པའོ་ཞི་ལེ་ལ་རྒྱ་ནག་གཞུང་གིས་ཉེས་འཛུགས་ཁྲིམས་བཤེར་རབས་དང་རིམ་པ་བྱས་པ་རྒྱལ་སྤྱིའི་བརྒྱུད་ལམ་ཁག་ཏུ་གླེང་སློང་ཆེན་པོ་བྱུང་བ་ཅུང་མར་འཇགས་བཞིན་པའི་སྐབས་འདིར། སླར་ཡང་རྒྱ་ནག་དབུས་ཆབ་སྲིད་སྡེ་ཚན་གྱི་རྒྱུན་ལས་ཟུར་པ་ཀྲུའུ་ཡཱོང་ཁང་ལ་ལྐོག་ཟ་རུལ་སུངས་ཀྱི་དོགས་གཞིའི་འོག་ཞིབ་བཤེར་བྱས་པའི་གནས་ཚུལ་ཞིག་མགོ་བརྩམས་ཡོད།
ཟླ་འདིའི་ཕྱི་ཚེས་ ༢ ཉིན་ཧོང་ཀོང་ཤིན་ཏོ་ཉིན་རེའི་ཚགས་པར་སྟེང་། པེ་ཅིན་སྲིད་གཞུང་གིས་ཁྲིམས་འཛིན་ལས་ཁུངས་རིམ་པའི་ལས་བྱེད་ཚོར་ཡིག་ཆ་གལ་ཆེན་ཞིག་བཀྲམས་ཡོད་པའི་ནང་། རྒྱ་ནག་དབུས་ཆབ་སྲིད་རྒྱུན་ལས་ཟུར་པ་ཀྲུའུ་ཡཱོང་ཁང་(Zhou Yongkang)གིས་དམར་ཤོག་ཚོགས་པའི་སྲིད་དབང་མགོ་རྟིང་སློག་རྩིས་དང་ལྐོག་ཟ་རུལ་སུངས་བྱས་པའི་ནག་ཉེས་འོག་ཟླ་འདིའི་ཚེས་ ༡ ཉིན་ནས་བཀག་ཉར་བྱས་ཚུལ་བཀོད་ཡོད་ཀྱང་། པེ་ཅིན་གཞུང་གིས་དེར་གསལ་བཤད་གང་ཡང་བྱས་མེད་པར་གསར་ལམ་ཁག་གི་གནས་ཚུལ་དེའི་སྐོར་བཀག་སྡོམ་བྱས་ཡོད། དེ་བཞིན། འདི་ལོའི་ཕྱི་ཟླ་ ༡༠ ཚེས་ ༢༡ ཉིན་ཀྲུང་དབྱང་བརྙན་འཕྲིན་ཁང་གི་དབྱིན་ཡིག་ཊི་ཊིར་(Twitter)སྟེང་། སྲིད་འཛིན་ཞི་ཅིན་ཕིན་གྱིས་བཀའ་བཏང་སྟེ་ཀྲུའུ་ཡཱོང་ཁང་ལ་ཆེད་དམིགས་ཞིབ་བཤེར་ཚོགས་ཆུང་ཞིག་འཛུགས་དགོས་ཚུལ་བརྗོད་ཡོད་པ་དང་། པེ་ཅིན་གྲོང་ཁྱེར་ཉེན་རྟོག་ལས་ཁུངས་ཀྱི་མགོ་ཁྲིད་གཞོན་པ་ཧྥོའུ་ཀྲིན་ཧྭ་ལ་ཀྲུའུ་ལ་རྟོག་ཞིབ་གཟབ་ནན་བྱེད་དགོས་པ་དང་། རྒྱ་ནག་དབུས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་མགོ་ཁྲིད་ཝང་ཅི་ཧྲན་ལ་སྤྱི་ཡོངས་ནས་ལྐོག་ཟ་རུལ་སུངས་ལ་རྒོལ་རྡུང་གཏོང་དགོས་པའི་ལས་འགན་སྤྲད་ཡོད་ཚུལ་སོགས་བཀོད་ཡོད་ཀྱང་། གནས་ཚུལ་དེ་སྤེལ་བའི་ཕྱི་ཉིན་ནག་བསུབ་བཏང་ཡོད་འདུག
