དེ་རིང་སྔ་དྲོར་བཙོན་ཟུར་གྲྭ་བག་གྲོ་ལགས་ཀྱིས་༼བོད་མིའི་སྙིང་སྟོབས་དྲག་པོས་མི་གནོན༽ཞེས་པའི་པར་རིས་དཔེ་དེབ་ཅིག་དབུ་འབྱེད་གནང་སོང་། དཔེ་དེབ་འདིས་རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བརྗོད་རྫུན་བཟོ་བྱས་པ་རྣམས་ལ་བདེན་པའི་འགྲེལ་བརྗོད་བྱས་ཡོད་ཟེར།
དེ་རིང་སྔ་དྲོའི་ཆུ་ཚོད་༩།༣༠ ཐོག་ངྷ་ས་གཙུག་ལག་ཁང་གི་ཉེ་འགྲམ་དུ་ཡོད་པའི་ལྷ་སྤྱི་ཚོགས་ཞབས་ཞུ་ཁང་གི་ཚོགས་ཁང་དུ་ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས། བོད་བསྟན་སྲིད་མི་རིགས་ཆེད་རང་ལུས་མཆོད་མེར་སྒྲོན་མཁན་རྒྱལ་གཅེས་དཔའ་པོ་དཔའ་མོ་རྣམ་དང་། གཞན་རྒྱ་ནག་གིས་བོད་མིར་དྲག་གནོན་དང་ཁོར་ཡུག་གཏོར་བཤིག་བཏང་བའི་པར་རིས་ཕྱོགས་སྒྲིག་བྱས་པའི་དཔེ་དེབ་༼ བོད་མིའི་སྙིང་སྟོབས་དྲག་པོས་མི་གནོན༽ཞེས་པའི་དབྱིན་ཡིག་གི་འགྲེལ་བཤད་དཔེ་དེབ་ཅིག་དབུ་འབྱེད་གནང་སོང་ལ། སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གཙོས་བོད་མི་དང་ཕྱི་རྒྱལ་བ། གསར་འགོད་པ་བཅས་ཁྱོན་མི་གྲངས་ ༢༠ ལྷག་མཉམ་ཞུགས་གནང་འདུག
པར་རིས་དཔེ་དེབ་ཕྱོགས་སྒྲིག་བྱེད་མཁན་ཆབ་སྲིད་བཙོན་ཟུར་གྲྭ་བག་གྲོ་ལགས་ཀྱིས་དཔེ་དེབ་འདིའི་དམིགས་ཡུལ་སྐོར་ལ་བརྗོད་དོན། རྒྱ་གཞུང་གིས་བོད་ཀྱི་དངོས་ཡོད་ལོ་རྒྱུས་ལ་འཁྱོག་བཤད་རྫུན་སྒྲིག་བྱས་ཏེ་བརྙན་འཕྲིན་དང་དཔེ་དེབ་སོགས་དཔར་སྐྲུན་བྱེད་ཀྱི་ཡོད། གལ་སྲིད་རྒྱ་ནག་གིས་བོད་ནང་འཛུགས་སྐྲུན་ཡར་རྒྱས་བཏང་ཡོད་ན། ༡༩༨༧ དང་ ༡༩༨༨། ༢༠༠༨ གསུམ་གྱི་ནང་བོད་མིས་རྒྱ་གཞུང་ལ་ཞི་བའི་ངོ་རྒོལ་བྱས་པའི་དོན་རྐྱེན་བྱུང་དགོས་དོན་གང་ཡང་མེད། བོད་མིས་ཞི་བའི་ངོ་རྒོལ་གྱི་དོན་རྐྱེན་འདི་དག་དང་བོད་མིས་རང་ལུས་མེར་བསྲེགས་བྱེད་དགོས་པའི་རྒྱུ་རྐྱེན་གཙོ་བོ་རྒྱ་གཞུང་ལ་རག་ལས་ཡོད། བོད་ལྗོངས་བརྙན་འཕྲིན་དང་བོད་ལྗོངས་གནའ་རྫས་འགྲེམས་སྟོན་ཁང་གཉིས་ཀྱིས་བོད་གསར་རྙིང་གཉིས་ཀྱི་པར་རིས་རྫུན་བཟོ་དང་ཡུལ་སྐོར་སྤྲོ་འཆམ་པ་ཚོར་མགོ་སྐོར་བཏང་དང་གཏོང་བཞིན་ཡོད་པ་རེད། དཔེར་ན། ཀྲུང་གོ་མི་རིགས་འགྲེམས་སྟོན་ཁང་དུ་ ༢༠༠༨ ལོར་བོད་ནང་ཞི་རྒོལ་ཆེན་མོ་བྱུང་སྐབས་ཀྱི་པར་རིས་རྫུན་མ་མང་པོ་འགྲེམས་སྟོན་བྱས་ཏེ་༸གོང་ས་མཆོག་དང་བོད་མིའི་སྒྲིག་འཛུགས་ལ་ཞྭ་མོ་ནག་པོ་གཡོགས་ཏེ་རྒྱལ་ཁབ་ཁ་བྲལ་རིང་ལུགས་པ་ཏཱ་ལའི་རུ་ཚོགས་ཀྱི་ངན་སྐུལ་རེད་ཅེས་རྒྱ་མི་རིགས་ལ་མགོ་སྐོར་གཏོང་གིན་ཡོད། ཀྲུང་གོའི་བོད་ལྗོངས་དང་པོ་ཏཱ་ལ་དུས་དེབ་སོགས་ཀྱི་ནང་དུ། བོད་ཀྱི་ལོ་རྒྱུས་རྫུན་བཟོ་ཕྱོགས་སྒྲིག་བྱས་ཏེ་ཕྱི་རྒྱལ་མི་རིགས་ལ་མགོ་སྐོར་བཏང་བསྡད་ཡོད། རང་ལུས་མེར་བསྲེགས་གཏོང་མཁན་བོད་ཀྱི་རྒྱལ་གཅེས་དཔའ་པོ་དཔའ་མོ་རྣམ་གྱི་ལོ་རྒྱུས་རྫུན་བཟོ་བྱས་ཏེ་ཀྲུང་དབྱང་བརྙན་འཕྲིན་དང་གསར་འགྱུར་བརྒྱུད་ལམ་ཁག་གི་ནང་༸གོང་ས་མཆོག་དང་བཙན་བྱོལ་བོད་མིས་བཟོས་པ་རེད་ཅེས་སྐྱོན་བརྗོད་དང་། ཉེ་ཆར་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འགྲོ་བ་མིའི་ཐོབ་ཐང་བསྐྱར་ཞིབ་སྐབས་རྒྱ་ནག་གཞུང་གིས་རྒྱབ་ཤ་དཀར་པོ་ཟེར་བ་འགྲེམས་སྤེལ་བྱས་པའི་ནང་བོད་མིར་བདེ་སྐྱིད་ཡོད་པ་དང་། བོད་འཛུགས་སྐྲུན་ཡར་རྒྱས་བཏང་ཡོད་ཚུལ་བཤད་ཀྱང་། དེང་སང་གསར་འགྱུར་བརྒྱུད་ལམ་ནང་བོད་ནང་གི་བོད་མིའི་འགྲོ་བ་མིའི་ཐོབ་ཐང་སྐོར་གྱི་གནས་ཚུལ་མང་པོ་ཐོན་སྟབས། རྒྱལ་ཁབ་ཁ་ཤས་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ག་འདྲ་ཡོད་མེད་ཤེས་ཏེ་རྒྱ་ནག་ལ་སྐྱོན་བརྗོད་བྱས་ཡོད། དེ་བཞིན། བོད་མི་ཚོས་ཆོས་ཕྱོགས་ཀྱི་མཛད་སྒོ་གང་འདྲ་ཞིག་ཚོགས་སྐབས་ཉེན་རྟོག་པ་དང་དྲག་ཆས་ཉེན་རྟོག་པ་མང་པོ་ཞིག་གཏོང་བ་དང་། བོད་ཀྱི་དགོན་སྡེ་ཡོངས་རྗོགས་བཙོན་ར་ལྟ་བུ་ཆགས་པ། བོད་ཀྱི་སྐད་ཡིག་རྩ་མེད་བཟོ་བའི་དམིགས་ཡུལ་བཟུང་ནས་བོད་ནང་གི་