ཨ་རུ་ནཱ་ཅལ་ཁུལ་གྱི་བོད་མི་ཆིག་སྟོང་ཁེ་ན་ཌར་གཞིས་སྤོ་བྱེད་རྒྱུའི་ལས་གཞིའི་ཁྲོད་རིམ་པ་དང་པོའི་མི་ ༡༧ ཙམ་སང་ཉིན་གཏོང་རྒྱུ་ཡིན་པ་དང་། རིམ་པ་གཉིས་པ་དང་གསུམ་པ་སོགས་ཟླ་བ་རྗེས་མའི་ནང་གཏོང་ཐུབ་རྒྱུར་ཚོད་དཔག་གནང་གི་ཡོད་འདུག
ཕྱི་ལོ་ ༢༠༡༡ ཟླ་ ༩ པ་ནས་བཟུང་ཨ་རུ་ནཱ་ཅལ་མངའ་ཁུལ་གྱི་བོད་མི་ཆིག་སྟོང་ཁེ་ན་ཌར་གནས་སྤོའི་ལས་གཞི་ཞིག་མགོ་འཛུགས་བྱས་ཡོད་པ་ལྟར། ད་ལོའི་ལོ་མགོར་ཨ་རུ་ནཱ་ཅལ་གྱི་བོད་མིའི་གཞིས་ཆགས་ཁག་གསུམ་ནས་མི་ ༩༠༠ ཙམ་རྒྱན་བརྒྱབ་སྟེ་འདེམས་སྒྲུག་བྱས་ཡོད་པ་དང་། དེ་དག་ལས་མི་ ༢༠༤ ཙམ་གྱི་གཟུགས་པོར་བརྟད་དཔྱད་བརྒྱུད་མི་ ༡༧ ཙམ་གནས་སྤོ་རིམ་པ་དང་པོའི་ནང་ཚུད་དེ། ཟླ་འདིའི་ཚེས་ ༢༩ ལྡི་ལི་ནས་ཁ་ལམ་བརྒྱུད་ཁེ་ཎ་ཌར་གཞིས་སྤོ་བྱེད་རྒྱུ་ཡིན་པ་དང་། རིམ་པ་གཉིས་པ་དང་གསུམ་པ་ཟླ་བ་རྗེས་མའི་ནང་གཏོང་ཐུབ་རྒྱུར་ཚོད་དཔག་བྱེད་ཀྱི་ཡོད་འདུག
འདི་གའི་གསར་འགོད་པས་གོང་གནས་ཚུལ་སྐོར་ནང་སྲིད་དྲུང་ཆེ་བསོད་ནམས་སྟོབས་རྒྱལ་ལགས་སུ་བཅར་འདྲི་ཞུས་པར། ཁོང་གིས། “ ཨ་རུ་ནཱ་ཅལ་ཁུལ་གྱི་མི་ཆིག་སྟོང་ཁེ་ན་ཌར་གནས་སྤོ་བྱེད་རྒྱུ་ཡིན་པ་ཚང་མས་མཁྱེན་གསལ་རེད། མི་ཆིག་སྟོང་ལས་ ༩༠༠ ཙམ་ང་ཚོས་རྒྱན་བརྒྱབ་སྟེ་བདམས་ཚར་བ་རེད། དེ་དག་ལས་མི་ ༢༠༤ ཙམ་ལ་ད་ལོའི་ཕྱི་ཟླ་ ༥ པའི་ནང་ལྡི་ལིར་གཟུགས་པོ་བརྟག་དཔྱད་གཏོང་གི་ཡོང་དགོས་ཀྱང་། ནང་སྲིད་ལས་ཁུངས་ཀྱིས་རེ་སྐུལ་ཞུས་པ་ལྟར་ཁེ་ན་ཌའི་གཞུང་ཚབ་ཀྱི་མི་སྣ་གཉིས་ཡར་ས་གནས་སུ་ཕེབས་ཏེ་བརྟག་དཔྱད་དང་བཅར་འདྲི་སོགས་བྱས་ཏེ། རིམ་པ་དང་པོའི་ནང་མི་ ༡༧ ཙམ་ཟླ་བ་འདིའི་ཚེས་ ༢༩ ཉིན་གཏོང་རྒྱུ་གཏན་ཁེལ་ཡོད་པ་རེད ” ཅེས་བརྗོད་བྱུང་།
