དུས་ཀྱི་འགྱུར་བ་དང་བསྟུན་པའི་ལས་འགུལ་ཞིག་སྤེལ་མ་ཐུབ་པར་དགོངས་སེལ་ཞུ།

དེ་རིང་སྔ་དྲོར་ཉིན་གྲངས་གསུམ་རིང་གི་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཆེན་ཐེངས་དྲུག་པ་མགོ་འཛུགས་ཐོག ཚོགས་གཞོན་ལགས་ཀྱིས་འདས་པའི་ལོ་གསུམ་རིང་ལས་དོན་ཤུགས་ཆེན་པོ་གནང་ཐུབ་མེད་ཀྱང་ཚོགས་པ་ཉམས་རྒུད་དུ་གཏན་ནས་འགྲོ་བཅུག་མེད་ཟེར།

དེ་རིང་སྔ་དྲོའི་ཆུ་ཚོད་ ༩ པ་ཐོག དྷ་ས་སྟོད་པ་སྐྱིད་སྡུག་ཚོགས་ཁང་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་ཆེན་ཐེངས་ ༦ པ་མགོ་འཛུགས་གནང་སོང་། ཚོགས་ཆེན་གྱི་སྐུ་མགྲོན་གཙོ་བོར་ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས་ཀྱིས་གཙོས་དྷ་ས་ཁུལ་གྱི་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ། དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་དང་རྒྱུན་ལས་ཟུར་པ། དེ་བཞིན་ལས་ཐོག་དབུས་རྒྱུན་རྣམ་པ་དང་སློབ་མ་བཅས་མི་གྲངས་ ༡༠༠ ལྷག་འདུ་འཛོམས་གནང་འདུག

ཚོགས་འདུ་དབུ་འབྱེད་ཀྱི་ཐོག་མར་སྐུ་མགྲོན་གཙོ་བོ་དགེ་བཤེས་ཐུབ་བསྟན་དབང་ཆེན་ལགས་ཀྱིས་མར་མེ་ཞལ་འབྱེད་དང་། ཚོགས་ཞུགས་པ་ཚང་མས་བོད་པའི་བདེན་དོན་ཆེད་ཚེ་སྲོག་ཤོར་བ་དག་ལ་མྱ་ངན་གུས་འདུད་བཅས་སྔོན་འགྲོའི་ལས་རིམ་ཁག་གྲུབ་རྗེས། སྐུ་མགྲོན་གཙོ་བོ་ལགས་ཀྱིས་དགུ་བཅུ་གསུམ་ལས་འགུལ་ཚོགས་པས་རྩོམ་སྒྲིག་གནང་བའི་ཆབ་སྲིད་བཙོན་པའི་ལོ་རྒྱུས་དེབ་ཕྲེང་ ༢༣ པ་༼དཔའ་རིས་པ་དོན་ཡོད་སྐྱབས་ཀྱི་མི་ཚེའི་མྱོང་བ༽ཞེས་པ་དང་། ༼རྒྱ་ནག་གི་ཉེ་རབས་ལོ་རྒྱུས༽སྟོད་ཆ་བཅས་དབུ་འབྱེད་དང་སྦྲགས་ལས་བྱེད་རྣམས་ལ་ཕྱག་རྟགས་བཅས་གནང་སོང་།

