བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སངས་ཚེ་རིང་ལགས་ཀྱིས་ཕྱག་ལས་དབུ་འཛུགས་གནང་བ་དང་བསྟུན་ཏེ། ཚོགས་པའི་ངོ་བོ་དང་ལས་དོན་བྱེད་ཕྱོགས། དེ་བཞིན་ཆབ་སྲིད་ཀྱི་ལྟ་བ་འཁྱེར་སྟངས་བཅས་ཀྱི་ཐོག་བཅར་འདྲི་ཞུས་ཡོད།
དྲི་བ། ཐོག་མར་སྐུ་ཉིད་ཀྱིས་སོ་སོ་ངོ་སྤྲོད་རོབ་ཙམ་ཞིག་གནང་རོགས།
ལན། ང་རང་སྐྱེས་ཡུལ་ལྷ་ས་འཕན་པོ་རེད། གཞི་རིམ་སློབ་གྲྭ་ཐོན་རྗེས་ལྷ་སར་ཚོང་ལས་བྱས་པ་ཡིན། ༡༩༩༡ ལོར་ལྷ་སའི་བར་སྐོར་ནང་གི་ངོ་རྒོལ་ནང་མཉམ་ཞུགས་བྱས་ཤིང་། ལྷག་པར་དུ་ ༡༩༩༣ ལོར་ལྷ་སའི་ཚོང་ཟོག་གི་གོང་ཚད་ཆེན་པོ་འཕར་བ་དང་། དེ་དང་མཉམ་དུ་དཔྱ་ཁྲལ་རིགས་ཀྱང་རང་བཞིན་གྱིས་འཕར་སྟབས། ཚོང་བ་དང་མང་ཚོགས་ཀྱིས་ངོ་རྒོལ་བྱས་པ་དེ་རིམ་གྱིས་ཆབ་སྲིད་ངོ་རྒོལ་དུ་གྱུར་ཏེ། ༸རྒྱལ་བ་རིན་པོ་ཆེ་ཁྲི་ལོར་བརྟན་པར་ཤོག་ཟེར་བ་སོགས་ཀྱི་སྐད་འབོད་བརྒྱབ་པ་རེད། སྐབས་དེར་ཉེན་རྟོག་པ་དང་དྲག་ཆས་དམག་གིས་མང་ཚོགས་ལ་དྲག་གནོན་བྱས་ཤིང་། ངའི་རོགས་པ་ཞིག་ལོ་དེའི་ཕྱི་ཟླ་ ༥ པའི་ནང་ལ་འཛིན་བཟུང་བྱས་སོང་། ང་རང་ཟླ་ ༣ རིང་ཉེན་ཡོལ་བྱས་མཐར་ ༡༩༩༣ ལོར་རྒྱ་གར་ལ་བྲོས་བྱོལ་དུ་ཡོང་བ་ཡིན། རྒྱ་གར་ལ་ཡོང་རྗེས་ཁྲིམས་ཞིབ་ཁང་དུ་ལོ་ལྔ་ཙམ་རིང་ལས་ཀ་བྱས་པ་ཡིན། ༡༩༩༨ ལོར་ས་རཱ་མཐོ་སློབ་ཏུ་ལོ་གཉིས་རིང་སློབ་སྦྱོང་བྱས་རྗེས་ཤེས་རབ་དགའ་ཚལ་སློབ་གླིང་དུ་བོད་ཡིག་དགེ་རྒན་བྱས་ཤིང་། ༢༠༠༢ ལོ་ནས་ད་བར་ས་རཱ་མཐོ་སློབ་ཏུ་བརྡ་སྤྲོད་དགེ་རྒན་བྱེད་བཞིན་ཡོད།
དྲི་བ། ད་རེབ་དགུ་བཅུ་གསུམ་གྱི་ཚོགས་ཆེན་ཐེངས་དྲུག་པའི་ཐོག་གྲོས་ཆོད་གང་དག་བཞག་ཡོད་དམ།
