ལྕམ་ཨན་རྗི་ལཱར་རྒྱལ་ཁ་ཐོབ།

འཇར་མན་གྲོས་ཚོགས་འོག་མའི་རྒྱལ་ཡོངས་འོས་བསྡུའི་ཁྲོད། ད་ལྟའི་སྲིད་བློན་ལྕམ་ཨན་རྗི་ལཱའི་སྲིད་དོན་ཚོགས་པར་རྒྱལ་ཁ་ཆེན་པོ་ཐོབ་ཡོད་འདུག

ཁ་སང་ཕྱི་ཚེས་ ༢༢ ཉིན་འཇར་མན་གྲོས་ཚོགས་འོག་མའི་སྲིད་བློན་འོས་བསྡུ་སྐབས་ ༡༨ པ་གནང་ཡོད་པ་དང་། གྲོས་ཚོགས་འོག་མར་འཐུས་མི་ ༦༣༠ ཡོད་པ་ལས། ཐེངས་འདིར་ད་ལྟའི་སྲིད་བློན་ལྕམ་ཨན་རྗི་ལཱ་(Angela Merkel)ལགས་ཀྱི་ཡེ་ཤུ་དམངས་གཙོ་མཐུན་ཚོགས་( CDU) ལ་འོས་གྲངས་བརྒྱ་ཆ་ ༤༢ ཐོབ་ཡོད་པ་དང་།  ཁ་གཏད་ཚོགས་པའི་སྐུ་ཞབས་བེར་ (Peer Steinbruck)གྱི་སྤྱི་ཚོགས་རིང་ལུགས་དམངས་གཙོ་ཚོགས་པ་ (SDP) ལ་འོས་གྲངས་བརྒྱ་ཆ་ ༢༦ བཅས་ཐོབ་སྟེ་ཡེ་ཤུ་དམངས་གཙོ་ཚོགས་པར་རྒྱལ་ཁ་ཐོབ་སྟེ། འབྱུང་འགྱུར་ཕྱི་ཟླ་ ༡༡ པའི་ནང་ལྕམ་ཨན་རྗི་ལ་མཆོག་འཇར་མན་གྱི་སྲིད་བློན་ཐེངས་གསུམ་པར་བཞུགས་རྒྱུ་ཡིན་འདུག  

འཇར་མན་འོས་བསྡུ་ལྷན་ཁང་གིས་ལྕམ་ཨན་རྗི་ལཱའི་སྲིད་དོན་ཚོགས་པར་རྒྱལ་ཁ་ཐོབ་པ་གསལ་བསྒྲགས་བསྐྱངས་མ་ཐག རྒྱལ་ས་སྦར་ལིན་ (Berlin)གཙོས་གྲོང་ཁྱེར་མང་པོའི་ནང་མང་ཚོགས་ཀྱིས་དགའ་བསུ་ཆེན་པོ་གནང་ཡོད་པ་དང་། ཡེ་ཤུ་དམངས་གཙོ་མཐུན་ཚོགས་ཀྱི་མདུན་ཐང་དུ་མང་ཚོགས་འདུ་འཛོམས་བྱས་ཏེ། “ འབྱུང་འགྱུར་ལོ་བཞིའི་རིང་ང་ཚོས་མཉམ་བསྒྲིལ་ཐོག འཇར་མན་གྲུབ་འབྲས་ལྡན་པའི་རྒྱལ་ཁབ་ཅིག་ཏུ་མངོན་འགྱུར་བྱེད་རྒྱུ་ཡིན” ཞེས་བརྗོད་འདུག

འཇར་མན་གྲོས་ཚོགས་ནང་གི་ཡེ་ཤུ་དམངས་གཙོ་མཐུན་ཚོགས་མགོ་ཁྲིད་སྐུ་ཞབས་བོལ་ཀར་(Volker Kauder) གྱིས་གསར་འགོད་པར་བརྗོད་དོན། ལྕམ་ཨན་རྗིི་ལཱ་ཡིས་གཞུང་འཛིན་སྐྱོང་ཆོག་པ་དེ་འཇར་མན་མང་ཚོགས་ཀྱིས་ཁོང་མོར་སྲིད་བློན་མུ་མཐུད་གནང་རྒྱུར་མོས་མཐུན་ཡོད་པའི་རྣམ་གྱུར་གསལ་བོར་བསྟན་པ་རེད་ཅེས་བརྗོད་འདུག

