤོར་བ་རེད་དམ་ཟེར་ན་དེ་ནི་ཕྱི་ལོ་ ༡༩༡༤ ལོའི་ཟླ་ ༡༠ བའི་ཚེས་ ༡༣ ཉིན་བོད་དང་དབྱིན་ཇི་གཉིས་ཀྱི་བར་ལ་བཞག་པའི་སྐབས་ཀྱི་སིམ་ལའི་ཆིངས་ཡིག་གི་ནང་དུ་མེག་མ་ཧོན་ས་ཐིག་ཅེས་པ་ཞིག་བརྒྱབ་པ་དེ་ལས་ཤོར་བའི་ས་ཆ་ཞིག་རེད་འདུག  སྐབས་དེར་རྒྱ་གར་དབྱིན་གཞུང་གི་སྐུ་ཚབ་མེག་མ་ཧོན་དང་བོད་གཞུང་སྐུ་ཚབ་བློན་ཆེན་བཤད་སྒྲ རྒྱ་ནག་གི་སྐུ་ཚབ་ཨན་ཕན་ཅན་སོགས་ཕྱོགས་གསུམ་གྱི་སྐུ་ཚབ་དབང་ཚད་འདྲ་མཉམ་ཐོག་ཚོགས་ཞུགས་བྱ་རྒྱུ་མོས་མཐུན་བྱས་པ་ལ་བརྟེན་ནས་རྒྱལ་ཁབ་གསུམ་གྱི་ལྷན་ཚོགས་ ༡༩༡༣ ཟླ་ ༡༠ ཚེས་ ༡༣ ཉིན་རྒྱ་གར་གྱི་བྱང་ངོས་སུ་གནས་པའི་དབྱིན་ཇིའི་དབྱར་དུས་ཀྱི་རྒྱལ་ས་སིམ་ལར་འཚོགས་གཏན་འཁེལ་བའི་ཚོགས་ཆེན་ཞིག་ཡིན་པ་དང༌། དེ་དུས་དབྱིན་གཞུང་གི་སྐུ་ཚབ་མེག་མ་ཧོན་དང་བོད་གཞུང་སྐུ་ཚབ་བློན་ཆེན་བཤད་སྒྲ་གཉིས་ཀྱིས་བོད་ཀྱི་ས་ཁྲའི་སྒང་ལ་བོད་དང་རྒྱ་གར་གཉིས་ཀྱི་ས་མཚམས་དབྱེ་འབྱེད་བྱེད་ཕྱིར་མེག་མ་ཧོན་ས་ཐིག་འདི་བརྒྱབ་པས་མོན་རྟ་དབང་དང་བཅས་པ་ཚང་མ་དབྱིན་ཇིའི་ཁེ་སྤོགས་ཀྱི་ཕྱིར་དུ་བོད་ལག་ནས་བསྡུ་གསོག་བརྒྱབ་པ་ཞིག་རེད་འདུག  ཕྱིས་སུ་ ༡༩༤༧ ལོར་རྒྱ་གར་ལ་རང་བཙན་ཐོབ་རྗེས་སིམ་ལའི་ཆིངས་ཡིག་གཞིར་བཞག་གིས་ ༡༩༥༡ ལོ་ནས་བཟུང་རྒྱ་གར་གྱིས་ས་འདི་ཚང་མ་བདག་བཟུང་ལྷོད་མེད་བྱས་པ་ཞིག་ཡིན་པ་རེད།

སྐབས་མཚམས་འདི་ནས་ངའི་སེམས་ལ་འདི་འདྲ་ཞིག་དྲན་སོང༌། གལ་སྲིད་ང་ཚོའི་བོད་ཀྱི་ས་ཆ་འདི་ལུག་ཅིག་ཡིན་པའི་དབང་དུ་བཏང་ན་ཤ་གཟན་ཞིག་ཡིན་པ་དང༌། ཤ་གཟན་ཞིག་གི་ནང་ནས་ཀྱང་ཚོན་པོ་ཞིག་ཡིན་པ་ནི་གོར་མ་ཆགས་པའི་སྐད་ཆ་རེད། ཤ་གཟན་འདིའི་སྒང་ལ་སྔར་ནས་འཇབ་རྒྱུག་བྱེད་མཁན་གྱི་སྤྱང་ཀི་ལྟ་བུ་ནི་དབྱིན་ཇི་དང༌། ཨུ་རུ་སུ། ཉི་ཧོང༌། རྒྱ་ནག་སོགས་རྒྱལ་ཁབ་མང་པོ་ཞིག་བྱུང་མྱོང་བ་རེད་ཀྱང༌། ད་ལྟ་དངོས་སུ་ཤ་གཟན་གྱི་རྩིབ་ཤ་ལ་སོ་རྒན་རེ་བརྒྱབ་ནས་ཚིམས་མེད་ཀྱི་ལོངས་སྤྱོད་ལ་རོལ་བཞིན་པ་དེ་ནི་ང་ཚོའི་མེས་རྒྱལ་ཆེན་མོའི་ཁྱིམ་མཚེས་རྒྱལ་ཁབ་སྤྱང་ཀི་དཀར་པོ་དང་སྤྱང་ཀི་ནག་པོ་གཉིས་ཡིན་པ་རེད།  