རྒྱ་རིགས་རྩོམ་པ་པོ་གཉིས་ཀྱིས་གྲངས་ཉུང་མི་རིགས་ཁག་ལ་བཏོན་པའི་གྲོས་གཞི།

ལི་ཡི་ཕིན་དང་ཧྥན་ཆིན་གཉིས་ཀྱི་བརྩམས།       ལོ་མ་རྒྱལ་གྱིས་བསྒྱུར།

དང་པོ།   རྒྱ་ནག་དབང་བསྒྱུར་འོག་གི་མི་རིགས་ས་ཁུལ་གནས་བབ།

རྒྱ་ནག་སྲིད་དབང་སྒེར་གཅོད་དབང་བསྒྱུར་འོག་ཏུ། མི་རིགས་སོ་སོའི་ས་ཁུལ་ཁག་ཏུ་མི་སེར་སྤེལ་ཡུལ་སྲིད་ཇུས་དེ་བཙན་ཚུགས་ཀྱིས་སྤེལ་གྱི་ཡོད་པ་མ་ཟད། མི་རིགས་ཁག་གི་ལོ་རྒྱུས་ལ་འཁྱོག་བཤད་བྱེད་པ་དང་། མི་རིགས་ལ་མཐོང་ཆུང་བྱེད་པ། མི་རིགས་ཕན་ཚུན་བར་སྡང་སེམས་དང་ཞེ་འཁོན་བསྐྲུན་ཞིང་།  མི་རིགས་ཕན་ཚུན་བར་འབྲེལ་འདྲིས་དང་རྒྱུས་ལོན་བྱེད་པ་འགོག་གི་ཡོད། གང་ལྟར། མི་རིགས་ཕན་ཚུན་བར་འགལ་བ་ཛ་དྲག་ཅན་དང་རྣོ་ངར་ཅན་དུ་སྒྱུར་བཞིན་ཡོད། རྒྱ་གཞུང་གིས་འཆར་གཞི་ལྡན་པའི་ཐོག་ནས་གྲངས་ཉུང་མི་རིགས་ཁག་གི་ཆོས་དང་རིག་གཞུང་རྩ་མེད་གཏོང་གི་ཡོད། དེར་མ་ཟད། ད་དུང་རང་བྱུང་ཐོན་ཁུངས་རྣམས་བཙན་འཕྲོག་གིས་སྔོག་འདོན་བྱེད་པ་དང་། ཁོར་ཡུག་ལ་གཏོར་བརླག་ཚབས་ཆེན་གཏོང་གི་ཡོད།  མདོར་ན། རྒྱ་གཞུང་གིས་མི་རིགས་གཉའ་གནོན་སྲིད་ཇུས་སྤེལ་ཏེ་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་ཟིན་ཐོ་དེས་མི་རྣམས་ཧ་ལས་ཤིང་ཧོན་ཐོར་དུ་བཅུག་ཡོད།

རྒྱ་མི་རིགས་དང་གྲངས་ཉུང་མི་རིགས་ཚོས་ད་དུང་རྒྱ་གཞུང་གི་གཉའ་གནོན་དབང་བསྒྱུར་གྱི་བཙོན་ཁང་ནང་དུ། འགྲོ་བ་མིའི་ཐོབ་ཐང་ལ་རྡོག་རྫིས་དང་དཔལ་འབྱོར་འཕྲོག་བཅོམ། རིག་གཞུང་གཏོར་བཅོམ་བྱེད་པའི་ཁྲོད་ན་འཚོ་བ་སྐྱེལ་བཞིན་ཡོད། རྒྱ་གཞུང་གིས་སྔོན་མ་ཞིག་ནས་ “ གཅིག་གྱུར་ཆེན་པོ ” བྱེད་པའི་ཆེད་དུ། མི་རིགས་རྒྱ་བསྒྱུར་གྱི་སློབ་གསོ་སྤྲོད་ཀྱི་ཡོད་མ་ཟད། རྒྱ་མིའི་དཔོན་རིགས་དང་མི་སེར་འབོར་ཆེན་གྲངས་ཉུང་མི་རིགས་ས་ཁུལ་ཁག་ཏུ་གནས་སྤོར་གྱིས་ས་གནས་ཀྱི་ཆབ་སྲིད་དབང་ཆ་དང་དཔལ་འབྱོར་སྲོག་རྩ་རྣམས་བདག་འཛིན་བྱས་ཤིང་། རྒྱ་རིགས་དང་མི་རིགས་ཁག་བར་གྱི་མཛའ་བརྩེ་ལ་གནོད་སྐྱོན་བཟོས་ཏེ་བར་ཐག་ཇེ་རིང་ནས་ཇེ་རིང་དུ་བཏང་དང་གཏོང་གི་ཡོད། ཕན་ཚུན་ལ་བཅངས་བའི་ཞེ་འཁོན་ཇེ་ཆེ་ནས་ཇེ་ཟབ་ཏུ་གཏོང་གི་ཡོད། མདོར་ན། བྱེད་ཐབས་འདི་གྲངས་ཉུང་མི་རིགས་དང་རྒྱ་མི་རིགས་གཉིས་མཉམ་འབྲེལ་ཐོག་སྲིད་གཞུང་ལ་ངོ་ལོག་རྒྱག་མི་ཐུབ་པའི་ཆེད་དུ་ཡིན་པ་མ་ཟད། མ་འོངས་པར་ཡང་གྲོས་མོལ་སོགས་ཐབས་ལམ་གང་གི་ཐོག་ནས་ཀྱང་དཀའ་རྙོག་འདི་སེལ་མི་ཐུབ་པ་བཟོ་བཞིན་ཡོད།

