དཔའ་བོའི་རྡོ་རིང་ཆེད་ཧིན་སྒོར་འབུམ་ ༦ ལྷག་བསྡུས་འདུག

བོད་ཀྱི་རོལ་དབྱངས་མཐུན་ཚོགས་ཀྱིས་འདས་པའི་ལོ་གཅིག་རིང་བཙན་བྱོལ་བོད་མིའི་གཞིས་ཆགས་ཁག་ཏུ་གཞས་སྣ་འཁྲབ་སྟོན་གྱི་སྐོར་སྐྱོད་བྱས་ཏེ། དཔའ་བོའི་རྗེས་དྲན་རྡོ་རིང་ཆེད་ཧིན་སྒོར་ ༦༨༡༧༥༦ བསྡུ་རུབ་བྱས་ཡོད་འདུག

ཁ་སང་དགོང་མོའི་ཆུ་ཚོད་ ༧ པ་ཡོལ་ཙམ་ལ་དྷ་ས་ཟློས་གར་ཚོགས་པའི་ཐང་ཆེན་དུ། བོད་ཀྱི་རོལ་དབྱངས་མཐུན་ཚོགས་ཀྱིས་འདས་པའི་ལོ་གཅིག་རིང་རྒྱ་གར་ནང་ལོགས་ཀྱི་གཞིས་ཆགས་ཁག་ ༢༦ ཙམ་ལ་སྐོར་སྐྱོད་བྱས་ཏེ། བོད་དོན་འཐབ་རྩོད་ཁྲོད་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་དག་ལ་རྗེས་དྲན་རྡོ་རིང་བཞེངས་བསྐྲུན་ཀྱི་མ་དངུལ་འཚོལ་སྒྲུབ་བྱས་པའི་མཇུག་བསྡོམས་མཛད་སྒོ་༼དབྱངས་ལ་ཐིམ་པའི་རྗེས་དྲན་གྱི་རྡོ་རིང་༽ཞེས་པ་ཚོགས་སོང་།

མཛད་སྒོའི་ཐོག་གངས་དཀར་རིན་པོ་ཆེ་མཆོག་གི་གཙོས་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་སོགས་སྤྱི་འཐུས་ཁག་ཅིག་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། དེ་བཞིན་དྷ་ས་ཁུལ་གྱི་སེར་སྐྱ་མི་མང་བཅས་འདུ་འཛོམས་བྱུང་སོང་། དགོང་ཚོགས་ཐོག་བཙན་བྱོལ་ནང་གི་གཞས་པ་གྲགས་ཅན་ཚེ་རིང་འགྱུར་མེད་ལགས་དང་ཕུར་བུ་རྣམ་རྒྱལ་ལགས། ཆོས་གྲགས་ལགས་སོགས་ཀྱིས་གཙོས་གཞོན་སྐྱེས་གཞས་པ་ཁག་ཅིག་གིས་གཞས་དང་ཞབས་བྲོ་འཁྲབ་སྟོན་དང་། ལོ་གཅིག་རིང་གི་རོལ་དབྱངས་སྐོར་སྐྱོད་ཀྱི་བྱུང་སོང་རྩིས་ཁྲ་སྒྲོགས་སྦྱང་གནང་པར། ཁྱོན་ཧིན་སྒོར་ ༡༢༣༤༩༤༢ དང་ཨ་སྒོར་ ༣༠ བྱུང་བ་ལས་ཧིན་སྒོར་ ༥༥༣༡༨༦ འགྲོ་སོང་བཏང་རྗེས། ལྷག་མ་ཧིན་སྒོར་ ༦༨༡༧༥༦ ཡོད་སྐོར་ངོ་སྤྲོད་གནང་སོང་།

