ཉེ་བའི་ལོ་ཤས་ནང་ཨ་ཧྥི་རི་ཀའི་གླང་ཆེན་གྱི་གྲངས་འབོར་ལོ་རེ་བཞིན་བརྒྱ་ཆ་ ༡༠ ཇེ་ཉུང་དུ་འགྲོ་བཞིན་ཡོད་པ་དེ་རྒྱ་ནག་ནང་གླང་ཆེན་མཆེ་བ་བྲིན་རྒྱུག་ཆེན་པོ་ཆགས་པས་ཡིན་འདུག
ཉེ་ཆར་ཨ་རིའི་ཁྲིམས་འཛིན་ལས་ཁུངས་ཁག་ཅིག་མཉམ་འབྲེལ་ཐོག་ཞིབ་འཇུག་བྱས་ཏེ། ཨ་རིའི་ལྷོ་ཕྱོགས་མངའ་སྡེ་ཁོ་ལོ་རཱ་ཌོ་ནང་གི་བཟོ་གྲྭ་ཞིག་ཏུ། ཨ་ཧྥི་རི་ཀ་ནས་སྐྱེལ་འདྲེན་བྱས་པའི་གླང་ཆེན་གྱི་མཆེ་བ་དང་མཆེ་བའི་ཐོན་རྫས་ཏུན་ ༦ ཙམ་རྙེད་སོན་བྱུང་ཡོད་པ་དང་། དེ་དག་གཟའ་ཕུར་བའི་ཉིན་ཨ་རིའི་ཌན་ཝར་བྱང་ཕྱོགས་ཀྱི་རྒྱལ་ཁབ་རི་སྐྱེས་སྲོག་ཆགས་སྲུང་སྐྱོབ་ས་ཁུལ་ནས་རྡུང་གཅོག་བྱས་ཏེ་མེད་པར་བཟོས་ཡོད་པ་མ་ཟད། མཆེ་བའི་ཆག་ཧྲུག་རྣམས་དངོས་མང་བཤམ་སྟོན་ཁང་དུ་སྤྲོད་རྒྱུ་ཡིན་འདུག ཨ་རིའི་རྒྱལ་དོན་དྲུང་ཆེ་ཇོན་ཁཱ་རིའི་( John Kerry)ལགས་ཀྱིས་ནག་ཚོང་དེ་དག་མེད་པ་བཟོས་པར་ཨ་སྒོར་ཁྲི་ ༡༠༠ ཡི་བྱ་དགའ་སྤྲོད་རྒྱུ་གསལ་བསྒྲགས་གནང་ཡོད་འདུག
གོང་གི་གནས་ཚུལ་ཐད་རོའུ་ཊར་གསར་ཁང་གིས་བརྗོད་པ་ལྟར་ན། མཆེ་བ་དེ་དག་མང་ཆེ་བ་ཨ་ཧྥི་རི་ཀ་ནས་ཚོང་འདྲེན་བྱས་ཤིང་རྒྱ་ནག་སྐམ་ས་ཆེན་མོ་སོགས་ཨེ་ཤ་ཡའི་གླིང་དུ་སྐྱེལ་འདྲེན་བྱེད་རྩིས་ཡོད་པ་དང་། ལོ་རབས་བདུན་ཅུ་བརྒྱད་ཅུའི་ནང་ཨ་ཧྥི་རི་ཀར་གླང་ཆེན་ཁྲི་ ༡༣༠ ལྷག་ཡོད་ཀྱང་ད་ལྟ་ཁྲི་ ༦༠ ཡས་མས་ལས་མེད་ཅིང་། འཛམ་གླིང་ཁྱོན་ཡོངས་སུ་ལོ་རེར་གླང་ཆེན་སྟོང་ཕྲག་འགའ་རེ་ལྐོག་གསོད་ཀྱིས་ནག་ཚོང་བྱས་པའི་དངུལ་འབོར་ཨ་སྒོར་དུང་ཕྱུར་ ༡༠༠ ཙམ་ཟིན་གྱི་ཡོད་པ་དང་། ཐེངས་འདིར་མེད་པར་བཟོས་པའི་མཆེ་བ་རྣམས་གླང་ཆེན་ ༢༠༠༠ ཙམ་གྱི་ཡིན་ལུགས་བརྗོད་འདུག
