ཁ་སང་ཨ་མདོ་རྨ་ཆུའི་ཆུ་ཁ་མ་ཡུལ་ཚོའི་རང་ལོ་ ༣༠ ཡིན་པའི་དཀོན་མཆོག་ཚེ་བརྟན་ཞུ་བ་ཞིག་རྔ་པ་རྫོང་དམེ་རུ་མ་ཡུལ་ཚོའི་ཁྲོམ་གཞུང་དུ་རང་ལུས་མེར་བསྲེགས་གནང་ཡོད་འདུག
ཁ་སང་ཕྱི་ཚེས་ ༤ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༥ ཡས་མས་ལ། ཨ་མདོ་རྔ་པ་ཁུལ་རྔ་པ་རྫོང་དམེ་རུ་མ་ཡུལ་ཚོའི་ཁྲོམ་གཞུང་དུ་དཀོན་མཆོག་ཚེ་བརྟེན་ཞུ་བ་ཞིག་གིས། རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་བཏང་ཡོད་པ་དང་། སྐབས་དེར་ཁོང་གི་ལུས་སྟེང་དུ་མེ་འབར་བཞིན་དུ་ “རྒྱལ་བ་བསྟན་འཛིན་རྒྱ་མཚོ་ཁྲི་ལོར་བརྟན་པར་ཤོག རྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་དགོས། བོད་མི་གཞིས་བྱེས་མཉམ་འཛོམས་ཡོང་དགོས” ཞེས་སྐད་འབོད་གནང་བཞིན་ཡར་རྒྱུག་མར་རྒྱུག་བྱས་རྗེས་སར་འགྱེལ་ཡོད་འདུག
ངྷ་སར་གནས་བཞུགས་ཆབ་སྲིད་བཙོན་ཟུར་ལྷ་མོ་སྐྱབས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། གནས་ཚུལ་བྱུང་མ་ཐག་རྒྱ་གཞུང་ཉེན་རྟོག་པ་དང་དམག་མི་བསླེབས་ཏེ་ཁོང་བཙན་འཁྱེར་བྱས་སྐབས། ས་གནས་བོད་མི་ཚོས་བཀག་འགོག་བྱས་པར་བརྟེན་ཡུལ་མི་དང་ཉེན་རྟོག་པའི་བར་རྩོད་རྙོག་བྱུང་སྟེ། ས་གནས་བོད་མི་འགའ་འཛིན་བཟུང་བྱས་ཡོད་པ་དང་། མཐར་ཉེན་རྟོག་པས་ཁོང་བཙན་འཁྱེར་བྱས་ཡོད་པ་མ་ཟད། རྒྱལ་གཅེས་དཔའ་བོ་དཀོན་མཆོག་ཚེ་བརྟན་ལགས་ཀྱི་ཆུང་མ་ནམ་སྣང་ལགས་དང་གཉེན་འབྲེལ་འགའ་ཞིག་ཀྱང་འཛིན་བཟུང་བཙན་འཁྲིད་བྱས་ཡོད་འདུག
དེ་རིང་ནས་བཟུང་དམེ་རུ་མ་ཡུལ་ཚོའི་ཐོག་གི་ཚོང་ཁང་དང་ཟ་ཁང་ཚང་མ་སྒོ་རྒྱག་ཏུ་བཅུག་ཡོད་པ་མ་ཟད། སྲང་ལམ་དུ་ཁ་པར་རྒྱག་མཁན་རྣམས་ཀྱི་ཁ་པར་ཡང་བཙན་འཕྲོག་བྱས་ཏེ་དམ་དྲག་ཆེན་པོ་བྱེད་བཞིན་ཡོད་སྟབས། ད་ལྟའི་ཆར་ཁོང་ཤི་གསོན་གང་ཡིན་དང་ཁྱིམ་མིའི་གནས་སྟངས་སོགས་གསལ་བོ་ཤེས་རྟོགས་བྱུང་མི་འདུག