ང་ཚོས་བོད་དང་སོག་པོ། ཤིན་ཅང་བཅས་གྲངས་ཉུང་མི་རིགས་ཀྱི་ལས་དབང་དང་འབྲེལ་བའི་རྒྱུ་རྐྱེན་ཁག་བཞི་མཐོང་གི་ཡོད།

༡ ༽ མི་རིགས་བྱིངས་ཀྱི་འདུ་ཤེས་སད་རྟོགས་དང་རྒྱ་གཞུང་གི་གཉའ་གནོན་ལ་ངོ་རྒོལ།

༢ ༽ ལོ་རྒྱུས་དུས་རིམ་མི་འདྲ་བའི་ནང་གི་རྒྱ་ནག་གཞུང་གི་མི་རིགས་སྲིད་ཇུས་འགྱུར་བ།

༣ ༽ རྒྱལ་སྤྱིའི་རྒྱབ་སྐྱོར་དང་རོགས་རམ།

༤ ༽ རྒྱ་ནག་གི་མི་འབོར་ཆེན་པོ་ཟིན་ཡོད་པའི་རྒྱ་མི་རིགས་ཀྱི་བསམ་བློ་དང་རྣམ་འགྱུར།

འདས་བའི་ལོ་བཅུ་ཕྲག་ཁ་ཤས་ལ་ཕྱི་མིག་བལྟས་ན། བོད་དང་སོག་པོ། ཤིན་ཅང་མི་རིགས་བཅས་ཀྱིས་བཙན་བྱོལ་དུ་ཡོད་པའི་སྒྲིག་འཛུགས་ཁག་གི་སྣེ་ཁྲོད་འོག གོང་གི་རྒྱུ་རྐྱེན་དང་པོ་དང་གཉིས་པ། གསུམ་པ་བཅས་ཀྱི་ཐད་ལ་ནུས་ཤུགས་དང་འབད་རྩོལ་མང་པོ་བྱས་ཡོད་ན་ཡང་། རྒྱུ་རྐྱེན་བཞི་པ་སྟེ། ཐད་ཀར་རྒྱ་ནག་ནང་ཁུལ་གྱི་རྒྱ་རིགས་མི་མང་ལ་འབྲེལ་འདྲིས་བྱས་ཏེ། ཁོ་ཚོའི་ཕྱོགས་ནས་རྒྱབ་སྐྱོར་རག་ཐབས་དང་། ཁོ་ཚོ་ལ་གོ་རྟོགས་སྤེལ་བ་ཧ་ཅང་ཉུང་ཉུང་རེད།  དེའི་རྒྱུ་མཚན་གཙོ་བོ་གཅིག་ནི། རྒྱ་མི་རིགས་ལ་རྒྱལ་ཁབ་ཀྱི་ཆབ་སྲིད་དང་འབྲེལ་བའི་སྨྲ་བརྗོད་རང་དབང་མེད་པས་རེད། དེར་བརྟེན།  རྒྱ་ནག་མི་མང་གིས་གྲངས་ཉུང་མི་རིགས་ཁག་ལ་ཁ་ཡོད་ལག་ཡོད་ཀྱི་རོགས་ཕན་བྱེད་ཐུབ་ཀྱི་མེད། ཡང་ཅིག་བཤད་ན། རྒྱ་གཞུང་གིས་ཆབ་སྲིད་སྒེར་སྡོམ་བྱེད་ཐབས་འདྲ་མིན་སྤེལ་རྗེས། བཙན་བྱོལ་ན་ཡོད་པའི་གྲངས་ཉུང་མི་རིགས་ཁག་གིས་ཐད་ཀར་རྒྱ་ནག་ནང་ཁུལ་གྱི་རྒྱ་རིགས་རྣམས་དང་འབྲེལ་འདྲིས་བྱེད་མ་ཐུབ་པས་རེད།

