དེ་རིང་སྔ་དྲོར་སྤྱི་འཐུས་གྲོས་ཚོགས་ནང་། ཁ་སང་སྤྱི་འཐུས་ཚོགས་གཙོ་གཞོན་གཉིས་དང་སྲིད་སྐྱོང་མཆོག་བཅས་༧གོང་ས་མཆོག་ལ་མཇལ་ཁ་ཞུས་སྐབས། ༧གོང་ས་མཆོག་གིས་ད་ལོའི་དམངས་གཙོའི་དུས་དྲན་ཉིན་བཀའ་སློབ་གནང་བ་དེ་གཙོ་བོ་གཞུང་ཞབས་ལས་བྱེད་ཚོས་ཀུན་སྤྱོད་ཡག་པོ་བྱེད་དགོས་པའི་སྐོར་ཡིན་ཚུལ་ངོ་སྤྲོད་གནང་སོང་།
དེ་རིང་ཕྱི་ཚེས་ ༢༣ ཉིན། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་ལྔ་པའི་སྔ་དྲོའི་ལས་རིམ་མགོ་འཛུགས་སྐབས། ཉེ་ལམ་༧གོང་ས་མཆོག་ཐུགས་ཕམ་གྱི་བཀའ་སློབ་ཅིག་གནང་བའི་ཐད། ཟླ་འདིའི་ཚེས་ ༡༩ ཉིན་སྤྱི་འཐུས་གྲོས་ཚོགས་ནང་སྤྱི་མོས་ཐོག་ལྷ་དགོངས་དྭངས་གསལ་ཡོང་བའི་གཞུང་འབྲེལ་གྲོས་ཆོད་གྲོས་འཆར་ཞིག་བཞག་ཡོད་པ་དེ་དང་འབྲེལ་ཏེ། ཁ་སང་ཉིན་རྒྱབ་སྤྱི་འཐུས་ཚོགས་གཙོ་མཆོག་གཞོན་གཉིས་དང་སྲིད་སྐྱོང་མཆོག་བཅས་༧གོང་ས་མཆོག་ལ་མཇལ་ཁ་ཞུས་པའི་ནང་དོན་གསལ་བཤད་གནང་སོང་།
དེའི་སྐོར་ཚོགས་གཙོ་མཆོག་གིས་གསུངས་དོན། “ཁ་སང་ཉིན་རྒྱབ་ཆུ་ཚོད་ ༡ ཙམ་ལ་སྐུ་མདུན་ལ་མཇལ་ཁ་ཐོབ་སོང་། ཆུ་ཚོད་གཅིག་རིང་༸རྒྱལ་བ་རིན་པོ་ཆེས་ཐུགས་ལྷོད་ལྷོད་ཀྱིས་དགོངས་པར་གང་ཡོད་པ་ཆ་ཚང་གསུངས་གནང་སོང་། ནང་དོན་རེ་རེ་བྱས་ཏེ་ཞུ་དགོས་པ་མི་འདུག དགོངས་པར་གང་ཡོད་པ་ཆ་ཚང་ད་ལྟའི་བར་ང་ཚོས་གསན་མྱོང་བ་ཞིག་ལས་དེའི་ནང་དམིགས་བསལ་གསར་བ་གང་ཡང་ཡོད་པ་མ་རེད། ” ཅེས་དང་། “ ༧གོང་ས་མཆོག་གིས་དམངས་གཙོའི་དུས་དྲན་གྱི་ཉིན་རྒྱབ་ལས་བྱེད་སྡེ་འགན་ཡན་ལ་བཀའ་སློབ་གནང་སྐབས། གཙོ་བོ་ལས་བྱེད་ཚོའི་ཀུན་སྤྱོད་ཡག་པོ་དང་འགན་འཁུར་རྒྱུ། དཔོན་ཉམས་མ་འཁུར་བ་བཅས་ཀྱི་ཐོག་ལ་དགོངས་ཚུལ་གསུངས་བ་ཡིན་ཞེས་གསུངས་སོང་། ལས་བྱེད་ཞུ་བའི་སྐབས་སུ་གཞུང་ཞབས་ལས་བྱེད་གཅིག་པུ་གོ་རྒྱུ་མིན་པར། ང་ཚོ་མགོར་སྡོད་མཁན་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་ནས་གཞུང་མང་ལས་བྱེད་ཚང་མར་གོ་དགོས་པའི་གནས་སྟངས་ཤིག་རེད། དེའི་ཞོར་དུ་སྤྱི་འཐུས་རྣམ་པ་དང་གྲོས་ཚོགས་ལ་སྙན་སེང་ཞུས་པའི་ཐོག་ནས་བྱུང་པ་རེད། དེའི་གནས་སྟངས་ཀྱི་ཐོག་ཁྱེད་རང་ཚོ་འཁྲུག་ཐེབས་འདུག་ཅེས་བཀའ་ཕེབས་སོང” ཞེས་གསུངས་སོང་།