རྒྱ་ནག་དམར་ཤོག་ཚོགས་པའི་ཚོགས་ཆེན་སྐབས་བཅོ་བརྒྱད་པ་གྲོལ་རྗེས་ཀྲུའུ་ཡཱོང་ཁང་ལ་ཞིབ་བཤེར་མགོ་འཛུགས་བྱས་ཡོད་ཅིང་། ཀྲུའུ་ཡི་ནང་མི་དང་དྲུང་ཡིག ཁོས་དེ་སྔོན་ལས་ཀ་བྱས་མྱོང་སའི་སི་ཁྲོན་རྡོ་སྣུམ་བཙོ་སྦྱང་བཟོ་གྲྭ་སོགས་ཀྱི་མགོ་ཁྲིད་རྣམས་སྔ་གཞུག་ཏུ་འཛིན་བཟུང་བྱས་ཡོད་པ་མ་ཟད། ཉེ་ཆར་ཀྲུའུ་ཡི་བུ་ཀྲུའུ་པིན་སེངྒ་ཕོར་ནས་པེ་ཅིན་དུ་ཁྲིད་དེ་བཀག་ཉར་གྱིས་ལྐོག་ཟ་རུལ་སུངས་ཀྱི་གྱོད་གཞི་ཞིག་ལ་ཞིབ་བཤེར་བྱེད་ཀྱི་ཡོད་པའི་གནས་ཚུལ་ཐོན་ཡོད།
བརྒྱུད་ལམ་ཁག་ཏུ་ཀྲུའུ་དང་ཀྲུའུ་ཚང་གི་ནག་ཉེས་མང་པོ་ཞིག་བགྲང་གི་ཡོད་པ་དག་ནི། ཕྱི་ལོ་ ༡༩༩༩ ནས་ ༢༠༠༢ བར་ཀྲུའུ་ཡིས་སི་ཁྲོན་ཞིང་ཆེན་དམར་ཤོག་དྲུང་ཆེའི་བྱས་སྐབས། སི་ཁྲོན་ཞིང་ཆེན་གྱི་སྤྱི་ཁྱབ་གཞོན་པ་ཟུར་པ་ཀོ་ཡཱོང་ཞང་ལ་ལྐོག་ཇུས་འཐེན་བཅུག་སྟེ་ཀྲུའུ་ཡི་ཁ་ལོ་བ་གཉིས་ཀྱིས་རླངས་འཁོར་བརྡབ་སྐྱོན་གྱི་བྱེད་ཐབས་སྤྱད་དེ་ཀྲུའུ་ཡི་སྐྱེས་དམན་རྐྱེན་ལམ་དུ་བཏང་ཡོད་པ་མ་ཟད། ཁ་ལོ་བ་གཉིས་ཀྱིས་བསམ་བཞིན་དུ་བུད་མེད་དེ་རྐྱེན་ལམ་དུ་བཏང་བ་ངོས་ལེན་བྱས་ཏེ་ལོ་ ༡༥ ནས་ ༢༠ བར་གྱི་བཙོན་འཇུག་ཁྲིམས་ཐག་བཅད་ཡོད་ཀྱང་ལོ་གསུམ་བཞི་ལས་མ་ཕྱིན་པར་བཙོན་གྲོལ་བཏང་སྟེ། གཅིག་སི་ཁྲོན་ཞིང་ཆེན་རླངས་འཁོར་ཁ་ལོ་བའི་རུ་ཁག་གི་འགན་འཛིན་གཞོན་པ་དང་། གཞན་དེ་ཧྲན་ཏུང་ཞིང་ཆེན་རྡོ་སྣུམ་བཙོ་སྦྱང་བཟོ་གྲྭའི་སྤྱི་ཁྱབ་གཞོན་པར་བསྐོ་བཞག་བྱས་ཡོད་འདུག ཆུང་མ་རྐྱེན་ལམ་དུ་ཕྱིན་མ་ཐག་ཀྲུའུ་ཡིས་རང་ཉིད་ལས་ལོ་ངོ་ ༢༨ གྱིས་ཆུང་བའི་ཀྲུང་དབྱང་བརྙན་འཕྲིན་ཁང་གི་མདོ་འཛིན་པ་དང་། རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་གྱི་ཆུང་མའི་ཚ་མོ་ཅཱ་ཞོ་ཡཱས་ལ་གཉེན་སྒྲིག་བྱས་ཏེ་ཅང་ཙེ་མེན་གྱི་ལག་རོགས་གཙོ་བོ་ཞིག་ཏུ་གྱུར་ཡོད་པ་དང་། བཟའ་ཟླ་རྐྱེན་ལམ་དུ་བཏང་བའི་གནད་དོན་དེའང་ཅང་ཙེ་མེན་གྱི་ཐབས་ཇུས་ཤིག་ཡིན་པར་ངོས་འཛིན་བྱེད་ཀྱི་ཡོད།
