བོད་རྒྱ་གཉིས་ཀས་ལོ་རྒྱུས་ཀྱི་དོན་ཆེན་བརྗེད་མི་རུང་།

ཨ་རིའི་ནེའུ་ཡོག་གི་རྒྱ་རིགས་ཤེས་ཡོན་ཅན་ཁག་ཅིག་གིས་དྲུག་བཞིའི་དོན་རྐྱེན་ཐེངས་ ༢༥ པའི་སྟེང་ལས་འགུལ་གཞི་རྒྱ་ཆེན་པོ་ཞིག་སྤེལ་འཆར་ཡོད་པའི་གསལ་བསྒྲགས་སྤེལ་འདུག

ཟླ་འདིའི་ཚེས་ ༡༥ ཉིན་ཨ་རིའི་ནེའུ་ཡོག་ཏུ་ཡོད་པའི་རྒྱ་གྲོང་གི་ཟ་ཁང་ཆེན་པོ་ཞིག་ཏུ། རྒྱ་རིགས་ཤེས་ཡོན་ཅན་ཁག་ཅིག་གིས་ ‘དྲུག་བཞིའི་དོན་རྐྱེན’བྱུང་སྟེ་མི་ལོ་ ༢༥ འཁོར་བ་དང་བསྟུན་ཏེ་གཞི་རྒྱ་ཆེ་བའི་ལས་འགུལ་ཞིག་སྤེལ་རྒྱུའི་གསར་འགོད་ལྷན་ཚོགས་བསྐྱངས་ཡོད་ཅིང་། དེར་དྲུག་བཞིའི་དོན་རྐྱེན་ནང་དངོས་སུ་ཞུགས་མྱོང་མཁན་ཀོ་ལིམ་སྦི་ཡ་གཙུག་ལག་སློབ་གྲྭ་ཆེན་མོའི་ཆབ་སྲིད་མཁས་དབང་ཝང་ཅུན་ཐའོ་དང་། སྲིད་དོན་དབྱེ་ཞིབ་པ་ཧུའུ་ཕིན། ཁྲིམས་རྩོད་པ་ཤང་ཞའོ་ཇི། རྒྱ་རིགས་ཆབ་སྲིད་བཙོན་ཟུར་ལིའུ་གཉན་ཁྲུན་སོགས་རྒྱ་རིགས་ཤེས་ཡོན་ཅན་དང་། གསར་འགོད་པ་བཅས་མི་ ༦༠ ཙམ་མཉམ་ཞུགས་གནང་ཡོད་འདུག

གསར་འགོད་ལྷན་ཚོགས་ཐོག་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས་གདན་ཞུ་གནང་བ་བཞིན་ཁོང་གིས་༼ བོད་པའི་གཞོན་སྐྱེས་མི་རབས་ཚོས་ལོ་རྒྱུས་བརྗེད་མེད། རྒྱ་རིགས་གཞོན་སྐྱེས་ཚོས་ཀྱང་བརྗེད་ཡོད་ཀྱི་མ་རེད།༽ཅེས་པའི་མགོ་བརྗོད་འོག་གཏམ་བཤད་གནང་དོན། ངའི་བསམ་པར། ཁྱེད་ཚོས་ལོ་ལྟར་དྲུག་བཞིའི་དུས་ཚིགས་དྲན་གསོ་བྱེད་སྐབས་ ༡༩༨༩ ལོར་འདས་གྲོངས་སུ་གྱུར་བ་རྣམས་ལ་དྲན་གསོ་བྱེད་ཀྱི་ཡོད་པ་མ་ཟད། དེ་ལས་གལ་ཆེ་བ་ཞིག་ནི་དོན་རྐྱེན་འདིའི་ལོ་རྒྱུས་ཀྱི་དོན་སྙིང་ཆེན་པོར་དྲན་གསོ་བྱེད་ཀྱི་ཡོད་པར་ངོས་འཛིན་བྱེད་ཀྱི་ཡོད། དྲུག་བཞིའི་དོན་རྐྱེན་བྱུང་ནས་ལོ་ཉེར་ལྔ་འཁོར་བའི་དྲན་གསོའི་ལས་འགུལ་འཆར་གཞི་རྣམས་རྒྱལ་སྤྱི་རང་བཞིན་གྱི་དམངས་གཙོའི་ལས་འགུལ་ཞིག་ཆགས་ཐུབ་མིན་དང་། འཛམ་གླིང་མི་རྣམས་ཀྱིས་གདེང་འཇོག་ཆེན་པོ་བྱེད་པའི་ལས་འགུལ་ཞིག་ཆགས་ཐུབ་མིན། དེ་ལས་གལ་ཆེ་བ་ཞིག་ལ་རྒྱ་ནག་སྐམ་ས་ཆེན་པོའི་མི་མང་གིས་རྒྱབ་སྐྱོར་ཐོབ་པའི་ལས་འགུལ་ཞིག་ཆགས་ཐུབ་མིན་གྱི་འགག་རྩ་ནི། འཛམ་གླིང་ས་གནས་ཁག་ཏུ་གནས་པའི་དམངས་གཙོ་དོན་གཉེར་བའི་ཚོགས་པ་ཡོངས་རྫོགས་བར་ཕན་ཚུན་ཡིད་གཏིང་ནས་མཉམ་ལས་བྱེད་ཐུབ་མིན་དང་། ཐུང་གི་ནུས་པ་འདོན་སྤེལ་བྱེད་ཐུབ་མིན་ལ་རག་ལུས་ཡོད། 