གཉིས་པ། རྒྱ་ནག་གི་གནས་སྟངས་ལ་འགྱུར་བ་འགྲོ་བཞིན་ཡོད་པ།

ཐོག་མར། རྒྱ་གཞུང་གིས་སྒེར་སྡོམ་བྱས་པའི་རྒྱ་ནག་ནི་དཔོན་ངན་གྱི་ལྐོག་ཟ་རུལ་སུངས་དང་དྲང་བདེན་ཁྲིམས་ལུགས་མེད་པ། སྤྱི་ཚོགས་ཁྲོད་དབུལ་ཕྱུག་གི་ཧེ་བག་ཆེ་བ། དཔལ་འབྱོར་ཉེན་ཁ་ཕྱོགས་སོ་སོ་ན་ཁ་དར་ནས་ཡོང་གི་ཡོད་པ་དང་ས་གནས་གང་ས་ན་དམངས་གཙོའི་སྐད་སྒྲ་སྒྲོག་བཞིན་ཡོད་སྟབས། རྒྱ་གཞུང་གིས་མུ་མཐུད་རྒྱ་ནག་ལ་དབང་བསྒྱུར་བྱེད་རྒྱུ་ཁག་པོ་ཆགས་ཀྱི་ཡོད། ལོ་ཤས་ནང་རྒྱ་ནག་ལ་འགྱུར་བ་ཆེན་པོ་ཞིག་འགྲོ་རྒྱུ་ཡིན་པ་གཏན་ཁེལ་བ་རེད། དེར་བརྟེན། མི་རིགས་ཁག་སོ་སོའི་འཐབ་རྩོད་འཆར་གཞི་དེ། ད་ལྟའི་གནས་བབ་ལ་དམིགས་གཏད་བྱེད་དགོས་པ་མ་ཟད། ད་དུང་ཕུགས་ཀྱི་ལས་དོན་ལ་ཡང་ལྟ་དགོས་ཀྱི་ཡོད། རྒྱ་ནག་གི་གནད་ཡོད་མི་སྣ་ཚོས་མངོན་གསལ་དོད་པོས་ཆབ་སྲིད་སྒྲོམ་གཞི་བཅོས་བསྒྱུར་ལ་ངོ་རྒོལ་བྱེད་ཀྱི་ཡོད། དེར་བརྟེན།  མི་རིགས་ཁག་གིས་ངེས་པར་དུ་དམངས་གཙོའི་ཐོག་ནས་གསར་བརྗེ་བྱས་ན། ད་གཟོད་རྒྱ་གཞུང་གི་ཆབ་སྲིད་སྒྲོམ་གཞིར་འགྱུར་བ་གཏོང་ཐུབ་པ་རེད། དེ་བཞིན། གཞི་རྩའི་འགྲོ་བ་མིའི་ཐོབ་ཐང་དང་མི་རིགས་ཁག་གི་རང་ཐག་རང་གཅོད་དབང་ཆ་དེ་ཡང་གསལ་བོ་ཆགས་ཡོང་གི་རེད། རྒྱ་ནག་ནི་དམག་དོན་དང་དཔལ་འབྱོར་སྟོབས་ཤུགས་ཆེ་བའི་རྒྱལ་ཁབ་ཅིག་ཡིན་སྟབས། རྒྱལ་སྤྱིའི་སྤྱི་ཚོགས་ཀྱིས་ཐད་ཀར་ཕོག་ཐུག་དང་བར་ཆད་གཏོང་ཐུབ་ཀྱི་མེད། དེར་བརྟེན། མི་རིགས་ཁག་གི་ཆབ་སྲིད་ཚོགས་པར་རྒྱལ་སྤྱིའི་སྒང་ནས་རག་པའི་རྒྱབ་སྐྱོར་དང་རོགས་རམ་དེས། མི་རིགས་རང་སྐྱོང་དང་རང་ཐག་རང་གཅོད་ལ་འཐབ་རྩོད་བྱེད་པའི་ཆ་རྐྱེན་ཕལ་བ་ཞིག་ལས་གཙོ་གནད་དེ་ཆགས་ཐུབ་ཀྱི་མེད་པ་མ་ཟད། མི་རིགས་རང་ཉིད་ཀྱི་ལས་དབང་ལ་འགྱུར་བ་གཏོང་ནུས་པའི་ཆ་རྐྱེན་ཞིག་ལ་དེ་བས་འགྱུར་ཐུབ་ཀྱི་མེད།

