རྐང་འཁོར་སྐོར་སྐྱོད་པ་རིན་པོ་ལགས་ངྷ་སར་འབྱོར་སོང་།

རྐང་འཁོར་སྐྱོར་སྐྱོད་པ་རིན་པོ་ལགས་དེ་རིང་བཞུགས་སྒར་ངྷ་རམ་ས་ལར་འབྱོར་ཏེ་ངྷ་ས་ཁུལ་གྱི་ཚོགས་པ་དང་མི་མང་ཚོས་ཕེབས་བསུའི་མཛད་སྒོ་ཚོགས་པའི་སྟེང་སྤྱི་འཐུས་ཚོགས་གཙོ་མཆོག་གིས་རིན་པོ་སོགས་བོད་མི་སྒེར་ངོས་ནས་བོད་དོན་ལས་འགུལ་སྤེལ་མཁན་ཚོར་བསྔགས་བརྗོད་གནང་སོང་།

དེ་རིང་ཉིན་རྒྱབ་ཆུ་ཚོད་ ༢།༣༠ སྟེང་། རྐང་འཁོར་བོད་དོན་ཞུ་གཏུག་སྐོར་སྐྱོད་པ་རིན་པོ་ལགས་བཞུགས་སྒར་ངྷ་རམ་ས་ལར་འབྱོར་ཏེ། བོད་ཀྱི་དགུ་བཅུ་གསུམ་ལས་འགུལ་ཚོགས་པ་དང་བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ། དེ་བཞིན་ངྷ་ས་ས་གནས་གཞོན་ནུ་དང་བུད་མེད་བཅས་ཀྱི་གོ་སྒྲིག་འོག ངྷ་ས་ཉིན་སློབ་རྩེད་ཐང་དུ་ཐེངས་འདིའི་ལས་འགུལ་མཇུག་བསྡོམས་ཀྱི་མཛད་སྒོ་ཞིག་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་བཅས་ཕེབས་ཏེ། ཚོགས་པ་སྐྱིད་སྡུག་ཁག་གི་སྐུ་ཚབ་དང་མི་མང་ཚོས་རིན་པོ་ལགས་སུ་ཕེབས་བསུའི་ཁ་བཏགས་སྒྲོན་འབུལ་ཞུས་སོང་།  

ཨ་རིར་གནས་སྡོད་རིན་པོ་ལགས་ཀྱིས། ད་ལོའི་གསུམ་བཅུའི་དུས་དྲན་ཉིན་ནས་བཟུང་བྷེལ་ཇམ་གྱི་རྒྱལ་ས་སྦར་སིལ་ནས་མགོ་བཙུགས་ཏེ་ཡུ་རོབ་རྒྱལ་ཁབ་ཁག་ ༡༣ ཙམ་བརྒྱུད་དེ། ཉི་ཧོང་དང་ཐའེ་ཝན། ཧོང་ཀོང་སོགས་ཨེ་ཤ་ཡའི་རྒྱལ་ཁབ་ ༥ ཙམ་ནང་འདས་པའི་ཟླ་ངོ་ ༨ དང་ཉིན་ ༢༠ ཙམ་རིང་ལྕགས་རྟ་སྐོར་སྐྱོད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་ཡོད་ཅིང་། ཉེ་ཆར་བལ་ཡུལ་ནང་སྐོར་སྐྱོད་གྲུབ་རྗེས་བོད་ནང་རང་ལུས་མེར་བསྲེགས་གནང་མཁན་ཚོའི་མཚན་གཞུང་བསྣམས་ཏེ་རྒྱ་གར་གྱི་གནས་ཆེན་ཁག་ལ་མཇལ་སྐོར་དང་རྒྱ་གར་ལྷོ་ཕྱོགས་ཁུལ་གྱི་གདན་ས་ཁག་དང་གཞིས་ཆགས་ཁག་བཅས་སུ་སྐོར་སྐྱོད་གནང་ཡོད།