ངའི་ངོས་འཛིན་ལ། ༡༩༨༩ ལོའི་དྲུག་བཞིའི་དོན་རྐྱེན་བརྒྱུད་མྱོང་མཁན་སློབ་ཕྲུག་གི་མགོ་ཁྲིད་ཚོ་དང་། དེ་བཞིན་ལུས་པོ་མི་ཡུལ་ལུང་པར་ཡོད་ཀྱང་རྒྱ་ནག་དམངས་གཙོ་ཅན་དུ་འགྱུར་རྒྱུའི་བྱ་བཞག་ལ་ཡུན་རིང་འབད་བརྩོན་གནང་མཁན་འདིར་ཡོད་པ་དང་། མེད་པ་ཚོས་དྲུག་བཞིའི་དོན་རྐྱེན་མ་བརྗེད་པ་དང་། གཞོན་སྐྱེས་མི་རབས་རྣམས་ཀྱི་སེམས་ནང་དྲུག་བཞིའི་དོན་རྐྱེན་གྱི་ལོ་རྒྱུས་ཀྱི་དོན་སྙིང་ཤེས་རྟོགས་ཡོད་པ་ཞིག་བཟོ་ཐུབ་པ་ཡིན་ན། དུས་སང་ལོ་ཉེར་ལྔ་འཁོར་བའི་སྐབས་ཀྱི་ལས་འགུལ་རྣམས་ཡག་པོ་ཡོང་གི་རེད་བསམ་པར་ངས་ཡིད་ཆེས་བྱེད་ཀྱི་ཡོད།

ལོ་ལྟར་ཕྱི་ཟླ་ ༦ ཚེས་ ༤ སྔ་ནུབ་ཏུ་དྲུག་བཞིར་དྲན་གསོ་བྱེད་པའི་ལས་འགུལ་སྤེལ་བ་མཐོང་སྐབས། རྒྱ་ནག་གི་ལོ་རྒྱུས་ཐོག་གུ་ཡངས་ཆེ་ཤོས་དང་བསམ་ཤེས་ཆེ་ཤོས། བོད་དོན་ཐོག་དངོས་ཐོག་བདེན་འཚོལ་གྱི་དགོངས་པ་བཞེས་མཁན་ཡིན་པའི་དབུ་ཁྲིད་ཞིང་གཤེགས་ཧུའུ་ཡའོ་པང་དང་། ཀྲའོ་ཙེ་ཡང་གཉིས་ངའི་ཡིད་ལ་འཁོར་གྱི་འདུག དྲུག་བཞིའི་གནམ་བདེ་སྒོ་མོའི་དོན་རྐྱེན་བྱུང་རྗེས་ཧྥ་རན་སིའི་རྒྱལ་ས་པའེ་རི་སིར་༧གོང་ས་མཆོག་ནས་པེ་ཅིན་དང་། དེ་མིན་རྒྱ་ནག་གི་ས་གནས་གང་ས་ནས་སྔ་རྗེས་སུ་འབྱོར་བའི་རྒྱ་རིགས་བཙན་བྱོལ་བ་མང་པོ་དང་ལྷན་དུ་མཇལ་འཛོམས་གནང་ཡོད་པ་དེ་ནི་བོད་རིགས་བཙན་བྱོལ་བ་དང་། རྒྱ་རིགས་བཙན་བྱོལ་བའི་བར་གྱི་འབྲེལ་ལམ་ཟབ་ཏུ་འགྲོ་མགོ་ཚུགས་པ་ཞིག་ཡིན། ཚང་མས་མཁྱེན་གསལ་ལྟར།  བོད་རིགས་ཀྱི་གནས་སྟངས་ཡིན་ནའང་འདྲ། རྒྱ་རིགས་ཀྱི་གནས་སྟངས་ཡིན་ནའང་འདྲ། ༧གོང་ས་མཆོག་ནི་ག་དུས་ཡིན་རུང་མི་མང་ཕྱོགས་སུ་བཞེངས་ཀྱི་ཡོད།

