རྒྱལ་སྤྱིའི་གསར་ལམ་ཁག་ཏུ་པེ་ཅིན་གྱི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྟེང་རྒྱ་ནག་གི་འཆར་ལྡན་བུ་སྐྱེས་སྲིད་བྱུས་ལ་བཅོས་བསྒྱུར་བཏང་ཡོད་སྐོར་བཀོད་འདུག
དེ་རིང་རྒྱལ་སྤྱིའི་གསར་ལམ་ཁག་ཏུ་ཁ་སང་ཚེས་ ༡༥ ཉིན་རྒྱ་ནག་ཤིན་ཧྭ་གསར་ཁང་གིས་རྒྱ་ནག་གི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྟེང་གྲོས་འཆམ་བྱུང་བའི་ཡིག་འབྲུ་ ༢༢༠༠༠ ཅན་གྱི་གསལ་བསྒྲགས་ཤིག་སྤེལ་བར་དབྱེ་ཞིབ་བྱས་ཡོད་པའི་ནང་། ཚོགས་འདུ་དེའི་སྟེང་གནད་དོན་གལ་ཆེན་ཁག་ཅིག་གི་ཐོག་བཅོས་བསྒྱུར་བཏང་ཡོད་ཅིང་། དེ་དག་ལས་རྒྱ་ནག་གི་གྲོང་ཁྱེར་ཁག་གི་ ‘འཆར་ལྡན་བུ་སྐྱེས་སྲིད་བྱུས’ ལ་བཅོས་བསྒྱུར་བཏང་སྟེ་ཕ་མ་གང་རུང་བྱིས་པ་གཅིག་ཡིན་པའི་ཁྱིམ་ནས་སྐྱེས་པ་ཡིན་ན་བཟའ་ཚང་དེར་བྱིས་པ་གཉིས་སྐྱེ་ཆོག་པ་དང་། ‘ངལ་རྩོལ་བསྒྱུར་བཀོད་ལམ་ལུགས’ ཁྱིམ་ཐོ་དེབ་སྐྱེལ་དང་ས་ཞིང་བདག་དབང་ལ་བསྒྱུར་བཅོས་བཏང་སྟེ་སྤྱི་ཚོགས་ཀྱི་དཀའ་ངལ་སེལ་ཆེད་གཞི་རིམ་མི་སེར་གྲོང་ཁྱེར་ནང་གནས་སྤོར་བྱེད་པར་བཀག་འགོག་མི་བྱེད་པ། ༡༩༧༨ ལོ་དང་ ༡༩༩༣ ལོ་ཚང་འཛོམས་གྲོས་ཚོགས་སྐབས་ཀྱི་རྒྱ་ནག་གི་དཔལ་འབྱོར་བསྒྱུར་བཅོས་བཏང་བའི་རྨང་གཞིའི་ཐོག་མ་རྩ་རིང་ལུགས་ཀྱི་ཚོང་རྭའི་དཔལ་འབྱོར་ལ་ཟུང་འབྲེལ་གྱིས་རྒྱ་ནག་གི་ཚོང་རའི་ནུས་པ་ཆེ་རུ་གཏོང་རྒྱུ་སོགས་བཀོད་འདུག
གནས་ཚུལ་དེ་དག་ནང་། ༡༩༥༧ ལོར་མའོ་ཙེ་ཏུང་གིས་རྒྱ་ནག་དམར་ཤོག་ཚོགས་པའི་སྲིད་དབང་སྲ་བརྟན་ཡོང་ཆེད་གསར་བརྗེ་ངོ་རྒོལ་ཤོག་ཁག་ལ་ཁ་གཏད་གཅོག་ཕྱིར་ངལ་རྩོལ་བསྒྱུར་བཀོད་ལམ་ལུགས་གསར་འཛུགས་བྱས་ཏེ། རྒྱ་ནག་གི་ཤེས་ཡོན་ཅན་དང་སྲིད་དོན་མི་སྣ། མང་ཚོགས་ས་ཡ་མང་པོ་བཙོན་འཇུག་དང་ངལ་རྩོལ་བསྒྱུར་བཀོད་འོག་ཚེ་སྲོག་ཤོར་ཡོད་པ་དང་། དེང་སྐབས་རྒྱ་ནག་གཞུང་དང་ལྟ་བ་མི་མཐུན་པའི་དམངས་གཙོ་དོན་གཉེར་བ་དང་རྩ་རླུང་སྒོམ་སྒྲུབ་པ། གྲོང་ཁྱེར་ནང་གི་རྐུན་ཇག་དང་ཞང་ཚོང་མ་སོགས་འཛིན་བཟུང་བྱས་ཏེ་ཁྲིམས་ལུགས་ཀྱི་འགྲོ་ལུགས་བརྒྱུད་མ་དགོས་པར་ཉེན་རྟོག་པས་ལོ་གཅིག་ནས་ལོ་བཞིའི་བར་བཀག་ཉར་བྱེད་ཆོག་པའི་དབང་ཆ་ཡོད།
