ཞི་ཅིན་ཕིན་ནི་མའོ་ཙེ་ཏུང་གི་རྣམ་ཤེས་རེད།

ཚོ་ཁྲང་ཆིན་གྱིས་བརྩམས། ལོ་མ་རྒྱལ་གྱིས་བསྒྱུར།

ཉེ་སྔོན་པེ་ཅིན་ནས་རྒྱ་ནག་གི་རྒན་རབས་པ་ཞི་གྲོང་ཅོན་ལོ་བརྒྱ་ལ་སོན་པའི་དགའ་སྟོན་གྱི་མཛད་སྒོ་རྒྱ་ཆེན་པོ་ཞིག་ཚོགས་སོང་།  ཞི་གྲོང་ཅོན་ནི་ཁ་སང་དེ་རིང་རྒྱ་ནག་གི་ཆེས་མཐོའི་མགོ་ཁྲིད་མི་སྣ་ཞི་ཅིན་ཕིན་གྱི་ཕ་རྒན་ཡིན་སྟབས།  ས་ཆ་གང་ས་ནས་དགའ་སྟོན་གྱི་འཚམས་འདྲི་ཞུ་བཞིན་འདུག དེ་ཡང་། རྒྱ་ནག་གི་བཤད་སྲོལ་ཞིག་ལ། ཕ་ཡི་དྲིན་གྱིས་བུ་ཕྱུག་པོར་གྱུར་ཟེར། དེ་བཞིན་དུ། བུ་རྒྱལ་སྲིད་ལ་བསྡད་པའི་རྐྱེན་གྱིས་ཕ་ནི་རང་བཞིན་གྱིས་རྒྱལ་བོའི་ཡབ་ཆེན་དུ་གྱུར་སོང་བ་རེད།  དེ་བས།  འབངས་མི་ཀུན་གྱིས་པུས་མོ་ས་བཙུགས་ཏེ་ ‘ཁྲི་ལོ་ནས་ཁྲི་ལོར་ཤོག’ ཅེས་འབོད་དགོས་ཀྱི་རེད།

དགའ་སྟོན་མཛད་སྒོ་འདིས་མི་མང་པོ་ཞིག་ལ་བསྐྱར་དུ་ཞི་ཅིན་ཕིན་ཁྲི་ལ་བསྡད་རྗེས་ཀྱི་སྲིད་ཇུས་ལ་མནོ་བསམ་གཏོང་དུ་བཅུག་ཡོད། དེ་ཡང་། ཁོས་རྒྱ་ནག་གང་ཞིག་ཏུ་འཁྲིད་ནས་འགྲོ་བའི་གནད་དོན་དེ་རེད། ན་ནིང་ཕྱི་ཟླ་ ༡༡ པའི་ནང་ལ་ཞི་ཅིན་ཕིན་ཁྲི་ལ་བསྡད་དེ་གུང་ཁྲན་ཏང་གི་ལག་པ་ཡ་གཅིག་དང་། ཀྲུང་ནན་ཧེ་ཡི་ཆེས་མཐོའི་མགོ་ཁྲིད་ལ་གྱུར་ནས་དབང་འཛིན་གྱི་ལས་ཀ་བྱས་ཏེ་ཧ་ལམ་ལོ་ངོ་གཅིག་འཁོར་གྱིན་འདུག  ཡིན་ན་ཡང་། མི་མང་གི་མཐོང་ལམ་དུ་མངོན་པ་དེ་ནི།  ཁོས་མི་མང་གིས་རེ་ཞིང་ངང་སྒུག་བྱེད་བཞིན་པའི་ཆབ་སྲིད་ཀྱི་གསར་བརྗེ་དང་འཕོ་འགྱུར་དེ་མངོན་འགྱུར་བྱེད་ཐུབ་མེད་པ་མ་ཟད། དེ་ལས་ལྡོག་སྟེ། ཅང་ཙེ་མིན་དང་ཧུའུ་ཅིན་ཐོ་ཡི་དུས་སྐབས་ལས་ཀྱང་བསམ་བློའི་སྒེར་འཛིན་ཤུགས་ཆེ་རུ་གྱུར་འདུག