སློབ་གྲྭ་ཁག་ཏུ་བོད་ཡིག་གི་ཚབ་ཏུ་རྒྱ་ཡིག་སྦྱོང་དགོས་བཟོས་པ། བོད་ཀྱི་རྒྱལ་སར་ཡོད་པའི་ཁང་རྙིང་ཅི་ཡོད་གཏོར་བཤིག་རྩ་མེད་བཏང་བ་དང་། བོད་ཀྱི་ས་ཆའི་མིང་སོགས་བརྗེ་བོ་རྒྱག་པ། དཔེར་ན། པོ་ཏཱ་ལའི་མིང་ལ་མི་དམངས་ཕོ་བྲང་དང་ནོར་བུ་གླིང་ཁར་མི་དམངས་སྤྱི་གླིང་ཞེས་བཏགས་ཡོད། གང་ལྟར། དཔེ་དེབ་འདིའི་པར་རིས་ཀྱི་ཐོག་ནས་བོད་ཀྱི་དངོས་ཡོད་གནས་སྟངས་ཧ་གོ་རྒྱུ་དང་ལྷག་པར་རྒྱ་གཞུང་གིས་བོད་ཀྱི་ལོ་རྒྱུས་འཁྱོག་བཤད་རྫུན་བཟོ་བྱས་པ་རྣམས་ཁུངས་སྐྱེལ་ར་སྤྲོད་གསལ་བོ་བྱེད་ཐུབ་ཅེས་བརྗོད་སོང་།
ཁོང་གིས་མུ་མཐུད་དུ་པར་རིས་དཔེ་དེབ་འདི་འགྲེམས་སྤེལ་བྱེད་ཕྱོགས་སྐོར་ལ་བརྗོད་དོན། དཔེ་དེབ་འདི་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འགྲོ་བ་མིའི་ཐོབ་ཐང་བསྐྱར་ཞིབ་ཚོགས་འདུ་དང་སི་པན་གྱི་ཁྲིམས་ཁང་། རྒྱ་གར་རྒྱལ་ས་ལྡི་ལིར་ཡོད་པའི་གཞུང་ཚབ་ཁང་ཁག འཛམ་གླིང་གི་མགོ་ཁྲིད་གཙོས་རྒྱ་གར་དང་ཕྱི་རྒྱལ་ཁག་གི་མཐོ་རིམ་སློབ་གྲྭ་ཁག་ལ་འབུལ་འཆར་ཡོད་ཅེས་བརྗོད་སོང་།
དེའི་རྗེས་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས་ཀྱིས། སྤྱི་ཡོངས་བོད་ཀྱི་གནད་དོན་ཐོག་བལྟས་ན་བོད་ཀྱི་གནད་དོན་འདི་རྒྱལ་སྤྱིའི་རང་བཞིན་གྱི་གནད་དོན་ཆགས་ནས་དོ་སྣང་བྱེད་དགོས་པ་ཞིག་ཆགས་བསྡད་ཡོད། ཡིན་ནའང་དེང་སང་སྤྱི་ཚོགས་བརྒྱུད་ལམ་འདྲ་མིན་ནང་ནས་མི་ཁ་ཤས་ཀྱིས་ངོ་མ་རྫུན་མ་བཟོ་བ་དང་རྫུན་མ་ངོ་མ་བཟོ་ཐུབ་སྟབས། མི་མང་པོ་ཞིག་རང་བཞིན་གྱི་འཁྲུལ་འགྲོ་བའི་གཞི་རྩ་ཆགས་ཡོད་དུས། གྲྭ་བག་གྲོ་ལགས་ཀྱིས་བོད་ཀྱི་གནད་དོན་དང་འབྲེལ་བའི་པར་རིས་བསྡུ་སྒྲིག་གནང་ཐུབ་པ་ཡག་པོ་བྱུང་ཡོད་པ་དང་། དེང་སང་མི་ཚང་མས་པར་རིས་ཀྱི་ཕྱོགས་ལ་དོ་སྣང་ཤུགས་ཆེན་པོ་བྱེད་ཡོད། དཔེར་ན། པར་རིས་ཞིག་གིས་ལོ་རྒྱུས་ངོ་མ་འགྲེལ་བཤད་བརྒྱབ་ཐུབ་ན་ཡིག་འབྲུ་ཁྲི་གཅིག་གཉིས