ཡང་ཁོང་ལ་ད་རེབ་མི་ ༡༧ ཙམ་ལས་མེད་པའི་རྒྱུ་མཚན་གང་ཡིན་དང་འཕྲོད་བསྟེན་བརྟག་དཔྱད་སྐབས་ནད་གཞི་གཙོ་བོ་གང་དག་འཐོན་ཡོད་མེད་དྲིས་པར། “ ད་རེབ་མི་ ༡༧ ཙམ་ལས་གཏོང་མ་ཐུབ་པ་དེ་ཕར་ཕྱོགས་ནས་རོགས་པ་བྱེད་མཁན་དང་གོ་སྒྲིག་སོགས་ཀྱི་ཐོག་དཀའ་ངལ་འཕྲད་ཀྱི་ཡོད་པ་རེད། ཐོག་མ་རིམ་པ་དང་པོའི་ནང་མི་ཉི་ཤུ་རྩ་གྲངས་ཤིག་གཏོང་རྒྱུའི་འཆར་གཞི་ཡོད་ཀྱང་། མི་ཁག་ཅིག་ལ་འཕྲོད་བསྟེན་བརྟག་དཔྱད་ཐོག་ནས་འགོག་རྐྱེན་འཕྲད་དེ་ད་རེབ་དངོས་སུ་གཏོང་ཐུབ་པ་ཁྱིམ་ཚང་ཁ་ཤས་དང་མི་ཧྲང་ཧྲང་ཁག་ཅིག་བཅས་ཁྱོན་མི་ ༡༧ ཡོད་པ་རེད” ཅེས་དང་། “ ནད་གཞི་གཙོ་བོ་གློ་ནད་དང་གྲུམ་བུ་དེ་འདྲ་རེད། དེ་ཚོར་འགྲོ་ཆོག་གི་མ་རེད་ལབ་ཡོད་པ་མ་རེད། དུས་ཚོད་ངེས་ཅན་ཞིག་སྤྲད་དེ་སྨན་བཅོས་བྱེད་དགོས་པ་དང་། རྗེས་སུ་བསྐྱར་དུ་བརྟག་དཔྱད་བཏང་སྟེ་ན་ཚ་མེད་ན་རིམ་པའི་གནས་སྤོ་བྱེད་ཆོག་གི་རེད། གཞན་བརྟག་དཔྱད་སྐབས་འཛམ་གླིང་ཐོག་ཞེད་སྣང་ཆེན་པོ་བྱེད་དགོས་པའི་ཨེ་ཙི་སོགས་ད་སྔ་འཐོན་མ་སོང་།” ཞེས་བརྗོད་སོང་།
ཐོག་མ་ཁེ་ན་ཌར་གནས་སྤོ་བྱེད་མཁན་གཅིག་ལ་ཕར་ནས་སྦྱིན་བདག་མི་ལྔ་འཚོལ་དགོས་པ་དང་དེ་དག་ལས་གཅིག་བོད་པ་ཡིན་དགོས་པ་སོགས་ཀྱི་ཆ་རྐྱེན་བཞག་ཡོད་པ་དེ་གང་འདྲ་ཆགས་ཡོད་མེད་དང་། དེ་དག་གི་རོགས་རམ་དུས་ཡུན་ག་ཚོད་ཡིན་མིན་དྲིས་པར། ཁོང་གིས། “ སྤྱིར་བཏང་ཕར་འགྲོ་མཁན་གཅིག་ལ་མི་ལྔའི་སྦྱིན་བདག་དགོས་ཟེར་གྱི་ཡོད་ཀྱང་། དེའི་ནང་མི་གཅིག་ངེས་པར་དུ་བོད་པ་ཡིན་དགོས་ཟེར་བ་དེ་འདྲ་ཡོད་པ་མ་རེད། སྦྱིན་བདག་བྱེད་པའི་ཆ་རྐྱེན་ཚང་ན་ལྔ་ཆ་བོད་པ་ཡིན་ནའང་འགྲིག་གི་རེད། ཁྲིམས་ལུགས་གཞིར་བཟུང་ཁོ་རང་གི་དངུལ་ཁང་འཛིན་བྱང་ཐོག་ཉུང་མཐར་ཁེ་ན་ཌའི་སྒོར་མོ་ཁྲི་གཉིས་ཡོད་དགོས་པ་དང་། སོ་སོ་རང་བདག་གི་སྡོད་ས་དང་ལས་ཀ་བྱེད་ཆོག་པའི་ཡིག་ཆ་སོགས་སྟོན་རྒྱུ་ཡོད་དགོས་པ་རེད། སྦྱིན་བདག་གི་དུས་ཡུན་དེ་ད་ལྟ་བཤད་ཐུབ་ཀྱི་མི་འདུག ཕར་ནས་སྡོད་ས་དང་ལས་ཀ་འགྲིག་ཚར་བ་ཡིན་ན་སྦྱིན་བདག་ཀྱང་མཚམས་ཆད་འགྲོ་བ་རེད་བསམ་གྱི་འདུག” ཅེས་བརྗོད་བྱུང་།
