བཀའ་བློན་རྣམ་པ་ ༥ ཡུ་རོབ་ནང་ཕེབས།

བོད་པའི་བཀའ་བློན་རྣམ་པའི་སྤྲོ་བསང་ཆེན་མོ།

བཀའ་ཤག་སྔོན་མའི་སྐབས་གཞིས་ཆགས་སྲ་བརྟན་དང་ཤེས་ཡོན་སྲིད་བྱུས་སོགས་བོད་མིའི་དགོས་མཁོ་དང་ཕུགས་ཀྱི་ཁེ་ཕན་ལ་དམིགས་ནས་ལས་འཆར་རབ་དང་རིམ་པར་སྤེལ་ཡོད།
འོན་ཀྱང་སྐབས་འདིའི་བཀའ་ཤག་གི་ལས་འཆར་ཁག་ནི་མིག་རྒྱང་ཐུང་བ་དང་། ལོ་གཅིག་གཉིས་ནང་ངེས་པར་ཚར་དགོས་པ་ཤ་སྟག་རེད།
བཀའ་ཤག་སྐབས་འདི་པས་བྱ་ཐབས་གཅིག་དང་དམིགས་ཡུལ་གཅིག་རང་བཟུང་ཡོད། བྱ་ཐབས་ནི་ཁྱབ་བསྒྲགས་མང་ཙམ་བྱས་ནས་གཅིག་བྱེད་ཀྱི་འདུག་མདོག་མདོག་སྟོན་ཡས་དང་། དམིགས་ཡུལ་ནི་སྐབས་རྗེས་མར་བསྐྱར་དུ་འོས་ཐོབ་པ་བྱ་རྒྱུ་དེ་རེད།
དོན་དངོས་ཐོག་བཀའ་ཤག་སྐབས་འདི་པས་བོད་རྒྱ་ཞི་མོལ་ཐད་ལས་དོན་ག་རེ་བསྒྲུབ་ཡོད་དམ། ཤེས་ཡོན་ཡར་རྒྱས་ཆེད་ཕུགས་ཕན་གྱི་ལས་གཞི་ག་རེ་སྤེལ་ཡོད་དམ། བཙན་བྱོལ་གྱི་སྒྲིག་འཛུགས་སྲ་བརྟན་ཡོང་བར་ལས་འཆར་ག་རེ་སྤེལ་ཡོད་དམ།

མང་ཙམ་བཤད་པ་ལས་མང་ཙམ་བསྒྲུབ་དགོས་པ་དང་། མང་ཙམ་ཕེབས་པ་ལས་འགོ་འདོན་གཙོ་སྐྱོང་མང་ཙམ་གནང་ན་གལ་མི་ཆེའམ།

སྤྱིར་བཏང་བཀའ་བློན་རྣམ་པ་དང་ལས་ཀྱི་སྣེ་མོ་བ་ཚོ་ལས་ཁུངས་ནང་འཛུལ་མ་བསྡད་པར་ཕྱོགས་ཕེབས་གནང་རྒྱུ་གལ་ཆེན་པོ་རེད། འོན་ཀྱང་ཉེ་ལམ་སྐུ་ངོ་རྣམ་པ་ཕྱོགས་ཕེབས་དེ་ཏོག་ཙམ་གོ་སྒྲིག་ཡག་པོ་རང་བྱུང་མེད་པའི་རྣམ་པ་ཞིག་བྱུང་། ཡུ་རོབ་སྡོད་མཁན་བོད་མི་ཞིག་གི་བཤད་པ་ལྟར་ན། ཉེ་ལམ་བདུན་གཅིག་གཉིས་ནང་བཀའ་ཟུར་ཟམ་གདོང་རིན་པོ་ཆེ་དང་སྲིད་སྐྱོང་། དེ་ནས་བཀའ་བློན་ལྔ་སོགས་བསྟུད་མར་ཕེབས་ནས་ས་གནས་བོད་རིགས་ཚོགས་པའི་གོ་སྒྲིག་པ་ཚོ་ལའང་སྣེ་ལེན་གཅིག་རྗེས་གཉིས་མཐུད་བྱས་དགོས་པ་དང་། མི་མང་ཚོ་ཡང་བཀའ་སློབ་མང་དྲག་ནས་སུན་སྣང་གི་ཚོར་བ་བྱུང་ལུགས་སོགས་གོ་རྒྱུ་འདུག

སླད་ནས་ཕྱོགས་སྐྱོད་གནང་ན་གཅིག་རྗེས་གཉིས་མཐུད་མིན་པར་འཆར་གཞི་ལྡན་པ་ཞིག་གི་དགོས་འདུག དེ་མིན་ན་མི་མང་སྙོབས་སྣང་དང་གོ་སྒྲིག་པ་ཚོ་ཡང་སུན་སྣང་སྐྱེས་ངེས་རེད།

ཕྱོགས་ཕེབས་དང་འབྲེལ་བའི་གནད་དོན་དེ་ལས་གལ་ཆེ་བ་ཞིག་ནི་ད་ལྟ་སྐུ་ངོ་ཚོ་ཕེབས་སའི་ས་གནས་དེ་དག་གི་བོད་མི་དང་ཡུལ་མི། རྒྱལ་ཁབ་གང་གི་ཆ་ནས་དེ་དག་བོད་དོན་ལ་རྟག་ཏུ་གདུང་སེམས་མཉམ་བསྐྱེད་དང་རྒྱབ་སྐྱོར་ཡོད་ཡོད་པ་རེད་པ། ཡང་ནས་ཡང་དུ་མཇལ་རྒྱུ་གལ་ཆེན་པོ་ཡིན་ཀྱང་མང་དྲག་ན་ཞེ་སུན་སྐྱེད་སྲིད། དེ་ལས་ལྡོག་ཏེ་དཀྱིལ་ཤར་ཡུལ་ལུང་། ཨ་ཕི་རི་ཀ ལྷོ་ཨ་མི་རི་ཀ་དང་ལྷོ་ཤར་ཨེ་ཤི་ཡའི་ནང་བོད་དོན་རྒྱབ་སྐྱོར་དང་གདུང་སེམས་མཉམ་བསྐྱེད་ཀྱི་ལས་སྐུལ་སྤེལ་ཐུབ་ན་ཕན་འབྲས་ཆེ་བར་མཐོང་།

གཅིག་བྱས་ན་ཡུལ་ལུང་འདི་ཚོའི་ནང་མཐུན་རྐྱེན་ཞན་པ་དང་སྣེ་ལེན་མེད་པས་ཟ་རྒྱུ་འདུག་གནས་ལ་སྐྲག་ནས་སྐུ་ངོ་ཚོ་ཕེབས་རྒྱུར་འཛེམས་སོན་བྱེད་ཀྱི་ཡོད་པ་ལྟ་བུའི་སྣང་བ་ཞིག་བྱུང་གི་འདུག ང་ཚོ་རང་བཙན་ནི་རྩོད་ཀྱི་མེད་པས་ངེས་པར་དུ་ལུང་པ་དེ་དག་གིས་གདུང་སེམས་མཉམ་བསྐྱེད་བྱེད་དང་བྱེད་བསམ་གྱི་འདུག