དེ་རིང་གི་མཛད་སྒོའི་ཐོག་གཞུང་འབྲེལ་མིན་པའི་ཚོགས་པ་ལྔས་རིན་པོ་ལགས་ལ་ཕེབས་བསུ་ཞུ་དགོས་པའི་དམིགས་ཡུལ་སྐོར་ལ་དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་རྨེའུ་དཀོན་རྒྱམ་ལགས་ཀྱིས་བོད་དོན་ལས་འགུལ་བ་རིན་པོ་ལགས་ཀྱིས་ད་རེབ་ཙམ་མིན་པར་ ༢༠༠༠ ལོ་ནས་སྔ་ཕྱིར་བོད་དོན་ཁྱབ་བསྒྲགས་ཀྱི་ལས་འགུལ་ཐེངས་མང་སྤེལ་ཡོད་པ་དང་། ཐེངས་འདིར་ཟླ་ངོ་བརྒྱད་ལྷག་རིང་རྒྱལ་ཁབ་ ༡༨ ལྷག་གི་ནང་བོད་དོན་ཞུ་གཏུག་སྐོར་སྐྱོར་གནང་བའི་བློས་གཏོང་སྙིང་སྟོབས་སོགས་ལ་བསྔགས་བརྗོད་དང་རྗེས་སུ་ཡི་རངས་ཞུ་བཞིན་ཡོད་ཅེས་སོགས་བརྗོད་སོང་།

དེའི་རྗེས་བོད་དོན་ལས་འགུལ་བ་རིན་པོ་ལགས་ཀྱིས་བོད་མི་ཚང་མས་དམིགས་ཡུལ་གཅིག་གི་ཐོག་ནས་ལས་འགུལ་སྤེལ་གྱི་ཡོད་པ་དང་། ལྷག་པར་དུ་བོད་ནང་དཀའ་ངལ་ཆེན་པོ་ཡོད་པ་རྒྱལ་སྤྱིའི་ཐོག་གསལ་སྟོན་བཟོ་ཐབས་གནང་གི་ཡོད་པ་བཞིན་ཁོ་རང་སྒེར་ངོས་ནས་ཀྱང་བོད་པ་ཞིག་ཡིན་པའི་ལས་འགན་དེ་འཁྱེར་ནས་སྐོར་སྐྱོད་གནང་བ་ཡིན་སྐོར་བརྗོད་སོང་། རིན་པོ་ལགས་ཀྱིས་བརྗོད་དོན། “ ང་རང་བུ་ཕྲུག་གཉིས་ཀྱི་ཨ་ཕ་ཞིག་རེད། ད་ལྟ་ངའི་ཕྲུ་གུ་གཉིས་ཀྱི་ཨ་མ་ང་དང་མཉམ་དུ་མེད་ཀྱང་། ངས་གོ་སྐབས་འདི་བརྒྱུད་ནས་མོ་རང་གིས་བུ་ཕྲུག་གཉིས་ལ་ལྟ་སྐྱོང་གང་ལེགས་གནང་བའི་བཀའ་དྲིན་གྱིས་ང་རང་འདི་ལྟར་ཕྱིན་ཏེ་ལས་འགུལ་ལམ་ལྷོངས་ལྡན་པ་ཞིག་བྱུང་བ་དང་། གཉིས་པ་ས་གནས་གང་དུ་ཕྱིན་ཡང་བོད་རིགས་ཚོགས་པ་དང་བོད་དོན་རྒྱབ་སྐྱོར་བ། བོད་པ་དང་ཕྱི་རྒྱལ་བ་མི་སྒེར་མང་པོ་ཞིག་གི་ལམ་སྟོན་རྒྱབ་སྐྱོར་འོག་འདས་པའི་ཟླ་ངོ་ ༨ ལྷག་རིང་སྐོར་སྐྱོད་ཀྱིས་དེ་རིང་གཟུགས་པོ་ཐང་པོའི་ཐོག་ནས་འདིར་འབྱོར་ཐུབ་པ་བྱུང་བ་རེད། ངས་ཁོང་ཅག་ལ་སེམས་གཏིང་ནས་ཐུགས་རྗེ་ཆེ་ཞུ་རྒྱུ་དང་། དེ་རིང་འདིར་གཞུང་འབྲེལ་མ་ཡིན་པའི་ཚོགས་པ་ལྔ་དང་ཆོལ་ཁ་གསུམ་གྱི་སྐུ་ཚབ་ཚོས་རྒྱབ་སྐྱོར་གྱི་རྣམ་པའི་སྣེ་ལེན་གནང་བར་ཧ་ཅང་དགའ་བོ་བྱུང་། འདིས་ག་རེ་མཚོན་གྱི་ཡོད་པ་རེད་ཟེར་ན་ང་རང་མི་ཕལ་བ་ཞིག་ཡིན་ནའང་ང་རང་ཚོའི་བསམ་བློ་དང་འཐབ་རྩོད་གཅིག་པ་ཡིན་པ་དང་། དེ་ཡང་ཁ་ཙམ་མིན་པར་མཉམ་རུབ་དང་མཐུན་སྒྲིལ་ཡོད་པ་གསལ་བོ་མཚོན་གྱི་ཡོད” ཅེས་བརྗོད་སོང་།