རྒྱ་ནག་ནང་ཁུལ་ནས་མི་གྲངས་དང་ས་ཁུལ་ཡག་ཤོས། ཐོན་ཁུངས་སྟངས་འཛིན། དཔལ་འབྱོར་འཕེལ་རྒྱས། དམག་དོན་སྟོབས་ཤུགས་སོགས་ཕྱོགས་གང་ཐད་ནས་རྒྱ་མི་རིགས་ཀྱིས་མང་ཤོས་དང་ཡག་ཤོས་བཟུང་ཡོད། དེ་ནས། མི་རིགས་ཁག་གི་ངོ་རྒོལ་དེ་ཧ་ཅང་གི་གལ་ཆེན་ཆགས་ཡོད་ཀྱང་ང་ཚོས་གསལ་བོར་ཤེས་དགོས་པ་ཞིག་ལ། རྒྱ་གཞུང་གི་མི་རིགས་རྒྱ་བསྒྱུར་སྲིད་ཇུས་རྩད་རྫོག་མ་བྱས་ཚེ། མི་རིགས་ཁག་གི་རང་སྐྱོང་དང་རང་ཐག་རང་གཅོད་དབང་ཆ་ལོངས་སུ་སྤྱོད་རྒྱུ་དང་། རང་ཉིད་ཀྱི་དབང་ཆ་དང་ཐོབ་ཐང་མངོན་འགྱུར་བྱེད་རྒྱུ་ལས་སླ་བོ་ཞིག་གཏན་ནས་མིན། དེར་བརྟེན། རྒྱ་མི་རིགས་ཀྱི་བསམ་བློ་དང་རེ་འདུན་ལ་འགྱུར་བ་གཏོང་རྒྱུ་དེ། མ་འོངས་བར་གྲངས་ཉུང་མི་རིགས་ཁག་གི་མི་རིགས་རང་སྐྱོང་དང་རང་ཐག་རང་གཅོད་དབང་ཆ་ལ་འཐབ་རྩོད་བྱེད་པར་ཧ་ཅང་གནད་འགག་ཆགས་ཡོད།

དྲ་རྒྱ་ནི་མི་རིགས་ཁག་གི་བར་ལ་ཐད་ཀར་འབྲེལ་འདྲིས་བྱེད་ཐུབ་པའི་ལག་ཆ་གལ་ཆེན་ཞིག་ཡིན། ད་ལྟ་རྒྱ་ནག་ནང་དྲ་རྒྱ་བེད་སྤྱོད་གཏོང་མཁན་དུང་ཕྱུར་ ༥ བརྒལ་ཡོད་སྟབས། རྒྱ་ནག་མི་མང་གིས་གནས་ཚུལ་རྒྱུས་ལོན་བྱེད་སའི་ལམ་ཁ་ཡག་ཤོས་དེ་དྲ་ལམ་ཆགས་ཡོད། ཆབ་སྲིད་བསམ་བློ་དང་རིན་ཐང་ལྟ་ཚུལ་སོགས་ཁྱབ་སྤེལ་ཕྱོགས་ནས་ཀྱང་། དྲ་རྒྱ་ནི་སྲོལ་རྒྱུན་གྱི་བརྒྱུད་ལམ་ཁག་ལས་ལྡབ་འགྱུར་གྱིས་ཕན་ཐོགས་ཆེ་བ་ཡོད། སྤྱིར་རྒྱ་གཞུང་གིས་དྲ་རྒྱར་སྟངས་འཛིན་དང་བར་ཆད་གཏོང་གི་ཡོད་ཀྱང་། རྒྱ་ནག་ནང་ཁུལ་གྱི་དྲ་རྒྱ་རྣམས་ཚད་གཞི་ངེས་ཅན་ཞིག་གི་ཐོག་ནས་གུ་ཡངས་སུ་བཏང་ཡོད་སྟབས། ཕྱི་ལོགས་ན་བཙན་བྱོལ་དུ་བསྡད་ཡོད་པའི་མི་སྣ་དང་ཚོགས་སྡེ་ཁག་གིས་ལས་སླ་བོའི་ངང་ནས་རྒྱ་ནག་ནང་གི་དྲ་ཚིགས་དང་སྤྱི་ཚོགས་བརྒྱུད་ལམ་ཁག་ལ་འབྲེལ་འདྲིས་བྱས་ཏེ། རྒྱ་ནག་ནང་གི་མི་མང་ལ་རང་ཉིད་ཀྱི་སྐད་སྒྲ་བསྒྲགས་ཐུབ་ཀྱི་ཡོད།

དེར་བརྟེན། བོད་དང་སོག་པོ། ཤིན་ཅང་བཅས་མི་རིགས་ཁག་གི་ཆབ་སྲིད་མི་སྣ་དང་ཚོགས་སྡེ་ཁག་གི་འཐབ་རྩོད་ཐབས་ལམ་དང་བསམ་བློ་གཏོང་ཕྱོགས་ལ་འགྱུར་བ་བཏང་སྟེ། ངེས་པར་དུ་རྒྱ་ནག་ནང་ཁུལ་ལ་ཁ་གཏད་དེ་རྒྱ་ནག་མི་མང་དང་ཐད་ཀར་འབྲེལ་འདྲིས་བྱེད་རྒྱུ་དེ་རེད།