ཡང་ཁོང་ལ་ད་རེབ་འཕར་འགྲོ་མཁན་ཚོའི་འགྲོ་སོང་ཇི་ལྟར་གཏོང་གི་ཡོད་མེད་དྲིས་པར། “ཕར་ཚུར་གནམ་གྲུའི་གླ་ཆ་དང་དྲི་བ་དྲིས་ལན་སྐབས་ཀྱི་འགྲོ་སོང་སོགས་སྒེར་ངོས་ནས་གཏོང་ཐུབ་མཁན་ཡིན་ན་སྒེར་གྱིས་གཏོང་གི་ཡོད་པ་རེད། གཏོང་མ་ཐུབ་མཁན་ཚོས་ཁེ་ན་ཌའི་གཞུང་ལ་བུ་ལོན་གནང་རོགས་ཞེས་ཞུས་པ་ཡིན་ན། ཁེ་ན་ཌའི་གཞུང་གིས་བུ་ལོན་གནང་བའི་ལམ་སྲོལ་འདུག དེར་བརྟེན་ཉུང་ཤས་ཤིག་གིས་འགྲོ་སོང་རང་ངོས་ནས་གཏོང་གི་འདུག མང་ཆེ་བས་བུ་ལོན་གཡར་རོགས་ཞུ་བཞིན་འདུག” ཅེས་བརྗོད་བྱུང་།
ཁོང་ལ་རིམ་པ་གཉིས་པ་གསུམ་པ་ག་དུས་གཏོང་རྒྱུ་དྲིས་པར། “ རིམ་པ་གཉིས་པ་དེ་ཟླ་བ་ ༡༢ པའི་ཚེ་ཤར་དང་རིམ་པ་གསུམ་པ་ཟླ་མཇུག དེ་ནས་ལོ་རྗེས་མའི་ཟླ་བ་དང་པོ་བཅས་ལ་རིམ་པ་བཞིན་གཏོང་རྒྱུ་དང་། ༢༠༡༦ ལོའི་ཟླ་ ༤ ཡས་མས་ལ་མི་ཆིག་སྟོང་དེ་ཕར་བཏང་ཚར་དགོས་ཀྱི་ཡོད་པ་རེད” ཅེས་བརྗོད་བྱུང་།
གཞིས་སྤོ་གནང་མཁན་ཚོར་ཁེ་ན་ཌའི་མི་སེར་ཐོབ་ཐང་ག་དུས་རག་མིན་དྲིས་པར། ཁོང་གིས། “ད་ཐེངས་བོད་མི་གནས་སྤོར་བྱེད་མཁན་ཚོར་མཚོན་ན་གཞུང་འབྲེལ་ཡིན་སྟབས། ཁོ་ཚོ་ཁེ་ཎ་ཌའི་ནང་བསླེབས་ཏེ་ཟླ་གཅིག་གཉིས་ནང་ལག་དེབ་ལྗང་ཁུ་ (Green Card) རག་འགྲོ་བ་རེད། དེའི་ཐོག་ནས་ལས་ཀ་བྱེད་པ་དང་ཕར་ཚུར་འགྲུལ་བཞུད་སོགས་བྱེད་ཆོག་གི་ཡོད་པ་རེད། ཁེ་ན་ཌའི་མི་སེར་ཆགས་པ་ལ་དེ་སྔོན་ཡིན་ན་ལོ་ ༢ འགོར་གྱི་ཡོད་ཅིང་། ཕྱིས་སུ་ལོ་གཅིག་འཕར་སྣོན་བྱས་ཏེ་ལོ་ ༣ གྱི་མཚམས་སུ་གཞི་ནས་མི་སེར་ཆགས་རྒྱུའི་སྔོན་བརྡ་ཞིག་འབྱོར་གྱི་ཡོད་པ་དང་། སྔོན་བརྡ་དེའི་ནང་བཅར་འདྲིའི་དུས་ཚོད་ཅིག་སྤྲད་ཡོད་པ་རེད། དྲི་བ་དྲིས་ལན་དེར་ཡིག་རྒྱུགས་འཕྲོད་པ་ཡིན་ན། ཟླ་བ་གཉིས་གསུམ་རྗེས་ལ་རྒྱལ་ཁབ་ཀྱི་སེར་ཁས་ལེན་དམ་བཅའ་ཞིག་འབུལ་དགོས་ཀྱི་ཡོད་པ་དང་། དེའི་རྗེས་ཀྱི་ཟླ་བ་གཅིག་ཡས་མས་ནང་མི་སེར་ལག་འཁྱེར་དེ་རག་འགྲོ་བ་རེད” ཅེས་བརྗོད་སོང་།
མཇུག་ཏུ་ཁོང་ལ་ད་རེབ་ཕར་འགྲོ་མཁན་ཚོ་ན་ཚོད་དང་སློབ་སྦྱོང་སོགས་མི་སྒེར་གྱི་གནས་སྟངས་གང་འདྲ་ཡོད་པ་དྲིས་པར་ཁོང་གིས། “ཐོག་མའི་ང་ཚོའི་འཆར་གཞིར་རིམ་པ་དང་པོའི་ནང་སློབ་སྦྱོང་དང་ཕྱོགས་གང་ཐད་ནས་གང་འཚམ་ཡག་པོ་ཡོད་མཁན་རྐྱང་གཏོང་ཐུབ་པ་ཡིན་ན། ཕར་ཕྱོགས་ནས་ཀྱང་ང་ཚོའི་རྒྱལ་ཁབ་ནང་བླངས་པའི་མི་དེ་ཚོར་སློབ་སྦྱོང་དང་ལས་ཀ་ཡག་པོ་བྱེད་ཐུབ་མཁན་རེད་བསམ་པ་ཡོང་གི་རེད། དེ་ལྟར་བྱུང་ན་མ་འོངས་པར་ཡང་མི་ཆིག་སྟོང་ཉིས་སྟོང་བསྐྱར་དུ་གཏོང་ཐུབ་པར་རེ་བ་ཡོད་སྲིད་པ་རེད་ཅེས་བསམ་བློ་བཏང་པ་རེད ”ཅེས་བརྗོད་བྱུང་།
གཞིས་སྤོ་རིམ་པ་དང་པོ་དེ་ཁེ་ཎ་ཌའི་གྲོང་ཁྱེར་ཌོ་རོན་ཌོན་( Toronton)དང་ཝན་ཀོ་ཝར་ (Vancauver)། ཨོ་ཊ་ཝ་ (Ottawa) བཅས་སུ་གཏོང་རྒྱུ་ཡིན་ཞིང་། ད་ལྟ་་ཁེ་ཎ་ཌའི་ནང་བོད་མི་ ༦༠༠༠ ཙམ་གནས་སྡོད་བྱེད་བཞིན་ཡོད་འདུག ༡༩༧༢ ལོར་ཁེ་ན་ཌ་གཞུང་གིས་རྒྱ་གར་བྱང་ཕྱོགས་སུ་གཞིས་ཆགས་པའི་བོད་རིགས་ ༢༣༠ སྐྱབས་བཅོལ་དུ་བླངས་ཡོད་འདུག
གསར་འགོད་པ། ལྷ་སྐྱབས་རྒྱལ།
གསར་འབྱོར་འགྲོ་དགོས་ན་ཌྲ་ལོམང་པོ་སྤྲད་ནས་འགྲོ་ཡང་ན་ཆབ་སྲིད་བཙུན་ཟུར་དང་ཆབ་སྲིད་བཙོན་ཟུར་རྫུན་མ་བྱེད་ཐབས་བྱེད་ནས་འགྲོ་ན་མ་གཏོགས་གོ་སྐབས་མི་འདུག་ག
གང་མགྱོགས་གནང་རོགས།