ལན། གྲོས་ཆོད་གཙོ་བོ་དོན་ཚན་ལྔ་འདྲ་བོ་ཞིག་ཆགས་ཡོད། གལ་ཆེ་ཤོས་གཅིག་༸གོང་ས་མཆོག་གི་སྐུ་ཕྱྭའི་སྐོར་རེད། དེར་ ༸གོང་ས་མཆོག་ལ་མཚན་སྨད་ཞུ་མཁན་དང་གསུང་ལ་འགྲེལ་ལོག་རྒྱག་མཁན། ལྷག་པར་དུ་༸གོང་ས་མཆོག་ཐུགས་ཕམ་བྱུང་འཇུག་མཁན་རིགས་ལ་ཚོགས་པའི་ངོས་ནས་དངོས་ཤུགས་བརྒྱུད་གསུམ་ནས་གདོང་ལེན་ཚ་ནན་བྱེད་རྒྱུ་མ་ཟད། ཚོགས་མི་ཞིག་ཡིན་ཚེ། གོ་སྐོན་སློབ་གསོ་རྒྱག་རྒྱུ་དང་། དེ་ལས་བརྒལ་ན་ཚོགས་ཁོངས་ནས་ཕྱིར་འཕུད་གཏོང་རྒྱུ’ སོགས་བཀོད་ཡོད་པ་རེད། གཉིས་པ་བོད་པའི་ཛ་དྲག་གནས་སྟངས་ཐོག་ལས་འགུལ་སྤེལ་ཕྱོགས་སྐོར་རེད། དབུ་མའི་ལམ་གྱི་སྲིད་བྱུས་གཞིར་བཟུང་ཐོག་ལས་འགུལ་འདྲ་མིན་སྤེལ་རྒྱུ་དང་། བོད་རྒྱ་ཞི་མོལ་ཡོང་ཆེད་རྒྱ་གར་གྲོས་ཚོགས་འཐུས་མི་དང་རྒྱལ་ཁབ་སོ་སོའི་གཞུང་ཚབ་སོགས་ལ་ཞུ་གཏུག་བྱེད་རྒྱུ། གཏམ་བརྗོད་འཁྲབ་སྟོན་གྱི་ལམ་ནས་བོད་ནང་གི་གནས་ཚུལ་ཁྱབ་བསྒྲགས་བྱེད་རྒྱུ་སོགས་ཡོད་པ་རེད།
དྲི་བ། རྒྱུན་ལས་སྐབས་ལྔ་པ་ནས་དྲུག་པར་རྩིས་སྤྲོད་རྩིས་ལེན་གནང་སྟངས་གང་འདྲ་བྱུང་ཡོད་དམ།
ལན། རྒྱུན་ལས་གསར་རྙིང་རྩིས་སྤྲོད་རྩིས་ལེན་ཡག་པོ་བྱུང་སོང་བསམ་ཡོད། སྤྱིར་བཏང་ ༡༩༩༡ ལོར་དགུ་བཅུ་གསུམ་ལས་འགུལ་ཚོགས་པ་གསར་འཛུགས་གནང་བ་དང་། དེ་ནས་རིམ་བཞིན་འབྲེལ་ཡོད་ཚོགས་པ་ཁག་དང་མི་སྒེར་གྱི་ཞལ་འདེབས་རོགས་རམ་ལ་བརྟེན་ནས་ཚོགས་པའི་མ་དངུལ་དང་ཚོགས་མི་གཉིས་ཀ་འཕེལ་རྒྱས་ཕྱིན་ཡོད་པ་རེད། སྔོན་མ་རྩིས་ཁྲའི་ཐོག་མི་སྒེར་བྱེ་བྲག་པ་རེ་ཟུང་གི་འདོད་བློ་མ་ཁེངས་པ་དང་དོགས་པ་ཡོད་ན་གནས་ཚུལ་ཐ་དད་རེད། ད་རེབ་སྤྱི་ཡོངས་ཀྱི་ཐོག་ནས་ཚོགས་པའི་རྩིས་ཁྲའི་ནང་རྙོག་གླེང་རིགས་ཕལ་ཆེར་བྱུང་མ་སོང་བསམ་ཡོད། རྩིས་ཀྱི་འགྲོ་སྟངས་རྒྱ་གར་དབུས་གཞུང་གི་རྩི་སཞིབ་འགྲོ་སྟངས་ལྟར་རྩིས་ཞིབ་བྱས་ཏེ་ཕྱིན་པ་ཞིག་རེད།
