ཝན་ཚང་གི་གནས་ཚུལ་གསར་པ།

སྙན་གྲགས་ཆེ་བའི་ཨ་རིའི་དངུལ་རྩའི་ཁེ་ལས་ཇི་ཕི་མོར་གྷན་གྱིས་རྒྱ་ནག་གི་སྲིད་བློན་ཟུར་པ་ཝན་ཅཱ་པའོ་ཡི་བུ་མོའི་ཁེ་ལས་ཤིག་དང་མཉམ་འབྲེལ་བྱས་ཡོད་འདུག

དེ་རིང་ནེའུ་ཡོག་དུས་བབ་ནང་གནང་ཚུལ་བཀོད་པ་ལྟར་ན། ཨ་རིའི་ཇི་ཕི་མོར་གྷན་(JPMorgan) ཁེ་ལས་ཀྱིས་རྒྱ་རིགས་བུད་མེད་ལི་ལི་ཅང་( Lily Chang )གི་ཁེ་ལས་(Full mark)དང་མཉམ་འབྲེལ་བྱེད་མགོ་ཚུགས་ཡོད་པ་དང་།  ཁེ་ལས་དེའི་ནང་ལས་ཀ་བྱེད་མཁན་ལི་ལི་ཅང་མོ་རང་ཚུད་པའི་རོགས་པ་བུད་མེད་གཞན་ཞིག་བཅས་མི་གཉིས་ལས་མེད་ཅིང་། ཁོ་གཉིས་ལ་ཨ་རིའི་ཇི་ཕི་མོར་གྷན་ཁེ་ལས་ཀྱིས་ཟླ་རེར་ཨ་སྒོར་ ༧༥།༠༠༠ སྤྲོད་ཀྱི་ཡོད་འདུག དེའི་སྐོར་ཧོང་ཀོང་ནང་རྟེན་གཞི་བྱས་པའི་ཇི་ཕི་མོར་གྷན་ཁེ་ལས་ཀྱི་གཙོ་འཛིན་གྱིས་བརྗོད་པ་ལྟར་ན། ཨ་རིའི་ཇི་ཕི་མོར་གྷན་གྱིས་མཉམ་ལས་བྱེད་བཞིན་པའི་རྒྱ་ནག་སྐམ་ས་ཆེན་མོའི་ཁེ་ལས་དེའི་མགོ་འཛིན་གྱི་མིང་དངོས་ལ་ལི་ལི་ཅང་ཟེར་གྱི་མེད་པར། མོ་ནི་རྒྱ་ནག་གི་སྲིད་བློན་ཟུར་པ་ཝན་ཅཱ་པའོ་ཡི་བུ་མོ་ཝན་རུ་ཆུན་ (Wen Ruchun) ཡིན་པ་བརྗོད་འདུག

ཇི་ཕི་མོར་གྷན་ཁེ་ལས་དང་ཝན་ཅཱ་པའོ་ཡི་ནང་མིའི་བར་གྱི་ཚོང་འབྲེལ་དེ། ཝན་ཅཱ་པའོ་རྒྱ་ནག་གི་སྲིད་བློན་ཡིན་སྐབས་ནས་བྱུང་བ་ཞིག་ཡིན་ཞིང་། དཔལ་འབྱོར་ཉམས་ཞིབ་པ་མང་པོ་ཞིག་གིས། ཝན་ཅཱ་པའོ་ནི་རྒྱ་ནག་གི་དཔོན་རིགས་མཐོ་གྲས་ཤིག་ཡིན་སྟབས་རྒྱ་ནག་ནང་ཚོང་འབྲེལ་བྱེད་པར་སྟབས་བདེ་པ་དང་། རྒྱ་ནག་གི་གཞུང་འབྲེལ་ཁེ་ལས་དང་དངུལ་ཁང་མང་པོ་ཞིག་དཔོན་རིགས་མཐོ་གྲས་དང་དེ་དག་གི་ནང་མི་སྤུན་མཆེད་ཚོའི་ལག་པར་ཡོད་ཅིང་། ཝན་ནི་རྒྱ་ནག་ནང་ཁེ་ལས་གསར་འཛུགས་དང་མ་འཇོག་བྱེད་ཕྱོགས་ཐད་ནུས་པ་འདོན་མཁན་གཙོ་གྲས་ཤིག་ཡིན་སྟབས། ཇི་ཕི་མོར་གྷན་ཁེ་ལས་ཀྱིས་ཝན་ཅཱ་པའོ་ཡི་བུ་མོ་དང་མཉམ་ལས་བྱས་པར་ངོས་འཛིན་བྱེད་ཀྱི་ཡོད་འདུག