འདས་པའི་ལོ་མང་རིང་རྒྱལ་སྤྱིའི་འགྲོ་བ་མིའི་ཚོགས་སྡེ་ཁག་དང་རྒྱལ་ཁབ་ཁག་གི་གཞུང་གིས་རྒྱ་ནག་ལ་སྐྱོན་བརྗོད་དང་། རྒྱ་གཞུང་གིས་ངེས་པར་དུ་ངལ་རྩོལ་བསྒྱུར་བཀོད་ལམ་ལུགས་རྩ་མེད་གཏོང་དགོས་པའི་གནོན་ཤུགས་སྤྲད་དེ་ཐེངས་འདིར་བཅོས་བསྒྱུར་བྱུང་པ་ནི། བཟང་ཕྱོགས་ཀྱི་འགྱུར་བ་ཞིག་ཏུ་ངོས་འཛིན་བྱེད་ཀྱི་ཡོད་འདུག
༡༩༧༩ ལོར་རྒྱ་ནག་དམར་ཤོག་ཚོགས་པས་དཔལ་འབྱོར་འཕེལ་རྒྱས་གལ་གནད་དུ་བཟུང་སྟེ་འཆར་ལྡན་བུ་སྐྱེས་སྲིད་ཇུས་གཏན་འབེབས་ཀྱིས་ལོ་ ༣༠ ལྷག་རིང་མི་འབོར་འཕེལ་རྒྱས་ལ་ཚོད་འཛིན་བྱས་སྟབས། ད་ཆར་རྒྱ་ནག་གི་མི་རབས་རྒན་ཡོལ་དང་གཞོན་སྐྱེས་ལས་ཀ་བྱེད་མཁན་བར་དོ་མི་མཉམ་པའི་གནས་ཚུལ་བྱུང་སྟེ། འབྱུང་འགྱུར་གཞོན་སྐྱེས་གཅིག་གིས་རྒན་འཁོགས་བཞི་ནས་ལྔ་བར་གསོ་སྐྱོང་བྱ་དགོས་པ་ཆགས་རྒྱུ་ཡིན་པ་དང་། སྔོན་མ་ནས་བཟུང་མང་ཚོགས་ཀྱིས་བྱིས་པ་གཅིག་གི་སྲིད་ཇུས་ལ་འདོད་མོས་མེད་སྟབས། སྤྱི་ཚོགས་ནང་གི་དཀའ་ངལ་མང་ཆེ་བ་སྲིད་བྱུས་འདི་ལ་ཐད་ཀར་འབྲེལ་བ་ཆགས་ཡོད་ཅེས་གསར་འགྱུར་བརྒྱུད་ལམ་ཁག་ཏུ་ཐོན་འདུག
གནད་དོན་དབྱེ་ཞིབ་པ་ཚོས་རྒྱ་ནག་གི་འཆར་ལྡན་བུ་སྐྱེས་སྲིད་བྱུས་ཀྱིས་ངལ་རྩོལ་ཁོར་ཡུག་ཆུང་དུ་བཏང་སྟེ་རྒྱལ་ཁབ་ཀྱི་དཔལ་འབྱོར་འཕེལ་རྒྱས་ལ་གནོད་སྐྱོན་ཚབས་ཆེན་བཟོས་ཡོད་པ་དང་། ༢༠༡༢ ལོར་རྒྱ་ནག་གི་ལས་ཀ་བྱེད་མཁན་གྱི་གྲངས་འབོར་ས་ཡ་ ༣།༤༥ མར་ཆག་ཡོད་ཅིང་། མཉམ་འབྲེལ་རྒྱལ་ཚོགས་ཀྱིས་ ༢༠༣༠ ལོར་རྒྱ་ནག་ནང་ལོ་ ༦༥ ལ་གསོན་པའི་རྒན་ཡོལ་གྱི་གྲངས་འབོར་རྒྱ་ནག་གི་མི་འབོར་གྱི་བརྒྱ་ཆ་ ༢༥ ཟིན་ཏེ། མི་རབས་གཞོན་པ་ཚོར་རྒན་ཡོལ་གསོ་སྐྱོང་གི་འགན་འཁུར་ཆེན་པོ་ཆགས་རྒྱུ་ཡིན་པའི་ཚོད་དཔག་བྱེད་ཀྱིན་འདུག
གསར་འགོད་པ། ལྷ་སྐྱབས་རྒྱལ།