གསུམ་པ།  དྲ་རྒྱའི་ཕན་ཡོན་གྱི་དཔེ་མཚོན།

༢༠༠༩ ལོའི་ཟླ་ ༥ བའི་ནང་།  ཧོ་པེ་ཞིང་ཆེན་གྱི་པཱ་ཏོན་རྫོང་གི་མགོ་ཁྲིད་གཉིས་ཀྱིས་གླུ་གར་ཚོགས་པ་ཞིག་གི་ཞབས་ཞུ་མ་ཏིན་ཡུ་ཆོལ་ཟེར་བ་ཞིག་ལ་བཙན་གཡེམ་བྱ་རྩིས་བྱེད་སྐབས། ཏིན་ཡུ་ཆོལ་གྱིས་རང་སྲུང་གིས་མགོ་ཁྲིད་གཅིག་ལ་གྲིས་བརྒྱབ་སྟེ་བཀྲོངས་ཡོད། ས་གནས་སྲིད་གཞུང་གིས་འཕྲལ་དུ་ཏིན་ཡུ་ཆོལ་འཇུ་བཟུང་བྱས་པ་མ་ཟད། བདེན་དཔང་རྣམས་ཀྱང་མེད་པ་བཟོས་ཏེ་ཁྲིམས་ཐོག་ཏུ་བསྐྱེལ་རྩིས་བྱས། དྲ་གྲོགས་ཐོ་ཧི་ཟེར་བ་ཞིག་གིས་གནས་ཚུལ་དེ་ཧ་གོ་ནས་ཁེ་ཏེ་དྲ་ཚིགས་སྟེང་སྤེལ་ཏེ་དོན་དངོས་གནས་ཚུལ་ཕྱིར་བསྒྲགས་ཀྱིས་དྲ་གྲོགས་ཚོར་བསམ་ཚུལ་བསྡུ་ལེན་བྱས། གནས་ཚུལ་འདི་ཞག་མ་གཅིག་རིང་རྒྱལ་ཡོངས་ལ་ཁྱབ་སྟེ། རྒྱལ་ཡོངས་ནས་ཏིན་ཡུ་ཆོལ་ལ་རྒྱབ་སྐྱོར་དང་རོགས་པ་མང་པོ་རག མཐར་ས་གནས་སྲིད་གཞུང་གིས་ཏིན་ཡུ་ཆོལ་ཀློད་གྲོལ་མི་གཏོང་ག་མེད་ཆགས་ཤིང་། གནད་དོན་འདིས་ཅི་ཞིག་གསལ་བཤད་བྱེད་ཀྱི་ཡོད་ཅེ་ན། དྲ་རྒྱའི་ཐོགས་ནས་གནད་དོན་གང་ཞིག་ཡིན་ཡང་མགྱོགས་མྱུར་ངང་རྒྱལ་ཡོངས་སུ་ཁྱབ་སྤེལ་བྱེད་ཐུབ་ཀྱི་ཡོད་མ་ཟད། མི་མང་འབོར་ཆེན་གྱི་བསམ་ཚུལ་ཡང་བསྡུས་ལེན་བྱེད་ཐུབ་ཀྱི་ཡོད་པ་དང་། དེས་རྒྱ་གཞུང་གི་སྲིད་ཇུས་ལ་གནོན་ཤུགས་ཐེབས་ཀྱི་ཡོད་པ་མཚོན་ཡོད།