དྲི་བ། དགུ་བཅུ་གསུམ་ལས་འགུལ་ཚོགས་པ་འདིར་ད་ལྟ་ཚོགས་མི་ག་ཚོད་ཡོད་པ་དང་། ཚོགས་མི་གསར་པ་ཚོགས་ཁོངས་སུ་ཞུགས་སྟངས་གང་འདྲ་ཡིན་ནམ།
ལན། དགུ་བཅུ་གསུམ་ལས་འགུལ་ཚོགས་པར་ད་ལྟ་ཚོགས་མི་ ༧༠༠ ལྷག་ཡོད་པ་རེད། ཚོགས་མིའི་ཁོངས་སུ་ཞུགས་སྟངས་གཙོ་བོ་དེ། བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱིས་ངོས་འཛིན་གནང་ཕྱོགས་ལྟར། ཆབ་སྲིད་བཙོན་ཟུར་དང་འབྲེལ་ཡོད། འབྲེལ་ཆགས་གང་རུང་ཞིག་གི་ཁུངས་སྐྱེལ་ཡིག་ཆ་ཡོད་ན། ཚོགས་པ་འདིར་ཐོབ་ཐང་གང་ཡོད་པ་དེ་འབུལ་གྱི་ཡོད་པ་རེད། དེ་མིན། མི་ཞིག་གིས་སྣེ་ལེན་ཁང་དང་བདེ་སྲུང་མ་བརྒྱུད་པར་ཆབ་སྲིད་དང་འབྲེལ་བ་ཡོད་ཟེར་ནས་ཡིག་ཆ་སོགས་འཁྱེར་ཡོང་ན་ང་ཚོས་ངོས་ལེན་བྱེད་ཐུབ་ཀྱི་ཡོད་པ་མ་རེད། འོན་ཀྱང་ཆབ་སྲིད་བཙོན་པ་ཡིན་མིན་ཐོག་བདེ་སྲུང་ལས་ཁུངས་ལ་དཀའ་ངལ་འཕྲད་ཀྱི་ཡོད་པ་རེད། དེ་བཞིན་ང་ཚོའི་ཚོགས་པར་ཡང་དཀའ་ངལ་ཕྲན་བུ་རེ་ཡོད་ས་རེད།
དྲི་བ། དགུ་བཅུ་གསུམ་ལས་འགུལ་ཚོགས་པའི་སྒྲིག་འཛུགས་གྲུབ་སྟངས་དང་སྡེ་ཚན་སོགས་གང་དག་ཡོད་དམ།
ལན། དགུ་བཅུ་གསུམ་ལས་འགུལ་ཚོགས་པར་དབུས་ལས་ཁུངས་ཤིག་ཡོད་ཡོད་པ་རེད། དེ་ནས་སློབ་གྲྭ་ཞིག་དང་གློག་ཀླད་འཛིན་གྲྭ་གཅིག ཚེམ་ཁང་དང་ཟ་ཁང་བཅས་ཡོད་པ་རེད། ཚེམ་ཁང་ཐོག་མ་མགོ་འཛུགས་སྐབས་དམིགས་ཡུལ་གཉིས་བཟུང་ཡོད་པ་རེད། དང་པོ། ང་ཚོ་མང་ཆེ་བ་རོགས་ཚོགས་ལ་བརྟེན་བསྡད་ཡོད་སྟབས། ནམ་ཞིག་རོགས་ཚོགས་མཚམས་ཆད་ན། ང་ཚོར་ལབ་ས་གང་ཡང་ཡོད་པ་མ་རེད། ཡིན་ནའང་བོད་དོན་བདེན་མཐའ་མ་གསལ་བར་ཚོགས་པ་གནས་དགོས་ཀྱི་ཡོད་དུས། རང་ཁ་རང་གསོ་ཟེར་ན་འདྲ་དངུལ་ཕྲན་བུ་རེ་འཚོལ་ཐབས་སུ་ཚེམ་ཁང་འདི་བཙུགས་པ་རེད། གཉིས་པ། ཚོགས་པའི་ཚོགས་མི་སློབ་གྲྭའི་དུས་ཚོད་ཡོལ་ཟིན་པ་ཚོར་ཚེམ་བུའི་སྦྱོང་བརྡར་སྤྲད་དེ་ཁོང་ཚོའི་མདུན་ལམ་ཐོག་ཕན་ཐོགས་ཕྲན་བུ་ཡོང་ན་བསམ་པ་དེ་གཉིས་རེད། ན་ནིང་འགྲོ་སོང་ཕུད་ཧིན་སྒོར་འབུམ་གཅིག་ཡས་མས་ལས་ཁུངས་ལ་ཕུལ་ཡོད་ས་རེད། ད་ལྟ་ཚེམ་བཟོ་ཁང་དུ་བཟོ་བ་ ༢༥ ཡས་མས་ཤིག་ཡོད།