གནས་
རྒྱལ་གཅེས་དཔའ་བོ་དཀོན་མཆོག་ཚེ་བརྟན་ལགས་ནི་ཀན་སུའུ་ཞིང་ཆེན་ཀན་ལྷོ་ཁུལ་རྨ་ཆུ་རྫོང་ཆུ་ཁ་མ་ཡུལ་ཚོ་རྒྱུ་ལག་རུ་ཆེན་ནས་ཡིན་པ་དང་། ཁོང་གི་ཕ་མིང་ལ་བསམ་ཁོ་དང་ཨ་མ་མིང་ལ་འོ་དགའ། ཆུང་མའི་མིང་ལ་ནམ་སྣང་ཟེར་ཞིང་། ཁོ་མོ་རང་ལོ་ ༢༨ ཡིན་འདུག ཁོང་བཟའ་མི་གཉིས་ལ་བུ་གཉིས་ཡོད་པ་ལས། ཆེ་བ་ཕྱག་རྡོར་སྐྱབས་ལོ་ ༤ དང་། ཆུང་བ་དཔལ་རྩལ་སྐྱབས་ལོ་ ༣ ཡིན་འདུག
གསར་འགོད་པ། པདྨ་མཚོ།
ངས་འདི་བཞིན་བསམ་བློ་བཏང་ཡོང་དུས། ཤི་བོ་རྣམས་འདི་ལྟར་མུ་མཐུད་དེ་ཤི་འགྲོ་བཞིན་འདུག་ཅིང་། གསོན་པོ་རྣམས་ཀྱིས་ཤི་བོ་དག་གི་རེ་འདུན་དེ་རྣ་རྒྱབ་ཀྱི་བསེར་བུ་ལྟ་བུར་ཆགས་འདུག་པས། སྐད་མཚམས་འདི་ནས་བསམ་བློ་གནད་ལ་ཕབ་ནས་སྐད་ཆ་དྲང་མོ་ཞིག་མི་བཤད་ག་མེད་བྱུང་། འོན་ཀྱང་། སྐད་ཆ་འདི་བཤད་བདེ་བོ་ཞིག་གཏན་ནས་མ་རེད། རྒྱུ་མཚན་ནི། གལ་ཏེ་རང་ལུས་མེར་བསྲེགས་བྱས་པར་སྙིང་བོ་མི་འདུག་ཅེས་བཤད་པ་ཡིན་ན། རྒྱལ་གཅེས་དཔའ་བོ་༡༢༤ ལྷག་གི་རང་སྲོག་ཆུད་ཟོས་སུ་འགྲོ་བར་ཉན་ཁ་འདུག་པས། སྐད་ཆ་འདི་ཡང་བཤད་ཕོད་པ་ཞིག་མ་རེད། དེ་མིན་རང་ལུས་མེར་བསྲེགས་བྱས་ན་ཡག་རབས་བཤད་ན། དེ་ཡང་བཤད་བདེ་བོ་ཞིག་མ་རེད། རྒྱུ་མཚན་ནི། འདི་ལྟར་བོད་རིགས་སྤུན་ཟླ་མང་བོ་ཞིག་གིས་རང་སྲོག་ཆུད་ཟོས་སུ་འགྲོ་བཞིན་འདུག གང་ལྟར་ངས་ལྟས་ན། འདི་ལ་བཙན་བྱོལ་ནང་གི་ཚོགས་པ་ཁག་གཅིག་གིས་མར་མེའི་ཁྲོམ་སྐོར་ཙམ་བྱེད་ནས་འགྲིགས་ཐབས་མི་བྱེད་པར། བཙན་བྱོལ་གཞུང་ངོས་ནས་གནད་དུ་སྨིན་པའི་བྱ་འགུལ་ཞིག་ཅི་ནས་ཀྱང་སྤེལ་དགོས། དེ་མིན༸གོང་ས་མཆོག་ལྟ་བུའི་གནད་ཡོད་མི་སྣ་ཞིག་གིས་བོད་ནང་གི་རང་ལུས་མེར་བསྲེགས་གཏོང་མཁན་དག་ལ། དེ་ལྟར