༢༠༡༡ ལོར། རྒྱ་ནག་ཧའོ་ནན་གྱི་ན་གཞོན་ཆིན་ཧོ་ཧོ་ཟེར་བ་ཞིག་གིས་མི་གསུམ་ལས་གྲུབ་པའི་བཟོ་གྲྭ་ཆུང་ཆུང་ཞིག་བཙུགས། དེས་དྲ་ཐོག་གི་ཚོང་འབྲེལ་བྱེད་པ་དང་མཉམ་དུ། དྲ་རྒྱའི་ཁྱབ་བསྒྲགས་ཐབས་ལམ་སྤྱད་ནས་དྲང་བདེན་མ་ཡིན་པ་དང་རྒྱ་གཞུང་གི་མི་སྣ་དག་ལ་སྐྱོན་བརྗོད་དང་ཐེར་འདོན་བྱེད་ཀྱི་ཡོད་སྟབས་སྤྱི་ཚོགས་ཀྱིས་དོ་སྣང་ཆེན་པོ་བྱས། ཚོགས་པ་ཆུང་ཆུང་འདིས་ལས་ཀ་ནི་དྲ་ཐོག་གི་སྤྱི་དོན་དག་རེད། དཔེར་ན། ཀོ་མེ་མེ་ཡི་དོན་རྐྱེན་དང་ལོ་ཧོན་གྱི་དོན་རྐྱེན་ལྟ་བུ། ལེ་ཧྥིན་ལ་དོགས་སློང་བྱེད་པ་སོགས་རེད། མདོར་ན། འདི་དག་གིས་རྒྱ་གཞུང་གིས་ཁྱབ་བསྒྲགས་རྫུན་མ་བྱེད་ཀྱི་ཡོད་པ་དག་དང་རྒྱ་གཞུང་གི་ཁྲིམས་མཐུན་མ་ཡིན་པའི་བྱེད་ཐབས་དག་སྔོག་འདོན་བྱས་ཡོད། འདིས་ཅི་ཞིག་གསལ་བཤད་བྱེད་ཀྱི་ཡོད་ཅེ་ན། གལ་ཏེ། ཚོགས་པ་ཆུང་ཆུང་ཞིག་ཡིན་ཡང་དྲ་རྒྱའི་ཁྱབ་བསྒྲགས་ཐབས་ལམ་བེད་སྤྱོད་གཏོང་ཤེས་ཚེ།  མི་མང་གི་བསམ་ཚུལ་འགྱུར་བ་གཏོང་ཐུབ་པ་དེ་གསལ་བཤད་བྱེད་ཀྱི་ཡོད།

༢༠༡༠ ལོའི་ཟླ་ ༦ པའི་ནང་། ཨར་ཇི་ཡི་ན་གཞོན་ཀོ་ནད་མོ་ཡིས་ངོ་དེབ་ཐོག་ “ང་ཚོ་ཚང་མ་ཧ་ལི་ཏིག་ཡིན་”ཞེས་པའི་ཤོག་ངོས་ཤིག་བཟོས་རྗེས། ལམ་སང་མི་ཁྲི་བཅུ་ལྷག་མཉམ་ཞུགས་གནང་བ་དང་། དེ་ནས་ཊུའུ་ནེ་ཤི་ཡི་གསར་བརྗེ་ལ་རྒྱལ་ཁ་ཐོབ་པའི་རྗེས་ནས། འཛུལ་ཞུགས་པ་ཚོས་ངོ་དེབ་བརྒྱུད་ཨར་ཇི་མི་མང་ཟླ་ ༡ པའི་ཚེས་ ༢༥ ཉིན་ལ་མོ་པ་ལ་ཁི་སྲིད་གཞུང་ལ་ངོ་ལོག་ལས་འགུལ་སྤེལ་རྒྱུ་བསྒྲགས་པ་མ་ཟད། ལས་འགུལ་འཆར་གཞི་སོགས་ལ་གྲོས་བསྡུར་ཡང་དྲ་ཐོག་ནས་བྱས།  དེ་ནས། ཚེས་པ་ ༢༥ ཉིན་ཨར་ཇི་ཡི་མི་མང་སྟོང་ཕྲག་མང་པོ་ཁྲོམ་དུ་ཐོན་ཏེ་ཡར་ལངས་བྱས་ཤིང་མི་མང་གིས་རྒྱལ་སའི་ཐང་ཆེན་བཟུང་སྟེ་ཨར་ཇིའི་གསར་བརྗེའི་སྒོ་མོ་ཡོངས་སུ་ཕྱེས་ཡོད། དཔེ་མཚོན་འདིའི་ཁྲོད་ནས་ང་ཚོས་ཅི་ཞིག་ཤེས་ཐུབ་ཅེ་ན། ཞི་བའི་གསར་བརྗེ་དྲ་རྒྱ་བརྒྱུད་དེ་ཕྱི་ལོགས་སུ་ཡོད་པའི་ཚོགས་སྡེ་ཁག་གིས་སྤེལ་ཐུབ་པ་ཞིག་ཡིན་པ་དེ་རེད། རྒྱ་གཞུང་གིས་དྲ་རྒྱའི་ཐད་ལ་བཀག་སྡོམ་བྱེད་ཚུལ་ནི་ཨར་ཇི་སྲིད་དབང་སྒེར་གཅོད་ལས་ཀྱང་དམ་དྲག་ཆེ་ནའང་། ང་ཚོས་ཆེས་རྙོག་འཛིང་གི་དྲ་རྒྱའི་ཐབས་རྩལ་བཀོལ་ན། ང་ཚོར་སྔར་བཞིན་གསར་བརྗེའི་རྒྱལ་ཁ་ཐོབ་ཐུབ་ངེས་ཤིག་རེད།

