རྒྱ་ནག་གཞུང་གིས་ཁམས་སོག་རྫོང་གི་བོད་མི་ཞིག་འཛིན་བཟུང་བྱས་ཏེ། ད་ཆར་གར་ཡོད་ཅི་བྱུང་གི་གནས་ཚུལ་མ་ཤེས་པར་ལྷག་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཚེས་ ༡༡ ཉིན་གྱི་མཚན་མོར་རྒྱ་ནག་གཞུང་གིས་ཁམས་སོག་རྫོང་ཅུང་པ་རྒྱལ་ཆེན་ཡུལ་ཚོ་གྲོང་ཚོ་ལྔ་བའི་རང་ལོ་ ༢༧ ཡིན་པའི་ཐུབ་རྒྱལ་ལམ་ (ཐུབ་བསྟན་རྒྱལ་མཚན) ལགས་འཛིན་བཟུང་བཙན་འཁྲིད་བྱས་ཏེ། ད་ཆར་ནང་མི་ཉེ་འབྲེལ་ཚོས་ཁོང་གང་དུ་བཙོན་འཇུག་བྱས་ཡོད་མེད་དང་། ཤི་གསོན་གྱི་གནས་སྟངས་ཅི་ཡང་མ་ཤེས་པར་ལྷག་ཡོད་འདུག
ཐུབ་རྒྱལ་ལགས་ཀྱི་ཕ་མིང་ལ་བསྟན་པའི་རྒྱལ་མཚན་དང་། མ་མིང་ལ་ཐུབ་བསྟན་ཆོས་འཛིན་ཞུ་བཞིན་ཡོད་པ་དང་། ཁོང་ནམ་རྒྱུན་ཚོང་ལས་གཉེར་མཁན་ཞིག་ཡིན་འདུག ཉེ་ཆར་ཉེན་རྟོག་པས་ཁོང་འཛིན་བཟུང་བྱེད་སྐབས་ནག་ཉེས་ཅི་ཡིན་གྱི་གསལ་བཤད་བྱས་མེད་ཀྱང་། ས་གནས་མི་མང་ཁྲོད་རྒྱ་ནག་གཞུང་གིས་ཁོང་ཕྱི་སྡོད་བོད་མིར་འབྲེལ་བ་བྱས་པའི་དོགས་གཞིའི་འོག་འཛིན་བཟུང་བྱས་པ་ཞིག་ཡིན་པའི་ཚོད་དཔག་བྱེད་ཀྱི་ཡོད་འདུག
གསར་འགོད་པ། དོན་གོ
