དེ་རིང་གཟའ་ཕུར་བའི་ཞོགས་པར་ཁྲིམས་ཞིབ་པ་ངག་དབང་ཆོས་གྲགས་ལགས་ཀྱིས། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གི་མདུན་དུ་ལས་ཁུར་དམ་འབུལ་གནང་སོང་།
དེ་རིང་ཕྱི་ཚེས་ ༣ ཉིན་གྱི་ཞོགས་པའི་ཆུ་ཚོད་ ༩།༣༠ སྟེང་། བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་མཇལ་འཕྲད་ཁང་དུ། ཉེ་ལམ་སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ཐོག་བདམས་ཐོན་བྱུང་བའི་ཁྲིམས་ཞིབ་པ་ངག་དབང་ཆོས་གྲགས་མཆོག་ལས་ཁུར་དམ་འབུལ་གྱི་མཛད་སྒོ་ཚོགས་སོང་ལ། དམ་འབུལ་མཛད་སྒོའི་ཐོག་ཁྲིམས་ཞིབ་པ་ཆེ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ། བདམས་ཐོན་ཁྲིམས་ཞིབ་པ། སྤྱི་འཐུས་ཚོགས་གཙོ་གཞོན་གཉིས་ཀྱིས་དབུས་པའི་སྤྱི་འཐུས་རྒྱུན་ལས་དང་། སྲིད་སྐྱོང་བློ་བཟང་སེང་གེའི་དབུས་བཀའ་བློན། རང་དབང་ཅན་གྱི་སྡེ་ཚན་ཁག་གི་འགན་འཛིན། བོད་མིའི་སྒྲིག་འཛུགས་ལྷན་ཁང་ཁག་གི་དྲུང་ཆེ་ཆུང་བཅས་འདུ་འཛོམས་གནང་སྟེ། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་དང་། བདམས་ཐོན་ཁྲིམས་ཞིབ་པ་ངག་དབང་ཆོས་གྲགས་ལགས་ནས་རྟེན་གསུམ་འདེགས་འབུལ། བདམས་ཐོན་ཁྲིམས་ཞིབ་པས་ཁྲིམས་ཞིབ་པ་ཆེ་བ་མཆོག་གི་མདུན་དུ་ལས་འཁུར་དམ་འབུལ་བཅས་གནང་རྗེས། མཛད་གཙོ་རྣམ་པ་དང་། དྲུང་ཆེ་དང་འགན་འཛིན་རྣམ་པས་བདམས་ཐོན་ཁྲིམས་ཞིབ་པར་རྟེན་འབྱུང་མཇལ་དར་སྒྲོན་འབུལ་བཅས་གནང་སོང་།
ཁྲིམས་ཞིབ་པ་ངག་དབང་ཆོས་གྲགས་མཆོག་ནི་བོད་ནས་སྐྱེས་ཤིང་། ༡༩༥༩ ལོར་འབྲུག་བརྒྱུད་བཙན་བྱོལ་དུ་འབྱོར་རྗེས་ཨ་སམ་དང་ཨོ་རི་ས་བཅས་སུ་གནས་སྡོད་ཀྱིས་འཛིན་རིམ་བཞི་བའི་བར་སློབ་སྦྱོང་དང་། དེའི་རྗེས་པ་ཆ་མ་རི་བོད་གཞུང་གཏན་སློབ་དང་མ་སུ་རི་བཅས་སུ་སློབ་སྦྱོང་གནང་སྟེ་འཛིན་རིམ་བཅུ་གཅིག་སློབ་ཐོན་བྱུང་ཡོད་པ་དང་། སློབ་མཐར་ཕྱིན་རྗེས་དགེ་རྒན་གྱི་ཕྱག་ལས་གནང་ཞོར་མཐོ་སློབ་ཀྱི་སློབ་སྦྱོང་གནང་ཏེ་ལག་ཁྱེར་བླངས་ཡོད་ལ། ཨ་རིའི་ཨིན་ཌི་ཡ་ན་མཐོ་སློབ་དུ་འཛིན་སྐྱོང་གི་སློབ་སྦྱོང་དང་། ཝེ་སི་ཀོན་སིན་མཐོ་སློབ་དུ་རྒྱལ་སྤྱིའི་ཆབ་སྲིད་ནང་གི་རྒྱ་ནག་གི་གནས་བབ་དང་རྒྱལ་སྤྱིའི་འབྲེལ་ལམ་སོགས་ཀྱི་ཐོག་སློབ་སྦྱོང་བྱས་ཡོད། ༡༩༧༥ ལོར་གཞུང་ཞབས་ལས་བྱེད་ཀྱི་ཁོངས་སུ་ཞུགས་ཏེ། ད་ལྟའི་བར་ཨོ་རི་ས་རིམ་གདན་བཟོ་གྲྭའི་རྩིས་པ་དང་གཞིས་ཆགས་ཀྱི་སྐད་དྲུང་། ནང་སྲིད་ལས་ཁུངས་ཀྱི་གཞོན་དྲུང་། ཀུ་ལུ་བདེ་དོན། ངྷ་ས་ལས་བྱེད་བདག་གཉེར་ཁང་གི་འགན་འཛིན། ལ་དྭགས་གཞིས་སྤྱི། ལྷོ་སྤྱི། བོད་གཞུང་ཟློས་གར་ཚོགས་པའི་འགན་འཛིན། ནང་སྲིད་དྲུང་འཕར། ཚོགས་དྲུང་ལས་ཁུངས་ཀྱི་དྲུང་འཕར། བདེ་སྲུང་ལས་ཁུངས་ཀྱི་འཛིན་སྐྱོང་དྲུང་ཆེ། ཆེས་མཐོའི་ཁྲིམས་ཞིབ་ཁང་གི་སྤྱི་ཁྱབ་དྲུང་ཆེ། བོད་གཞུང་ཆོས་རིག་ལས་ཁུངས་ཀྱི་དྲུང་ཆེ་བཅས་བཅས་ཕྱག་ལས་རབས་དང་རིམ་པ་གནང་ཡོད་པ་མ་ཟད། ཉེ་ལམ་ཆེས་མཐོ་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཅིག་ཏུ་བདམས་ཐོན་གྱིས་དེ་རིང་ནས་བཟུང་དངོས་སུ་ལས་འཁུར་ཞུ་བཞིན་ཡོད།
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཉེ་ལམ་གྲོས་ཚོགས་རྭ་བའི་ནང་ནས་འོས་འདེམས་ཀྱི་སྒྲིག་གཞི་གསར་བ་ཞིག་བརྒྱུད་ཁྲིམས་ཞིབ་པར་འོས་ཐོན་བྱུང་བའི་སྐུ་ཞབས་ངག་དབང་ཆོས་གྲགས་ལགས་སུ་འཚམས་འདྲི་ཞུ། སྐུ་ཉིད་ལོ་ན་རྒས་ཀྱང་གསར་ཚུགས་དོད་པ་དེ་གུས་མོས་སྣང་བར་འགྲོ་ཤོས་ཡིན། དེ་བཞིན་ཉིད་ཀྱི་མི་ཚེ་ཧྲིལ་བོ་བཙན་བྱོལ་སྲིད་གཞུང་གི་སྐྱིད་སྡུག་དང་འདྲེས་ཤིང་གཤིབ་ནས་ཡོང་བ་ཞིག་ཡིན་པའི་ངོས་ནས་རྒྱུས་ཆེ་ཞིང་། ཁྲིམས་ཞིམ་པར་འོས་འཚམས་སུ་མཐོང་། སླར་ཡང་བཀྲ་ཤིས་བདེ་ལེགས།།