མདའ་ཁ་བོད་ལ་གཟས་འདུག

འཇམ་དཔལ།

བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༢༥ ཉིན་རྒྱ་གཞུང་གིས་འཕུར་སྐར་བཅུ་དྲུག་རྟགས་ཅན་ཞེས་པ་ཚོད་ལྟ་བྱེད་ཁུལ་བྱས་ཏེ་བོད་ཤར་ཕྱོགས་ཨ་མཆོག་དང་བསང་ཁོག་གི་ས་མཚམས་ལ་བརྡབས་ནས་ས་བརླགས་ཕྱུགས་བསད་ཀྱི་སྐྱི་གཡའ་བའི་གནས་ཚུལ་བྱུང་འདུག་པ་མ་ཟད། བརྡབ་སྒྲས་སྤྱི་ལེའུ་ལྔ་བཅུ་དྲུག་ཅུའི་མཚམས་ཀྱི་མི་རྣམས་ལ་ས་འགུལ་ཆེན་པོ་རྒྱུགས་པ་ལྟ་བུའི་ཚོར་སྣང་བྱིན་འདུག གར་ལྷུང་གི་ཕྱོགས་ཙམ་མི་ཤེས་པར་ཚོད་ལྟ་བྱེད་མི་སྲིད་པས། རྒྱ་གཞུང་ལ་གདེང་ཚོད་མེད་པར་གཟས་ནས་མདའ་ཁ་བོད་ཕྱོགས་སུ་གཏད་ཡོད་པ་གསལ་བོ་རེད།

ཐེངས་འདིའི་འཕུར་སྐར་འདི་ས་སྟོང་འདི་འདྲ་ཞིག་ལ་བརྡབས་པ་སྟབས་ལེགས་འདུག་མ་གཏོགས། ས་ཁུལ་འདིའི་གཡས་གཡོན་གྱི་གྲོང་ཚོ་དང་གྲོང་ཁྱེར། དགོན་སྡེ་དང་སློབ་གྲྭ་ཞིག་ལ་ལྷུང་ན་མི་ག་ཚོད་ཅིག་གི་ཚེ་སྲོག་འཕྲོག་རྒྱུ་ཡིན་པ་འཕུར་སྐར་འདིའི་བོངས་ཚོད་ལ་བལྟས་ན་ཤེས་ངེས་རེད། འཕུར་སྐར་འདི་ལྷུང་སའི་ས་ནས་སྤྱི་ལེའུ་ཉི་ཤུ་སུམ་ཅུ་ནས། བཞི་བཅུ་ལྔ་བཅུའི་མཚམས་ན་ཆོས་སྡེ་ཆེན་མོ་བླ་བྲང་བཀྲ་ཤིས་འཁྱིལ་དང་བསང་ཆུ་རྫོང་། མདོ་ལྷོ་ཁུལ་གཙོས་གྲོང་ཁྱེར་དང་འབོ་རའི་གནམ་ཐང་སོགས་དགོན་ཆེན་དང་གྲོང་ཁྱེར་དུ་མ་ཡོད་ལ། དེ་འདྲ་ཞིག་ལ་ལྷུང་ན་འཇུག་འབྲས་ག་རེ་འབྱུང་གི་རེད།

འདི་ནི་རྒྱ་གཞུང་གིས་རང་གི་མི་སེར་ཡིན་པར་ཁས་འཆེ་བའི་ཉམས་ཆུང་བོད་མི་ཚོར་སྣང་མེད་ཐུབ་ཚོད་བཏང་བ་ཞིག་ཡིན་པ་མ་ཟད། ཁྲིམས་མེད་ལུགས་མེད་ཀྱི་བྱེད་སྟངས་འདི་གཅིག་བུའི་ཐོག་ནས་བལྟས་ན་རྒྱ་གཞུང་གིས་གྲངས་ཉུང་མི་རིགས་ལ་ཆ་འཇོག་ག་འདྲ་ཞིག་བྱེད་ཀྱིན་ཡོད་མེད་ཟུར་བལྟས་ལེབ་མཐོང་རེད།

མ་གཞི་ནས་རྒྱལ་ཁབ་གང་དང་གང་གིས་བརྟག་དཔྱད་འདི་འདྲ་བྱེད་ཀྱི་ཡོད་མོད། ཡིན་ཡང་མདའ་ཤུབས་ལྷུང་ས་རྒྱ་མཚོ་དང་མི་མེད་བྱེ་ཐང་སོགས་ལ་གཟས་ཀྱིན་ཡོད་ན། ཐེངས་འདིའི་ལྷུང་ས་དང་རྒྱ་མཚོའི་བར་ཐག་ཅི་ཙམ་ཡོད་མེད་ཤེས་གསལ་རེད། གནས་ཚུལ་འདི་བྱུང་མ་ཐག་བསང་ཆུ་རྫོང་གི་དམག་དཔུང་དང་ཉེན་རྟོག་སྡེ་ཁག་ཡོང་ནས་འབྲོག་པ་མང་ཚོགས་ལ་དམངས་སྒོར་ ༥༠༠༠༠ ཙམ་བྱིན་ནས་ཁ་གཅོད་ཐབས་བྱས་འདུག འབྲོག་པ་མང་ཚོགས་ལ་འདི་མིན་དེ་ཡིན་གྱི་འདམ་ཀ་དང་། ཁྲིམས་གཏུག་བྱེད་ས་མེད་པར་རྔན་པ་དེ་ཙམ་གྱིས་འཐུས་པ་བྱེད་རྒྱུ་ལས་ལམ་ཁ་གཞན་ཡོད་པ་མ་རེད།

