མི་རིགས་ཀྱི་སོན་རྩ་གླེང་བ།

ཨ་འདུས་མིག་ཆུ།

ཉེར་གཅིག་དུས་རབས་འདིར་སྐྲ་སེར་པོ་དང་སྐད་སྦྲགས་མ་སྨྲ་བར་སྤྲོ་བའི་བོད་རིགས་བྱིས་པ་འདི་དག་མཐོང་ཐེངས་རེར་སེམས་གཏིང་ནས་ཁོ་ཆད་ཡོང་བཞིན་འདུག མ་ཟད་འདི་དག་གིས་ཕྱིའི་རྣམ་པ་སྒྱུར་བཞིན་པའི་སྒང་ལ་ནང་བསམ་བློ་ཡང་ཡོངས་སུ་བཅོས་བསྒྱུར་བྱེད་པར་དང་འདོད་ཆེན་པོ་བྱེད་བཞིན་འདུག་གོ།

ནང་གི་སེམས་ཁམས་དེ་ཉིད་དོན་དངོས་ཀྱིས་གསར་གཏོད་ཀྱི་འགྱུར་བཅོས་ཤིག་ཡིན་ན་ཆོག་མོད། འདི་དག་གིས་གསར་པ་རུ་འདོད་པའི་ནང་གི་སེམས་བློའི་འཁོར་ཕྱོགས་ཡོད་ཚད་མི་རིགས་ཀྱི་རིག་གནས་ལ་སྐྱོན་འཛུགས་དང་། རང་རེའི་སྔོན་རབས་ཀྱི་སྐྱེས་ཆེན་དམ་པ་དག་ལ་དམའ་འབེབས། ད་ཡོད་མཁས་པ་རྒན་རབས་ཚོར་བསྙོན་འཛུགས་བྱེད་རྒྱུ་ལས། མི་རིགས་ཤིག་ཡར་ཐོན་བྱེད་པའི་བསམ་སྤྱོད་དམ་ཡང་ན་མི་རིགས་ཀྱི་སྣེ་ཁྲིད་པའི་བསམ་བློ་ཞིག་ནི། གཏན་ནས་མི་འདུག་གོ།

བོད་ཕྱི་ནང་གི་རྩོམ་པ་པོར་ཁས་འཆེ་བ་མང་དག་ཅིག་གིས་རང་ཉིད་བསམ་བློ་པ་རུ་བཅའ་འདོད་འདུག་ལ། བསམ་བློ་བ་རུ་བཅས་པའི་མཐར་ཐུག་གི་ཐེམ་སྐས་ལྟ་བུ་ནི། མི་རིགས་ཀྱི་རིག་གནས་དང་མེས་པ་གོང་མར་དགག་རྒྱག་བྱ་རྒྱུ་དང་པོར་བཟུང་ནས་འདུག་སྙམ། མཐོ་སློབ་དག་ནས་ཐོན་ཡོང་བའི་བསམ་བློ་བ་རུ་འདོད་པ་དག་གི་སྣང་ངོར་རང་རེ་མི་ རིགས་ལ་ཡོད་པ་ནི། སྐད་ཡིག་གཅིག་པོ་ལས་མ་འདས་སོ།།

ཁ་ནས་ལ་རྒྱ་ཞེས་ཇི་ལྟར་བཤད་ཀྱང་ཆོག་ལ། ལག་པས་མི་རིགས་ཞེས་ག་ཚོད་བྲིས་ཀྱང་ཆོག་མོད། དོན་དམ་གྱིས་མི་རིགས་ལ་ཤ་ཚ་ཞིང་། སྙིང་ཉེ་བ་ཞིག་ཡིན་ཚེ། མི་རིགས་དེའི་རིག་གནས་དང་ཡུལ་སྲོལ་གོམས་གཤིས། དཀའ་བ་བརྒྱ་ཕྲག་སྤྱད་པའི་སྔོན་རབས་མེས་པོ་གོང་མ་དག་སེམས་བསམ་པའི་གཏིང་དང་ སྙིང་རུས་པའི་གསེང་ལ་ཡོད་དགོས་པ་རེད་འདོད།