ང་ཚོའི་རླུང་རྟ་ཟ་ཁང་དེར་གླེང་སློང་མང་པོ་ཞིག་ཡོང་བསྡད་ཡོད་པ་རེད། སྤྱི་ཚོགས་ནང་འབྲེལ་བཤད་སྣ་ཚོགས་བརྒྱབ་ཡོང་དུས་སྔོན་མ་ང་ཚོའི་ཚོགས་པ་དང་སྦྱིན་བདག་བར་དཀའ་ངལ་བྱུང་འདུག ངས་ཟ་ཁང་གི་འགན་འཛིན་དང་སྐབས་ལྔ་བའི་ཚོགས་གཞོན། སྐབས་བཞི་བ་ལྔ་བའི་ཚོགས་གཙོ་སོགས་བསྐོངས་ཏེ་གསལ་བོ་བཟོས་པ་ཡིན། རླུང་རྟ་ཟ་ཁང་གི་བདག་དབང་ཡོངས་རྫོགས་དགུ་བཅུ་གསུམ་རང་རེད། ཡིན་ནའང་། ད་ལྟའི་སྦྱིན་བདག་ལ་ཐོག་མ་སྤྲོད་སྐབས། བོགས་མ་ཡིན་ཟེར་ན་བོགས་མ་ཡིན་པའི་ངོ་བོ་མི་འདུག ཐོག་མ་དགུ་བཅུ་གསུམ་གྱིས་ཟ་ཁང་རྒྱག་གི་ཡིན་ཟེར་ནས་འཆར་གཞི་གཏོང་སྐབས། ད་ལྟའི་སྦྱིན་བདག་ཁོ་རང་གིས་བླངས་འདུག ཁོ་རང་རླུང་རྟ་རོགས་ཚོགས་ཕོར་ཌོ་གྷལ་(Portugal)གྱི་ལས་བྱེད་ཅིག་རེད། ཟ་ཁང་གི་ལོ་གཅིག་གི་ཡོངས་འབབ་བགོ་འགྲེམས་བྱེད་སྟངས་ལ་འགྱུར་བ་ཁ་ཤས་ཕྱིན་འདུག མཐའ་མར་བརྒྱ་ཆ་ ༤༠ དགུ་བཅུ་གསུམ་ཚོགས་པར་སྤྲོད་རྒྱུ་དང་། བརྒྱ་ཆ་ ༤༠ སྦྱིན་བདག་ཁོ་རང་ལ་དབང་བ། བརྒྱ་ཆ་ ༢༠ ཟ་ཁང་གི་མཁོ་ཆས་རིགས་ནང་འདྲེན་ཆེད་གཏོང་རྒྱུ་བཅས་བྱས་འདུག ད་ལྟ་ང་ཚོ་རྒྱུན་ལས་གསར་པ་ཚོའི་ངོས་ནས་འཆར་གཞི་གསར་པ་ཞིག་བསྒྲིགས་ཡོད།
དྲི་བ། ད་རེབ་དགུ་བཅུ་གསུམ་གྱི་ལངས་ཕྱོགས་དབུ་མའི་ལམ་ལ་འགྱུར་བ་གཏོང་ཕྱོགས་གང་འདྲ་ཡིན་ནམ།