དེ་ནས། གོང་གི་དཔེ་མཚོན་དེ་གསུམ་ལས་ང་ཚོར་སྡོམ་ཚིག་ཅི་ཞིག་རག་ཐུབ་ཞེ་ན། དྲ་རྒྱའི་དུས་རབས་འདིའི་ནང་། ཕྱིར་བཙན་བྱོལ་དུ་བསྡད་ཡོད་པའི་མི་རིགས་ཁག་གི་ཚོགས་སྡེ་ཚོས་དྲ་རྒྱ་བརྒྱུད་རྒྱ་ནག་ནང་ཁུལ་གྱི་མི་རིགས་ཁག་ལ་འབྲེལ་འདྲིས་བྱས་ན་ཆོག་པ་མ་ཟད། ལྷག་པར་དུ་རྒྱ་མི་རིགས་ལ་ཐད་ཀར་འབྲེལ་འདྲིས་བྱས་ཏེ་གྲོས་བསྡུར་དང་ཁྱབ་བསྒྲགས་བྱེད་ཆོག་ཅིང་། ད་དུང་། རྒྱ་གཞུང་གིས་མི་རིགས་ཁག་ལ་གདུག་རྩུབ་ཆེ་བའི་སྲིད་ཇུས་ལག་བསྟར་བྱེད་པའི་གསང་བ་དེ་ཡང་ཐེར་འདོན་བྱེད་ཐུབ།  རྒྱ་གཞུང་གིས་མི་རིགས་ཁག་གི་ལོ་རྒྱུས་ལ་འཁྱོག་བརྗོད་དང་ཆབ་སྲིད་ཐོག་ནག་ཐིག་བཟོས་ཡོད་པ་དག་ཀྱང་གསལ་སྟོན་བྱ་ཐུབ་པ་མ་ཟད། གོ་སྐབས་དམ་འཛིན་ཐོག་རྒྱ་ནག་དམངས་གཙོ་གསར་བརྗེ་ཚོགས་པ་དང་མཉམ་འབྲེལ་བྱས་ཏེ་སྲིད་དབང་སྒེར་སྡོམ་གཞུང་མགོ་རྟིང་སློག་པའི་གསར་བརྗེ་ཡང་བསླང་ནུས་པ་དེ་རེད།

བཞི་པ།  བསམ་ཚུལ་མདོར་བསྡུས།

ཀ ༽ བཙན་བྱོལ་དུ་ཡོད་པའི་ཚོགས་སྡེ་ཁག་གིས་རང་ས་ནས་དྲ་རྒྱའི་ལས་ཁུངས་རེ་བཙུགས་ཏེ། ཆེད་དུ་རྒྱ་ནག་ནང་ཁུལ་གྱི་མི་རིགས་ཁག་ལ་འབྲེལ་འདྲིས་བྱེད་པ་དང་། ལྷག་པར་དུ་རྒྱ་མི་རིགས་ལ་འབྲེལ་འདྲིས་དང་ཁྱབ་བསྒྲགས་ལས་འགུལ་སྤེལ་དགོས་པ།

ཁ ༽ དྲ་རྒྱའི་ལས་ཁུངས་ཀྱི་ཚོགས་མི་རྣམས་ཆེད་ལས་པ་ཡིན་ཆོག་ལ་དང་བླངས་པ་ཡིན་ཡང་ཆོག ད་དུང་ལས་ཡུན་དུས་ཚོད་ལ་ཚོད་འཛིན་མི་བྱེད་པ་དང་། རིམ་གྱིས་འཆར་གཞི་ཡང་རྒྱ་ཇེ་ཆེར་གཏོང་དགོས།

ག ༽ ཚོགས་སྡེ་སོ་སོས་ཕན་ཚུན་ལ་འབྲེལ་གཏུགས་ཡོད་པ་དང་། འདྲ་མཉམ་དང་རང་དབང་གི་སྒོ་ནས་ཕན་ཚུན་མཉམ་འབྲེལ་བྱེད་པ། མཉམ་འབྲེལ་བྱེད་ཕྱོགས་ཕྱི་རྒྱལ་གྱི་དམངས་གཙོའི་ཚོགས་སྡེ་ཁག་གིས་སྒེར་གཅོད་སྲིད་གཞུང་ལ་ངོ་རྒོལ་བྱེད་ཐབས་དང་མཉམ་པ།

ལྔ་པ། དྲ་རྒྱའི་ལས་ཁུངས་ཀྱི་དམིགས་ཡུལ་གཙོ་བོ།

ཀ ༽ རྒྱ་རིགས་གཙོ་བོར་བྱས་ཏེ་མི་རིགས་ཁག་ལ་རྒྱ་གཞུང་གི་གཉའ་གནོན་བྱེད་བཞིན་ཡོད་པ་དེ་དག་གསལ་སྟོན་བྱེད་པ་དང་། མི་རིགས་ཕན་ཚུན་དངོས་ཡོད་འབྲེལ་བ་ཇེ་གསལ་དང་གོང་འཕེལ་དུ་གཏོང་བ། དེ་ནས་མི་རིགས་ཁག་དང་དམིགས་བསལ་རྒྱ་རིགས་ཕན་ཚུན་ལ་རྒྱུས་ལོན་བྱེད་པར་ཤུགས་སྣོན་བྱེད་དགོས།

