རྒྱ་ནག་གི་ཆབ་སྲིད་ཚོཊ་པ་གསར་པ།

པའོ་ཞི་ལེ་ལ་རྒྱབ་སྐྱོར་བྱེད་མཁན་ཚོས་ཆབ་སྲིད་ཚོགས་པ་ཞིག་གསར་འཛུགས་བྱས་ཏེ་པའོ་ཚོགས་གཙོར་བདམས་ཡོད་འདུག

ཟླ་འདིའི་ཚེས་ ༦ ཉིན། ད་ལྟ་རྒྱ་ནག་གི་བཙོན་འོག་ཏུ་ཡོད་པའི་པའོ་ཞི་ལེ་ལ་རྒྱབ་སྐྱོར་བྱེད་མཁན་ཚོས་ཏྲི་ཞན་ཆབ་སྲིད་ཚོགས་པ་ (智献党)ཞེས་པ་ཞིག་གསར་འཛུགས་བྱས་ཏེ་པའོ་ཞི་ལེ་ཚོགས་གཙོར་བདམས་ཡོད་འདུག རོ་ཌིར་ (Reuters) གསར་ཁང་གིས་ཚོགས་པ་གསར་འཛུགས་བྱེད་མཁན་པེ་ཅིན་དཔལ་འབྱོར་སློབ་གླིང་གི་རྒྱལ་སྤྱིའི་ཚོང་ལས་སློབ་དཔོན་ཆེན་མོ་ལྕམ་ཝང་ཏྲིན་ (Wangzheng) ལ་ཁ་པར་བརྒྱུད་ཚོགས་པ་དེར་ཚོགས་མི་ག་ཚོད་ཡོད་མེད་དང་དམིགས་ཡུལ་སྐོར་འདྲི་སྐབས། ཁོ་མོས་དྲི་བར་ཐད་ཀར་ལན་འདེབས་མ་བྱས་པར། ༡༩༢༡ ལོར་ཧྲེང་ཧེ་རུ་རྒྱ་ནག་དམར་ཤོག་ཚོགས་པའི་ཚོགས་འདུ་དང་པོ་ཚོགས་སྐབས། དམར་ཤོག་གི་རྒྱུན་ལས་ཚོགས་མི་ ༡༢ ཞུགས་ཡོད་པ་ལས་མང་བ་ཡོད་པ་དང་། ཚོགས་པ་འདི་རྒྱ་ནག་དམར་ཤོག་ཚོགས་པའི་ཁ་གཏད་མིན་པར་གཞུང་གིས་མི་དམངས་ལ་འདུ་འཛོམས་རང་དབང་དང་འོས་བསྡུའི་རང་དབང་སྤྲོད་པའི་དགོས་འདུན་བཏོན་ཆེད་བཙུགས་པ་ཡིན་སྐོར་བརྗོད་འདུག 

ཁོ་མོས་མུ་མཐུད་དུ་རྒྱ་ནག་གི་རྩ་ཁྲིམས་ནང་གི་མང་ཚོགས་ཀྱི་ཐོབ་ཐང་སྐོར་ལ་བརྗོད་དོན།  མང་ཚོགས་ཀྱིས་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་དང་སྲིད་གཞུང་གི་མཐོ་རིམ་མི་སྣ་འདེམས་པའི་ཐོབ་ཐང་རྩ་ཁྲིམས་ནང་བཀོད་ཡོད་ཀྱང་། རྒྱ་གཞུང་གིས་ལག་ལེན་བྱེད་ཀྱི་མེད་པ་དེ་དོན་དངོས་ལག་ལེན་བྱེད་ཐུབ་པར་འབད་བརྩོན་བྱ་རྒྱུ་ཡིན་ཞེས་བརྗོད་འདུག

ཚོགས་པ་འདི་རྒྱ་ནག་དམར་ཤོག་གི་སྐབས་བཅོ་བརྒྱད་པའི་ཚང་འཛོམས་གྲོས་ཚོགས་ཐེངས་གསུམ་པ་མ་ཚོགས་པའི་ཉིན་གསུམ་སྔོན་ལ་བཙུགས་ཡོད་པ་དང་། ད་སྔ་གཞུང་གིས་བཀག་སྡོམ་དང་སྐྱོན་བརྗོད་གང་ཡང་བྱས་མི་འདུག  ཟླ་འདིའི་ཚེས་ ༩ ནས་ཚེས་ ༡༢ ཉིན་བར་ཚང་འཛོམས་གྲོས་ཚོགས་ཐེངས་གསུམ་པ་ཚོགས་ཏེ་རྒྱ་ནག་གི་དཔལ་འབྱོར་བཅོས་བསྒྱུར་སོགས་ཀྱི་ཐད་གྲོས་ཆོད་འཇོག་གི་ཡོད། ༡༩༧༨ ལོར་ཏིན་ཞོ་ཕིན་གྱིས་སྣེ་འཁྲིད་དེ་དཔལ་འབྱོར་བཅོས་བསྒྱུར་ཆེན་པོ་བྱུང་ཡོད་པ་ལྟར། ཐེངས་འདིར་ཡང་མང་ཚོགས་ཚོས་རྒྱ་ནག་གི་དཔལ་འབྱོར་སྒྲོམ་གཞིར་འགྱུར་ལྡོག་འགྲོ་བའི་རེ་བ་རྒྱག་གི་ཡོད་འདུག