ལན། ད་རེབ་ཚོགས་པའི་ལངས་ཕྱོགས་བསྒྱུར་བ་དེ་ཚོགས་ཞུགས་པ་ཚོས་སོ་སོའི་ངོས་ནས་འདས་པའི་ཉམས་མྱོང་དང་། ད་ལྟའི་གནས་སྟངས། མ་འོངས་པའི་ཁ་ཕྱོགས་སོགས་ལ་དགོངས་པ་གཏིང་ཟབ་བཞེས་ཏེ་ཐག་གཅོད་གནང་བ་ཞིག་ཆགས་ཡོད་པ་རེད། གཞན་ཚོགས་པ་སྒྲིག་འཛུགས་ཤིག་གམ། སྐྱེས་བུ་སྒེར་བྱེ་བྲག་པ་ཞིག་གི་ལམ་སྟོན་བཀོལ་བྱུས་འོག་ཕྱིན་པ་ཞིག་རྩ་བ་ཉིད་ནས་ཆགས་ཀྱི་མེད། ཚོགས་མི་སོ་སོས་བསམ་བློ་གཏོང་ཕྱོགས་དེ། བོད་མིའི་སྒྲིག་འཛུགས་དབུ་མའི་ལམ་གྱི་ཐོག་ཕེབས་ཀྱི་ཡོད་པ་དང་། སོ་སོའི་སྒྲིག་འཛུགས་ཀྱི་ལྟ་བ་ལངས་ཕྱོགས་འཁྱེར་དགོས་པ་མི་ཞིག་གི་ངོས་ནས་གལ་ཆེན་པོ་རེད། བོད་མིའི་སྒྲིག་འཛུགས་ཀྱི་ལངས་ཕྱོགས་དེ་གློ་བུར་དུ་བྱུང་བ་ཞིག་མ་རེད། བརྒྱུད་རིམ་མང་པོ་ཞིག་གི་ཐོག་ནས་ཐག་གཅོད་གནང་བ་ཞིག་རེད། དེར་བོད་མི་ཚོ་རྒྱག་གཅིག་མཆོངས་གཅིག་གིས་ཕྱིན་པ་ཡིན་ན་ནུས་པ་ཆེ་རུ་འགྲོ་བ་ཞིག་ལ་རེ་བ་དང་ཡིད་ཆེས་གནང་བ་རེད་བསམ་གྱི་ཡོད། ཁ་ཤས་ཀྱིས་དགུ་བཅུ་གསུམ་ལ་ཚོགས་མི་ ༧༠༠ ལྷག་ཡོད་པ་རེད། ད་རེབ་ཚོགས་འདུའི་ཐོག་མི་བརྒྱ་གྲངས་ཤིག་གིས་ལངས་ཕྱོཊ་འགྱུར་བ་བཏང་ན་འགྲིག་གི་མ་རེད་ཟེར་བ་དེ་བསམ་བློ་གཏོང་སྟངས་རྦད་དེ་ནོར་བ་རེད། ད་ལྟ་ང་ཚོ་བཙན་བྱོལ་ནང་མི་འབུམ་གཅིག་ལྷག་ལས་ཡོད་པ་མ་རེད། ང་ཚོས་ལྟ་བ་ལངས་ཕྱོགས་གང་ཞིག་གཏན་འབེབས་བྱས་པ་ཚང་མ་བོད་མི་ས་ཡ་དྲུག་གི་ལྟ་བ་ལངས་ཕྱོགས་ལ་ཚང་མས་ངོས་འཛིན་གནང་གི་ཡོད་པ་རེད། གངས་ཅན་སྐྱིད་གཤོང་ལ་ཆ་བཞག་ན། རང་བཙན་རྒྱལ་ཁབ་ཅིག་གི་ལས་ཁུངས་བྱེ་བྲག་པ་ཞིག་གི་ཆེ་ཆུང་ལས་མེད་ཀྱང་། བོད་རྒྱལ་ཁབ་ཅིག་གི་རྣམ་འགྱུར་དང་ངོ་བོ་མཚོན་གྱི་ཡོད་པར་ཚང་མས་ངོས་ལེན་བྱེད་ཀྱི་ཡོད་པ་རེད།
དྲི་བ། སྤྱི་ཚོགས་ནང་དགུ་བཅུ་གསུམ་ལས་འགུལ་ཚོགས་པའི་ཚོགས་མི་མང་པོ་ཞིག་ཆབ་སྲིད་བཙོན་ཟུར་ཡིན་པ་དང་། ཁོང་ཅག་ཐོག་མ་ཆབ་སྲིད་བཙོན་པ་ཆགས་དོན་བོད་རང་བཙན་ཆེད་ཡིན་ཚུལ་གསུང་གི་ཡོད་པ་དེར་གཟིགས་ཚུལ་གང་འདྲ་ཡོད།