ཁོང་གིས་མུ་མཐུད་དུ་བརྗོད་དོན། “ ངས་ད་སྔ་བོད་དོན་ལས་འགུལ་ཞིག་སྤེལ་བ་དེ་ངས་ཞེ་དྲག་ཅིག་འཇོན་སོང་ཟེར་གྱི་མེད་ལ་དེ་ལྟར་བསམ་པ་ཡང་ཡིད་ན་མེད། ངས་ཐོག་མ་རང་ཉིད་ལ་དྲི་བ་དྲིས་ཏེ་སོ་སོ་ངོས་ནས་ག་རེ་བྱེད་ཐུབ་པ་དང་འཇོན་གྱི་འདུག དེའི་སྐོར་ལ་བསམ་བློ་མང་པོ་བཏང་པ་ཡིན། མི་སུ་ཞིག་ཡིན་ཡང་སོ་སོས་ངོས་ནས་ག་རེ་བྱེད་ཐུབ་པ་དང་ག་རེ་འཇོན་གྱི་འདུག་དེ་ལ་རན་པོ་ཞིག་བྱེད་དགོས་པ་གལ་ཆེན་པོ་རེད། ངས་གཅིག་བྱེད་ཀྱི་ཡོད་པ་དེ་ཁྱེད་རང་ཚོས་ཀྱང་མ་བྱས་ན་ཡག་པོ་མ་རེད་རྩ་བ་ནས་ཞུ་ཡི་མེད། གཙོ་བོ་སོ་སོས་སོ་སོར་དྲི་བ་བཏང་ནས་བོད་དོན་སྒྲུབ་རྒྱུ་གལ་ཆེན་པོ་རེད་བསམ་གྱི་འདུག” ཅེས་བརྗོད་སོང་།