ཚོགས་གཞོན་ཀླུ་མཁར་བྱམས་ལགས་ཀྱིས་དབུས་རྒྱུན་སྐབས་ ༥ པའི་ལས་དོན་ངོ་སྤྲོད་གནང་སྐབས། འདས་པའི་ལོ་གསུམ་རིང་རྒྱ་གར་གཙོ་བོར་གྱུར་བའི་ཐའེ་ཝན་དང་ཨ་རི་སོགས་སུ་བོད་དོན་ཞུ་གཏུག་གི་ལས་འགུལ་སྣ་ཚོགས་སྤེལ་ཡོད་ཀྱང་། ཨ་རི་དང་ཡུ་རོབ། དེ་བཞིན་དཀྱིལ་ཤར་ཡུལ་གྲུ་ཁག་ཏུ་གསར་བརྗེ་ཤུགས་ཆེན་འབྱུང་བཞིན་ཡོད་པ་དང་། ལྷག་པར་དུ་རྒྱ་གཞུང་གི་བཙན་གནོན་འོག་ད་ལྟའི་བར་བོད་མི་ ༡༢༠ ལྷག་གིས་རང་ལུས་མེར་བསྲེགས་བཏང་བ་དང་། དེ་བཞིན། ༸གོང་ས་མཆོག་གིས་ཆབ་སྲིད་སྐུ་དབང་རྩིས་སྤྲོད་དང་འབྲེལ་སྲིད་སྐྱོང་གསར་འདེམས་བྱུང་བ་སོགས་བོད་རྒྱལ་ཁབ་ཆེན་མོའི་ལོ་རྒྱུས་ཀྱི་ཀྱོག་མཚམས་ཆེན་པོ་ཞིག་ཏུ་བསླེབས་ཡོད་ཀྱང་།  དུས་ཀྱི་འགྱུར་བ་དང་བསྟུན་པའི་ལས་འགུལ་ཤུགས་ཆེན་པོ་ཞིག་སྤེལ་མ་ཐུབ་པར་དགོངས་སེལ་ཞུ་རྒྱུ་དང་། དེ་བཞིན་དཔལ་འབྱོར་གྱི་ཆ་ནས་ཐོག་མར་རྒྱུན་ལས་སྐབས་བཞི་པས་ཁྱོན་ཧིན་སྒོར་འབུམ་ ༨༦ ལྷག་རྩིས་སྤྲོད་གནང་བ་དེ་ད་ལྟ་འབུམ་ ༩༣ ཡས་མས་ཤིག་ལ་འཕར་ཡོད་སྐོར་དང་། ཚོགས་མི་ ༥༣ ཙམ་གསར་ཞུགས་གནང་ཡོད་པ་སོགས་འདས་པའི་ལོ་གསུམ་རིང་ཚོགས་པ་ཉམས་རྒུད་དུ་གཏན་ནས་སོང་མེད་སྐོར་བརྗོད་སོང་།

དེ་རྗེས་སྐུ་མགྲོན་གཙོ་བོ་ལགས་ཀྱིས་གསུང་བཤད་གནང་དོན། “ཕྱི་རྒྱལ་ཁག་ན་བོད་པར་རྒྱབ་སྐྱོར་བྱེད་མཁན་མང་པོ་ཡོད་པ་རེད། གཞུང་དང་དཔོན་རིགས་ཚོས་ཀྱང་རྒྱབ་སྐྱོར་གནང་གི་ཡོད་ཀྱང་། ང་ཚོའི་འདོད་པ་ལྟར་རྒྱབ་སྐྱོར་གནང་ཐུབ་ཀྱི་མེད་ལ། དེ་བཞིན་ང་ཚོ་བོད་པར་དགའ་མོས་བྱེད་མཁན་དང་གྲོགས་པོ་མང་པོ་ཡོད་པ་རེད། ཡིན་ནའང་། ཁོ་ཚོ་ཁག་ཅིག་གིས་དངོས་གནས་ཁ་ཡོད་ལག་ཡོད་ཀྱིས་བོད་པར་རྒྱབ་སྐྱོར་བྱེད་ཀྱི་ཡོད་པ་དང་། ཁག་ཅིག་གིས་མིང་ཙམ་མ་གཏོགས་རང་མགོ་ཡང་ཐོན་གྱི་ཨེ་ཡོད་བསམ་པ་ཞིག་ཡོད་སྟབས། བོད་ཀྱི་བདེན་མཐའ་སེལ་བར་ཕྱི་རྒྱལ་རོགས་ཚོགས་གཅིག་པུ་ལ་བརྟེན་ནས་བསྡད་པ་ཡིན་ན་ཕལ་ཆེར་ཁག་པོ་རེད་དྲན་གྱི་འདུག ང་ཚོ་བོད་པ་ཚང་མར་བོད་ཀྱི་བདེན་མཐའ་སེལ་བའི་འགན་ཡོད་པ་ལྟར། ང་རང་ཚོས་འགན་ཁུར་དགོས་པ་ལས་ང་ཚོས་འགན་མ་འཁུར་བ་ཡིན་ན། ཕྱི་རྒྱལ་བོད་དོན་རྒྱབ་སྐྱོར་བ་ཚོས་རྒྱབ་སྐྱོར་གནང་བ་ཡིན་ནའང་ནུས་པ་ཞེ་དྲག་ཐོན་འཐུབ་ཀྱི་མ་རེད།”ཅེས་གསུངས་སོང་།