ད་ལྟ་ཡིན་ན། ཞི་ཅིན་ཕིན་དང་ཁོའི་ནང་མི་ཚང་མས་གཟབ་རྒྱས་ངང་ཁོ་རང་གི་ཕ་རྒན་ལ་རྟེན་འབྲེལ་ཞུ་བཞིན་འདུག  ཡིན་ན་ཡང་། ཁོའི་ཕ་རྒན་སྔོན་ཆད་གསར་བརྗེ་ཡི་སྙིང་སྟོབས་ཡོད་མཁན་ཞིག་རེད། རྒྱ་གཞུང་གི་ནང་ནས་བསམ་བློ་གུ་ཡངས་ཅན་གྱི་ཕྱོགས་གཏོགས་ཡིན་པ་ལས། མཁྲེགས་འཛིན་ཅན་གྱི་ཕྱོགས་སུ་མེད། དེར་བརྟེན། ཁོ་ལ་སྔོན་ཆད་མའོ་ཙེ་ཏུང་གི་གནོད་འཚེ་ཡང་ཐེབས་མྱོང་ཡོད། ཡིན་ན་ཡང་། ཞི་ཅིན་ཕིན་ཁྲི་ལ་བསྡད་རྗེས་ཀྱི་རྣམ་འགྱུར་ལ་བལྟས་ཡོང་ན།  དཔྱད་བརྗོད་པས་འདི་ལྟར་བརྗོད་དེ། ‘ཞི་ཅིན་ཕིན་ནི་ཁོའི་ཕ་རྒན་གྱི་བུ་དང་འདྲ་བོ་མི་འདུག  ཁོ་རང་མའོ་ཙེ་ཏུང་གི་བུ་དང་འདྲ་བོ་འདུག’ ཅེས་རྗོད་ཀྱི་ཡོད། རྒྱུ་མཚན་ནི། ཁོས་མའོ་ཙེ་ཏུང་གི་དར་ཆ་སྒྲེང་ཞིང་མའོ་ཙེ་ཏུང་གི་སྐད་ཆ་ཤོད་ཀྱི་ཡོད་པས་རེད། དོན་དངོས་ཐོག་ཁོས་མའོ་ཙེ་ཏུང་གི་སྲིད་དབང་སྒེར་འཛིན་གྱི་བསམ་བློ་དེ་རྒྱུན་སྐྱོང་བྱེད་ཀྱིན་འདུག

ཡིན་ན་ཡང་། མའོ་ཙེ་ཏུང་གི་དུས་སྐབས་ཀྱི་སྲིད་དབང་སྒེར་འཛིན་གྱི་བསམ་བློ་སོགས་གཡོན་ལྷུང་གི་ལམ་ཁ་དེ་ཡིས། རྒྱ་ནག་ཧ་ལམ་ཉམས་རྒུད་ནས་ཉམས་རྒུད་དུ་གྱུར་ཡོད། དེར་བརྟེན། མའོ་ཙེ་ཏུང་འདས་རྗེས་ཏིན་ཞོ་ཕིན་གྱིས་བཅོས་བསྒྱུར་སྒོ་འབྱེད་བྱས་ཏེ། དཔལ་འབྱོར་ཡར་རྒྱས་ཀྱི་སྒོ་ནས་གུང་ཁྲན་ཏང་གི་སྲོག་བསྐྱབས་པ་རེད། ཏིན་ཞོ་ཕིན་རང་ཉིད་ཀྱི་སྐད་ཆ་ཞིག་བཤད་ན། བསྐྱར་དུ་ཨུ་རུ་སུའི་ལམ་ཁར་མི་ཞུགས་སོ།།  ཁོས་བསམ་པར་ཨུ་རུ་སུ་ཐོར་ཞིག་ཏུ་གྱུར་རྐྱེན་ནི་ཨུ་རུ་སུའི་དཔལ་འབྱོར་ཉམས་རྒུད་དུ་སོང་བས་ཡིན་པར་འདོད་ཀྱི་ཡོད། དེའི་རྗེས་ཀྱི་ཅང་ཙེ་མིན་དང་ཧུའུ་ཅིན་ཐོ་ཡི་དུས་སྐབས་སུ་ཡང་། རྩ་བའི་ལམ་ཁ་གཉིས་ཏེ། ཆབ་སྲིད་ཀྱི་ཕྱོགས་ནས་དམ་དྲག་དང་དཔལ་འབྱོར་གྱི་ཕྱོགས་ནས་གུ་ཡངས་སྲིད་ཇུས་ལག་བསྟར་བྱས་པ་དེ་གཉིས་རེད།