སྐབས་དེར་བོད་ཀྱི་རོལ་དབྱངས་མཐུན་ཚོགས་ཀྱི་སློབ་སྟོན་པ་ཟླ་བ་རིན་ཆེན་ལགས་ཀྱིས། བོད་ནང་འདས་པའི་ལོ་མང་རིང་དཀའ་ངལ་མང་པོ་འཕྲད་ཀྱི་ཡོད་པ་དང་། ལྷག་པར་དུ་འདས་པའི་ལོ་ ༣ ནང་སྤུན་ཟླ་མང་པོ་ཞིག་གིས་རྒྱལ་ཁབ་དང་མི་རིགས་ཀྱི་ཆེད་དུ་ལུས་སྲོག་བློས་བཏང་ཡོད་སྟབས། ཛ་དྲག་གི་དུས་ཚོད་འདིར་སོ་སོའི་ནུས་པོས་ལྕོགས་ཚོད་ཀྱི་ལས་ཀ་ཞིག་བྱེད་ཐུབ་ཀྱི་ཡོད་ན་བྱེད་དགོས་པ་ལྟར། དུས་ཡུན་ལོ་གཅིག་ནང་བཙན་བྱོལ་གྱི་གཞས་པ་གང་མང་མཐུན་ཚོགས་ནང་བསླེབས་ཐུབ་པ་བྱས་ཏེ། མཐུན་ཚོགས་ཀྱི་ངོས་ནས་ལས་འགུལ་རྒྱ་ཆེན་པོ་ཞིག་སྤེལ་ཐུབ་པ་དང་། འཛམ་གླིང་གི་སྡིངས་ཆའི་ཐོག་དཔུང་པ་མཉམ་གཤིབ་ཀྱིས་འགྲོ་ཐུབ་པའི་དམིགས་ཡུལ་ངེས་ཅན་ཞིག་བཟུང་སྟེ། བཙན་བྱོལ་ནང་གི་གཞས་པ་ཚོས་བོད་ནང་གི་གཞས་པ་ཚོའི་མགྲིན་ཚབ་པ་བྱས་ཏེ། རང་དབང་མེད་པའི་རང་གི་ལུང་པའི་གནས་སྟངས་དེ་རང་དབང་ཡོད་པའི་གཞན་གྱི་ལུང་པར་ཁྱབ་བསྒྲགས་ཀྱི་ལས་འགན་མཐའ་འཁྱོལ་བ་ཞིག་གནང་དགོས། ཞེས་སོགས་བརྗོད་སོང་།

དེ་རྗེས་སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་བརྗོད་དོན། “བཙན་བྱོལ་སྤྱི་ཚོགས་ནང་ཚོར་བ་རྣོན་པོ་བསླེབས་པའི་སྐབས་སུ་གཞས་གཏོང་མཁན་དང་ཞབས་བྲོ་རྒྱག་མཁན་བྱུང་བ་ཡིན་ན། ཛ་དྲག་གི་སྐབས་སུ་གཞས་གཏོང་གི་འདུག་ཅེས་ཁ་གཏོང་མཁན་མང་པོ་ཡོད་པ་རེད། ཡིན་ནའང་། དེ་འདྲའི་གནས་སྟངས་ལ་བརྟེན་ནས་ཚོགས་འདུ་ཞིག་ཚོགས་པ་ཡིན་ན། ཕལ་ཆེར་མི་ལྔ་དྲུག་མ་གཏོགས་མ་ཡོང་བའི་གནས་སྟངས་མང་པོ་ཆགས་ཡོད་པ་རེད། དེ་རིང་གི་གནས་སྟངས་འདིར་བལྟས་པ་ཡིན་ན། གཞས་དང་ཞབས་བྲོ་ཡི་འདུ་འཛོམས་ཐོག་མི་མང་པོ་འཛོམས་ཀྱི་ཡོད་ལ། འཛོམས་པ་དེ་ཡང་གདུང་སེམས་མཉམ་སྐྱེད་དང་དེ་རིང་གི་དམིགས་ཡུལ་ག་རེ་ཡིན་པ་ཧ་གོ་བའི་ཐོག་ནས་འཛོམས་ཀྱི་ཡོད་སྟབས། ངེས་པར་དུ་ང་ཚོའི་སྤྱི་ཚོགས་འདི་དང་ལྷག་པར་དུ་དེང་དུས་ཀྱི་སྤྱི་ཚོགས་འདིའི་ནང་ལ་གཞས་དང་ཞབས་བྲོ། རོལ་དབྱངས་ཟེར་བ་དེ་མེད་ཐབས་མེད་པ་ཞིག་དང་། མི་མང་གིས་དོ་སྣང་ཆེན་པོ་བྱེད་པའི་གཞི་རྩ་ཞིག་ཆགས་ཡོད་པ་ངོས་འཛིན་བྱས་ཐོག མཐུན་ཚོགས་ཀྱི་རེ་ཞུ་ལྟར་བཀའ་སྤྱི་གཉིས་ནས་རྒྱབ་སྐྱོར་དང་མཐུན་འགྱུར་གནང་ཡོད་པ་རེད།”ཅེས་གསུངས་བ་དང་འབྲེལ། བཙན་བྱོལ་གཞས་པ་རྣམས་ཀྱིས་བོད་ནང་གི་གཞས་པ་ཚོའི་མགྲིན་ཚབ་པ་བྱེད་ཐུབ་པའི་ཐོག་ནས་བོད་ནང་གི་གནས་སྟངས་རྒྱལ་སྤྱིའི་སྒང་སྟོན་ཐུབ་པ་དགོས་རྒྱུ་གལ་ཆེན་ཡིན་སྐོར་གསུངས་སོང་།