ཁ ༽ མ་འོངས་དམངས་གཙོའི་རྩ་ཁྲིམས་སྒྲོམ་གཞིའི་འོག་ནས་རྒྱ་རིགས་དང་མི་རིགས་ཁག་གི་འབྲེལ་བ་སོར་གནས་དང་ཇེ་བཟང་གཏོང་ཆེད་མི་རིགས་རང་ཐག་རང་གཅོད་ཀྱི་བསམ་བློ་ཁྱབ་སྤེལ་བྱེད་དགོས།

ག ༽ དམངས་གཙོ་གསར་བརྗེའི་ལྟ་བ་དང་བྱེད་ཐབས་རྣམས་ཁྱབ་བསྒྲགས་བྱས་ཏེ། རྒྱ་ནག་ནང་ཁུལ་གྱི་མི་རིགས་ཁག་གི་མི་མང་གིས་དམངས་གཙོའི་གསར་བརྗེ་ལ་རྩ་འཛུགས་དང་གྲ་སྒྲིག་ཡག་པོ་ཡོང་བ་བྱེད་པ།

ང ༽ གོ་སྐབས་དམ་འཛིན་ཐོག་རྒྱ་ནག་དམངས་གཙོ་གསར་བརྗེ་ཚོགས་པ་དང་མཉམ་འབྲེལ་བྱས་ཏེ་མཉམ་འབྲེལ་གྱིས་རྒྱ་དམར་གཞུང་མགོ་རྟིང་སློག་ཐབས་བྱེད་པ།

དྲུག་པ། ཕྱི་ནང་གཉིས་ཀ་མཉམ་འབྲེལ་བྱེད་པ།

ཕྱི་རྒྱལ་བརྒྱུད་ལམ་ཁག་དང་ལྷག་པར་དུ་ནུབ་ཕྱོགས་བརྒྱུད་ལམ་ཁག་ནི་ཡིད་རྟོན་བྱེད་ཆོག་པ་དང་དབང་ཆའི་རང་བཞིན་ཡོད་ཅིང་། རྒྱ་ནག་གི་དྲ་རྒྱར་ཁྱབ་བསྒྲགས་ཧ་ཅང་མྱུར་པོར་བྱེད་ཐུབ་པའི་ནུས་པ་ཡོད། དེར་བརྟེན། མི་རིགས་ཁག་གི་བཙན་བྱོལ་ཚོགས་སྡེ་ཁག་གིས་མཉམ་རུབ་ཐོག་བརྒྱུད་ལམ་འདི་གཉིས་བེད་སྤྱད་དེ་ཕན་ཚུན་ལ་རོགས་འདེགས་བྱེད་ཆོག་ཅིང་། དྲ་རྒྱའི་ལས་ཁུངས་ཀྱི་ལས་ཀ་གཙོ་བོ་ནི་རྒྱ་ནག་ནང་ཁུལ་གྱི་མི་རིགས་ཁག་ལ་འབྲེལ་འདྲིས་དང་གྲོས་བསྡུར་བྱེད་རྒྱུ། དམིགས་བསལ་གྱིས་རྒྱ་རིགས་མི་མང་ལ་ཁྱབ་བསྒྲགས་དང་འབྲེལ་འདྲིས་བྱེད་རྒྱུ་དེ་ཡིན། དེ་ཡང་། སྒེར་གཅོད་སྲིད་དབང་རྩ་གཏོར་དང་དམངས་གཙོའི་གསར་བརྗེ་བདེ་ལེགས་ངང་ལེགས་འགྲུབ་པའི་ཆ་རྐྱེན་བསྐྲུན་ཆེད་དང་། མ་འོངས་དམངས་གཙོའི་རྩ་ཁྲིམས་ཀྱི་སྒྲོམ་གཞིའི་འོག་ནས། རྒྱ་རིགས་དང་མི་རིགས་ཁག་བར་ལ་བསམ་ཤེས་དང་ཞི་བདེའི་སྒོ་ནས་མི་རིགས་རང་སྐྱོང་དང་། རང་ཐག་རང་གཅོད་ཐད་གྲོས་མོལ་བྱེད་པ་སོགས་ཀྱི་གལ་འགངས་ཆེ་བའི་གནད་དོན་རྣམས་བདེ་ལེགས་ངང་སེལ་ཐུབ་ཆེད་ཀྱང་འདི་ཉིད་དོ།།

མ་རྩོམ་འབྲེལ་ཐག     http://blog.boxun.com/hero/201310/dongsai/16_1.shtml