ཁམས་ནགས་ཤོད་འབྲི་རུ་རྫོང་གི་ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ནམ་པིར་མིང་ལ་ཞོགས་དྲིལ་དང་ཁོང་གི་གྲོགས་པོ་གཡུལ་རྒྱལ་གཉིས་རྒྱ་གཞུང་གི་ཉེན་རྟོག་པས་འཇུ་བཟུང་བྱས་འདུག
ཟླ་འདིའི་ཚེས་ ༡༡ ཉིན་མཚན་མོའི་ཆུ་ཚོད་ ༡ ཙམ་ལ། འབྲི་རུ་རྫོང་ཉེན་རྟོག་མི་སྣ་ཁ་ཤས་གློ་བུར་དུ་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་དུ་འབྱོར་ཏེ། ཞོགས་དྲིལ་སྡོད་ཁྱིམ་དུ་འཛུལ་ནས་ཁོང་ལ་རྒྱལ་ཁབ་ཁ་བྲལ་དང་སྤྱི་ཚོགས་བརྟན་ལྷིང་ལ་དཀྲུག་ཤིང་བྱས་པའི་ཉེས་མིང་དང་། ཉེ་ཆར་ནགས་ཤོད་འབྲི་རུ་རྫོང་མོ་བ་གྲོང་དང་སྨོན་ཁྱིམ་གྲོང་། ཟླ་ཐང་ཤང་། དེ་བཞིན། རྫོང་གི་སློབ་གྲྭ་དང་མི་དམངས་བཅས་ཀྱིས་ཟས་བཅད་ངོ་རྒོལ་སོགས་བྱས་སྐབས། ཁོས་རྫོང་ཐོག་ཏུ་སྐད་ཆ་འདྲ་མིན་བཤད་ཡོད་པ་སོགས་ཀྱི་ཉེས་འཛུགས་བྱས་ཏེ་འཛིན་བཟུང་བྱས་ཡོད་འདུག ད་དུང་སྡོད་ཁང་སྔོག་བཤེར་བྱས་ཏེ་ཁོང་གི་གློག་ཀླད་དང་ཁ་པར། དཔེ་དེབ་སོགས་ཀྱང་བཙན་འཕྲོག་བྱས་ཡོད་འདུག
དེའི་ཕྱི་ཉིན་སྔ་དྲོར་ཁོང་གི་གྲོགས་པོ་གཡུལ་རྒྱལ་ཡང་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་གློ་བུར་འཛིན་བཟུང་བྱས་ཡོད་པ་དང་། གཡུལ་རྒྱལ་འཛིན་བཟུང་བྱེད་དགོས་པའི་རྒྱུ་མཚན་ཡང་གོང་མཚུངས་ལྟར། རྒྱལ་ཁབ་ཁ་བྲལ་གཏོང་བའི་ལས་ཀ་བྱས་པ་དང་། སྐད་ཆ་འདྲ་མིན་བཤད་ནས་སྤྱི་ཚོགས་བརྟན་ལྷིང་ལ་ཕུང་དཀྲུག་བྱས་པ་སོགས་ཀྱི་ཉེས་མིང་གཡོགས་ཡོད་འདུག
ན་གཞོན་རྩོམ་པ་པོ་ཚུལ་ཁྲིམས་རྒྱལ་མཚན་ནམ་ཞོགས་དྲིལ་ལགས་ནི། ད་ལྟ་རང་ལོ་ ༢༧ ཡིན་པ་དང་ཁོང་གི་ཕ་ཡུལ་ཁམས་ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་འདུག ཆུང་དུས་ནས་གཤམ་ཆུ་ཤང་སློབ་ཆུང་འགྲིམས་པ་དང་། ༢༠༠༡ ལོར་སྡེ་དགེ་དཔལ་ཡུལ་བཤད་གྲར་ཞུགས་ཏེ་ནང་ཆོས་གཙོས་པའི་བོད་ཀྱི་ཐུན་མོང་དང་ཐུན་མིན་རིག་གནས་སོགས་ལ་སློབ་གཉེར་གནང་ཡོད་ཅིང་། ༢༠༠༩ བར་སྡེ་དགེ་དཔལ་ཡུལ་དང་གསེར་རྟ་ལྔ་རིག་ནང་བསྟན་སློབ་གླིང་། སྡེ་དགེ་ཞེ་ཆེན། སྡེ་དགེ་རྫོགས་ཆེན། ཡ་ཆེན་སྒར། ཨ་མདོ་རྔ་པ་ཀིརྟི་དགོན་བཅས་སུ་སློབ་སྦྱོང་དང་གྲ་སྐོར་ལ་ཕེབས་ཡོད་འདུག