ཡིན་ན་ཡང་། ཆབ་སྲིད་ཐད་ནས་དེ་འདྲའི་དམ་དྲག་ཆེན་པོ་བྱས་དོན་ནི། རྒྱ་ནག་ནང་དང་ཕྱི་ལོགས་བཅས་སུ་ཆབ་སྲིད་ལངས་ཕྱོགས་ལ་འགྱུར་བ་གཏོང་དགོས་པའི་འབོད་སྒྲ་ཤུགས་ཆེན་པོ་ཡིན་པ་དང་། རྒྱལ་སྤྱིའི་ཕྱོགས་ཡོངས་ན་དམངས་གཙོའི་རླབས་རྒྱུན་དགུང་དུ་འཕྱོ་དང་འཕྱོ་བཞིན་པའི་རྐྱེན་གྱིས་ཡིན། དེ་བས། རྒྱ་གཞུང་གིས་ཕྱོགས་ཡོངས་ནས་དམ་གྲག་ཆེན་པོ་བྱེད་ཐུབ་མེད། འདི་ལྟ་བུའི་རྒྱབ་ལྗོངས་འོག་ནས་ཞི་ཅིན་ཕིན་ཁྲི་ལ་བསྡད་ཅིང་། མི་རྣམས་ཀྱིས་ཁོས་རྒྱ་ནག་ལ་འགྱུར་བ་ཞིག་དང་གུ་ཡངས་སྤྱི་ཚོགས་ཤིག་བསྐྲུན་པ་དང་། ཡང་ན། སྤྱི་ཡོངས་ཆབ་སྲིད་ཀྱི་ཐད་ནས་གསར་བརྗེ་ཞིག་མ་བྱས་ན་ཡང་། རྒྱ་ནག་མི་མང་ཅུང་ཙམ་རང་དབང་ལྡན་པ་ཞིག་ཏུ་གྱུར་བའི་རེ་བ་བྱས་པ་རེད། ཡིན་ན་ཡང་། ཞི་ཅིན་ཕིན་གྱིས་དབང་ཆ་བཟུང་ནས་ད་ལྟའི་བར་གྱི་སྲིད་ཇུས་ལ་བལྟས་ན། ཁོས་ཆབ་སྲིད་གུ་ཡངས་ཁྱོན་ནས་བྱས་མེད་པ་མ་ཟད། དེ་ལས་ལྡོག་སྟེ། སྔར་ལས་ཛ་དྲག་དང་ཇེ་དམ་ཇེ་དྲག་ཏུ་བཏང་འདུག་སྟེ། རྒྱ་གཞུང་གི་སྲིད་དབང་སྒེར་གཅོད་ཀྱི་བསམ་བློ་དེ་སྔར་ལས་གདུག་རྩུབ་ཅན་ཞིག་ཏུ་བཏང་འདུག

དཔེར་ན། ཞི་ཅིན་ཕིན་གྱིས་ཡང་ཡང་བརྗོད་པ་ལྟར། མའོ་ཙེ་ཏུང་གི་དུས་རབས་དང་ཁ་བྲལ་མི་རུང་སྟེ། མའོ་དང་གོང་བུ་གཅིག་ཏུ་གནས་པར་བྱེད་དགོས་ཞེས་རྗོད་ཀྱི་ཡོད་པ་དང་ །  དེ་ནས། ཨུ་རུ་སུ་གུང་ཁྲན་ཏང་ཐོར་ཞིག་ཏུ་སོང་བར་སེམས་གསོ་བྱེད་དུས་ཀྱང་། གུང་ཁྲན་ཏང་ཐོར་ཞིག་ཏུ་འགྲོ་བར་འགོག་མཁན་གྱི་ངེས་པ་དོན་གྱི་ཕོ་གསར་ཅིག་ཇི་ལྟར་མེད་པ་ཡིན་ནམ་ཞེས་ཀྱང་བརྗོད་ཡོད།  མདོེར་ན། ཞི་ཅིན་ཕིན་གྱི་རྣམ་འགྱུར་གསལ་བོ་རེད། ཁོས་གུང་ཁྲན་ཏང་གི་སྲིད་དབང་སྒེར་གཅོད་ཀྱི་སྲོལ་རྒྱུན་འདི་མུ་མཐུད་ནས་རྒྱུན་སྐྱོང་བྱེད་མཁན་གྱི་ཕོ་གསར་དེར། སྲུང་སྐྱོང་དང་རྒྱུན་འཛིན། ཁག་ཐེག་བྱེད་ཀྱི་ཡིན་པ་དེ་རེད། ཁོ་རང་གི་བཤད་སྤྱོད་དེ་ཚོ་ནི་ཅང་ཙེ་མིན་དང་ཧུའུ་ཅིན་ཐོ་ལས་ཀྱང་གཡོན་ཕྱོགས་སུ་ལྷུང་ཡོད་པ་མ་ཟད། ཐ་ན་མའོ་ཙེ་ཏུང་ལས་ཀྱང་བརྒལ་འདུག རྒྱུ་མཚན་ནི་མའོ་ཙེ་ཏུང་ནི་འདི་ལྟ་བུའི་ཆབ་སྲིད་སྨྱོ་སྤྱོད་པ་ཞིག་མིན་ཏེ། ཁོས་ལྐོག་ལྐོག་སུད་སུད་ཀྱི་སྒོ་ནས། འབྱོར་ལྡན་གྲལ་རིམ་གྱི་དམངས་གཙོ་མི་དགོས་ཤིང་། འབྱོར་མེད་གྲལ་རིམ་གྱི་དམངས་གཙོ་དོན་གཉེར་བྱེད་འཇུག་གི་ཡོད་པ་མ་ཟད། ཐད་ཀ་ཐད་རྐྱང་གིས་དམངས་གཙོ་དང་རང་དབང་ལ་དགག་པ་ཡང་རྒྱག་ཐུབ་ཀྱི་མེད།