སྐུ་མགྲོན་གཙོ་བོ་སྤྱི་འཐུས་ཚོགས་གཙོ་མཆོག་གིས་གསུང་བཤད་གནང་དོན། “རིན་པོ་ལགས་ཀྱིས་བོད་དོན་ལས་འགུལ་དེ་རིང་འདིར་མཇུག་བསྡུ་བའི་རྣམ་པ་ཙམ་རེད་མ་གཏོགས་ཁོ་རང་གི་མི་ཚེའི་ནང་བོད་བསྟན་སྲིད་མི་རིགས་ཆེད་ལས་ཀ་བྱེད་རྒྱུ་མཚམས་བཞག་ཡོད་པ་མ་རེད། ང་ཚོའི་འཐབ་རྩོད་འདི་ཆབ་སྲིད་རང་བཞིན་གྱི་འཐབ་རྩོད་ཅིག་རེད། འདི་ལ་གཅིག་ཅེ་ན་མི་ཐོག་མང་པོ་འགོར་སྲིད་ལ། གཅིག་ཅེ་ན་དུས་ཚོད་ཐུང་ཐུང་ནང་སེལ་སྲིད་པ་རེད། དངོས་ཡོད་གནས་ཚུལ་ཐོག་ང་ཚོས་རྒྱ་ནག་ལ་དྲག་པོས་འཛིང་ནས་བོད་དོན་སེལ་ཐུབ་ཡོད་པ་མ་རེད་ལ། རྒྱལ་ཁབ་གཞན་ཞིག་གིས་ང་ཚོའི་ཆེད་རྒྱ་ནག་ལ་དམག་བརྒྱབ་ནས་ང་ཚོར་རང་བཙན་དང་རང་སྐྱོང་བསྐྲུན་ཐབས་དེ་ལས་ཀྱང་མི་སྲིད་པ་ཞིག་རེད། གནས་སྟངས་དེའི་འོག་ནས་བོད་ནང་བོད་མི་སྐྱ་སེར་རྒན་དར་གཞོན་གསུམ་མང་པོ་ཞིག་གིས་སོ་སོའི་ཚེ་སྲོག་ཚུན་ཆད་བློས་བཏང་སྟེ་ཨུ་ཐུག་ཐབས་ཟད་ཀྱི་ལས་འགུལ་སྣ་ཚོགས་ཤིག་གནང་གི་ཡོད་པ་རེད།” ཅེས་དང་། ཁོང་གིས་མུ་མཐུད་དོན། “ སྤྱིར་རྒྱལ་སྤྱིའི་ཐོག་བོད་དོན་ཐོག་རྒྱབ་སྐྱོར་འཚོལ་དགོས་ཀྱི་ཡོད་ཀྱང་དེ་གལ་ཆེ་ཤོས་མ་རེད། གལ་ཆེས་ཤོས་དེ་ང་རང་ཚོས་ལས་འགུལ་སྤེལ་དགོས་པ་དེ་རེད། ལྷག་པར་དུ་བོད་ནང་གི་བོད་མི་ཚོ་ཡིན་ན་གནད་དོན་དེ་ཤེས་པའི་ཐོག་ནས་ལས་འགུལ་སྤེལ་གྱི་ཡོད་པ་རེད། ད་ལྟ་རིན་པོ་ལགས་ལྟ་བུའི་གང་ཟག་གཅིག་གིས་ལས་འགུལ་སྤེལ་བ་དེ་བོད་ནང་བློས་གཏོང་ག་རེ་བྱེད་ཀྱི་ཡོད་པ་དེ་སོ་སོར་དྲི་བ་བཏང་སྟེ་ལན་རག་པ་ཞིག་རེད། མ་འོངས་པར་ཁོང་གིས་འཆར་གཞི་བསྒྲིགས་ཏེ་ཨོ་སི་ཊོ་ལི་ཡ་དང་ནེའུ་ཛི་ལན་ཌི་སོགས་ཀྱི་ནང་ལས་འགུལ་སྤེལ་བར་ལམ་ལྷོངས་ཡོང་སྨོན་འདུན་ཞུ་བཞིན་ཡོད” ཅེས་གསུངས་སོང་།

སྤྱི་འཐུས་ཚོགས་གཙོ་མཆོག་གིས་གང་ཟག་སྒེར་བ་ཁག་ཅིག་གིས་ལས་འགུལ་སྤེལ་གྱི་ཡོད་པར་བསྔགས་བརྗོད་གནང་དོན། “ མི་སྒེར་གྱི་བོད་དོན་ལས་འགུལ་སྤེལ་བ་རིན་པོ་གཅིག་པོ་མ་རེད། དཔེར་ན། ང་ཚོའི་སྤྱི་ཚོགས་ནང་གླིང་ཚ་ཚེ་བརྟན་རྡོ་རྗེ་ལྟ་བུ་ཡིན་ན་ཁོང་གིས་ཀྱང་ནང་མི་ཚང་མ་བློས་བཏང་ནས་གོམ་པ་བརྒྱབ་སྟེ་བོད་ཀྱི་ས་མཚམས་བར་ཕྱིན་པ་རེད། ད་ལྟའི་ཆར་ཁོ་རང་གང་དུ་ཡོད་མེད་དང་ཤི་གསོན་གནས་སྟངས་མ་ཤེས་པར་ལྷག་བསྡད་ཡོད། ད་ལྟའི་གནས་སྟངས་ལ་བལྟས་ན་ཕལ་ཆེར་ཁོ་རང་བོད་ཀྱི་ས་ཁུལ་ནང་བསླེབས་ཏེ་དཀའ་ངལ་ཞེ་དྲག་མྱོང་གི་མེད་ན་བསམ་པ་དྲན་གྱི་འདུག གང་ཡིན་ཟེར་ན། གལ་སྲིད་རྒྱ་གར་ནང་ཡོད་ན་རྒྱ་གར་སྐོར་སྲུང་བས་བཟུང་སྟེ་ཁྲིམས་ཁང་ལ་གཏུག་དགོས་པ་རེད་མ་གཏོགས་དོན་མེད་ཉར་བསྡད་ན་འགྲིག་གི་ཡོད་པ་མ་རེད། དེ་རིང་གི་གོ་སྐབས་འདི་དང་བསྟུན་ཏེ་མང་ཚོགས་ལ་དྲན་གསོ་ཞིག་བྱས་ན་ཕན་ཐོགས་མི་ཡོང་ངམ་བསམ་བྱུང་།