ཁ་སང་དེ་རིང་སུད་སི་ན་ཚོགས་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་ཆེན་ཐོག་ན་རྒྱ་ནག་གི་འཐུས་མིས་མི་བདེན་རྫུན་སྒྲིག་གི་བོད་དང་ཤིན་ཅང་སོགས་སུ་སྔར་ལས་རང་དབང་ཡོད་རབས་དང་། གནས་སྟངས་ཡག་རབས་ཤོད་ཀྱིན་འདུག་པས་ཚེ་སྲོག་གི་མེ་ལྕེ་མཆེད་ཀྱིན་པའི་རྒྱལ་ཁབ་འདི་ལ་ངོ་ཚ་འདུག་གམ། རྒྱ་གཞུང་གིས་བཤད་པ་དོན་དངོས་ཡིན་ན་བཟའ་ཟླ་བུ་ཕྲུག་དང་ཕ་མ་སྤུན་མཆེད་བཞག་ནས་ང་ཚོའི་བོད་རིགས་སྤུན་ཟླ་དཔའ་བོ་དཔའ་མོ་ ༡༢༡ ཙམ་གྱིས་རང་ལུས་མེ་བསྲེགས་བཏང་བ་སྐྱིད་དྲགས་ནས་རེད་དམ།

འཇིག་རྟེན་ན་ཆེས་མི་འདོད་པ་ཞིག་ཡོད་པ་ནི་རང་ཉིད་ལ་སྡུག་སྦྱོང་མནར་གཅོད་དང་མེས་བསྲེགས་ནས་འཆི་མི་འདོད་པ་དེ་རེད། རྒྱ་གཞུང་གིས་ད་དུང་ངོ་ཚ་མེད་པར་ཧམ་པ་རི་འདྲ་ལངས་ཏེ། ༧གོང་ས་མཆོག་དང་བཙན་བྱོལ་སྒྲིག་འཛུགས། གཞོན་ནུ་ཚོགས་པ་སོགས་ཀྱིས་བརྒྱུད་སྐུལ་བྱས་ཏེ་མི་ཀླད་མེད་ཉུང་ཤས་ཞིག་གིས་རང་ཉིད་བརླགས་ཚུལ་དང་། ནང་མི་སྡུག་ལ་སྦྱར་ཚུལ། རྒྱལ་ཁབ་ཁ་བྲལ་བཏང་ཚུལ་སོགས་སྐྱུག་བྲོ་བའི་རྫུན་གཏམ་འཛམ་གླིང་ལ་བསྒྲགས་དང་སྒྲོག་གི་ཡོད།

ཁྱེད་ཅག་གིས་བཤད་པ་དོན་དངོས་ཡིན་ན་ཅིའི་ཕྱིར་ ༢༠༡༣ ལོ་གཅིག་བུར་ངོ་རྒོལ་བྱེད་མཁན་ལ་ཆབ་སྲིད་ཀྱི་ཉེས་མིང་བཏགས་ཏེ་མི་གྲངས་ ༡༦༠༠༠༠ ལྷག་ཁྲིམས་ཁང་བརྒྱུད་མེད་པར་བཙོན་ཁང་ ༣༦༠ ནང་དུ་ངལ་རྩོལ་བསྒྱུར་བཀོད་ཀྱི་བཙོན་འཇུག་བྱས་པ་ཡིན། འདི་ནི་རང་དབང་ཡོད་པའི་མཚོན་རྟགས་རེད་དམ། འདི་ལ་རང་དབང་ཟེར་རམ། ཉེར་ཆར་བོད་རྟའུ་མང་ཚོགས་ལ་མེ་མདའ་བརྒྱབ་ནས་མི་ག་ཚོད་བསད་རྨས་བཏང་བ་རེད། ད་དུང་དེས་ཀྱང་མ་འཚིམ་པར་བོད་ས་མེ་ཤུགས་འཕུར་མདའ་ཚོད་ལྟ་བྱེད་ཡུལ་དུ་བེད་སྤྱོད་གཏོང་གི་འདུག མ་གཞི་ནས་ད་ལྟའི་བོད་མིའི་གནས་སྟངས་འདི་འཛམ་གླིང་མི་མང་དང་། ལྷག་དོན་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་ད་ཐེངས་ཁ་ནས་བཤད་པ་ཙམ་མ་ཡིན་པར་དོན་དངོས་ལ་གཟིགས་ཞིབ་གནང་རོགས།།