དེ་ཡང་བོད་ཀྱི་རོལ་དབྱངས་མཐུན་ཚོགས་ཀྱི་ཚོགས་གཙོ་མཁྱེན་བརྩེ་ལགས་ཀྱིས་འདི་གའི་གསར་འགོད་པར། བཀའ་སྤྱི་གཉིས་ཀྱིས་རྒྱབ་གཉེར་གནང་བ་ལྟར་བོད་ཀྱི་རོལ་དབྱངས་མཐུན་ཚོགས་ཀྱི་ངོས་ནས་བོད་ཆོལ་ཁ་གསུམ་གྱི་གཞས་པ་ ༩ ས་གནས་ཁག་ཏུ་ཆེད་སྐྱོད་ཀྱིས། ས་གནས་ཁག་གི་གཞས་པ་གཞས་མ་ཚོ་དང་མཉམ་འབྲེལ་གྱིས་ལོ་གཅིག་རིང་རྒྱ་གར་ནང་ལོགས་ཀྱི་བོད་མི་འདུས་སྡོད་ཁུལ་ ༢༦ ཙམ་ལ་སྐོར་སྐྱོད་བྱས་ཏེ། དཔའ་བོའི་རྗེས་དྲན་རྡོ་རིང་བཞེངས་སྐྲུན་གྱི་མ་དངུལ་གསོག་སྒྲུབ་བྱས་ཡོད་པ་ལྟར། དང་ཐོག་རྡོ་རིང་བཞེངས་ཡུལ་ལྔ་བདམས་ཡོད་ཀྱང་། ཕྱིས་སུ་བཙན་བྱོལ་བོད་མིའི་འདུས་སྡོད་ཁུལ་ཆེ་ཤོས་དང་། ལྷག་པར་དུ་གདན་ས་གསུམ་གྱི་གནས་ཡུལ་རྒྱ་གར་ལྷོ་ཕྱོགས་སྤེལ་ཀོབ་བོད་མིའི་གཞིས་ཆགས་སུ་བཞེངས་གཏན་འཁེལ་ཡོད་པ་དང་། ད་ལོའི་ཕྱི་ཟླ་ ༡༢ པའི་ནང་བཞེངས་མགོ་རྩོམ་རྒྱུ་ཡིན་ལ། གལ་སྲིད་མ་དངུལ་གྱིས་མ་འདང་བ་བྱུང་ཚེ་སྐུ་སྒེར་ཡིག་ཚང་སོགས་སུ་སྙན་ཞུ་འབུལ་འཆར་ཡོད་སྐོར་བརྗོད་སོང་།

གསར་འགོད་པ། པདྨ་མཚོ།