གཞིས་ཆགས་མི་མང་གི་དཀའ་ངལ་ལབ་དུས། ཕྱི་རྒྱལ་ལ་བཏང་ཞག་ན་སེལ་འགྲོ་ཡ་ཅིག་གེ་མ་རེད་ཝ། དངོས་ནས་བྱས་ན་ཕྱི་རྒྱལ་ལ་བཏང་ཡ་འདི་བུ་གུར་ཅི་རིལ་སྤྲད་ནས་སྒོར་ཕུད་པ་དང་འདྲ་བོ་འདུག་གཱ དངོས་ནས་དཀའ་ངལ་སེལ་ཡ་ཡིན། མི་མང་དེ་གེ་དེ་ལ་རྩ་དོན་ལ་སེམས་ཁུར་ཡོད་པ་ཞིག སོ་སོའི་ཆོས་དང་རིག་གཞུང་ལ་ཤ་ཞེན་ཡོད་པ་ཞིག་བཟོ་དགོས་པ་མ་རེད་དམ། སོ་སོའི་བུ་གུ་བོད་པ་ཆ་ཚང་ཞིག་བཟོ་རྒྱུའི་སེམས་ཤུགས་ཡོད་པ་ཞིག་ཆགས་ཐུབ་ན་གཞི་ནས་དཀའ་ངལ་ཚང་མ་སེལ་གི་རེད་ཝ། དེ་མིན་ཕྱི་རྒྱལ་ལ་བཏང་ནས་བསྡད་ཡ་དེས་རྩ་བ་ནས་ཁུངས་འཁྱོལ་གི་མ་རེད་ལ། རྒྱ་གར་ནང་གི་སྒྲིག་འཛུགས་བརྟན་པོ་གནས་མ་ཐུབ་ཡ་གི་རྐྱེན་གཅིག་དང། བོད་ནང་གི་བོད་མི་ཚཽའི་ཡིད་ཆེས་བརླག་ཡ་ཅིག་ཆགས་སྲིད་པ་རེད་གདའ།། གཟབ་གཟབ་བྱས་ན་མ་གཏོགས།། དཔོན་པོ་ཚོས་ས་སོས་ཁེ་ཕན་དང་འོས་ཤོག་ཆེད་ལས་ཀ་བྱས་ན་ག་བ་ཡོང་གི་རེད།།
བློ་བཟང་སེང་གེས་གཞིས་ཆགས་ཀྱི་མི་མང་སྐྱོ་པོ་ཚོའི་ཨམ་འཇོག་དཀྲོགས་ཡ་གི་བཀའ་མོལ་གནང་སྟེ། ཕྱི་རྒྱལ་ལ་བཏང་གི་ཡིན་རབ། སྒྲོ་ལོ་མང་པོ་རག་ཡོད་རབ་བཤད་ནས། མདོ་དོན་གཞིས་ཆགས་མི་མང་ལ་མཐཽང་ཆུང་དང་གནས་ཚད་དམའ་པོ་ཞེ་པོ་ཅིག་མཐོང་གི་ཡོད་པ་དེ་ཁྱད་མཚར་རེད། གཞིས་ཆགས་ཟེར་པ་འདི་དེ་འདྲ་ཞིག་ཡིན་ན་དངོས་གནས་ཐབས་སྐྱོ་པོ་རེད།་ གཞུང་ཞབས་ཚོའང་དེ་འདྲ་རེད། ལྟོ་རག་ན་འགྲིག་བསྡད་པའི་ཟོལ་འདྲ་པོ་ཞིག་འདུག་གཱ སོ་སོས་རང་འགུལ་གྱིས་འཁུར་བླངས་ནས་ཅིག་བྱས་ཡ་མི་འདུག་གཱ དངོས་གནས་འདི་འདྲ་ཡིན་ན། ང་ཚོས་མ་འོངས་པར་གཞིས་ཆགས་མི་མང་ཚཽའི་གྲོད་ཁོག་མ་ཁེབས་པར་དཀའ་ལས་འཕྲད་ས་རེད། བློ་བཟང་སེང་གེ་ལགས་ཀྱིས་མགྱོགས་པོར་སྐུ་ངལ་མ་གསོས་དུས་ཞེ་དྲག་དཀའ་ལས་ཁག་ས་རེད། སྤྱི་ཡོངས་ནས་སྤུས་ཚད་སྡུར་རུ་སྡུག་རུ་འགྲོ་གི་འདུག