་མ་བྱེད་རོགས་ཞེས་བཀའ་སློབ་ནན་མོ་ཞིག་བསྩལ་དགོས་པར་སེམས། གལ་ཏེ་ང་འདི་བཞིན་གྲགས་འགུལ་གང་ཡང་མེད་པར་རོ་ཐོག་ལ་རོག་བརྩེགས་ནས་འགྲོ་རྒྱུ་ཡིན་ན། ནམ་ཞིག་གནས་སྟངས་འདི་ལག་པ་འཆངས་ས་མེད་ས་ཞིག་ཆགས་རྒྱུར་གདོད་མི་ཟ་བས་ན། ཛ་དྲག་གི་གནས་སྟངས་འདིའི་ཕྱོགས་ལ་ཀུན་གྱིས་སྣང་མེད་མི་བྱེད་པར་རིག་པ་བསྒྲིམས་པའི་དུས་ཚོད་རེད་ཅེས་ཞུ་འདོད་བྱུང་། བློ་བཟང་མདོ་བསྔགས་མིང་བས་རྡ་ས་ནས།
དཀོན་མཆོག་ཚེ་བརྟན་ལགས་སུ་གུས་འདུད་དང་སྨོན་ལམ་ཡོད་་་་་
རྒྱལ་གཅེས་དཔའ་བོ་དཀོན་མཆོག་ཚེ་བརྟན་ལགས་ལ་གདོང་ཤུགས་དྲག་པོས་གུས་འདུད་ཞུ། ཁྱེད་ཀྱི་རེ་བའི་འབོད་སྒྲ་ལྟར་བོད་གཞིས་བྱེས་མཉམ་འཛོམས་མགྱོགས་ནས་མྱུར་དུ་ཡོང་བར་ཤོག ཡིན་ནའང་རྒྱ་དམར་གཞུང་ལ་སྡུག་རྩུབ་ཧ་ཅང་ཆེ་ཞིང་སེམས་ཁོང་ཧ་ཅང་ནག་སྟབས། ད་དུང་ཁྱེད་དང་ཁྱེད་ལྟ་བུ་གྲངས་མེད་བྱུང་སྟེ་བོད་གཞིས་བྱེས་གཉིས་ནས་ཚེ་སྲོག་གི་འགྲོ་སོང་གྲངས་མེད་ཅིག་མ་བཏང་བར་ཡོང་ཐབས་མེད་པ་མིག་མཐོང་ལག་ཟིན་ཡིན་དུས་ད་དུང་བོད་གཞིས་བྱེས་གཉིས་ནས་ཧུར་སྐྱེད་གནང་སྟེ་ཞི་དྲག་གཉིས་ཐོག་ནས་འཐབ་རྩོད་མུ་མཐུད་ནས་གནང་རོགས་ཞེས་འབོད་སྐུལ་ཞུ་བཞིན་ཡོད།
བོད་ནང་གི་རྒྱལ་སྲས་བྱང་ཆུབ་སེམས་དཔའ་འདི་དག་ལ་གུས་འདུད་ཞུ། ང་ཚོ་བཙན་བྱོལ་ནས་གྲངས་ཀ་བགྲང་སྟེ་སྡོད་རྒྱུ་ཡིན་ནམ། བཀའ་བློན་རྣམ་པ་དང་སྤྱི་འཐུས་རྣམ་པའི་ཡུ་རོབ་ཁག་ཏུ་བོད་དོན་ཞུ་གཏུག་གི་མིང་ཐོག་ནས་སྤྲོ་འཁྱམ་བཏང་ནས་བསྡད་འདུག ད་དུང་སྤྱི་འཐུས་ནང་ཕྱི་རྒྱལ་ཁག་ཏུ་འགྲོ་རྒྱུར་རྩོད་རྙོག་ཅིག་ཀྱང་ཡོད་རབས་འདུག གལ་སྲིད་བཙན་བྱོལ་ནས་བོད་དོན་བསྒྲུབ་མི་ཐུབ་ན་བོད་ནང་ཁ་སངས་པོ་བྱེད་ཚད་རེད། བསམ་བཞིན་དུ་མེ་ནང་ལ་ལྕེབ་བཅུག་ན་ང་ཚོའི་ལས་རྒྱུ་འབྲས་ལ་འགྲོ་གི་མ་རེད།