རྒྱ་གར་ལྷོ་ཕྱོགས་གནས་སྡོད་རྒྱལ་མཚན་ཆོས་གྲགས་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་དེ་སྔོན་སྔ་རྗེས་ཐེངས་གསུམ་ལ་འཛིན་བཟུང་གིས་ལོ་ ༡༤ བཙོན་འཇུག་བྱས་པའི་ལྷ་ས་ཆུ་ཤུལ་རྫོང་གི་ཆབ་སྲིད་བཙོན་ཟུར་ཐུབ་བསྟན་བསོད་ནམས་ལགས། ཟླ་གཉིས་ཀྱི་གོང་གསང་བའི་སྒོ་ནས་ཡང་བསྐྱར་འཛིན་བཟུང་བྱས་ཏེ། ད་ཆར་ནང་མི་ཉེ་འབྲེལ་ཚོས་ཁོང་ནག་ཉེས་ཅི་ཞིག་གི་དབང་གིས་འཛིན་བཟུང་བྱས་མིན་དང་། ས་གནས་གང་དུ་བཀག་ཉར་བྱས་ཡོད་མེད་མ་ཤེས་པར་ལྷག་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་ནག་གཞུང་གིས་ ༡༩༨༩ ལོའི་ཟླ་ ༡ ཚེས་ ༢༢ ཉིན་ཐུབ་བསྟན་བསོད་ནམས་ལགས་ཀྱིས། ༸ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་གློ་བུར་སྐུ་གཤེགས་པའི་གནས་ཚུལ་ཐད་རྒྱ་གཞུང་ལ་ངོ་རྒོལ་བྱས་སྐབས། འཛིན་བཟུང་བྱས་ཏེ་ལོ་ ༩ དུས་བཀག་བཙོན་འཇུག་གི་ཁྲིམས་ཐག་བཅད་དེ་ལྷ་སའི་ཝུའུ་ཀྲི་ཏེ་བཙོན་ཁང་དུ་བཙོན་འཇུག་བྱས་ཡོད་འདུག ཕྱིས་སུ་བཙོན་འཇུག་དུས་ཡུན་རྫོགས་ཏེ་ཀློད་གྲོལ་ཐོབ་ཡོད་ཀྱང་། ཡང་བསྐྱར་ལྷ་སའི་ངོ་རྒོལ་སྐད་འབོད་ཁྲོད་ཞུགས་པའི་ཉེས་མིང་འོག་ཏེ་ལོ་ ༢ རིང་བཙོན་འཇུག་བཀག་ཉར་བྱས་ཡོད་འདུག
༢༠༠༩ ལོར་རྒྱ་གཞུང་གིས་ཁོང་ལྷ་སའི་བར་སྐོར་དུ་བོད་མིའི་ངོ་རྒོལ་སྐད་འབོད་བྱེད་སྐབས་མཉམ་ཞུགས་བྱས་པའི་ཉེས་མིང་འོག་འཛིན་བཟུང་བྱས་ཏེ་ལོ་ ༢ ཁྲིམས་ཐག་བཅད་ཡོད་པ་དང་། བཙོན་ཁང་གིས་གཅར་རྡུང་མནར་གཅོད་བཏང་སྟེ་ཉལ་སར་ལྷུང་ཡོད་ཀྱང་། ཕ་ཡུལ་ཆབ་མདོ་ནས་ཡིན་པའི་བསྟན་འཛིན་ཆོས་འཕེལ་ཞུ་བ་ཞིག་གིས་བཙོན་སྲུང་བར་ཐུབ་བསྟན་བསོད་ནམས་ཀྱིས་ན་རྫུན་བཤད་པ་རེད་ཅེས་གཏུག་བཤེར་བྱས་སྟབས། བཙོན་ཁང་གིས་ཁོང་ལ་དུས་ཡུན་ལོ་གཅིག་ཁ་སྣོན་བྱས་ཡོད་འདུག
ཁོང་གིས་ཆུ་ཤུལ་བཙོན་ཁང་དུ་སྡོད་སྐབས་རྒྱ་གཞུང་གིས་བོད་པའི་ཆབ་སྲིད་བཙོན་པ་ཚོར་ཟ་འཐུང་མ་སྤྲད་པར་ལྟོགས་སྐོམ་མྱངས་བཅུག་པ་དང་། གཅར་རྡུང་མནར་གཅོད་ཚད་ལས་བརྒལ་བ་བཏང་སྟེ་བཙོན་པ་ཚོ་དཀའ་ངལ་འཕྲད་ཡོད་ཚུལ་དང་། བཙོན་གྲོགས་ཚོར་༧གོང་ས་མཆོག་ཕྱིར་བོད་ཡུལ་མ་ཕེབས་བར་དུ་ང་རང་བཙོན་ཁང་ནས་ཕྱིར་འགྲོ་རྒྱུ་མིན་ཞེས་བརྗོད་ཡོད་འདུག
ཉེ་ཆར་ཁོང་འཛིན་བཟུང་མ་བྱས་གོང་འདྲ་པར་ཞིག་གི་སྟེང་། བོད་ལ་རང་དབང་ཐོབ་པའི་སྨོན་འདུན་དང་། ༸གོང་ས་མཆོག་ལ་བསྟོད་བསྔགས་ཀྱི་སྙན་རྩོམ་ཅིག་བྲིས་པའི་ནང་། རླུང་རྟ་རི་རྩེར་སྒྲོན་ཡོད། སྨོན་ལམ་སེམས་ནས་བཏབ་ཡོད་། གངས་ཅན་བོད་ཀྱི་མི་ལ། རང་དབང་ཐོབ་རྒྱུར་སྒུག་ཡོད་། སྐུ་འགྱུར་མེད་རྡོ་རྗེ་བྲག་བཞིན་བརྟན། གསུང་མི་འགྱུར་ཚངས་བའི་དབྱངས་བཞིན་སྙན། ཐུགས་འཁྲུལ་མེད་དྭངས་གསལ་མེ་ལོང་བཞིན། ངའི་རྩ་བའི་བླ་མ་སྙིང་ནས་དྲན། ཞེས་འཁོད་ཡོད་འདུག