དགུ་བཅུ་གསུམ་གྱི་རྒྱུན་ལས་གསར་འདེམས་སྐོར་ལ་ཁོང་གིས། “ མ་འོངས་པར་དགུ་བཅུ་གསུམ་གྱི་དབུས་རྒྱུན་ལ་སུ་ཞིག་བསླེབ་པ་ཡིན་ནའང་རྒྱབ་སྐྱོར་བྱ་རྒྱུ་དེ་ཁྱེད་རང་ཚོ་ཚང་མའི་ལས་འགན་རེད། རྒྱབ་སྐྱོར་བྱས་པ་དང་མཉམ་དུ་ཕྱག་ལས་ཧུར་བརྩོན་གནང་རོགས་ཟེར་ནས་རེ་འདུན་ཞུ་དགོས་པ་རེད། ཁོ་ཚོས་མ་གནང་པ་ཞིག་ཡོད་ན་དེ་གནང་རོགས་ཟེར་དགོས་དང་། ད་དུང་མ་གནང་བ་ཡིན་ན་ཁོ་རང་ཚོའི་ནོར་འཁྲུལ་རེད།  ཁོ་ཚོས་གནང་བ་དེར་ང་ཚོས་རྒྱབ་སྐྱོར་བྱས་པ་ཡིན་ན། དགུ་བཅུ་གསུམ་ཕྱུག་པོ་དང་རྡོག་རྩ་གཅིག་སྒྲིལ་ཆགས་ཀྱི་རེད། དེ་འདྲ་བྱུང་བ་ཡིན་ན། བོད་ནང་ཡོད་པའི་ཁྱེད་རང་ཚོའི་ཕ་མ་སྤུན་མཆེད་ཚོས་གོ་བ་ཡིན་ནའང་དགའ་འོས་པ་ཞིག་ཆགས་སྟབས། གང་ལྟར་གཞིས་ལུས་བོད་མི་ཚོས་བཙན་བྱོལ་བོད་མི་རྣམས་ཀྱིས་དངོས་གནས་བོད་དོན་ཡག་པོ་བསྒྲུབ་ཀྱི་འདུག་བསམ་པའི་ཚོར་བ་དང་སེམས་ཤུགས་སྤར་ཐུབ་པ་ཞིག་བཟོ་རྒྱུ་དེ་ང་ཚོའི་ལས་འགན་གཙོ་བོ་རེད། ”ཅེས་སོགས་གསུངས་སོང་།  

ཚོགས་ཆེན་གྱི་ཉིན་གྲངས་གསུམ་རིང་གི་ལས་རིམ་ཁག་ནི། རྒྱུན་ལས་སྐབས་ལྔ་པའི་རྩིས་ཁྲར་ཞིབ་འཇུག་དང་ཚོགས་ཆེན་ཐེངས་ལྔ་པའི་གྲོས་ཆོད་ལ་བསྐྱར་ཞིབ་དང་མཇུག་སྐྱོང་གནང་ཕྱོགས། སྒྲིག་གཞི་བསྐྱར་བཅོས། ༸གོང་ས་མཆོག་གི་སྐུ་ཕྱྭ་དང་འབྲེལ་བའི་རྒྱ་གཞུང་གི་སྤྲུལ་སྐུའི་ཡང་སྲིད་ལམ་ལུགས་སོགས་མངོན་ལྐོག་གི་སྲིད་བྱུས་སྣ་ཚོགས་ལ་གདོང་ལེན་གནང་ཕྱོགས། དེ་བཞིན། བོད་ནང་གི་གནས་བབ་ལ་གཞིགས་ནས་ལས་འགུལ་སྤེལ་ཕྱོགས་དང་། ཆབ་སྲིད་བཙོན་ཟུར་ནང་ཁུལ་དུ་ཆིག་སྒྲིལ་གཏོང་ཐབས། ས་གནས་ཡན་ལག་དགོས་མིན་སོགས་ཀྱི་ཐོག་གྲོས་བསྡུར་གནང་རྒྱུ་ཡིན་པ་དང་། ཚེས་ ༢༩ ཉིན་གྲོས་ཆོད་འཇོག་རྒྱུ་དང་སྐབས་དྲུག་པའི་རྒྱུན་ལས་གསར་འདེམས་བཅས་གནང་རྒྱུ་ཡིན་འདུག

གསར་འགོད་པ། པདྨ་མཚོ།