ཨ་རིའི་སྲིད་འཛིན་གཞོན་པ་ཇོ་བྷ་ཌན་མཆོག་བདུན་ཕྲག་ཅིག་རིང་ཉི་ཧོང་དང་རྒྱ་ནག དེ་བཞིན་ལྷོ་ཁོ་རི་ཡ་ནང་གཟིགས་སྐོར་གྱིས་མཚོ་གླིང་སྐོར་གླེང་སློང་བྱ་རྒྱུ་ཡིན་འདུག
ཨ་རིའི་སྲིད་འཛིན་གཞོན་པ་སྐུ་ཞབས་ཇོ་བྷ་ཌན་(Joe Biden)ཟླ་འདིའི་ཚེས་ ༢ ཉིན་ནས་བཟུང་བདུན་ཕྲག་གཅིག་རིང་ཉི་ཧོང་དང་རྒྱ་ནག་ནང་སྐོར་སྐྱོད་གནང་མགོ་བཙུགས་ཡོད་ཅིང་། དེ་ནི་ཉེ་ཆར་རྒྱ་ནག་གིས་ཞི་བདེ་རྒྱ་མཚོའི་གླིང་ཕྲན་ཁུལ་དུ་མཁའ་ཐོག་སྲུང་སྐྱོབ་ཀྱི་དབྱེ་མཚམས་ཐིག་ཚད་ཕྱིར་བསྒྲགས་བྱས་པ་དེར་ཉི་ཧོང་དང་ལྷོ་ཁོ་རི་ཡ་གཙོས་རྒྱལ་ཁབ་ཁག་གིས་ངོས་ལེན་བྱས་མེད་པ་མ་ཟད། ཁོང་ཁྲོ་ཆེན་པོ་ལངས་ཏེ་མཚོ་ཁུལ་དུ་དམག་དཔུང་རྒྱ་སྐྱེད་ཀྱི་ཡོད་སྟབས་ཞི་བདེ་རྒྱ་མཚོའི་མངའ་ཁུལ་དུ་དམག་འཐབ་ཡོང་ཉེན་ཡོད་པ་དེ་ཞི་འཇགས་ཡོང་ཐབས་སུ་གྲོས་མོལ་གནང་འཆར་ཡོད་འདུག
སྲིད་འཛིན་གཞོན་པ་ཇོ་བྷ་ཌན་མཆོག་གིས་ཉི་ཧོང་ནང་གཟིགས་སྐོར་གྱིས་ཉི་ཧོང་གི་སྲིད་བློན་ཤིང་ཛོ་ཨ་བྷེ་(Shinzo Abe)ལགས་མཇལ་འཕྲད་གནང་སྟེ་མཚོ་གླིང་སྐོར་གླེང་སློང་དང་སྦྲགས་གསར་འགོད་གསལ་བསྒྲགས་ཤིག་སྤེལ་ཡོད་པའི་ནང་། ཉི་ཧོང་དང་རྒྱ་ནག་བར་གྱི་ཞི་བདེ་རྒྱ་མཚོའི་མཚོ་གླིང་རྩོད་རྙོག་དེ་ཕན་ཚུན་ལ་ཡིད་ཆེས་ཀྱི་ཐོག་ནས་གྲོས་མོལ་བརྒྱུད་སེལ་རྒྱུ་གལ་ཆེན་ཡིན་པ་དང་། ཨ་རིའི་གཞུང་གིས་ཉི་ཧོང་གིས་འཛིན་པའི་མཚོ་གླིང་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་སྐོར་སོགས་བརྗོད་ཡོད་འདུག
རྒྱ་ནག་གཞུང་འབྲེལ་དྲ་རྒྱ་ཁག་ཏུ་ཨ་རི་ཉི་ཧོང་གི་ཕྱོགས་སུ་ལངས་ཏེ་སྐད་ཆ་ཤོད་ཀྱི་ཡོད་པའི་སྐྱོན་བརྗོད་ཤུགས་ཆེན་བྱེད་ཀྱི་ཡོད་ཅིང་། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་གྷེན་ཡང་ཤིན་(GengYansheng)ལགས་ཀྱིས་ཀྱང་། ཨ་རིས་གཙོས་རྒྱལ་ཁབ་ཁག་གིས་རྒྱ་ནག་གིས་ཕྱིར་བསྒྲགས་བྱས་པའི་མཚོ་གླིང་མཁའ་ཐོག་སྲུང་སྐྱོབ་དབྱེ་མཚམས་ཐིག་ཚད་ལ་སྐྱོན་བརྗོད་བྱེད་ཀྱི་ཡོད་ཀྱང༌། རྒྱ་ནག་གིས་རང་གི་མངའ་ཁོངས་མཁའ་ཐོག་སྲུང་སྐྱོབ་ཀྱི་སྲིད་བྱུས་འཛིན་པའི་ཐོབ་ཐང་དང་དབང་ཚད་ཆ་ཚང་ཡོད་སྟབས། གཞན་གྱི་བཤད་སྤྱོད་དེ་དག་ལ་ངོས་ལེན་གང་ཡང་བྱེད་ཀྱི་མེད་ཅེས་སོགས་བརྗོད་འདུག
མིང་སྨོས་མེད་པའི་ཨ་རིའི་ཕོ་བྲང་དཀར་པོའི་མི་སྣ་ཞིག་གིས་རྒྱ་ནག་ནི་ཨ་རིའི་དཔལ་འབྱོར་འཕེལ་རྒྱས་ཡོང་ཐབས་ཐད་མེད་དུ་མི་རུང་བའི་རྒྱལ་ཁབ་ཅིག་ཡིན་སྟབས། ཇོ་བྷེ་ཌིན་གྱིས་ཐེངས་འདིར་རྒྱལ་ཁབ་ཀྱི་ཁེ་ཕན་གལ་ཆེར་བཟུང་སྟེ་རྒྱ་ནག་དང་མཉམ་དུ་འབྲེལ་ལམ་བཟང་དུ་གཏོང་ཐབས་བྱེད་པ་ལས་རྒྱལ་ཁབ་ཀྱི་ཁེ་ཕན་རྒྱབ་ཏུ་བསྐྱུར་ནས་ཞི་བདེ་རྒྱ་མཚོའི་མཚོ་གླིང་གི་རྩོད་རྙོག་ནང་འཛུལ་མི་རུང་སྐོར་བརྗོད་ཡོད་འདུག
རྒྱ་ནག་སྤྱི་ཚོགས་ཚན་རིག་སློབ་ཆེན་གྱི་ཨ་རིའི་སློབ་གསོ་ཚན་ཁག་གི་ཉམས་ཞིབ་པ་ཐའོ་ཝང་ཀྲོ་(Tao Wenzhao) ལགས་ཀྱིས། རྒྱ་ནག་གིས་ཞི་བདེ་རྒྱ་མཚོའི་གླིང་ཕྲན་ཁུལ་དུ་མཁའ་ཐོག་སྲུང་སྐྱོབ་ཀྱི་དབྱེ་མཚམས་ཐིག་ཚད་བཟོས་པར་ཨ་རིས་ངོས་ལེན་བྱས་མེད་པ་དེས་ཨ་རྒྱ་གཉིས་བར་གྱི་འབྲེལ་ལམ་ཐད་དོ་ཕོག་ཆེན་པོ་ཕྱིན་ཡོད་སྐོར་བརྗོད་འདུག
ད་ལྟ་ཇོ་བྷེ་ཌིན་རྒྱ་ནག་ནང་གཟིགས་སྐོར་གྱིས་རྒྱ་ནག་སྲིད་འཛིན་ཞི་ཅིན་ཕིན་དང་སྲིད་འཛིན་གཞོན་པ། དེ་བཞིན་སྲིད་བློན་ལེ་ཁཱ་ཅང་སོགས་གནད་ཡོད་མི་སྣ་ཁག་ཅིག་དང་ཐུག་འཕྲད་ཀྱིས་ཞི་བདེའི་རྒྱ་མཚོའི་ཁུལ་གྱི་གླིང་ཕྲན་གཙོ་བོར་གྱུར་བའི་གནད་དོན་ཁག་ཅིག་གི་ཐོག་གྲོས་མོལ་བྱ་རྒྱུ་ཡིན་འདུག
རྒྱ་ནག་དང་ཇ་ཕན་གྱི་གནས་ཚུལ་ཛ་དྲག་ཇེ་ཆེར་འགྲོ་བ་དང་མཉམ་དུ་ཇ་པན་དང་རྒྱ་གར་གཉིས་ཀྱི་འབྲེལ་བ་ཇེ་ལེགས་སུ་བཏང་སྟེ་རྒྱ་ནག་ལ་སེམས་ཚབ་སློང་གི་འདུག