སྤྱང་ཀི་འདི་གཉིས་ཀྱི་ལྟོ་ཟན་དུ་གྱུར་བའི་ཤ་གཟན་ཚོན་པོ་འདིའི་བདག་པོ་ལུག་རྫིས་ནམ་ཡིན་ནའང་འཚེ་བ་ལ་འཛེམས་ནས་སྤྱང་ཀི་གསོད་མི་རུང་བར་བཤད་པ་དང༌།  དྲག་སྤྱོད་ལ་དོགས་ནས་ཀི་རིང་འདེབས་མི་ཉན་པར་གསུང་གི་ཡོད་ཀྱང༌།  གཏུམ་སྤྱོད་ཅན་གྱི་སྤྱང་ཀི་གཉིས་ཀྱིས་ངོ་ཚ་མེད་པར་ནམ་ཡིན་ནའང་ཧམ་པ་ཆེན་པོ་དང་འདོད་རྔམ་ཆེན་པོ།  དྲག་ཤུགས་ཆེན་པོ་དང་གཡོ་འཁྲུལ་ཆེན་པོས་རང་སྐལ་ཡིན་ཤག་ཤག་གིས་ཤ་གཟན་གྱི་མགོ་རྔ་ནས་ཕར་འཐེན་ཚུར་འཐེན་གྱིས་འཕྲོག་རེས་གྲངས་མེད་བྱེད་སྐབས་ཀྱང༌། ལུག་རྫིས་ངའི་ལུག  ངའི་ལུག  ཅེས་སྡུག་སྐད་ཀྱི་ཀློང་ནས་ལོ་ངོ་དྲུག་ཅུ་ལྷག་འགོར་ཞིང༌། གཞན་ལ་སྐྱབས་བཅོལ་གྱི་ལག་ཟུང་བཟེད་དེ་སྤྱང་ཀིའི་ཁ་ནང་གི་ཤ་གཟན་དེ་ནི་ངའི་ལུག་ཡིན་པ་དང་ངའི་ལུག་ཡིན་པའི་ཁུངས་བསྐྱེལ་ར་སྤྲོད་ཀྱི་བདེན་དཔང་གི་ལོ་རྒྱུས་འདི་དང་དེ་རེད་ཅེས་མཉམ་འབྲེལ་རྒྱལ་ཚོགས་དང་སྟོབས་ཅན་རྒྱལ་ཁབ་སོགས་ཀྱི་རྣ་ནང་ལ་ཡང་དང་བསྐྱར་དུ་འགྲེལ་ནས་དཔུང་རོགས་ཀྱི་འདེགས་བསྐྱོར་ཞིག་ཨེ་ཡོང་གི་རེ་བ་ཚད་མེད་འཁུར་ཏེ་བསྡད་པའི་འབྲས་བུ་ནི་ཤ་ཁྲག་ཟད་ནས་རུས་ལ་ཐུག་གྲབས་ཀྱི་ཤ་གཟན་ཚོན་པོ་རང་ལག་ནས་རྦད་དེ་ཤོར་བའི་གྱོང་ནག་ཆེན་པོ་ཞིག་ཏུ་གྱུར་བ་དང༌། གྱོང་ནག་དེ་ནི་མེས་པོ་གོང་མ་ཚོའི་ལོ་རྒྱུས་ཀྱི་མཐའ་མ་ལ་ཤོག་ལྷེ་འགའ་ཞིག་གིས་ཁ་གསབ་ལྷག་སྣོན་མི་བྱེད་ཐབས་མེད་ཅིག་ཆགས་པ་རེད་ཨང༌།  ཀྱེ་མ།  ངའི་དྲིན་ཆེན་གྱི་ཕ་མ་ལྟ་བུའི་སའི་གོ་ལའི་སྒང་གི་རང་ས་རང་ཡུལ། ཤ་ཁྲག་དང་གྱེས་མ་མྱོང་བའི་སྤྱང་ལྟོགས་ཀྱི་མཆེ་བར་ནས་ཁྱོད་ནམ་ཞིག་ལ་ཐར་རམ། བྱེས་སུ་གྱར་བའི་ང་ཚོ་ཁྱེད་ཀྱི་ལྟོ་ཐོག་ནས་དཀྱིལ་ཀྲུང་གིས་བསྡད་ཐུབ་པའི་མགོ་ཐོག་གི་ཉི་མ་དེ་ནམ་ཞིག་ལ་ཤར་རམ།