༧གོང་ས་མཆོག་ནས་ཐོག་མཐའ་བར་གསུམ་དུ་རྒྱ་ནག་འདི་བཞིན་འཛམ་གླིང་ཀུན་གྱིས་བརྩི་བཀུར་ཐོབ་པའི་སྟོབས་ཆེན་རྒྱལ་ཁབ་ཅིག་ཆགས་རྒྱུར་ཐུགས་རེ་ཆེན་པོ་གནང་གི་ཡོད། བོད་མི་མང་ལ་མིང་དོན་མཚུངས་པའི་རང་སྐྱོང་ཞིག་བྱུང་བ་ཡིན་ན། བོད་འདི་རྒྱ་ནག་ནས་ཁ་བྲལ་དུ་མ་སོང་བར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཁོངས་སུ་བསྡད་དེ། བོད་མི་རྣམས་ཀྱང་རྒྱ་ནག་མི་མང་དང་མཉམ་དུ་རང་དབང་དང་དམངས་གཙོ། ཁྲིམས་ལུགས་དབང་ཛིན་བཅས་ཀྱི་ལམ་ལུགས་དང་། དངོས་པོའི་ཡར་རྒྱས་ལོངས་སྤྱོད་བྱེད་རྒྱུ་ཡིན་ཞེས་ཡང་ཡང་བཀའ་གནང་གི་ཡོད།

མི་རབས་བརྗེ་པོ་ཐེབས་པ་དང་སྤྱི་ཚོགས་ཀྱང་འཕོ་འགྱུར་འགྲོ་བཞིན་ཡོད་ཀྱང་། བོད་པའི་གཞོན་སྐྱེས་མི་རབས་ཚོས་ ༡༩༥༩ ལོའི་ཟླ་ ༣ ཚེས་ ༡༠ ཉིན་གྱི་ལོ་རྒྱུས་དོན་ཆེན་དེ་བརྗེད་མེད་པ་དང་། ༡༩༨༩ ལོའི་ཟླ་ ༣ ཚེས་༨ ཉིན་བོད་ཀྱི་རྒྱལ་ས་ལྷ་སར་དྲག་གནོན་བྱས་པའི་ལོ་རྒྱུས་བརྗེད་མེད་ལ། ༢༠༠༨ ལོའི་ཟླ་ ༣ ཚེས་ ༡༤ ཉིན་བོད་ས་ཡོངས་ལ་དྲག་གནོན་བྱས་པའི་ལོ་རྒྱུས་དེ་བས་བརྗེད་མེད། རྒྱ་ནག་གི་གཞོན་སྐྱེས་མི་རབས་ཚོས་ ༡༩༨༩ ལོའི་དྲུག་བཞིའི་དོན་རྐྱེན་བརྗེད་མེད་པར་ངས་ཡིད་ཆེས་བྱེད་ཀྱི་ཡོད་ཅིང་། དོན་རྐྱེན་དེ་བརྗེད་ན་འགྲིག་གི་ཡང་མ་རེད། དེ་ནི་རྒྱ་ནག་གི་གཞོན་སྐྱེས་མི་རབས་ཚོར་ལོ་རྒྱུས་ཀྱིས་སྤྲད་པའི་ལས་འགན་རེད། ཅེས་སོགས་བརྗོད་ཡོད་འདུག