ལྷོ་ཨ་ཧྥི་རི་ཁའི་རང་དབང་འཐབ་རྩོད་པ་དང་འཛམ་གླིང་ཞི་བདེ་གཟེངས་རྟགས་བཞེས་མྱོང་མཁན་མི་རིགས་ནག་པོའི་སྲིད་འཛིན་ཐོག་མ་ནེལ་སིན་མན་ཌ་ལཱ་ལ་མཆོག་ད་ནིང་སྐུ་གྲོངས་ཡོད་འདུག
རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། འདང་ནུབ་ས་གནས་ཀྱི་ཆུ་ཚོད་ ༨།༥༠ ཡས་མས་ལ་ལྷོ་ཨ་ཧྥི་རི་ཁའི་རང་དབང་འཐབ་རྩོད་པ་དང་མི་རིགས་ནག་པོའི་སྲིད་འཛིན་ཐོག་མ་ནེལ་སིན་མན་ཌ་ལཱ་(Nelson Mandela)མཆོག་ལ་གློ་ཚད་བསྐྱར་ལོག་གི་སྙུང་གཞིས་རྐྱེན་པས་ལྷོ་ཨ་ཧྥི་རི་ཁའི་(Johennesburg)གི་ཁོ་རང་གི་བཞུགས་གནས་སུ་སྐུ་གྲོངས་ཡོད་ཅིང་། ཁོང་སྐུ་གྲོངས་སྐབས་དགུང་གྲངས་ ༩༥ ལ་ཕེབས་ཡོད་འདུག
ཁོང་སྐུ་གྲོངས་པའི་གནས་ཚུལ་བྱུང་མ་ཐག་ཨ་རིའི་སྲིད་འཛིན་ཨོ་བྷ་མ་མཆོག་དང་དབྱིན་ཡུལ་གྱི་སྲིད་བློན། དེ་བཞིན་རྒྱ་གར་གྱི་སྲིད་འཛིན་དང་མཉམ་འབྲེལ་རྒྱལ་ཚོགས་དྲུང་ཆེ་སོགས་འཛམ་གླིང་རྒྱལ་ཁབ་ཁག་གི་དབུ་ཁྲིད་དང་གནད་ཡོད་མི་སྣ་མང་པོ་ཞིག་གིས་མྱ་ངན་ཞུ་ཚིག་ཕུལ་ཡོད་འདུག
བོད་མིའི་དབུ་ཁྲིད་༧གོང་ས་མཆོག་དང་ཐུགས་ཧ་ཅང་ཉེ་བོ་ཡོད་ཅིང་། ད་ལོའི་ཕྱི་ཟླ་ ༦ པའི་ནང་མན་ཌ་ལཱ་མཆོག་གི་སྐུའི་སྙུང་གཞི་ཇེ་སྡུག་ཏུ་ཕྱིན་སྐབས་༧གོང་ས་མཆོག་གིས་སྙུང་གཞི་དྲག་སྐྱེད་ཡོང་བའི་ཐུགས་སྨོན་གྱི་འཚམས་འཕྲིན་ཞིག་ཕུལ་ཡོད་པའི་ནང་། “ སྲིད་འཛིན་ཟུར་པ་མན་ཌ་ལ་མཆོག་སྐུ་ཁམས་བདེ་མིན་གྱི་གནས་ཚུལ་བྱུང་བ་དེ་ནི་ཧ་ཅང་བློ་ཕམ་བྱེད་དགོས་པའི་གནས་སྟངས་ཤིག་ཆགས་ཡོད། མི་ཚང་མས་ཁོང་མྱུར་དུ་དྲག་སྐྱེད་ཡོང་ཆེད་སྨོན་ལམ་འདེབས་བཞིན་ཡོད།” ཅེས་གསུངས་ཡོད་པ་རེད།
ནེལ་སིན་མན་ཌ་ལཱ་མཆོག་ནི་ཕྱི་ལོ་ ༡༩༡༨ ཟླ་ ༧ ཚེས་ ༡༨ ཉིན་ལྷོ་ཨ་ཧྥི་རི་ཀའི་ཤར་ཕྱོགས་ཀད་པུ་གྲོང་ཁྱེར་( Cape town)ཞེས་པར་སྐུ་འཁྲུངས་ཤིང་། ལྷོ་ཨ་ཧྥི་རི་ཀའི་ནང་མི་རིགས་དབྱེ་འབྱེད་ཀྱི་སྲིད་བྱུས་ལ་ཁ་གཏད་བཅགས་ཏེ་རྒྱུན་རིང་འཐབ་རྩོད་བྱས་སྟེ། སྔ་ཕྱིར་ལོ་ངོ་ ༢༧ རིང་བཙོན་ཁང་དུ་བཞུགས་མྱོང་ཡོད་པ་དང་། ༡༩༩༠ ལོར་གཞུང་གི་སྲིད་བྱུས་ལ་འགྱུར་བ་ཐེབས་ཏེ་ཁོང་གི་འཐབ་རྩོད་ལ་རྒྱལ་ཁ་ཐོབ་ཡོད། ༡༩༩༣ ལོར་འཛམ་གླིང་ཞི་བདེའི་གཟེངས་རྟགས་ཐོབ་ཡོད། ༡༩༩༤ ལོར་ལྷོ་ཨ་ཧྥི་རི་ཀའི་ལོ་རྒྱུས་ཐོག་གི་མི་རིགས་ནག་པོའི་སྲིད་འཛིན་ཐོག་མ་དེ་ཆགས་ཡོད་པ་དང་། ༡༩༩༩ ལོར་ལྷོ་ཨ་ཧྥི་རི་ཀའི་མགོ་ཁྲིད་ནས་རྒན་ཡོལ་ཞུས་ཡོད།