ཀྲུའུ་ཡཱོང་ཁང་སི་ཁྲོན་ཞིང་ཆེན་དམར་ཤོག་དྲུང་ཆེ་ཡིན་སྐབས། སི་ཁྲོན་ཞིང་ཆེན་ནི་རྒྱ་ནག་ནང་རྩ་རླུང་སྒོམ་སྒྲུབ་པ་དམར་གསོད་དྲག་གནོན་ཤུགས་ཆེ་ཤོས་དེ་ཡིན་པ་མ་ཟད། ༢༠༠༧ ལོར་ཁོ་བོ་རྒྱ་ནག་དབུས་ཆབ་སྲིད་ཨུ་ཡོན་ལྷན་ཁང་གི་རྒྱུན་ལས་སུ་བསྐོས་རྗེས། རྩ་རླུང་སྒོམ་སྒྲུབ་པར་སྔར་ལས་དྲག་གནོན་ཤུགས་ཆེ་རུ་བཏང་སྟེ་ ༢༠༡༢ ལོར་རྩ་རླུང་སྒོམ་སྒྲུབ་པར་དྲག་གནོན་ཆེད་རྒྱ་སྒོར་དུང་ཕྱུར་ ༧༠༡༨ བཏང་ཡོད། ན་ནིང་ཕྱི་ཟླ་ ༢ ཚེས་ ༦ ཉིན་ཝང་ལི་ཅིན་ཁྲིན་ཏུའུ་ཨ་རིའི་གཞུང་ཚབ་ཏུ་བྲོས་བྱོལ་སྐབས་པའོ་ཞི་ལེ་དང་ཀྲུའུ་ཡཱོང་ཁང་སོགས་ཅང་ཙེ་མིན་གྱི་ཕྱོགས་གཏོགས་ཚོས་ཆེད་དུ་རྩ་རླུང་སྒོམ་སྒྲུབ་པ་མང་པོ་དམར་གསོད་བྱས་པའི་གནས་ཚུལ་ཕྱིར་ཐོན་ཡོད་པ་མ་ཟད། ཀྲུའུ་ཡི་བུ་ཀྲུའུ་པིན་གྱིས་རྒྱ་སྒོར་ས་ཡ་ ༣ ལྷག་བཏང་སྟེ་རྩ་རླུང་སྒོམ་སྒྲུབ་པར་དུག་རྫས་ཚོད་ལྟ་བྱས་ཏེ་ངན་གསོད་དང་། རྩ་རླུང་སྒོམ་སྒྲུབ་པའི་སྙིང་དང་མཁལ་མ་སོགས་དོན་ལྔ་གསོན་བཀོག་བྱས་ཏེ་ཕྱིར་ཚོང་བྱས་པ་བརྒྱུད་ལམ་ཁག་ཏུ་ཐོན་ཡོད།
དམར་ཤོག་ཚོགས་པའི་སྲིད་དབང་མགོ་རྟིང་སློག་རྩིས་བྱས་པའི་ནག་ཉེས་སྐོར་ལ། ཀྲུའུ་དང་པའོ་ཞི་ལེ་གཉིས་མཉམ་འབྲེལ་ཐོག་ཅང་ཙེ་མེན་གྱི་ཁ་གཏད་ཚོགས་པའི་དཔོན་རིགས་ཞི་ཅིན་ཕིན་དང་ཝུན་ཅཱ་པའོ། ཧོའུ་ཀོ་ཆཱང་སོགས་ཀྱི་གསང་བའི་ཡིག་ཆ་འཚོལ་བསྡུ་དང་ཁ་པར་ལ་ལྐོག་ཉན་བྱས་ཏེ། ཁ་གཏད་ཤོག་ཁག་གི་སྲིད་དབང་མགོ་རྟིང་སློག་རྩིས་བྱས་པའི་ཡིག་ཆ་རྣམས་ཝང་ལི་ཅིན་གྱིས་ཁྲིན་ཏུའུ་ཨ་རིའི་གཞུང་ཚབ་ཁང་དུ་སྤྲད་ཡོད་སྟབས། སྔར་ལོའི་ཕྱི་ཟླ་ ༢ ཚེས་ ༡༤ ཉིན་ཞི་ཅིན་ཕིན་ཨ་རིར་སྐྱོད་སྐབས་ཨ་རིའི་གསར་ལམ་ཁག་ཏུ་ཐོན་ཡོད་པ་མ་ཟད། དེ་སྔོན་པའོ་ཡི་ཆུང་མ་ཀུའུ་ཁེ་ལའི་ལ་འདྲི་གཅོད་བྱེད་སྐབས། ཁོ་མོ་ཀྲུའུ་དང་པའོ་གཉིས་བར་ཀྱི་གསང་བའི་ལས་འཆར་དེའི་འབྲེལ་མཐུད་པ་ཡིན་པ་ངོས་ལེན་བྱས་ཡོད་འདུག
དེ་བཞིན། ཕྱི་ལོ་ ༢༠༠༢ ནས་ ༢༠༠༣ ལོའི་བར་ཀྲུའུ་ཡཱོང་ཁང་རྒྱ་ནག་དབུས་ཉེན་རྟོག་ཁང་གི་མགོ་ཁྲིད་དང་སྲིད་ཁྲིམས་ཨུ་ཡོན་ལྷན་ཁང་གི་མགོ་ཁྲིད་གཞོན་པ་ཡིན་སྐབས། རྒྱ་ནག་གི་ཉེས་དོན་ལོ་རེ་བཞིན་བརྒྱ་ཆ་ ༡༧ ནས་ ༢༢ བར་འཕར་ཡོད་པ་མ་ཟད། མི་མང་གིས་ཉེན་རྟོག་ལས་ཁུངས་ནི་ལྐོག་ཟ་རུལ་སུངས་མང་ཤོས་དང་གདུག་རྩུབ་ཆེ་ཤོས་ཀྱི་ལས་ཁུངས་ཤིག་ཏུ་ངོས་འཛིན་གྱིས་མི་མང་གཞུང་ལ་ཡིད་ཆད་བྱུང་བའི་ནག་ཉེས་སོགས་བགྲངས་འདུག
ཀྲུའུ་ཡིས་བུད་མེད་མང་པོར་ངན་འབྲེལ་བྱས་སྐོར་ལ། ༡༩༨༩ ནས་ ༡༩༩༠ ལོའི་བར་ཀྲུའུ་ཡིས་རྒྱ་ནག་དབུས་རང་བྱུང་སོལ་རླངས་ཚོང་གཉེར་ཁང་གི་སྤྱི་གཉེར་བའི་འགན་འཁུར་སྐབས། པའོ་ཞི་ལེ་ཡི་འབྲེལ་བ་བརྒྱུད་དེ་བརྙན་འཕྲིན་མདོ་འཛིན་པ་དང་གླུ་མ། གློག་བརྙན་འཁྲབ་སྟོན་པ་སོགས་ལ་ལྐོག་འབྲེལ་བྱས་པའི་བརྙན་ཐུང་ཕྱི་གྱར་ཡོད་སྟབས། མི་མང་གིས་‘བྱ་བརྒྱའི་རྒྱལ་པོ’ཞེས་འཕྱ་སྨོད་བྱས་ཡོད་པ་མ་ཟད། མགྲོན་ཁང་གི་ཞབས་ཞུ་མ་མང་པོར་བཙན་གཡེམ་བྱས་པའི་གནས་ཚུལ་ཐོན་ཡོད་པ་རེད།
ཀྲུའུ་ཚང་གིས་ལྐོག་ཟ་རུལ་སུངས་ཕོན་ཆེན་བྱས་པའི་དོགས་གཞིའི་སྐོར་ལ། གནད་དོན་མང་ཆེ་བ་སྔོན་ཆད་པའོ་ཞི་ལེ་ཡི་དབང་བསྒྱུར་འོག་ཡོད་པའི་ཁྲུང་ཆེན་གྲོང་ཁྱེར་དུ་བྱུང་ཡོད་པ་དང་། ཀྲུའུ་ཡི་བུ་ཀྲུའུ་པེན་གྱིས་ཁྲུང་ཆིན་གྲོང་ཁྱེར་ནས་རྒྱ་སྒོར་དུང་ཕྱུར་ ༤༢༠ ལྷག་གི་བཟོ་སྐྲུན་རྣམ་གྲངས་བདག་གཉེར་བྱས་ཡོད་པ་མ་ཟད། བཟོ་སྐྲུན་དངུལ་དངོས་ཀྱི་བཞི་ཆའི་གཅིག་ཀྲུའུ་པིན་མི་སྒེར་ལ་ཐོབ་ཡོད་པ་སོགས་པའོ་ཞི་ལེ་ཡི་དབང་ཤུགས་ལ་བརྟེན་ཏེ་ཁྱོན་རྒྱ་སྒོར་དུང་འཕྱུར་ ༢༠༠ ལྷག་གི་རྒྱུ་དངོས་ཧམ་བཟུང་བྱས་ཡོད་འདུག ཀྲུའུ་པིན་གྱིས་ཀན་སུའུ་དང་ཧྲན་ཞི། ལེའོ་ལིན་སོགས་ཀྱི་ཁྲིམས་འཛིན་ལས་དོན་ནང་འཛུལ་ཏེ་ཉེས་ཅན་འགེབ་སྲུང་ཆེད་ལྐོག་རྔན་བླངས་པ། དཔེར་ན། ཆེས་མཐོའི་མི་མང་ཁྲིམས་ཁང་གི་ཞིབ་བཤེར་ཡིག་ཆ་ཞིག་ཏུ། ཉེན་རྟོག་ཁང་གིས་དོགས་ཡོད་ཉེས་ཅན་ཞིག་ཆུ་ཁོལ་གྱིས་གསོན་སྲེག་བྱས་ཏེ་འདས་གྲོངས་སུ་གྱུར་བ་གསལ་བོ་བཀོད་ཡོད་ཀྱང་། འབྲེལ་ཡོད་ནས་ཀྲུའུ་པིན་ལ་རྒྱ་སྒོར་དུང་ཕྱུར་གཅིག་གི་ལྐོག་རྔན་སྤྲད་དེ་ཁྲིམས་ཆད་བཏང་མེད།
ལྐོག་ཟ་རུལ་སུངས་ཀྱི་འབྱུང་ཁུངས་གཞན་ཞིག་ནི། ཀྲུའུ་ཚང་གི་དཔལ་འབྱོར་གཙོ་གཉེར་བ་ཝོའུ་པིན་ད་ལོའི་ཕྱི་ཟླ་ ༨ པའི་ནང་ཕྱི་རྒྱལ་དུ་འབྲོ་རྩིས་བྱས་སྐབས་འཛིན་བཟུང་བྱས་ཡོད་པ་དང་། ཁོས་ཀྲུའུ་ཚང་གི་ཆེད་དུ་ལོ་རེར་རྒྱ་སྒོར་དུང་ཕྱུར་ ༢༧ ལྷག་གི་ཁེ་སྤོགས་ཡོད་པའི་ཧྲན་ཞི་ཞིང་ཆེན་ཡུའུ་ལིན་རྡོ་སྣུམ་བཟོ་གྲྭའི་སྣུམ་གཏེར་ལ་རྒྱ་སྒོར་ས་ཡ་ ༩༠ ཙམ་སྤྲད་དེ་ཉོས་ཡོད་པ་དང་། རྒྱ་སྒོར་དུང་ཕྱུར་ ༨༠ ལྷག་གི་ཁེ་ལས་རྣམ་གྲངས་ལ་རྒྱ་སྒོར་ས་ཡ་ ༤༠ ཙམ་སྤྲད་དེ་བདག་བཟུང་བྱས་པ་སོགས་རྒྱལ་ཁབ་ཀྱི་རྒྱུ་དངོས་དུང་ཕྱུར་མང་པོ་ཧམ་བཟུང་བྱས་ཡོད་འདུག
རྒྱ་ནག་གི་ཆབ་སྲིད་གནད་དོན་ཆེད་མཁས་པ་ཧོའུ་ཕེན་གྱིས། ཀྲུའུ་ཚང་གི་ལྐོག་ཟ་རུལ་སུངས་གནད་དོན་ཧ་ཅང་ཚབས་ཆེན་ཡིན་སྟབས། ཀྲུའུ་ལ་གནད་དོན་འབྱུང་རྒྱུ་ཡིན་པ་བརྒྱ་ཆ་བརྒྱ་ཡིན་ནའང་ཁོ་ལ་དངོས་སུ་ཁྲིམས་རྭ་ཚོགས་ཏེ་འདྲི་གཅོད་བྱ་རྒྱུ་ཡིན་ནམ། ཡང་ན་དམར་ཤོག་ཚོགས་པ་ནང་ཁུལ་ནས་ཐག་གཅོད་བྱ་རྒྱུ་གནད་འགག་ཆགས་ཡོད་པ་དང་། ཀྲུའུ་ཡཱོང་ཁང་ལ་ཐག་གཅོད་བྱ་རྒྱུ་ཡིན་མིན་དེ་ཞི་ཅིན་ཕིན་གྱི་ལྐོག་ཟ་རུལ་སུངས་ལ་རྒོལ་རྡུང་གཏོང་བའི་སྟ་རེ་དང་པོ་དེ་ཡིན་ལ། ད་ལྟ་སྟ་རེ་དེ་གཡུག་གི་ཡོད་སྟབས་ཀྲུའུ་ཡི་གནད་དོན་གང་འཚམ་ཐག་གཅོད་བྱུང་རྗེས་ཝུན་ཅཱ་པའོ་དང་དབུས་འཐབ་ཤོག་གཅིག་གྱུར་ཁང་གི་འགན་འཛིན་ལིན་ཅི་ཧྭ་གཉིས་ལ་ཐག་གཅོད་མི་བྱེད་ཐབས་མེད་ཡིན་ལ། གལ་སྲིད་ཞི་ཅིན་ཕིན་གྱིས་ཁོ་གསུམ་ཚར་གཅོད་བྱས་ཐུབ་པ་ཡིན་ན། ཞི་ཅིན་ཕིན་གྱི་སྟག་དང་སྦྲང་ནག་མཉམ་རྡུང་གི་སྲིད་བྱུས་ལ་མི་མང་གིས་གདེང་འཇོག་གསར་པ་ཞིག་འཐོབ་སྲིད་ཀྱང་། དམར་ཤོག་ཚོགས་པའི་མགོ་ཁྲིད་ཞི་ཅིན་ཕིན་སོགས་ཀྱིས་སེམས་ཐག་གཙང་བཅད་དང་དུས་ཡུན་ངེས་ཅན་ནང་ཕྱོགས་ཡོངས་ནས་གྲ་སྒྲིག་འཐུས་ཚང་བྱེད་དགོས་སྟབས། ད་ལྟའི་ཆར་ཀྲུའུ་ཡི་ཉེ་འཁོར་གྱི་འབྲེལ་ཡོད་རྣམས་གཅིག་རྗེས་གཉིས་མཐུད་ཀྱིས་འཛིན་བཟུང་བྱས་ཏེ་ཀྲུའུ་ལ་ཐག་གཅོད་བྱེད་པར་སྔོན་འགྲོ་སྒྲུབ་བཞིན་ཡོད་པ་རེད་ཅེས་སོགས་བརྗོད་འདུག
གསར་འགོད་པ། པདྨ་མཚོ།
་རུལ་སུངས་ལ་དགའ་བའི་མི་ངན་ཀྲུའུ་ཁོ་ཕོར་ཏོ་ཞིག་རེད་འདུག་་་་ཡཡ་ད་ཁོ་ལ་ལས་འབྲས་འཁོར་ཚོད་ཡིན་་་་བྱུང་ན་རྒྱལ་སྤྱིའི་ཁྲིམས་ལ་སཀྱེལ་ཐུབས་ན་ཅི་མ་རུང་་་ཡིན་ཡང་་་དེ་འདྲ་ཡོང་བ་ཁག་ཙམ་རེད་ད་ལྟའི་གནས་བབས་ལ་་་་
བོད་ཀྱི་དུས་བབ་ཚང་གི་གསར་འགྱུར་ལ་འགྱུར་བ་ཆེན་པོ་གཉིས་ཕྱིན་སོང་། གཅིག་དུས་བབ་ཚང་གི་གསར་འགྱུར་གྱི་ཁྱབ་ཁོངས་བརྒྱ་ཆེ་རུ་དང་དཔྱད་ཞིབ་ཀྱི་གཏོང་ཇེ་ཟབ་ཏུ་ཕྱིན་སོང་། འགྱུར་བ་གཉིས་པ་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་རུལ་སུངས་དང་ཐལ་ཆེ་འཐུས་ཤོར་གྱི་གནས་ཚུལ་རིགས་སྔོག་འདོན་དང་འཛེམ་སོན་སྤངས་ཏེ་ཁྱབ་བསྒྲགས་བྱེད་ཤུགས་ཆེ་རུ་འགྲོ་སོང་། རྩོམ་སྒྲིག་པ་དོན་གྲུབ་བཀྲ་ཤིས་ལགས་ཀྱི་བསམ་བློ་དང་འཆར་འགོད་ལ་བསྔགས་བརྗོད་ཡོད། སྔོན་མ་རྡ་རམ་ས་ལའི་ལས་འགུལ་ཁག་དང་སློབ་གྲྭ་དང་ཚོགས་པ་དེ་ཚོའི་མཛད་སྒོའི་སྐོར་ཙམ་ཡིན་ཡང་ད་ལྟ་གནས་ཚུལ་མཁོ་སྒྲུབ་དང་ནང་དོན་སྔོག་འདོན་གཉིས་ཐད་ནས་ཡར་རྒྱས་ཆེན་པོ་འགྲོ་བཞིན་པར་ང་རང་ཀློག་པ་པོ་ཞིག་གི་ངོས་ནས་གང་ཐུབ་ཀྱི་དངོས་ཤུགས་བརྒྱུད་གསུམ་ནས་རྒྱབ་སྐྱོར་ཡོད། མུ་མཐུད་ནས་ཤུགས་བསྐྱོན་གནང་རོགས།
ཞི་ཅིང་ཕིང་གིས་ར་གསོད་ལུག་འདར་དང་། སྟག་གསོད་སྦྲང་འཛིན་གྱིས་རྒྱ་ནག་རྒྱལ་ཡོངས་དང་། དེ་བཞིན་ཏང་སྲིད་དམག་གསུམ་གྱི་ལྐོག་ཟ་རུལ་སུངས་ཀྱི་བྱ་སྤྱོད་དང་འབྲེལ་བའི་གནད་དོན་ཐག་གཅོད་དང་ལས་འགུལ་ལ་མུ་མཐུད་ལྟ་ཞིབ་བྱ་འདོད་ཆེན་པོ་ཡོད་ལ། དེ་ལས་ཀྱང་གལ་བ་ཞིག་ལ་སྐབས་ ༡༨ པའི་ཀྲུའུ་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྐབས་ཀྱི་བཅོས་བསྒྱུར་དོན་ཚན་ ༦༠ གི་གནད་དོན་ལ་དེ་བས་ཀྱང་རྟོག་ཞིབ་བྱ་འདོད་ཆེན་པོ་ཡོད་པ་ནི་ངོ་མ་སྐོམ་པ་ཆུ་འདོད་ཀྱི་དཔེ་དང་ཡོངས་སུ་མཚུངས།
བོད་ཀྱི་དུས་བབ་ཚང་གིས་དེང་སང་རྒྱ་ནག་ཕྱོགས་ཀྱི་གནས་བབ་དང་འགྱུར་ལྡོག་གི་སྐོར་ལ་སྔར་ལྷག་དོ་སྣང་དང་ཐུགས་འཁུར་གནང་བར་བཀའ་དྲིན་ཆེ་ཞུ་རྒྱུ་དང་ཆབས་ཅིག་ཏུ། ད་དུང་སྔར་ལྷག་གི་འབད་བརྩོན་བརྒྱུད་རྒྱ་ནག་གི་ཆབ་དཔལ་རིག་གསུམ་དང་། ཏང་སྲིད་དམག་གསུམ་གྱི་མངོན་ལྐོག་གི་གལ་ཆེའི་གནས་ཚུལ་དང་འགྱུར་ལྡོག་རྣམས་དུས་ཐོག་རྒྱ་ཆེའི་ཀློག་པ་པོ་རྣམས་ལ་འབུལ་ཐུབ་ཚེ། དེ་ནི་བོད་དོན་འཐབ་རྩོད་ཀྱི་ལས་རིམ་ཁྲོད་དུ་ཤིན་ཏུ་གལ་གནད་ཆེ་ཞིང་དོན་སྙིང་ལྡན་པའི་བྱ་གཞག་ཅིག་ཡིན་པར་སེམས།
