བོད་དོན་འཐབ་རྩོད་པ་ཤེས་རབ་ཚེ་རྡོར་ལགས་ཀྱིས་རྒྱ་གར་གྱི་རྒྱལ་ས་ལྡི་ལིར་ཆུ་ཚོད་ངེས་མེད་ཀྱི་ཟས་བཅད་ངོ་རྒོལ་གནང་སྟེ་ཉིན་ ༢༢ ཙམ་ཕྱིན་རྗེས་མཚམས་འཇོག་གནང་བཅུག་ཡོད་འདུག
ཟླ་སྔོན་མའི་ཕྱི་ཚེས་ ༢༤ སྟེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྩ་ཁྲིམས་གཏན་འབེབས་ཀྱི་ཉིན་མོ་དང་བསྟུན་ཏེ་བོད་རིགས་གཞོན་སྐྱེས་ལས་འགུལ་བ་ཤེས་རབ་ཚེ་རྡོར་ལཊ་ཀྱིས། རྒྱལ་ཚོགས་གཙོས་རྒྱལ་སྤྱིའི་ཚོགས་སྡེ་ཁག་གོས་བོད་ནང་གི་འགྲོ་བ་མིའི་ཐོབ་ཐང་སོགས་ཛ་དྲག་གནས་སྟངས་ལ་གཟིགས་རྟོག་དགོས་པའི་འབོད་སྐུལ་འོག ལྡི་ལི་ཅན་ཌར་མན་ཌར་ས་གནས་སུ་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་སྟེ་ཉིན་ ༢༢ ཙམ་ཕྱིན་རྗེས། ཁ་སང་ཉིན་གུང་ཆུ་ཚོད་ ༡༢ ཙམ་ལ། བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་ལྡི་ལི་སྐུ་ཚབ་དོན་གཅོད་བསྟན་པ་ཚེ་རིང་མཆོག སྤྱི་འཐུས་ཨཅརྱ་ཡེ་ཤེས་ཕུན་ཚོགས་ལགས་དང་སྤྱི་འཐུས་ཆོས་སྐྱོང་དབང་ཕྱུག་ལགས། ཨེ་ཤ་ཡིའི་བོད་དོན་རྒྱབ་སྐྱོར་ཚོགས་པའི་རྒྱུན་ལས་ཊི་ཀ་(Dr.N.K.Trikha)ལགས་དང་སུ་རེན་ཌར་ཀུ་མར་(Shri Surendar Kumar)lལགས། དེ་བཞིན་ས་གནས་གཞིས་མགོ ས་གནས་གཞོན་ནུ་དང་བུད་མེད་བཅས་ཀྱི་སྐུ་ཚབ་སོགས་ཕེབས་ཏེ་ཟས་བཅད་ངོ་རྒོལ་མཚམས་འཇོག་གནང་བཅུག་ཡོད་འདུག
དེ་རིང་ཁ་པར་བརྒྱུད་ཤེས་རབ་ཚེ་རྡོར་ལགས་སུ་གཟུགས་པོའི་གནས་སྟངས་གང་འདྲ་ཡོད་མེད་དྲིས་པར་ཁོང་གིས། “ ཁ་སང་ཁས་ཉིན་གོམ་པ་རྒྱག་ཐུབ་པ་འདྲ་བོ་འདུག་ཀྱང་གློ་བུར་དུ་འགྱེལ་འགྲོ་བའི་ཉེན་ཁ་འདུག ད་ལྟ་དེ་འདྲའི་དཀའ་ངལ་མི་འདུག ཉེ་སྔོན་ངས་ལྡི་ལིར་ཡོད་པའི་མཉམ་སྦྲེལ་རྒྱལ་ཚོཊ་དང་ཡུ་རོབ་མཐུན་ཚོགས་ཀྱི་ཡན་ལག་ལས་ཁུངས་དང་། རྒྱ་ནག་གཞུང་ཚབ་ཁང་སོགས་སུ་དགོས་འདུན་སྙན་ཞུ་ཕུལ་བ་དེ་ལག་ལེན་བསྟར་རྒྱུ་ཡིན་ཟེར་བའི་བརྡ་ལན་ད་དུང་འབྱོར་མེད་སྟབས། ང་རང་གི་གཟུགས་པོའི་གནས་སྟངས་སླར་གསོ་བྱུང་རྗེས། རྒྱལ་གཅེས་དཔའ་བོ་ཚེ་རིང་རྒྱལ་ལགས་ཀྱི་མཚན་ཐོ་ཁ་སྣོན་བརྒྱབ་སྟེ་ཡང་བསྐྱར་སྙན་ཞུ་འབུལ་རྒྱུ་ཡིན” ཞེས་བརྗོད་སོང་།
གསར་འགོད་པ། པདྨ་མཚོ།