མྱ་ངན་གུས་འདུད་ཡོང་ཡོང་ཞུ།
གོ་ལ་ཧྲིལ་པོའི་མཚན་སྙན་ཅན་གྱི་ནང་ནས། མིང་དོན་མཚུངས་པ་དང་། གྲུབ་འབྲས་ཡོངས་སུ་ཐོབ་པའི་ལྷོ་ཨ་ཧྥི་རི་ཁའི་མི་རིགས་འཐབ་རྩོད་པ་ཆེན་པོ་ནེལ་སའུ་མན་ཌོར་ལ་མཆོག གླིང་ཆེན་ཨ་ཧྥི་རི་ཁའི་ཞིང་དུ་སྐྱེ་འགྲོ་སྤྱིའི་ལས་དོན་མ་ཚང་བ་མེད་པར་གྲུབ་ཟིན་ནས། ད་ཆར་སྐུ་ཚེའི་འདུ་བྱེད་སྟོང་པ་དེར་འཇིག་རྟེན་གྱི་འགྲོ་ལུགས་ལྟར། དྲང་བདེན་དང་བྱམས་བརྩེ། སྙིང་རྗེ་དང་གཞན་ཕན། མཛད་བཟང་དང་ལེགས་སྤྱོད་སོགས་ལ་མཐའ་གཅིག་ཏུ་འབུངས་པའི་སྐྱེ་བོ་ཡོངས་ཀྱི་ཚབ་བྱས་ནས། ཐོག་མར་མྱ་ངན་ཞུ། དེ་ནས་ཁྱེད་ཀྱི་མཛད་བཟང་དང་ལེགས་སྤྱོད། ཁ་ཞེ་གཉིས་མེད་ཀྱི་དྲང་བདེན་དང་བྱམས་བརྩེ། ལེགས་པར་སེམས་པའི་གཞན་ཕན་དང་སྙིང་རྗེ་སོགས་ལ་ཡིད་རངས་དང་བསྔགས་བརྗོད་ཞུ། ཡང་དེ་ནས་ཁྱེད་ཀྱི་ཚེ་གང་པོའི་མིང་དོན་མཚུངས་པའི་མི་རིགས་ཀྱི་གྲུབ་འབྲས་དང་བྱས་རྗེས་སོགས་ལ། ང་ཚོ་ཤར་ཕྱོགས་དང་དེང་རབས་ན་གཞོན་རྣམས་ཀྱིས་མིག་དཔེ་དང་། ཁྱེད་དང་ཁྱེད་ལྟ་བུའི་རླབས་ཆེན་གྱི་མི་སྣ། བྱམས་བརྩེའི་ལངས་ཕྱོགས་འཛིན་པའི་སྐྱེ་བོ་ཆེན་པོའི་རྗེས་སུ་འབྲངས་ནས། རང་ཉིད་ཀྱི་ལས་དོན་ཕྲ་མོ་ཚུན་ཆད་དང་། ཉིན་རེའི་སྤྱོད་ལམ་སོགས་ལ་བཟང་པོའི་ལེགས་བཅོས་བྱས་ནས། སྤྱི་ཚོགས་ལ་ཕན་བདེ་ཅི་ནུས་བསྒྲུབ་རྒྱུའི་དམ་བཅའ་བཅས།
འཛམ་གླིང་ཞི་བདེ་ལ་དགའ་ཞིང་མི་རིགས་ཀྱི་རང་དབང་དང་ཐོབ་ཐང་རྩོད་ལེན་པ་འཇིག་རྟེན་གྱི་བསམ་བློའི་དབུ་ཁྲིད་ཁོང་ལ་མྱ་ངན་གུས་འདུད་གྲངས་མེད་ཞུ།།
རང་དབང་འཐབ་རྩོད་གནང་མཁན་རླབས་ཆེན་གྱི་སྐྱེ་བུ་དམ་པ་ཞིག་སྐུ་གཤེགས་པར་མྱ་ངན་གུས་འདུད་ཞུ། __གཉན་པོ།
འཛམ་གླིང་ཐོག་གི་རླབས་ཆེན་གྱི་མི་སྣ་ཞིག་གི་ཉི་མ་ནུབ་རིར་ཡིབ་པར་གདུང་ཤུགས་དྲག་པོས་མྱ་ངན་གུས་འདུད་ཞུ།