དངུལ་རྩའི་ཁེ་ལས་དེ་རྒྱ་ནག་སྐམ་ས་ཆེན་པོའི་ནང་ཆོག་མཆན་བཀའ་འཁྲོལ་ཐོབ་ཆེད་ཝན་ཅཱ་པའོ་ཡི་ལྐོག་རྔན་ཨ་སྒོར་ས་ཡ་མང་པོ་བླངས་ཡོད་པ་དང་། དེའི་སྐོར་ཨ་རིའི་ཚོང་ལས་རྟོག་ཞིབ་ཚོགས་ཆུང་གིས་རྒྱུས་ལོན་བྱེད་པར་བསྐྱོད་སྐབས། ཁེ་ལས་དེས་ཨ་རིའི་ཚོང་ལས་སྒྲིག་སྲོལ་གང་ལའང་འགལ་མྱོང་མེད་ཚུལ་བརྗོད་ཡོད་ཀྱང་། ཝན་ཅཱ་པའོ་ཡི་བུ་མོ་ཝན་གྱི་ཁེ་ལས་ (Fullmark Consultants ) ལ་ཇི་ཕི་མོར་གྷན་ཁེ་ལས་ཀྱིས་ ༢༠༠༦ ནས་ ༢༠༠༨ ལོར་ཆ་སྙོམ་ཨ་སྒོར་ཐེར་འབུམ་ ༡།༨ དང་། ༢༠༠༧ ལོར་ཨ་སྒོར་ཐེར་འབུམ་ ༥ སྤྲད་ཡོད་འདུག

ཝན་ཅཱ་པའོ་ཡི་བུ་མོ་ཝན་གྱི་ཚོང་གཉེར་བྱེད་བཞིན་པའི་ཁེ་ལས་ནི། རྒྱ་ནག་གི་རྒྱལ་ས་པེ་ཅིན་དཀྱིལ་གྱི་ཁང་ཆེན་ཐོག་རྩེག་དགུ་པར་ཡོད་པ་དང་། དེ་ཝན་ཅཱ་པའོ་ཡི་ནང་མིས་དོ་དམ་དང་ཁོ་ཚོའི་མིང་ཐོག་ཏུ་དེབ་སྐྱེལ་བྱས་ཡོད་འདུག ཁེ་ལས་དེ་དང་ཇི་ཕི་མོར་གྷན་གཉིས་ཀྱིས་རྒྱ་ནག་གི་དྲ་རྒྱ་འཚོལ་ཞིབ་ལྟེ་གནས་ (Baidu ) དང་ཉེན་སྲུང་ལྟ་སྐྱོང་ཁེ་ལས་པིན་ཡིང་ (Ping An )ནང་མ་རྩ་ཕོན་ཆེན་བཞག་ཡོད་འདུག

༢༠༠༦ ལོར་ཉེན་སྲུང་ལྟ་སྐྱོང་ཁེ་ལས་པིན་ཡིང་ནང་མ་རྩ་ཨ་སྒོར་ཐེར་འབུམ་ ༡ དང་། ༢༠༠༧ ལོར་ཨ་སྒོར་ཐེར་འབུམ་ ༢ བཞག་ཡོད་འདུག ད་དུང་། ས་ཁང་ཁེ་ལས་(New Horizon Capital ) དང་འཛུགས་སྐྲུན་ལས་གཞིའི་ཁེ་ལས་(BBMG ) ནང་མ་རྩ་ཕོན་ཆེན་བཞག་ཡོད་འདུག ད་ལྟ་མོ་ནི་པེ་ཅིན་ནང་གི་མ་འཇོག་ཕོན་ཆེ་ཤོས་ཀྱི་དཔོན་རིགས་སྲེས་མོ་གཅིག་པུ་དེ་ཆགས་ཡོད་འདུག

ད་ལྟ་མོར་ས་ཁང་ཁེ་ལས་དང་འཛུགས་སྐྲུན་ལས་གཞིའི་ཁེ་ལས། དེ་བཞིན། རྒྱན་ཆ་བཟོ་ཚོང་སོགས་ཚོང་གཉེར་ཁེ་ལས་ ༤ ཡོད་པ་དང་། མ་དངུལ་ཨ་སྒོར་ཐེར་འབུམ་མང་པོ་ཡོད་ཅིང་འགའ་ཞིག་ཕྱིའི་རྒྱལ་ཁབ་ཁག་ནང་མཁོ་གཏོང་བྱས་ཡོད་འདུག