ལན། ང་རང་སྒེར་ལ་ཆ་བཞག་ན། ༡༩༩༡ ལོའི་ལྷ་སའི་ཟིང་འཁྲུག་ནང་ཚུད་སྐབས། སོ་སོར་མཚོན་ན་བོད་རང་བཙན་ཟེར་ནས་སྐད་འབོད་རྒྱག་མཁན་གྱི་གྲས་རེད། དེས་མཚོན་པའི་བཙན་རྒོལ་རྒྱལ་སྐྱོབ་ནང་ཞུགས་མཁན་འདས་གསོན་འཐབ་གྲོགས་ཚང་མས་བོད་རང་བཙན་ཡིན་ཟེར་ནས་འབོད་སྒྲ་བསྒྲགས་པ་རེད། དེ་ལྟར་སྐད་འབོད་རྒྱག་དགོས་པའི་མཐར་ཐུག་གི་དམིགས་ཡུལ་མགོ་ཐོག་ལ་ལྷག་ཡོད་པའི་དཀའ་ངལ་དེ་སེལ་རྒྱུའི་ཆེད་དུ་རེད། དཀའ་ངལ་དེ་སེལ་ཐབས་ལ་༸གོང་ས་མཆོག་གི་ཡེ་ཤེས་དབྱངས་དཔྱད་དང་། དེའི་ཐོག་ལ་བོད་མི་མང་གིས་ཞིབ་འཇུག་གཏིང་ཟབ་བྱས་ཏེ་དབུ་མའི་ལམ་དེ་ཡང་དག་པ་ཞིག་ཡིན་པར་ཐག་གཅོད་གཏན་འབེབས་གནང་བ་རེད། ད་རེབ་དགུ་བཅུ་གསུམ་ལས་འགུལ་ཚོགས་པའི་ལངས་ཕྱོགས་དེ་དབུ་མའི་ལམ་དུ་བསྒྱུར་ཐུབ་པ་དེ་དགུ་བཅུ་གསུམ་ལས་འགུལ་ཚོགས་པའི་ངོས་ནས་ཡིན་རེད། ང་རང་སྒེར་གྱི་ངོས་ནས་ཡིན་ནའང་རེད་ཧ་ཅང་གི་གཟི་བརྗིད་ཆེན་པོ་ཞིག་རེད་བསམ་བསྡད་ཡོད། མི་སྒེར་རེ་ཟུང་གིས་འགྲེལ་བཤད་རྒྱག་སྟངས་མ་འདྲ་བ་ཡོད་སྲིད་པ་རེད་དེ། རྩ་བའི་ཆ་ནས་གདམ་ག་ནོར་ཡོད་པ་མ་རེད་དྲན་ཡོད།
དྲི་བ། ཚོགས་གཙོ་གསར་པའི་ངོས་ནས་དགུ་བཅུ་གསུམ་གྱི་ལས་དོན་བྱེད་ཕྱོགས་དང་ལས་འགུལ་སྤེལ་ཕྱོགས་སོགས་ལ་འགྱུར་བ་གཏོང་དགོས་པ་དེ་འདྲ་མཐོང་གི་ཡོད་དམ།
ལན། སྤྱིར་བཏང་ལས་འགུལ་སྤེལ་ཕྱོགས་ལ་རྣམ་པ་དང་ཁ་ཕྱོགས་གསར་བར་འགྲོ་དགོས་པ་དེ་འདྲ་ཡོད་རྒྱུ་རེད། དེ་ལས་ཀྱང་གལ་ཆེ་བ་ཞིག་ལ་ཚོགས་པའི་འཛིན་སྐྱོང་གི་འགྲོ་སྟངས་ཁག་ཅིག་ཏན་ཏན་བཅོས་སྒྲིག་ཅིག་བྱ་དགོས་ངེས་ཆགས་འདུག