རྒྱལ་སྤྱིའི་རི་སྐྱེས་སྲོག་ཆགས་སྲུང་སྐྱོབ་ཐེབས་རྩ་ཁང་གིས་ཞིབ་འཇུག་བྱས་པ་ལྟར་ན། ཉེ་བའི་ལོ་ ༡༠ ནང་ཨ་ཧྥི་རི་ཀའི་གླང་ཆེན་གྱི་གྲངས་འབོར་ལོ་རེ་བཞིན་བརྒྱ་ཆ་ ༡༠ རེ་ཉུང་དུ་འགྲོ་བཞིན་ཡོད་པ་དང་། རི་སྐྱེས་སྲོག་ཆགས་ཆེད་ལས་ཞིབ་འཇུག་པ་ཚོས་གླང་ཆེན་གྱི་གྲངས་འབོར་འདི་ལྟར་ཉུང་དུ་ཕྱིན་ཚེ། འབྱུང་འགྱུར་ལོ་ ༢༠ རྗེས་སུ་ཨ་ཧྥི་རི་ཀའི་གླང་ཆེན་རྩ་སྟོང་དུ་འགྲོ་རྒྱུའི་ཉེན་ཁ་ཆེན་པོ་ཡོད་ལ། ཉེ་བའི་ལོ་ཤས་ནང་རྒྱ་ནག་ཏུ་མཆེ་བའི་ཐོན་རྫས་ཀྱི་དགོས་མཁོ་ཆེ་རུ་ཕྱིན་ཞིང་། འདས་པའི་ལོ་ ༥ ནང་མཆེ་བའི་རིན་གོང་ལྡབ་ ༣ ཡས་མས་འཕར་ཏེ། སྤྱི་རྒྱ་གཅིག་ལ་རྒྱ་སྒོར་ཁྲི་ ༢ ལྷག་ཡིན་འདུག
རྒྱལ་སྤྱིའི་རི་སྐྱེས་སྲོག་ཆགས་སྲུང་སྐྱོབ་ཐེབས་རྩ་ཁང་གི་རྒྱ་ནག་སྐུ་ཚབ་ལྕམ་ཀེ་རའི་ལགས་ཀྱིས་བརྗོད་དོན། “ཁེ་སྤོགས་འབོར་ཆེན་ཡོད་པའི་དབང་གིས་རྒྱ་ནག་ནང་མཆེ་བའི་ནག་ཚོང་ཧ་ཅང་ཚབས་ཆེན་ཡིན་པ་དང་། རྒྱ་ནག་ནང་མཆེ་བར་‘གསེར་དཀར’དུ་འབོད་ཅིང་། ཨ་ཧྥི་རི་ཀའི་གནམ་ཐང་དང་གྲུ་ཁ་སོགས་སུ་ནག་ཚོང་བ་འཛིན་བཟུང་བྱས་པ་ལས་བརྒྱ་ཆ་ ༩༥ ཙམ་རྒྱ་རིགས་རེད། རྒྱ་ནག་གི་མཆེ་བའི་བཟོ་ལས་ལག་རྩལ་ལ་ལོ་ངོ་སྟོང་ཕྲག་གི་ལོ་རྒྱུས་ལྡན་ཞིང་། མཆེ་བའི་ཐོན་རྫས་ལ་བརྟེན་ཏེ་ཕྱུག་པོ་ཆགས་པའི་ནག་ཚོང་བ་ཚོའི་དམིགས་འབེན་དུ་གྱུར་ཡོད། རྒྱ་ནག་གཞུང་གིས་མཉམ་འབྲེལ་རྒྱལ་ཚོགས་ཀྱི་རི་སྐྱེས་སྲོག་ཆགས་སྲུང་སྐྱོབ་གཏན་འབེབས་ཡིག་ཆ་གཞིར་བཟུང་། གླང་ཆེན་གྱི་མཆེ་བ་ཉོ་ཚོང་བྱེད་པར་སྟངས་འཛིན་བྱེད་ཀྱི་ཡོད་ཀྱང་། ཁྲིམས་འགལ་ཐོག་གླང་ཆེན་མཆེ་བ་ཉོ་ཚོང་གི་གནས་སྟངས་ཧ་ཅང་ཚབས་ཆེན་རེད། ཕྱི་ལོ་ ༢༠༡༡ ལོར་ང་ཚོས་ཞིབ་འཇུག་བྱས་པ་བརྒྱུད་མཆེ་བ་བཟོ་ཚོང་ཁང་ ༡༥༨ ནས་ ༡༠༡ ཙམ་ཁྲིམས་འགལ་ཡིན་པ་ཤེས་རྟོགས་བྱུང་ཡོད”ཅེས་དང་། ཉེ་བའི་ལོ་ཤས་ནང་རྒྱ་ནག་ཧུའུ་ཅན་དང་ཧྲན་ཞི། ཀྲང་ཏུང་། ཧོང་ཀོང་སོགས་སུ་གླང་ཆེན་གྱི་མཆེ་བ་ནག་ཚོང་བྱས་པའི་ཉེས་དོན་བསྟུན་མར་བྱུང་ཡོད་སྐོར་སོགས་བརྗོད་འདུག
གསར་འགོད་པ། པདྨ་མཚོ།
