གྲྭ་བ་ཞིག་ལ་ལོ་ ༧ གྱི་ཁྲིམས་ཆད།

རྒྱ་ནག་གཞུང་གིས་མགོ་ལོག་པདྨ་རྫོང་ངྷི་མདའ་ཡུལ་ཚོའི་གྲྭ་བ་ཞིག་ལ་བོད་རྒྱ་མི་རིཊ་ཁ་བྲལ་གཏོང་མཁན་གྱི་ཉེས་མིང་འོག་ལོ་ ༧ གྱི་ཁྲིམས་ཐག་བཅད་འདུག

རྒྱ་ནག་གཞུང་གིས་སྔར་ལོའི་ཕྱི་ཟླ་ ༣ པའི་ནང་བོད་མདོ་སྨད་མཚོ་སྔོན་མགོ་ལོག་ཁུལ་པདྨ་རྫོང་ངྷི་མདའ་ཡུལ་ཚོའི་གྲྭ་ཚེ་གཡང་ལགས་འཛིན་བཟུང་བྱས་ཏེ། ཟླ་གཅིག་ཙམ་གྱི་རིང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་ཀྱང་། རྗེས་སུ་ཁོང་གི་ཞང་བོ་གཙོས་པའི་འབྲེལ་ཡོད་ཁག་ཅིག་ལ། ཁོང་ ༢༠༠༨ ལོ་ནས་བཟུང་དཀར་མཛེས་རྫོང་དང་འབར་ཁམས། རྔ་བ་བཅས་ས་གནས་ཁག་ཅིག་གི་བོད་མིའི་ངོ་རྒོལ་ལས་འགུལ་ཁྲོད་མཉམ་ཞུགས་གནང་བ་དང་། རྔ་བའི་ཞི་རྒོལ་སྐབས་མདུན་དུ་ཐོན་ཏེ་སྐད་འབོད་བྱེད་ཀྱི་ཡོད་སྐོར་སོགས་བརྗོད་ཡོད་པ་མ་ཟད། སྔར་ལོའི་ཟླ་ ༤ བའི་ནང་ཁོང་གི་ཨ་མའི་སྤུན་མཆེད་ཞང་བོ་གར་ཁོ་ཚང་ལ་སི་ཁྲོན་དཀར་མཛེས་རྫོང་ཉེན་རྟོག་ལས་ཁུངས་ཀྱིས་ཡི་གེ་ཞིག་འབྱོར་བའི་ནང་། གྲྭ་ཚེ་གཡང་ལགས་ཀྱིས་བོད་རྒྱ་མི་རིགས་ཁ་བྲལ་གཏོང་བའི་ནག་ཉེས་བསགས་ཏེ་ལོ་ ༧ གྱི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་ཚུལ་བཀོད་ཡོད་འདུག

རང་ལོ་ ༢༣ ཡིན་པའི་གྲྭ་ཚེ་གཡང་ལགས་ནི། མགོ་ལོག་ཁུལ་པདྨ་རྫོང་ངྷི་མདའ་ཡུལ་ཚོའི་ཁྱིས་མདའ་སྡེ་བ་ནས་ཡིན་པ་དང་། ཁོང་ལ་ཨ་མ་དང་ཕུ་བོ་གཉིས་བཅས་ཁྱིམ་མི་གསུམ་ཡོད་པ་ལས། ཨ་མ་དེ་སྔོན་ཁང་པའི་རྩིག་གྱང་ལོག་པའི་དོན་རྐྱེན་བྱུང་སྟེ་འདས་གྲོངས་སུ་ཕྱིན་ཡོད་འདུག དེ་སྔོན་ཁྱིམ་ཚང་གི་འབྱོར་བ་ཧ་ཅང་ཞན་པ་དང་ཨ་མ་འདས་གྲོངས་སུ་ཕྱིན་རྗེས་སྤུན་གསུམ་པོ་རང་སར་འཁྱམ་ཉུལ་བྱས་ཏེ། སྤུན་ཆེ་བ་བཀྲ་ཤིས་ཆོས་འགྲུབ་ཞུ་བ་ལོ་ ༡༥ ཡས་མས་རིང་གང་ཡོད་ཤེས་ཀྱི་མེད་པ་དང་། སྤུན་འབྲིང་བ་ཉི་མ་འོད་ཟེར་ཞུ་བ་མགོ་ལོག་གི་ས་ཆ་གང་སར་འཁྱམས་ཉུལ་བྱས་ཏེ་འཚོ་བ་བསྐྱལ་ཡོད་འདུག

ཁོང་ཆུང་དུས་སྡོད་ཁང་པ་མེ་ཤོར་ཏེ་མགོ་དང་རྐང་པ། ལག་པ་ཡག་གཅིག་བཅས་མེས་ཚིགས་ཏེ་རྨས་སྐྱོན་ཚབས་ཆེན་ཕོགས་ཡོད་པ་དང་། སྐབས་དེར་གྲོང་པ་ཁྱིམ་མཚེས་ཁག་གིས་རོགས་རམ་འོག་སྲོག་ཉེན་ལས་མཐར་ཡོད་པ་དང་། རྗེས་སུ་མགོ་ལོག་པདྨ་རྫོང་གི་དབུལ་ཕོངས་དང་དབང་བོ་སྐྱོན་ཅན་བདག་མེད་གཉོར་སྐྱོང་བྱེད་སའི་༼བོད་ཡིག་བྱམས་སྐྱོང་སློབ་གྲྭ༽ ཟེར་བའི་སྒེར་བཙུགས་སློབ་གྲྭ་ཞིག་གིས་བདག་པོ་བརྒྱབ་ཏེ་ལོ་  ༦ ཡས་མས་སུ་བསྡད་ཡོད་ཀྱང་། ཡི་གེ་འབྲི་ཀློག་མ་ཤེས་པའི་དབང་གིས་སློབ་གྲྭ་ལས་ཕྱིར་བུད་འདུག  དེའི་རྗེས་སུ་གྲྭ་བ་བྱས་ཏེ་གསེར་རྟ་ལྔ་རིག་ནང་བསྟན་སློབ་གླིང་དུ་ཟླ་ ༡ ལྷག་རིང་བསྡད་ཀྱང་། འགྲོ་སོང་དང་ཕྱོགས་ཡོངས་ཀྱི་དཀའ་ངལ་གྱི་དབང་གིས་འདུག་མ་ཐུབ་པར་ས་ཆ་གང་མང་ཞིག་ལ་འཁྱམ་ཉུལ་བྱས་ཏེ་བསྡད་ཡོད་པ་དང་། སྐབས་དེ་དག་ཏུ་ས་གནས་ཁག་གི་ལས་འགུལ་རིམ་པའི་ནང་མཉམ་ཞུགས་བྱས་སྟབས། སྔར་ལོ་རྒྱ་གཞུང་གིས་ཁོང་འཛིན་བཟུང་གིས་བཙོན་འཇུག་ཁྲིམས་ཐག་བཅད་འདུག

གསར་འགོད་པ། དོན་གོ