དེ་རིང་ཞོགས་པ་ང་ཚོ་ཚོགས་དེ་དོན་ཚན་བཅུ་དྲུག་བཅུ་བདུན་ཞིག་བཤད་ཡོད། དཔེར་ན། ཆུང་ས་ནས་ལས་བྱེད་ཚོས་ལ་བ་གྱོན་སྟངས་དང་། ལས་ཁུངས་ནང་ཡོང་བའི་མི་སྣར་སྣེ་ལེན་ཞུ་སྟངས། རྒྱུན་དུ་ལས་ཀ་བྱེད་སྐབས་ལས་ཀའི་ངོ་བོ་ལ་ལྟ་སྟངས། ལྷག་པར་དུ་དེང་སང་ལས་ཁུངས་ཁ་ཤས་ནང་དྲ་རྒྱ་དང་ཁ་པར་སོགས་ཀྱི་ཐོག་ལ་དུས་ཚོད་སྐྱེལ་སྡོད་མཁན་དང་། ངོ་དེབ་(Facebook) དང་རྩེད་མོའི་(Game)ཐོག་དུས་ཚོད་གཏོང་མཁན། མི་གཅིག་གཉིས་འཛོམས་ཏེ་དོན་མེད་ཁ་བརྡ་བྱས་ཏེ་སྡོད་པ་སོགས་ཡོང་གི་ཡོད་པ་རེད། དེ་རིགས་ཏག་ཏག་སྡོད་ཀྱི་ཡོད་པ་མ་རེད། དེ་རིགས་ལ་འགྲོ་སྟངས་ཤིག་ཡིག་ཐོག་ནས་འབུལ་དགོས་ཟེར་ནས་ཞུས་ཡོད། སོ་སོར་མཚོན་ན་འཛིན་སྐྱོང་གི་ཉམས་མྱོང་ཆེན་པོ་གང་ཡང་ཡོད་པ་མ་རེད་དེ། ཚོགས་པ་སྒྲིག་འཛུགས་དེ་འདྲའི་ནང་ལས་ཀ་གང་འཚམ་བྱས་མྱོང་སྟབས་འདི་དང་དེ་བྱེད་དགོས་བསམ་པ་དྲན་གྱི་འདུག ཡིན་ནའང་ཆབ་སྲིད་སྐོར་ལ་རྒྱུས་མངའ་གང་ཡང་ཡོད་པ་མ་རེད། དུས་རྒྱུན་ནས་ང་རང་ཆབ་སྲིད་པ་ཞིག་བྱེད་དགོས་བསམ་པ་མེད། ད་བར་ཤེས་ཡོན་ཐོག་ལས་ཀ་བྱས་བསྡད་པ་རེད།
གསར་འགོད་པ། ལྷ་སྐྱབས་རྒྱལ།
སྐུ་ངོ་ལགས་ཀྱིས་དྲི་བར་ལན་འདེབས་ཡག་པོ་གནང་འདུག ཁྱེད་ཀྱི་ལས་དོན་ལམ་འགྲོ་ཡོང་བ་ཤོག ཚོགས་ཆེན་སྐབས་སྔོན་མ་དང་ད་རེས་གཉིས་ལ་བོད་ཀྱི་དགུ་བཅུ་གསུམ་ལས་ཁུངས་ལ་འགྱུར་བ་ཆེན་པོ་གཉིས་འགྲོ་ཡོད་པ་རེད། ཚོགས་ཆེན་སྐབས་སྔོན་མའི་ཐོག་དགུ་བཅུ་གསུམ་གྱི་རྒྱུན་ལས་ནང་ཉུང་མཐར་ཆོལ་ཁ་རེ་ནས་མི་གཉིས་རེ་ཡོང་དགོས་པ་དེ་རེད། ད་ལོའི་ཚོགས་ཆེན་ཐོག་ལངས་ཕྱོགས་དབུ་མའི་ལམ་ལ་འགྱུར་བ་ཕྱིན་པ་འདི་གཉིས་རེད། དེ་ནས་གནས་ཚུལ་གསར་པ་ཞིག་ལ་བོད་ཀྱི་དགུ་བཅུ་གསུམ་གྱི་ཚོགས་གཙོ་རིམ་པ་གྲྭ་རྒན་བླ་རྒན་རྐྱང་རྐྱང་གིས་འཇུས་བསྡད་པ་དེ་ཡང་འགྱུར་བ་ཕྱིན་ཏེ་ད་རེས་མི་སྐྱ་གཙང་མ་ཞིག་ཕེབས་པ་རེད། འདི་ཡང་མང་གཙོའི་སྤྱི་ཚོགས་ནང་གི་འཕེལ་རྒྱས་འགྲོ་བཞིན་ཡོད་པའི་རྟགས་སམ་བཟང་ཕྱོགས་ཀྱི་འགྱུར་བ་ཞིག་རེད།