གསར་འགྱུར་ཡག་པོ་སྤེལ་འདུག རྒྱ་ནག་དབུས་གཞུང་ནང་ཁུལ་གྱི་གནས་ཚུལ་རིགས་གང་ཐུབ་ཐུབ་ཀྱིས་སྔོག་འདོན་ཁྱབ་སྤེལ་བྱ་རྒྱུ་གལ་ཆེན་པོ་ཞེ་དྲག་རེད། གསར་འགྱུར་གང་ཞིག་ཡིན་ནའང་ཞིབ་ཚགས་མོས་བྲིས་ཏེ་ཁ་གསལ་བོ་བཟོས་པ་ཡིན་ན་ཧ་ཅང་ཀློག་སྤྲོ་བོ་འདུག བོད་ཀྱི་དུས་བབ་ཚང་གིས་མི་སྣ་གལ་ཆེན་ཁག་གི་གཏམ་བཤད་ག་ཚོད་རྒྱས་རྒྱས་ཡིག་ཐོག་ལ་ཕབ་སྟེ་སྤེལ་གནང་གི་ཡོད་པ་དེར་ང་རང་ལ་མཚོན་ནའང་དགའ་བོ་ཞེ་དྲག་ཡོད། ཆབ་སྲིད་མི་སྣ་གལ་ཆེན་ཙམ་མིན་པར་ཤེས་ཡོན་པ་དང་མི་སྣ་དམིགས་བསལ་ཅན་དག་གི་གཏམ་བཤད་དང་བཅར་འདྲི་སོགས་ཀྱང་ལུང་འདྲེན་ཙམ་མ་ཡིན་པར་ཞིབ་ཚགས་བཀོད་པ་ཡིན་ན་དེའི་ནང་གནས་ཚུལ་མང་པོ་ཞིག་གསལ་བོ་ཆགས་ཐུབ་པ་མ་ཟད་ཀློག་མཁན་ཚོར་བློ་བསྐྱེད་བསྟེར་ཐུབ་པའི་གནས་ཚུལ་ཡང་མང་དག་ཅིག་འདུག
གསར་འགོད་པ་པདྨ་མཚོ་ལགས་སུ་ཐུགས་རྗེ་ཆེ། དངོས་གནས་གསར་འགྱུར་ཚད་ལྡན་རྐྱང་སྤེལ་བཞིན་འདུག མུ་མཐུད་གསར་འགྱུར་ལས་རིགས་ལ་སློབ་སྦྱོང་ཤུགས་སྣོན་རྒྱག་རོགས།
གསར་འགྱུར་ཧ་ཅང་གི་ཡག་པོ་བྲིས་གནང་འདུག གསར་འགོད་པ་པདྨ་མཚོ་ལགས་ཐུགས་རྗེ་ཆེ། ང་ཚོར་འདི་ལྟ་བའི་གསར་འགྱུར་གལ་ཆེན་པོ་རེད། ནམ་རྒྱུན་རྡ་རམ་ས་ལའི་གཞུང་འབྲེལ་མ་ཡིན་པའི་ཚོགས་པ་དེ་ཚོའི་མར་མེ་ཁྲོམ་སྐོར་ཙམ་ལས་རྒྱ་ནག་དབུས་གཞུང་ནང་ལོགས་ཀྱི་གནས་ཚུལ་ཁག་ལ་དབྱེ་ཞིབ་བྱས་པའི་གསར་འགྱུར་རིགས་སྤེལ་རྒྱུ་གལ་ཆེན་པོ་རེད། ང་རང་གིས་ནམ་རྒྱུན་བོད་ཀྱི་དུས་བབ་ཚགས་ཤོག་ལ་ཁྱད་ཆོས་མ་འདྲ་བ་ཞིག་ཡོད་པ་ནི་གསར་འགྱུར་གང་ཞིག་བཀོད་ཀྱང་དེ་གནས་ཚུལ་ངོ་སྤྲོད་གནང་བ་ཙམ་མ་ཡིན་པར་དེ་ལ་རྒྱུ་ཆ་མང་པོ་བསྡུ་རུབ་བྱས་ཏེ་དབྱེ་ཞིབ་རང་བཞིན་གྱི་གསར་འགྱུར་ཞིབ་ཚགས་མོ་འབྲི་གནང་གི་ཡོད་པ་དེ་རེད། དེ་ནས་མི་སྣ་གལ་ཆེན་ཁག་གི་གཏམ་བཤད་གནང་བ་ཁག་ཇི་མ་ཇི་བཞིན་ཡིག་ཐོག་ལ་ཞིབ་ཚགས་མོས་འབྲི་སྤེལ་གནང་གི་ཡོད་པ་དེ་ཧ་ཅང་གལ་ཆེན་པོ་དང་ཕན་ཐོགས་ཆེན་པོ་ཞིག་ལ་མཐོང་གི་ཡོད།