་ལས་པར་གཅིག་གིས་ཕ་རོལ་བར་ཚོར་བ་དང་དཔང་པོ་བྱེད་ཐུབ། དཔེ་དེབ་འདིས་བོད་ཀྱི་གནད་དོན་སྐོར་ལ་གོ་རྟོགས་གསལ་བོ་བཟོ་ཐུབ་པར་ཏན་ཏན་ཕན་ཐོགས་ཆེན་པོ་ཡོད། ད་ལྟ་ང་ཚོ་བོད་མིའི་སྒྲིག་འཛུགས་ཀྱི་ངོས་ནས་དེང་སང་གི་དངོས་ཡོད་གནས་སྟངས་ཐོག་ནས་གཉིས་ཕན་དབུ་མའི་ལམ་གྱི་ཐོག་ནས་རྒྱ་གཞུང་དང་མཉམ་དུ་འབྲེལ་མོལ་བྱེད་ཀྱི་ཡོད། སྤྱི་ཡོངས་ནས་བཤད་ན། དེང་སང་རྒྱ་ནག་ནང་ལ་འགྱུར་བ་ཏན་ཏན་འགྲོ་ཡི་ཡོད། རྒྱ་རིགས་རྩོམ་པ་པོ་ཁག་ཅིག་གིས། རྒྱ་ནག་སྲིད་གཞུང་ལ་འགྱུར་བ་གཏོང་བར་རྒྱ་ནག་མགོ་ཁྲིད་ཚོར་ཡིད་ཆེས་མེད་ཀྱང་རྒྱ་རིགས་མང་ཚོགས་ཀྱིས་རྒྱ་གཞུང་གི་སྒྲོམ་གཞི་ལ་འགྱུར་བ་འགྲོ་སྲིད་ཅེས་བཤད་ཀྱི་ཡོད། གང་ལྟར་རྒྱ་ནག་ལ་འགྱུར་བ་འགྲོ་བ་ཙམ་གྱིས་བོད་ཀྱི་གནད་དོན་གཙང་མ་ཆགས་པར་ཐེ་ཚོམ་མེད་སྟབས། ང་ཚོས་གོ་སྐབས་དམ་འཛིན་དང་གོམ་པ་མདུན་སྤོ་བྱེད་དགོས་པའི་གྲ་སྒྲིག་བྱེད་དགོས་རེད་ཅེས་གསུངས་སོང་།
བཙོན་ཟུར་གྲྭ་བག་གྲོ་ལགས་ཀྱིས་སྒེར་ངོས་ནས་བོད་ཀྱི་ལོ་རྒྱུས་དང་འབྲེལ་བའི་དཔེ་དེབ་ ༡༢ ལྷག་འགྲེམས་སྤེལ་བྱས་ཡོད་པ་དང་། པར་རིས་དཔེ་དེབ་འདིའི་ནང་རྒྱ་གཞུང་གིས་བོད་ཡུལ་བཙན་བཟུང་བྱས་ནས་བཟུང་བོད་ཀྱི་ཆོས་དང་རིག་གཞུང་། ཁོར་ཡུག་གཏོར་བཤིག་དང་། ལྷག་པར་དུ་བོད་བསྟན་སྲིད་མི་རིགས་ཀྱི་ཆེད་དུ་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མི་རྣམས་ཀྱི་སྐུ་པར་ཕྱོགས་སྒྲིག་བྱས་པའི་དཔེ་དེབ་ཅིག་ཡིན་འདུག
གསར་འགོད་པ། ལྷ་སྐྱབས་རྒྱལ།
ཆབ་སྲིད་བཙོན་ཟུར་ནང་གི་འཇོན་ཤོས་ཤིག་ཁོང་ཡིན། ཕྱག་ལས་དག་ལ་རྒྱབ་སྐྱོར་ཡོད།
གྲྭ་བག་བྲོ་ལ་དེབ་མང་པོ་ཞེ་དྲག་ཡོད་པ་རེད། ཡིན་ནའང་ཁོ་རང་གིས་དེབ་ཀྱི་གྲངས་ཀ་གཙོ་བོར་བྱེད་པ་ལས་ནང་དོན་ལ་དེ་ཙམ་ཐུགས་ཉམས་འཇོག་གི་མེད་པ་ཞིག་ལ་མཐོང་སོང་། སྤྱིར་བཏང་སེམས་ཤུགས་ཡག་པོ་རེད། དེ་ལ་སྔགས་བརྗོད་བརྒྱ་ཆའི་བརྒྱ་ཡོད་དོ།།།