མེས་པོ་སྐྱོན་ཅན་ཞིག་ལས་མེད་པ་དང་། རིག་གཞུང་ཕན་མེད་ཅིག་ལས་མེད་པའི་མི་རིགས་ཤིག་དོན་དངོས་ས་ཆེན་གྱི་འཇིག་རྟེན་འདིར་གནས་ཀྱང་དགོས་པ་དེ་ཙམ་མེད་ལ། མ་གནས་ཀྱང་འཛམ་གླིང་གི་མི་དམངས་ལ་གྱོང་གང་ཡང་མེད་པ་རེད། དེ་ལྟ་ན་ང་ཚོས་ཀྱང་མི་རིགས་ཞེས་ག་ཙམ་བྲིས་པ་དང་། ལ་རྒྱ་ཞེས་ག་ཚོད་མོལ་ཡང་དགོས་པ་ཆེན་པོ་ཞིག་གཏན་ནས་མཐོང་མ་གྱུར།

གཞོན་སྐྱེས་གང་མང་ཞིག་མེས་པོ་གླེང་བར་མི་དགའ་ལ། རིག་གཞུང་སྦྱང་རྒྱུར་མི་སྤྲོ་བར་རྩོམ་ཡིག་ཡིན་ཞེས་པའི་ཚིག་འགའ་ཤས་ནམ་རྒྱུན་ ནས་འབྲི་བཞིན་འདུག་མོད། མེས་པོ་གོང་མ་དག་དང་དེ་དག་གིས་ཤུལ་བཞག་རིག་གནས་མི་དགོས་པའི་རྩོམ་ཡིག་དག་ནི། ཆུ་ནང་ལ་འོག་རླུང་བཏང་བ་དང་ཁྱད་པ་ག་རེ་འདུག་ཨང་།

མི་རིགས་ཀྱི་ལ་རྒྱ་འཛིན་པ་ནི་གསར་གཏོད་ཅེས་ཁ་གཡང་སྒྲོག་རྒྱུ་ཙམ་དང་། མི་རིགས་ཀྱི་རིག་གནས་ལ་སྐྱོན་འཛུགས་རྒྱུ་ཙམ་ག་ལ་ཡིན་འདོད། མི་རིགས་ཀྱི་ལ་རྒྱ་འཛིན་པ་ནི་མི་རིགས་ཀྱི་རིག་གནས་ལ་སྦྱོང་བརྩོན་དང་། སྔོན་རབས་མེས་པོ་དག་གི་མཛད་རྗེས་ལ་ཕྱིར་རྟོགས་བྱས་ཏེ། རིག་གནས་རྒྱུད་འཛིན་དང་མཛད་རྗེས་གོང་བཀུར་བྱ་རྒྱུ་ཞིག་ཡིན་པར་འདོད།

དོན་དངོས་གནས་བྱས་ན། མི་རིགས་ཀྱི་སོན་རྩ་ཡིན་མིན་གྱི་གནད་འགག་གཙོ་བོ་ནི་ཕ་མ་བོད་རིགས་ཡིན་པ་ཙམ་གྱིས་ག་ལ་ཆོག བྱིས་པ་དེ་མི་རིགས་གང་དེའི་སོན་རྩ་ཡིན་པའི་རྩ་བའི་འགག་རྩ་ནི། མི་དེའི་སེམས་རྒྱུད་ལ་མི་རིགས་ཀྱི་འདུ་ཤེས་བརྟན་པོ་ཞིག་དང་། རིག་གཞུང་ལ་ལྟ་ཚུལ་ཡང་དག་ཅིག་ཡོད་མེད་ལ་རག་ལས་འདུག་སྙམ།

མི་རིགས་ཀྱི་འདུ་ཤེས་ཡང་དག་ཅིག་ཡོད་པ་གང་ཞིག རིག་གཞུང་ལ་ལྟ་ཚུལ་ཕུན་ཚོགས་པའི་བྱིས་པ་དེ་དག་དོན་དངོས་བོད་མི་རིགས་ཀྱི་མ་འོངས་པའི་སོན་རྩ་ཡིན་ངེས་ལ། དེ་ལས་གོང་གི་ཆ་རྐྱེན་གང་རུང་མི་ལྡན་པའི་བྱིས་པ་དེ་མི་རིགས་ཀྱི་གད་སྙིགས་སུ་འགྱུར་བ་ཐེ་ཚོམ་མི་འདུག་འདོད།

དེའི་ཕྱིར་ད་ཡོད་ཀྱི་དགེ་རྒན་དུ་འབོད་པ་དང་། སློབ་གསོ་བ་རུ་ཁས་འཆེ་བ་སུ་འདྲ་ཞིག་ཡིན་རུང་བོད་ཀྱི་བྱིས་པ་དག་བོད་མི་ཡང་དག་ཅིག་བསྐྱེད་སྲིང་བྱ་དགོས་ན། ངེས་པར་བྱིས་པ་དེའི་སེམས་ཁམས་ལ་མི་རིགས་ཀྱི་འདུ་ཤེས་བརྟན་པོ་ཞིག་བཟོ་དགོས་པ་དང་། རིག་གཞུང་ལ་ལྟ་ཚུལ་ཡང་དག་ཅིག་བསྐྲུན་དགོས་པ་རེད་འདོད་བཞིན་ཡོད།

རིགས་ཀྱི་འདུ་ཤེས་བརླག་པ་དང་རིག་གཞུང་གི་དགེ་མཚན་མི་ཤེས་པའི་མི་ཞིག་གིས་སྐད་ཡིག་གཙང་མ་དགོས་ཞེས་ཇི་ལྟར་སྐད་ཅོར་བརྒྱབ་ཀྱང་ཁ་བཤད་ཙམ་ལས་དོན་ལག་ལེན་ཐོག་གཏན་ནས་མེད་པ་གསལ་པོ་རེད། སྐད་ཡིག་མི་རིགས་ཀྱི་བླ་སྲོག་ཏུ་གྱུར་པ་ནི། ཕུན་ཚོགས་རིག་གནས་ཤིག་ལ་བརྟེན་ནས་བྱུང་བ་གདོན་མི་ཟའོ།།

གསར་གཏོད་ནི་སྔོན་སྲོལ་རྒྱུན་འཛིན་དང་དེ་ལ་ཁ་གསབ་བྱས་པ་ལ་བརྟེན་ནས་བྱུང་བ་ཞིག་ཡིན་པ་ལས། མེས་པོས་བཞག་པའི་རིག་གནས་དོར་ནས་གཞན་གྱི་བསམ་བློ་རྙིང་པ་འགའ་ཁྱེར་ཡོང་བ་ལ་གསར་གཏོད་ག་ལ་ཟེར། གསར་གཏོད་མི་ཤེས་པའི་མི་ནི་ནམ་ཡང་རང་བདག་གི་ཅ་དངོས་ཀྱི་རིན་ཐང་དང་དགེ་མཚན་མི་ཤེས། རིག་གནས་ཀྱི་དགེ་མཚན་དང་རིག་གནས་དེ་སྦྱང་བའི་འདུན་པ་མེད་པའི་མི་ཞིག་གིས་གསར་གཏོད་ཅེས་པ་ནི་ཁ་གཡང་ཙམ་མོ།།

ང་ཚོའི་ཕྱི་རབས་བོད་པ་དག་མི་རིགས་ཀྱི་སོན་རྩ་ངོ་མ་ཞིག་ཆགས་དགོས་ཚེ། ངེས་པར་རིགས་ཀྱི་འདུ་ཤེས་བསམ་བློ་ཡོད་པ་དང་། རང་གི་རིག་གཞུང་གི་དགེ་མཚན་ཤེས་པའི་མི་ཞིག་བཟོ་མ་ཐུབ་ཚེ། ཅུང་མི་འགོར་བར་རྩམ་དྲི་མར་དྲི་འཐུལ་བའི་བོད་ཀྱི་བྱིས་པ་ཞིག་ཁག་པོ་རེད་འདུག་སྙམ་མོ།།