ཡིན་ན་ཡང་། ཞི་ཅིན་ཕིན་གྱིས་ཐད་ཀ་ཐད་སོ་དང་མངོན་གསལ་དོད་པོས་སྒེར་གཅོད་ཀྱི་ལས་ལ་འཇུག་གི་ཡོད། དཔེར་ན། སྨྲ་མི་རུང་བ་བདུན་བཏོན་པ་ལྟ་བུ་རེད། དེ་དག་ནི། གསར་འགྱུར་རང་དབང་སྨྲ་མི་ཆོག ཁྲིམས་ཞིབ་སྒེར་ཚུགས་སྨྲ་མི་ཆོག ཡོངས་ཁྱབ་རིན་ཐང་སྨྲ་མི་ཆོག ནུབ་ཕྱོགས་དམངས་གཙོ་སྨྲ་མི་ཆོག་པ་ལ་སོགས་པ་ལྟ་བུ་རེད། ཐ་ན། གཞུང་གི་ཚོགས་ཐོག་ནས་ཀྱང་འདི་ལྟར་བཀའ་སྒྲོག་གི་ཡོད་དེ། དྲ་ཐོག་ན་གཞུང་གི་མགོ་ཁྲིད་དང་སྤྱི་ཚོགས་རིང་ལུགས་ཀྱི་ལངས་ཕྱོགས་ལ་ངོ་རྒོལ་དང་སྐྱོན་འཛུགས་བྱེད་མཁན་ཚོར་གཟབ་ནན་གྱིས་ལྟ་རྟོག་བྱེད་དགོས་པ་དང་། དེ་ནས། དྲ་རྒྱ་དང་དམངས་སེམས་ལ་སྟངས་འཛིན་བྱེད་དགོས་པ་མ་ཟད།  བསམ་ཚུལ་དང་ལྟ་ཚུལ་མ་འདྲ་བ་འདོན་མཁན་ཚོར་དམ་དྲག་དང་གཉའ་གནོན་བྱེད་དགོས་སོ།།

ཞི་ཅིན་ཕིན་གྱི་སྲིད་དབང་སྒེར་གཅོད་ཀྱི་སྲིད་ཇུས་འདིས་བསྐྱར་དུ་རྒྱ་ནག་མི་མང་ལ་ཅི་ཞིག་གསལ་འདེབས་དང་དྲན་སྐུལ་གཏོང་གི་འདུག་ཅེ་ན། རྒྱ་གཞུང་གི་མཐོ་རིམ་མི་སྣས་འགྱུར་བ་གཏོང་ཡོང་བར་རེ་བ་མི་བྱེད་པར། ཆབ་སྲིད་སྤྱིའི་སྒྲོམ་གཞི་ལ་འགྱུར་བ་འགྲོ་བར་རེ་བ་བྱེད་འོས་པ་ཞིག་ཆགས་ཡོད། རྒྱ་ནག་གི་སང་ཉིན་གྱི་འགྱུར་བ་ནི། བསམ་བློའི་གོ་རྟོགས་སད་ཡོད་པའི་རྒྱ་ནག་མི་མང་ག་ཚོད་ཅིག་ཡོད་མེད་ལ་རག་ལས་ཡོད་པ་ལས།  མཐོ་རིམ་མི་སྣ་ཚོའི་འགྱུར་བ་ལ་དེ་ཙམ་རག་ལས་མེད། སྐད་ཆ་གཞན་ཞིག་གི་སྒོ་ནས་བཤད་ན། རེ་བ་ཡོད་ཚད་མི་མང་གི་བསམ་བློའི་གོ་རྟོགས་སད་པའི་སྟོབས་ཤུགས་ལ་བཅོལ་དགོས་པ་ལས། རྒྱ་གཞུང་གི་མཐོ་རིམ་མི་སྣའི་སྙིང་རྗེ་ལ་རེ་མི་རུང་བ་དེ་རེད།  གང་ལྟར། རྒྱ་ནག་གི་ཆབ་སྲིད་སྒྲོལ་གཞི་ཁྱོན་ཡོངས་ལ་འགྱུར་བ་ཐེབས་ཚེ། ད་གཟོད་གཞི་ནས་རྒྱ་ནག་ལ་དོན་དང་ལྡན་པའི་འགྱུར་བ་ཞིག་ཐེབས་ངེས་ཡིན།

མ་རྩོམ་གྱི་འབྲེལ་ཐག 

http://www.rfa.org/mandarin/pinglun/caochangqing/caochangqing-10242013121431.html