ཚོགས་གཙོ་མཆོག་གིས་མུ་མཐུད་དོན། “༧གོང་ས་མཆོག་དགུང་གྲངས་ ༡༡༣ ནས་ ༡༠༨ བར་ཉུང་འཕྲི་མཛད་པའི་གནས་སྟངས་དེ། སྐུའི་གཟུགས་བབ་ཀྱི་དངོས་ཡོད་གནས་སྟངས་ཐོག་ནས་འགྲེལ་བཤད་རྒྱས་པོ་ཞིག་སྐྱོན་གནང་སོང་། གྲོས་ཚོགས་བརྒྱུད་ནས་བོད་ཕྱི་ནང་གཉིས་ཀྱི་མང་ཚོགས་ལ་ཞུ་དགོས་པ་གཙོ་བོ། ༸གོང་ས་མཆོག་གིས། ‘ ཁྱེད་རང་ཚོ་ཐུགས་ངལ་རྩ་བ་ཉིད་ནས་གནང་མི་དགོས། དབུ་མའི་ལམ་གྱི་ཐོག་ནས་བོད་ཀྱི་བདེན་མཐའ་སེལ་ནས་བོད་མི་ཚོ་གཞིས་བྱེས་མཉམ་འཛོམས་ཡོང་བའི་དུས་ཚོད་ཅིག་ཏན་ཏན་ཡོང་གི་རེད། ངས་དུས་རྒྱུན་དེ་ལྟར་སྨོན་ལམ་རྒྱག་གི་ཡོད། དེ་འདྲ་ཞིག་འབྱུང་བའི་བར་ངའི་མི་ཚེའི་ལོ་ཡི་འདང་ངེས་ཤིག་ཡོང་གི་རེད’ ཅེས་བཀའ་གནང་སོང་། དེ་བཞིན། བརྟན་བཞུགས་ཀྱི་སྐོར་ལ་སྙན་སེང་ཞུས་སྐབས་བརྟན་བཞུགས་མི་དགོས་པར། ངོས་ཀྱིས་བཤད་བཞག་པའི་ནང་དོན་འཛིན་སྐྱོང་དང་སྤྱི་འཐུས། ལས་བྱེད་ཚོས་འབད་པ་ལྷོད་མེད་ཀྱི་ཐོག་ནས་བསྒྲུབ་རྒྱུ་གལ་ཆེན་པོ་རེད་ཅེས་བཀའ་གནང་སོང ” ཞེས་གྲོས་ཚོགས་ལ་གསལ་བཤད་གནང་སོང་།
དེའི་རྗེས་སྲིད་སྐྱོང་བློ་བཟང་སེང་གེ་མཆོག་གིས་གོང་མཚུངས་ལྟར། ཁ་སང་༸གོང་ས་མཆོག་ལ་མཇལ་ཁ་ཞུས་སྐབས་ཀྱི་གནས་ཚུལ་ཁག་གསལ་བཤད་དང་སྦྲགས། སྤྱི་འཐུས་རྣམ་པ་ས་གནས་ཁག་ཏུ་ཕེབས་སྐབས་མང་ཚོགས་ལ་གསལ་བོ་བཟོ་དགོས་སྐོར་གསུངས་སོང་།
གསར་འགོད་པ། དོན་གོ
བྱང་ཆུབ་སེམས་དཔའ་འགྲོ་བའི་དོན་དུ་བྱོན།
འགྲོ་དོན་འགྲུབ་མིན་ལས་སྨོན་དམ་ཚིག་མཐུ།
གཞིས་བྱེས་ལྷན་འཛོམས་རང་དབང་ཉིན་མོ་གང།
འཐོབ་ངེས་དབུགས་དབྱུང་འདི་ཉིད་སྐལ་བ་བཟང།
ཞབས་ཞུའི་ལས་རེ་སྒྲུབ་པའི་ནུས་མེད་ཀྱང།
ཞབས་འདྲེན་མི་ཞུའི་དམ་རེ་བཅའ་བར་འཚལ།
༸གོང་ས་མཆོག ༸སྐུ་ཚེ་ཡུན་བརྟན་ཤོག། །།
ག་རེ་བྱས་ནས་དགུང་གྲངས་༡༡༣་ནས་༡༠༨ བར་ཉུང་འཕྲི་བྱུང་པ་རེད།
སུ་ཡིས་ཤེས་ན་གསུང་རོགས་མཛོད།
༧ སྐྱབས་མགོན་མི་འགྱུར་ནམ་མཁའི་ཀློང་ཆེན་ཡངས།།
དབུ་ཁྲིད་མི་འགྱུར་ཉི་ཟླ་རྣམ་གཉིས་རྒྱས།།
དད་དམ་མི་འགྱུར་གཞི་བྱེས་སྐར་ཚོགས་བརྟན།།
གནས་ལུགས་མི་འགྱུར་བདེན་པ་རྒྱལ་གྱུར་ཅིག །