རྒྱ་ནག་གཞུང་གིས་རང་ལུས་མེར་བསྲེཊ་ལ་རྐྱེན་བྱས་ཏེ། བོད་མདོ་སྨད་རྔ་བ་ཁུལ་ཁྱུང་མཆུ་རྫོང་གི་བོད་མི་གསུམ་ལ་ལོ་བཞི་ནས་ལྔ་བར་གྱི་བཙོན་འཇུག་ཁྲིམས་ཐག་བཅད་འདུག
ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་འདི་ལོའི་ཕྱི་ཟླ་ ༡ ཚེས་ ༡༨ ཉིན་བོད་མདོ་སྨད་རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རྒྱལ་གཅེས་དཔའ་བོ་གྲུབ་མཆོག་ལགས་ཀྱིས་རང་ལུས་མེར་བསྲེཊ་གནང་སྐབས། ཉེན་རྟོག་པ་དང་ལས་བྱེད་པས་མེ་གསོད་ཀྱིན་པ་བཀག་འགོག་བྱས་པའི་ཉེས་མིང་འོག བོད་མི་གུར་མགོན་དང་ནོར་བུ་རྡོ་རྗེ། བསོད་ནམས་ཡར་འཕེལ་བཅས་མི་གསུམ་འཛིན་བཟུང་བྱས་ཡོད་པ་མ་ཟད། ཕྱི་ཟླ་ ༧ པའི་ནང་ཁྱུང་མཆུ་རྫོང་ཁྲིམས་ཁང་གིས་མི་བསད་པའི་ཉེས་མིང་འོག་གུར་མགོན་དང་བསོད་ནམས་ཡར་འཕེལ་གཉིས་ལ་ལོ་ ༤ རེ་དང་། ནོར་བུ་རྡོ་རྗེ་ལ་ལོ་ ༥ བཙོན་འཇུག་ཁྲིམས་ཐག་བཅད་དེ་ད་ཆར་སི་ཁྲོན་མེན་ཡཱང་བཙོན་ཁང་དུ་བཙོན་འཇུག་བཀར་ཉར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཐེངས་འདིའི་གནས་ཚུལ་དེ་ནི་འདི་ལོའི་ཕྱི་ཟླ་ ༡ ཚེས་ ༡༨ ཉིན་གྱི་བོད་ནང་གི་ཉིན་རྒྱབ་ཆུ་ཚོད་ ༣།༡༥ ཡས་མས་སུ་རྔ་བ་ཁུལ་ཁྱུང་མཆུ་རྫོང་སྦྲ་ཆེན་ཡུལ་ཚོའི་རུ་ཁག་གཉིས་པའི་གཙོས་རུ་མའི་ཕ་ཀྱོག་པོ་དང་མ་གཡང་མཚོ་གཉིས་ཀྱི་བུ་རང་ལོ་ ༢༨ ཡིན་པའི་གྲུབ་མཆོག་ལགས་ཀྱིས། སྦྲ་ཆེན་མཐུན་སྒྲིལ་ཐང་དུ་རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་སྐབས། དེ་མ་ཐག་ཉེན་རྟོག་པ་དང་ལས་བྱེད་མི་སྣ་འབྱོར་ཏེ་ཁོང་གི་ལུས་སྟེང་གི་མེ་གསོད་རྩིས་བྱས་པར། བོད་མི་གུར་མགོན་དང་ནོར་བུ་རྡོ་རྗེ། བསོད་ནམ་ཡར་འཕེལ་བཅས་ཀྱིས་ཉེན་རྟོག་པའི་ལག་ཏུ་ཡོད་པའི་མེ་གསོད་ཡོ་བྱེད་ལ་འཇུས་ནས་བཀག་འགོག་དང་། གཞན་བོད་མི་མང་པོ་མཉམ་རུབ་ཐོག་འགོག་ཐབས་བྱས་ཡོད་འདུག
ཕྱི་ཟླ་ ༡ ཚེས་ ༢༢ ཉིན་རྒྱ་ནག་གཞུང་གིས་སྐབས་དེའི་གནས་ཚུལ་ལ་རྐྱེན་བྱས་ཏེ། ཁོང་གསུམ་ལ་འཛིན་བཟུང་བཀའ་རྒྱ་བསྒྲགས་པ་དང་། གལ་སྲིད་ཁོང་གསུམ་གྱིས་མགོ་འདོགས་ཞུས་ན་ཁྲིམས་ཆད་ཡང་མོ་གཅོད་ཀྱི་ཡིན་ཚུལ་སོགས་བཤད་དེ་འཛིན་བཟུང་གིས་ཁྱུང་ཆུ་རྫོང་དུ་བཀག་ཉར་འདྲི་བརྩད་བྱས་ཡོད་པ་མ་ཟད། ཕྱི་ཟླ་ ༧ པའི་ཟླ་དཀྱིལ་ཙམ་ལ་ཁྱུང་མཆུ་རྫོང་མི་མང་ཁྲིམས་ཁང་གིས། རྫོང་ཁོངས་ཀྱི་ཞང་ཁག་གི་མགོ་ཁྲིད་དང་ལས་བྱེད། ཁོང་གསུམ་གྱི་ནང་མི་གཉིས་རེ་བཅས་སྐོང་འགུག་བྱས་ཏེ་བཙོན་འཇུག་ཁྲིམས་ཐག་བཅད་ཡོད་འདུག
ཉེ་ཆར་རྒྱ་གཞུང་གིས་ཞང་དང་རྫོང་བཅས་རིམ་པ་ཁག་བརྒྱུད་ཡིག་ཆ་འདྲ་མིན་བཟོ་དགོས་པའི་སྒྲིག་གཞི་གཏན་འབེབས་དང་སྟངས་འཛིན་བྱེད་ཀྱི་ཡོད་སྟབས། ནང་མི་ཉེ་འབྲེལ་ཚོ་ཁོང་ཚོར་ཐུག་འཕྲད་དུ་འགྲོ་རྒྱུར་དཀའ་ངལ་འཕྲད་ཀྱི་ཡོད་འདུག
གསར་འགོད་པ། དོན་གོ
