ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ཟླ་སྔོན་མའི་ཕྱི་ཚེས་ ༡༧ ནས་ཟླ་འདིའི་ཚེས་ ༢༠ བར་རྔ་པ་རྫོང་ཁྲིན་ཀན་རུ་ཁག་དང་པོའི་རྒན་མོ་ལོ་ ༨༠ ཅན་ཞིག་ཚུད་པའི་ཡུལ་མི་ ༡༦ གིས། རྫོང་སྲིད་གཞུང་གིས་འདས་པའི་ལོ་ཉི་སུམ་བཅུའི་སྔོན་ནས་བཙན་འཕྲོག་བྱས་ཟིན་པའི་ཞིང་སའི་ཐོག་གུར་འཕིབས་ཏེ་ངོ་རྒོལ་བྱས་ཡོད་པ་དང་། སྐབས་དེར་སྲིད་གཞུང་གིས་ངོ་རྒོལ་མཚམས་འཇོག་མ་བྱས་ཚེ་འཛིན་བཟུང་བྱ་རྒྱུ་ཡིན་པའི་འཇིགས་སྐུལ་བྱས་ཡོད་ཀྱང་། མི་མང་གིས་ཞིང་ས་མེད་ན་ཁོ་ཚོར་འཚོ་བའི་རྟེན་ས་མེད་སྟབས། དེ་སྔའི་མང་ཚོགས་ཀྱི་ཞིང་སའི་ཐོག་ད་ལྟ་རྒྱ་གཞུང་གིས་བཤས་ར་རྒྱག་བཞིན་པའི་ས་རྨུ་ ༣༤ ལ་རིན་པ་སྤྲོད་དགོས་པ་དང་། ལྷག་མ་རྨུ་ ༦ ཕྱིར་སྤྲོད་དགོས་པའི་རེ་སྐུལ་བྱས་པར། རྫོང་སྲིད་གཞུང་གིས་ཞིང་ས་རྨུ་གཅིག་རང་ལ་ས་རིན་སྤྲོད་རྒྱུ་ཡིན་ལུགས་ཙམ་བརྗོད་པ་ལས་བཟང་ཕྱོགས་ཀྱི་ཐག་གཅོད་གང་ཡང་བྱས་མེད་ཀྱང་། ས་ཆ་དེར་བཤས་ར་འཛུགས་སྐྲུན་བྱེད་བཞིན་པ་མཚམས་འཇོག་བྱས་ཡོད་པ་དང་། མི་མང་གིས་གྲང་ངར་ཆེ་རུ་འགྲོ་བཞིན་ཡོད་པས་གནས་སྐབས་རིང་ལས་གཞི་མཚམས་འཇོག་བྱས་པ་ཡིན་ལུགས་རྗོད་ཀྱི་ཡོད་འདུག
མང་ཚོགས་ཀྱི་ས་ཞིང་བཙན་འཕྲོག་བྱས་པ་འདིའི་ཐད་དེ་སྔོན་ནས་ས་གནས་མང་ཚོགས་ཀྱིས་ཞུ་གཏུག་ཐེངས་ ༥༠ ཙམ་བྱས་ཡོད་ཀྱང་གཞུང་གིས་ཡ་ལན་གང་ཡང་སྤྲད་མེད་སྟབས། ཐེངས་འདིར་ས་གནས་མང་ཚོགས་ཨུ་ཐུག་ཐབས་ཟད་དུ་གྱུར་ཏེ་ངོ་རྒོལ་ལས་འགུལ་དེ་བརྩམས་པ་ཞིག་ཡིན་འདུག
ཕྱི་ལོ་ ༡༩༨༦ ཟླ་ ༦ པའི་ནང་རྔ་པ་རྫོང་མི་མང་སྲིད་གཞུང་གིས་ཁྲིན་ཀན་རུ་ཁག་དང་པོའི་དུད་ཁྱིམ་ ༡༦ ནས་ཞིང་ས་རྨུ་ ༤༠ བླངས་ཏེ། སྐྱིན་ཚབ་ཏུ་ཁྱིམ་ཚང་རེར་ལོ་གཅིག་ལ་རྒྱ་སྒོར་ ༣༥༠ སྤྲོད་རྒྱུ་དང་། ཁྱིམ་ཚང་རེ་ནས་མི་གཅིག་ལ་བཤས་རའི་ནང་ལས་ཀ་སྤྲོད་རྒྱུ་ཁས་ལེན་བྱས་ཡོད་ཀྱང་། ཐོག་མའི་ལོ་གཅིག་གི་སྐྱིན་ཚབ་སྒོར་མོ་མ་གཏོགས་སྤྲད་མེད་པ་མ་ཟད། བཤས་རའི་ནང་ལས་ཀ་སྤྲོད་རྒྱུའང་ལག་བསྟར་བྱས་མེད་སྟབས། མི་མང་གིས་རྫོང་སྲིད་གཞུང་ལ་གནད་དོན་ཐག་གཅོད་དགོས་པའི་ཞུ་གཏུག་ཐེངས་མང་བྱས་ཡོད་ཀྱང་། རྫོང་དཔོན་གྱིས་བཤས་ར་དེ་ད་ལྟ་ཚོད་ལྟའི་དུས་ཡུན་ཡིན་ལ། གནད་དོན་དེར་རྫོང་སྲིད་གཞུང་གིས་ཞིབ་འཇུག་བྱེད་བཞིན་པའི་སྒང་ཡིན་ལུགས་སོགས་བརྗོད་དེ་བཟང་ཕྱོགས་ཀྱི་ཡ་ལན་གང་ཡང་སྤྲད་མེད་སྟབས། མི་མང་འུ་ཐུག་སྟེ་ངོ་རྒོལ་བྱས་ཡོད་འདུག
ད་ལོའི་ཕྱི་ཟླ་ ༩ ཚེས་ ༡༤ ཉིན་སྡེ་བའི་རྒན་རྒོན་ ༡༦ གིས་ས་གནས་འབྲེལ་ཡོད་ཚོར་མིང་དང་མཛུབ་ཐེལ་བརྒྱབ་པའི་དོན་ཚན་གསུམ་ཅན་གྱི་ཞུ་གཏུག་ཡི་གེ་ཞིག་ཕུལ་ཡོད་པ་མ་ཟད། ཕྱི་ཚེས་ ༡༧ ནས་ ༢༠ བར་སྐྲུན་འཛུགས་བྱེད་བཞིན་པའི་ཞིང་སའི་ཐོག་ཕུར་འཕིབས་ཏེ་ངོ་རྒོལ་བྱས་ཡོད་འདུག
ཞུ་གཏུག་ཡི་གེའི་ནང་དུ། གཅིག ༡༩༨༦ ་ལོར་ཁོ་ཚོ་ཁྱིམ་ཚང་ ༡༦ གི་ཞིང་ས་གནས་རྒྱ་གཞུང་གིས་བེད་སྤྱོད་སྐབས། སྲིད་གཞུང་གིས་ཁོ་ཚོར་ཁྱིམ་ཚང་རེ་ནས་མི་གཅིག་རེ་གཞུང་ཞབས་ལས་བཟོ་བའི་གྲས་སུ་འདེམས་སྒྲུག་བྱ་རྒྱུའི་ཁས་ལེན་བྱས་ཡོད་པ་ལྟར། ད་ལྟ་ཁས་ལེན་དེ་ངེས་པར་ལག་ལེན་བྱེད་དགོས་པ་མ་ཟད། ཕྱི་ལོ་ ༡༩༨༦ ལོ་ནས་ད་ལྟའི་བར་གྱི་ཕོགས་དངུལ་ཁ་གསབ་བྱེད་དགོས། གཉིས། ཁོ་ཚོ་ཁྱིམ་ཚང་ ༡༦ ཚང་མ་དཀའ་ངལ་ཅན་གྱི་མི་ཚང་ཡིན་པ་དང་། ཁོ་ཚོའི་ཁྲོད་ལྔ་སྐྱོང་ཁྱིམ་དང་འཚོ་བར་དཀའ་ངལ་ཆེན་པོ་ཅན་ཡང་ཡོད་སྟབས། ཁྱིམ་ཚང་གི་འཚོ་བའི་དཀའ་ངལ་སེལ་ཐབས་ཐད་རོགས་སྐྱོར་ཆེད། ས་ཆ་དེའི་ཐོག་ཐོག་ཁང་གསར་རྒྱག་སྐབས། ལམ་ཁའི་འགྲམ་བརྒྱུད་ཀྱི་ས་ཆ་རྣམས་ཁོ་ཚོ་ཁྱིམ་ཚང་ ༡༦ གི་མང་ཚོགས་ལ་དབང་དགོས། གསུམ། ཁོ་ཚོའི་ཞིང་ས་དེར་བསྡོམས་མུའུ་ ༤༠ ཡོད་པ་དང་། དེའི་ནང་ནས་ས་གནས་སྲིད་གཞུང་གིས་ས་ཆ་མུའུ་ ༣༤ བེད་སྤྱོད་གཏོང་བཞིན་པ་ཕུད། དེ་འཕྲོས་ཀྱི་ས་ཞིང་རྣམས་ཁྱིམ་ཚང་བཅུ་དྲུག་པོ་ལ་ཕྱིར་སློག་དགོས་ཅེས་བཀོད་ཡོད་འདུག