བཀའ་ཤག་གིས་གཟབ་གཟབ་མ་བྱས་ཚེ་ལས་གཞི་འདི་རྦོ་ལུགས་རྒྱུའི་ཉེན་ཁ་ཏན་ཏན་འདུག ལས་གཞི་འདི་ཐོག་མར་སྤྱི་ལོ་ ༢༠༡༡ ཟླ་ ༩ ་པའི་ནང་ལ་མགོ་འཛུགས་བྱས་པ་རེད། ལོ་གཉིས་ལྷག་རིང་ལ་མི་ ༡༧ ་གཞི་ནས་གཏོང་ཐུབ་པ་བྱུང་བ་རེད། ལས་གཞི་འདི་ལོ་ ༥ ་ཡི་འཆར་གཞི་ཞིག་རེད། སྤྱི་ལོ་ ༢༠༡༦ ་ཟླ་བ་ ༤ ་པའི་ནང་ལ་ལས་གཞི་འདུ་སྒོ་རྒྱག་དགོས་པ་རེད།
དེ་ནས་ནང་སྲིད་དྲུང་ཆེ་མཆོག་གིས་མ་འོངས་པར་ཡང་མི་ཆིག་སྟོང་ཉིས་སྟོང་གཏོང་ཐུབ་པའི་རེ་བ་ཡོད་པ་རེད་ཟེར་འདི་ལ་རྗེས་སུ་ཡི་རངས་ཡོད་འདིའི་ཕྱོགས་ལ་མུ་མཐུད་ཤུགས་བསྐྱོན་གནང་རོགས།
མི་རྗེ་སྲིད་སྐྱོང་མཆོག་གི་མཛད་རྗེས་ལ་བཀྲིན་བླ་མེད་དུ་ཆེ་ཞུ་རྒྱུ་ཡིན་གང་ལ་ཟེར་ལ་ལས་གཞི་འདི་སྔོན་མ་ནས་ཡོད་ཀྱང་ཕྱི་ནང་འགོག་རྐྱེན་དུ་མ་ལས་བརྟེན་ནས་ད་བར་ལུས་པ་གསལ་པོ་རེད།
ཁེ་ན་དྲ་ནི་རྒྱ་དམར་ལ་མགོ་བོ་མི་ཞུམ་མཁན་རྒྱལ་ཁབ་རེད་དེ། ཡིནའང་འཛམ་གླིང་ཚོང་འབྲེལ་ལ་བརྟེན་དགོས་པ་བརྟེན་ལས་སླ་པོ་ཞིག་ག་ནས་ཡོང་། ངས་བལྟས་ན་སྣང་བ་སྐྱིད་པོ་བྱེད་འདོད་མཁན་གཅིག་ཡིན་ཚེ་ཁོང་རང་གླ་ཕོགས་ཆེ་ཐག་གཅོད་ལེན་ནས་ནུབ་ཕྱོགས་སུ་ཆེད་ལས་གནང་ན་འགྲིག་མཁན་ཞིག་རེད། ་་་་་་་་
བློ་བཟང་སེང་གེ་ལགས། ད་ངོ་ཚ། འོས་ཤོག་དང་མིང་གྲགས་ཀྱི་དོན་དུ་དེ་འདྲ་རང་ད་མ་གནང། ཇོ་རུ་ཚེ་རིང་གིས་བཤད་པ་ལྟར། ལོ་ལྔའི་ནང་མི ༡༠༠༠ གཏོང་གི་ཡིན་ན། ལོ་གཉིས་དང་ཕྱེད་ཀར་མི ༡༧ ལས་གཏོང་མ་ཐུབ་པ་འདི་ཅི་རེད། ད་ཁྱེད་བློ་བཟང་སེང་གེ་ཟེར་བའི་མི་འདི། དངོས་གནས་སྣང་བ་སྐྱིད་པོ་ཞེ་དྲག་ཡོད་ས་རེད།།
གནས་སྤོ་ལས་གཞི་འདི་མགོ་བཙུགས་ནས་ཧ་ལམ་ལོ་གཉིས་ལྷག་འདས་ཟིན། དེ་སྔ་ཕྱིར་བསྒྲགས་བྱས་པ་ལྟར་ན་ལས་གཞི་འདི་ལོ་ལྔའི་ནང་མཇུག་བསྡུ་དགོས་པ་ཞིག་ཡིན་བསམ་སོང་། ལོ་གཉིས་ལྷག་གི་ནང་མི་ ༡༧ ལས་གཏོང་མ་ཐུབ་ན། མི་ ༡༠༠༠ དུས་བཅད་ནང་གཏོང་ཐུབ་མིན་ཐད་དོགས་པ་ཆེན་པོ་རེད།