༢༠༠༩ ལོའི་མཇུག་ཏུ་སྐྱ་སར་བབས་ཏེ་ནུབ་བྱང་མི་རིགས་སློབ་གླིང་དུ་ཞུགས་ཏེ་ད་བར་ལོ་ ༤ རིང་རྒྱ་ཡིག་གི་ལམ་ནས་རྩོམ་རིགས་སྐོར་ཆེད་སྦྱང་གནང་མུས་ཡིན་ཡང་། ད་ལོའི་ཕྱི་ཟླ་ ༥ པའི་ནང་རྒྱ་གཞུང་གིས་ཞོགས་དྲིལ་དང་སློབ་ཕྲུག་གཞན་ཁ་ཤས་ཀྱིས་ནམ་རྒྱུན་ནུབ་བྱང་མ་རིགས་སློབ་ཆེན་ནང་ཁྲིམས་འགལ་ཐོག་བགྲོ་གླེང་གོ་སྒྲིག་བྱེད་ཀྱིན་ཡོད་པའི་ཉེས་འཛུགས་བྱས་ཏེ་སློབ་གྲྭ་ནས་ཕྱིར་འཕུད་བཏང་ཡོད་འདུག ཕྱི་ཟླ་ ༦ པའི་ནང་ཕ་ཡུལ་ཁམས་ནགས་ཤོད་འབྲི་རུ་རྫོང་དུ་ལོག་ནས་ << མི་རབས་གསར་པའི་མགྲོན་ཁང >>ཞེས་པ་ཞིག་བཙུགས་ཏེ། ཞོར་དུ་ཟུར་སྦྱོང་འཛིན་གྲྭ་བསྒྲུབས་ཏེ། ན་གཞོན་ཚོར་བོད་རྒྱ་ཡིག་རིགས་གཉིས་ནས་རིན་མེད་ཐོག་སློབ་ཁྲིད་བྱེད་ཀྱིན་ཡོད་འདུག
༢༠༠༧ ལོར་ཁོང་གིས << ཁ་བ་ལ་འཁྲེང་བའི་དུང་སེམས་ཀྱི་ཅོང་སྒྲ > ཞེས་པ་དང << གངས་རིའི་ལས་དབང >> ཅེས་པའི་རྩོམ་དེབ་གཉིས་སྔ་ཕྱིར་དཔར་སྐྲུན་བྱས་རྗེས་ཀློག་པ་པོ་ཚོས་གདེང་འཇོག་ཆེན་པོ་གནང་ཡོད་པ་དང་། ༢༠༡༢ ལོ་ནས་རིམ་བཞིན་ནུབ་བྱང་མི་རིགས་སློབ་ཆེན་དུ་ཁོང་དང་སློབ་མ་ཁ་ཅིག་མཉམ་རོབ་ཐོག་<< མི་རབས་གསར་པ >> ཅེས་པའི་ལོ་དེབ་རྩོམ་སྒྲིག་བྱས་ཡོད་པ་དང་། ད་དུང་རྒྱ་ཡིག་ཐོག་ <<秀真博客 >>ཞེས་པའང་གཉེར་གྱི་ཡོད་ཅིང་། གཞན་ཁོང་གིས་ནམ་རྒྱུན་རྩོམ་ཡིག་སྤེལ་སའི་དྲ་ངོས་ཀྱི་ཟིན་བྲིས་http://xiuzheng.tibetcul.com/131613.html#253254 ཞེས་པ་འདི་ད་ལྟ་རྒྱ་གཞུང་གིས་སྒོ་བརྒྱབ་ཡོད་འདུག
ཁམས་ནགས་ཤོད་འབྲི་རུ་རྫོང་གཤམ་ཆུ་ཤང་སྟེང་མཁར་གྲོང་ནས་ཡིན་པའི་གཡུལ་རྒྱལ་ལགས་ནི་ད་ལྟ་རང་ལོ་ ༢༦ ཡིན་པ་དང་། ཁོང་ཆུང་དུས་ནས་གཤམ་ཆུ་ཤང་སློབ་ཆུང་དུ་འགྲིམས། ༢༠༠༥ ལོར་རྫོག་ཉེན་རྟོག་ལས་ཁུངས་སུ་ལས་གནས་བསྐོ་བཞག་གིས་ལོ་ ༧ ལས་ཀ་བྱས་ཡོད་ཀྱང་། ཉེན་རྟོག་པའི་ལས་ཀ་ནི་ཆབ་སྲིད་ཀྱི་ལས་ཀ་རྐྱང་རྐྱང་ཡིན་སྟབས་ཁོང་གིས་མུ་མཐུད་བསྒྲུབ་འདོད་མ་བྱུང་བར། ༢༠༡༢ ལོར་རང་འགུལ་ཐོག་རྩ་དགོངས་ཞུས་ཏེ་རྫོང་ཐོག་ཏུ་ཚོང་ལས་གཉེར་གྱིན་ཡོད་འདུག ཁོང་གིས་ཉེན་རྟོག་པའི་ལས་ཀ་བྱས་རིང་ཕ་ཡུལ་གྱི་མི་དམངས་ལ་ཕན་ཐོགས་ཆེན་པོ་བྱུང་ཡོད་འདུག
གཡུལ་རྒྱལ་ལགས་ཀྱི་བཟའ་ཟླའི་མིང་ལ་ལྷ་སྐྱིད་སྒྲོལ་མ་ཟེར་ཞིང་ཁོང་གཉིས་ལ་ཕྲུ་གུ་གཉིས་ཡོད་འདུག
“ང་འདི་ལྟར་ཕུགས་བསམ་ཞིག་གི་ཆེད་དུ་ཡོང་དུས།
མི་ལ་ལས་སྨྱོ་འདུག་བཤད་སྲིད་ལ།
མི་འགའ་རེས་འཆུགས་འདུག་གླེང་སྲིད།
གང་ལྟར་ངས་དེ་དག་ལ་ཁ་ཡ་བྱེད་ན་མི་འདོད།”
___ཞོགས་དྲིལ།
‘ཞོགས་དུང’ ‘ཞོགས་དྲིལ’
འབུད་མི་ཆོག འཁྲོལ་མི་ཆོག
གལ་ཏེ་མི་ཉན་ན
མེ་མདའ་རྒྱག་ཆོག
___གུང་ཁྲན་ཏང།
རང་དབང། དམངས་གཙོ།
སུས་ཀྱང་མི་སོད།
ངེས་པར་རྒྱལ་ངེས།
___མི་དམངས།