གཞན། སུད་སིའི་བློ་བརྟན་རྣམ་གླིང་ལགས་ཀྱིས་ཀྱང་སུད་སིའི་རྒྱལ་ས་ནས་ཇི་ནེ་ཝ་བར་བོད་ནང་དུ་རང་ལུག་མེར་བསྲེགས་མང་པོ་གནང་གི་ཡོད་སྟབས། ནམ་རྒྱུན་ནང་བཞིན་ལས་འགུལ་སྤེལ་བ་ཡིན་ན་མང་ཚོགས་ཀྱིས་དོ་སྣང་སླེབ་ཀྱི་མེད་དུས་གསར་གཏོད་ཀྱི་རྣམ་པས་རོ་སྒམ་དྲུད་དེ་ལས་འགུལ་སྤེལ་ཡོད་པ་རེད། ད་དུང་ཨ་རིའི་ནང་བོད་དོན་ཆེད་གོམ་བགྲོད་གནང་མཁན་མང་པོ་ཡོད” ཅེས་དང་། “ དེ་རིང་རིན་པོ་ལགས་འདིར་ཕེབས་ཏེ་ཁོ་རང་གི་ཉམས་མྱོང་མང་ཚོགས་ལ་བཤད་པ་ཧ་ཅང་ཡག་པོ་འདུག ལྷག་པར་དུ་གཞོན་སྐྱེས་ཚོར་ཡིད་འགུལ་ཐེབས་པའི་རེ་བ་ཁོ་རང་གིས་འདོད་ཀྱི་ཡོད་པ་རེད་ལ་ང་ཚོས་ཀྱང་ཕན་ཐོགས་ཆེན་པོ་ཡོང་གི་རེད་བསམ་གྱི་ཡོད། ད་ཐེངས་ཁོང་རང་འདིར་བསླེབས་པའི་ཞོར་དུ་བོད་ཕྲུག་ཁྱིམ་སྡེ་གཙོས་ངྷ་སའི་གཡས་གཡོན་གྱི་བསྟི་གནས་ཁག་ཏུ་ཉམས་མྱོང་གསུང་ཐུབ་ཚེ་ཕན་ཐོགས་ཡོང་གི་རེད། ངས་སྒྲིག་འཛུགས་ཁག་གི་འགན་འཁུར་མཁན་ཚོ་ལའང་ཞལ་པར་བཏང་ནས་འདི་འདྲའི་གོ་སྐབས་སྐྲུན་དགོས་ཀྱི་འདུག་ཅེས་ཞུ་རྒྱུ་ཡིན”  ཞེས་གསུངས་སོང་།

མཇུག་ཏུ་གསར་འགོད་པ་ཚོས་རིན་པོ་ལགས་སུ་དྲི་བ་དྲིས་ལན་འགའ་གནང་རྗེས་མཛད་སྒོ་མཇུག་བསྒྲིལ་སོང་།

གསར་འགོད་པ། ལྷ་སྐྱབས་རྒྱལ།