སྤྱི་ཚོགས་རིང་ལུགས་དམངས་གཙོ་ཚོགས་པའི་སྲིད་བློན་འོས་མི་བེར་ལགས་ཀྱིས་སྦི་སྦི་སིའི་གསར་འགོད་པར། “ ང་ཚོས་རེ་བ་བྱེད་པ་བཞིན་གྲུབ་འབྲས་འཐོན་མེད་སྐོར་དང་། ཡེ་ཤུ་དམངས་གཙོ་མཐུན་ཚོགས་དང་མཉམ་དུ་གཞུང་འཛིན་པར་ཟླ་སྒྲིལ་བྱེད་འདོད་མེད ” ཅེས་བརྗོད་འདུག་ཀྱང་། ཁོའི་སྲིད་དོན་ཚོགས་པའི་ནང་ཁུལ་དུ་གཞུང་འཛིན་ཚོགས་པ་དང་མཉམ་དུ་ཟླ་སྒྲིལ་གཏོང་མིན་ཐོག་ཕྱོགས་ཁག་གཉིས་ཆགས་ཡོད་འདུག

སྲིད་དོན་དབྱེ་ཞིབ་པ་ཚོས་ཐེངས་འདིར་ལྕམ་ཨན་རྗི་ལཱར་འཇར་མན་ལ་སྲིད་བློན་འོས་འདེམས་ཐེངས་གསུམ་པ་ཐོེབ་པ་དེ་ནི། ཁོ་མོས་འཇར་མན་སྲིད་བློན་ཐེངས་གཉིས་གནང་པའི་གྲུབ་འབྲས་ལ་མང་ཚོགས་ཀྱིས་ངོས་འཛིན་གནང་བ་ཞིག་དང་། ཁོང་མོར་ཉམས་མྱོང་ཆེན་པོ་རག་ཡོད་པ། སྤྱི་ཚོགས་ནང་ཤུགས་རྐྱེན་ཆེ་པ་བཅས་ལ་བརྟེན་ནས་བྱུང་བ་ཡིན་སྐོར་བརྗོད་འདུག

ལྕམ་ཨན་རྗི་ལཱ་ལགས་ནི། ༡༩༥༧ ལོར་འཇར་མན་གྱི་བྱང་ཕྱོགས་གྲོང་ཁྱེར་ཧམ་སྦར་གྷི་ (Humburg)ནང་སྐྱེས་ཤིང་། ༡༩༧༩ ལོར་དངོས་ཁམས་རིག་པའི་ཐོག་འབུམ་རིམ་པ་ཐོན། ༡༩༨༩ ལོ་ནས་བཟུང་ཆབ་སྲིད་ལས་དོན་ནང་འཛུལ་ཞུགས་བྱས་ཏེ་ ༡༩༩༠ ལོར་འཇར་མན་ཤར་བྱང་གཉིས་ཟླ་སྒྲིལ་རྗེས་ཁོང་མོ་གྲོས་ཚོགས་འོག་མའི་འཐུས་མིར་བདམས་ཐོན་བྱུང་སྟེ་ཁོར་ཡུག་དང་ཉིང་རྡུལ་སྲུང་སྐྱོབ་བློན་ཆེན་གནང་ཡོད། ༢༠༠༥ ལོར་འཇར་མན་གྱི་སྲིད་བློན་དང་། ༢༠༠༩ ལོར་ཐེངས་གཉིས་པའི་སྲིད་བློན་དུ་བདམས། མི་འགྱངས་བར་ཐེངས་གསུམ་པའི་སྲིད་བློན་གནང་རྒྱུ་ཡིན་འདུག 

གསར་འགོད་པ། ལྷ་སྐྱབས་རྒྱལ།