ཁ་སང་ཨ་རིའི་སྲིད་འཛིན་ཨོ་བྷ་མ་མཆོག་གིས་རྒྱ་ནག་པེ་ཅིན་གྱི་ཨ་རིའི་གཞུང་ཚབ་ཆེན་མོ་གྷ་རི་ལོག་གིས་དགོངས་པ་ཞུས་པའི་ཚབ་ཏུ། ཨ་རིའི་གྲོས་ཚོགས་གོང་མའི་འཐུས་མི་མེག་སེ་བྷ་ཁ་སེ་བསྐོ་འཆར་ཡོད་ཚུལ་བརྗོད་འདུག
རྒྱལ་སྤྱིའི་བརྒྱུད་ལམ་ཁག་ནང་གནས་ཚུལ་ཐོན་པ་ལྟར་ན། ཉེ་ལམ་རྒྱ་ནག་པེ་ཅིན་དུ་ཡོད་པའི་ཨ་རིའི་གཞུང་ཚབ་ཆེན་མོ་གྷ་རི་ལོག་(GaryLocke )མཆོག་གིས་གཞུང་ཚབ་ནས་དགོངས་པ་ཞུས་ཏེ་ ༢༠༡༤ ལོའི་ལོ་མགོར་ཁོང་ཕྱིར་ཨ་རིར་ལོག་རྒྱུ་ཡིན་པའི་གསལ་བསྒྲགས་སྤེལ་བ་ལྟར། ཁ་སང་ཚེས་ ༡༨ ཉིན་ཨ་རིའི་སྲིད་འཛིན་ཨོ་བྷ་མཆོག་གིས་གལ་སྲིད་གྲོས་ཚོགས་གོང་མས་རྒྱབ་སྐྱོར་འཐོབ་པ་ཡིན་ན། པེ་ཅིན་གྱི་ཨ་རིའི་གཞུང་ཚབ་ཆེན་མོར་གྲོས་ཚོགས་གོང་མའི་དམངས་གཙོ་ཚོགས་པའི་འཐུས་མི་རྒན་གྲས་མེག་སེ་བྷ་ཁ་སེ་(Max Baucus)ལགས་བསྐོ་བཞག་བྱ་རྒྱུ་ཡིན་སྐོར་བརྗོད་འདུག
མེག་སེ་བྷ་ཁ་སེ་ལགས་ ༡༩༧༨ ལོར་ཨ་རིའི་གྲོས་ཚོགས་གོང་མའི་འཐུས་མིར་བདམས་ཐོན་བྱུང་བ་ནས་བཟུང་གྲོས་ཚོགས་ཀྱི་ཚོགས་ཆུང་འདྲ་མིན་ནང་ཕྱག་ལས་གནང་ཡོད་པ་དང་། ཁོང་གིས་འདི་ལོའི་ཕྱི་ཟླ་ ༧ པའི་ནང་རྒྱ་ནག་གཞུང་གིས་ཨ་རིའི་རིག་རྩལ་བདག་དབང་དང་དམག་དོན་གསང་བ་སོགས་རྐུ་འཁྱེར་བྱེད་ཀྱི་ཡོད་པ་དག་སྲིད་འཛིན་ཨོ་བྷ་མས་ཐེར་འདོན་བྱེད་དགོས་སྐོར་བརྗོད་ཡོད་ལ། རྒྱ་ནག་གི་ཕྱི་ཕྱོགས་ཚོང་འབྲེལ་ལམ་ལུགས་དང་དངུལ་རྩའི་ཛ་ཐང་ལ་མཐའ་གཅིག་ཏུ་དགག་པ་རྒྱག་མཁན་གྲས་ཡིན་འདུག ཁོང་ད་ལྟ་ཨ་རིའི་གྲོས་ཚོགས་གོང་མའི་རྒྱལ་སྤྱིའི་ཚོང་འབྲེལ་ལམ་ལུགས་དང་། དཔྱ་ཁྲལ་གནད་དོན་ཐོག་རྟོག་ཞིབ་བྱེད་མཁན་དཔལ་འབྱོར་རྟོག་ཞིབ་ལྷན་ཚོགས་ཞེས་པའི་ཚོགས་ཆུང་གི་ཚོགས་གཙོ་ཡིན་འདུག
མིང་བརྗོད་འདོད་མེད་པའི་ཨ་རིའི་དམངས་གཙོ་ཚོགས་པའི་འཐུས་མི་ཞིག་གིས་བརྗོད་པར། བྷ་ཁ་སེ་ལགས་ནི་རྒྱ་ནག་རྒྱལ་སྤྱིའི་ཚོང་དོན་ལྷན་ཚོགས་ཀྱི་ཚོགས་མིའི་ནང་ཞུགས་རྒྱུར་རྒྱབ་སྐྱོར་བྱེད་མཁན་ཞིག་ཡིན་པ་དང་། རྒྱ་ནག་ནང་ཐེངས་ ༨ ཙམ་བསྐྱོད་དེ་ཨ་རྒྱའི་བར་གྱི་ཚོང་དོན་འབྲེལ་ལམ་འཕེལ་རྒྱས་གཏོང་རྒྱུར་སྐུལ་འདེད་བྱེད་མཁན་ཞིག་ཡིན་སྐོར་བརྗོད་འདུག
མག་སེ་བྷག་ཁ་སེ་ལགས་ནི། ༡༩༤༡ ལོར་ཨ་རིའི་མན་ཌ་ཎ་མངའ་སྡེ་ནང་སྐྱེས་ཞིང་། ༡༩༧༨ ལོ་ནས་ཨ་རིའི་གྲོས་ཚོགས་གོང་མའི་འཐུས་མིར་བདམས་ཐོན་གྱིས་གྲོས་ཚོགས་ཀྱི་དཔལ་འབྱོར་ལྷན་ཚོགས་ཀྱི་ཚོགས་གཙོ་དང་། ཨོ་བྷ་མའི་སྲིད་གཞུང་གིས་ལག་བསྟར་བྱེད་བཞིན་པའི་སྨན་བཅོས་ལྟ་སྐྱོང་ལས་གཞི་འཆར་འགོད་པ། དེ་བཞིན། དེ་སྔའི་གྲོས་ཚོགས་གོང་མའི་འབྲུ་རིགས་ཐོན་ཁུངས་བརྟག་ཞིབ་ཚན་པ་དང་ཁོར་ཡུག འགྲིམ་འགུལ་དང་འཛུགས་སྐྲུན་ཐོན་སྐྱེད་ཚོགས་ཆུང་། དཔྱ་ཁྲལ་དོ་དམ་ཚོགས་ཆུང་སོགས་ནང་ཕྱག་ལས་གནང་མྱོང་ཡོད་འདུག ཁོང་ནི་ཨ་རིའི་གྲོས་ཚོགས་གོང་མའི་འཐུས་མི་རྒྱུན་རིང་གནང་མྱོང་མཁན་ཞིག་དང་། གྲོས་ཚོགས་ནང་ནང་སྙན་གྲགས་ཆེན་པོ་ཡོད་མཁན་ཞིག་ཀྱང་ཡིན་འདུག
ཨ་རིའི་གསར་ལམ་ཁག་ནང་། གལ་སྲིད་བྷ་ཁ་སེ་ཨ་རིའི་རྒྱ་ནག་གཞུང་ཚབ་ཏུ་བསྐོ་བཞག་བྱས་པ་ཡིན་ན། ཁོའི་ཚབ་ཏུ་འཐུས་མི་སུ་ཞིག་བསླེབ་མིན་སྐོར་ལ་བགྲོ་གླེང་ཤུགས་ཆེན་འབྱུང་བཞིན་ཡོད་ཅིང་། གྲོས་ཚོགས་གོང་མའི་འཐུས་མི་རྒན་གྲས་ཤིག་གིས། གལ་ཏེ་བྷ་ཁ་སེ་ཨ་རིའི་རྒྱ་ནག་གཞུང་ཚབ་ཏུ་བསྐོ་བཞག་བྱས་པ་ཡིན་ན་མོན་ཌ་ཎ་མངའ་སྡེའི་ཁྲིམས་ལུགས་ལྟར། མངའ་སྡེའི་སྤྱི་ཁྱབ་མི་སི་ཀྲི་ཝུ་བྷུ་ལོག་(Steve Bullock )ལགས་ལ་ཁོང་གི་ཚབ་འདེམས་སྒྲུག་བྱ་རྒྱུའི་དབང་ཆ་ཡོད་སྐོར་དང་། གཞན། ཁོང་གིས་ཨ་རིའི་གྲོས་ཚོགས་གོང་མའི་ནང་དམངས་གཙོ་ཚོགས་པར་འཐུས་མི་ ༥༣ དང་སྤྱི་མཐུན་ཚོགས་པར་འཐུས་མི་ ༤༥། རང་དབང་ཅན་གྱི་འཐུས་མི་ ༢ བཅས་ཡོད་སྟབས། བྷུ་ལོག་ལགས་ཀྱིས་དམངས་གཙོ་ཚོགས་པའི་འཐུས་མི་ཞིག་གྲོས་ཚོགས་གོང་མའི་འཐུས་མིར་བདམས་ཀྱང་། གྲོས་ཚོགས་ཀྱི་ལྗིད་སྙོམ་སྟངས་འཛིན་གྱི་དབང་ཚད་ལ་ཤུགས་རྐྱེན་གང་ཡང་ཐེབས་མི་སྲིད་སྐོར་བརྗོད་འདུག
དེ་བཞིན། དམངས་གཙོ་ཚོགས་པའི་འཐུས་མི་ཞིག་གིས། བྷུ་ལོག་ལགས་ཀྱིས་བྷ་ཁ་སེ་ཚབ་ཏུ་འཐུས་མི་སུ་འདྲ་ཞིག་བསྐོ་བཞག་བྱས་ཀྱང་། མི་དེར་ལོ་རྗེས་མའི་ཕྱི་ཟླ་ ༡༡ ནང་གི་གྲོས་ཚོགས་གོང་མའི་འོས་བསྡུར་ཁེ་ཕན་ཐོབ་རྒྱུ་ཡིན་སྐོར་ཚོད་དཔག་བྱེད་ཀྱི་ཡོད་ཅིང་། ཨ་རིའི་སྤྱི་མཐུན་ཚོགས་པས་ ༢༠༡༤ལོའི་གྲོས་ཚོགས་གོང་མའི་འོས་བསྡུའི་རྒྱལ་ཁ་ཐོབ་ཆེད་མོན་ཌ་ཎའི་མངའ་སྡེའི་གྲོས་ཚོགས་འཐུས་མིའི་རྐུབ་སྟེགས་ལ་རྩོད་ལེན་བྱེད་བཞིན་ཡོད་འདུག
