སྲིད་བློན་ལྕམ་སྐུ་མཆོག་ལ་ངོ་རྒོལ།

དེ་རིང་ཐེ་ལན་ཌིའི་དམངས་གཙོ་ཚོགས་པ་དང་ཚོགས་པའི་རྒྱབ་སྐྱོར་བ་གཅིག་ཁྲི་ལྷག་འདུ་འཛོམས་ཀྱིས་ཐེ་ལན་ཌིའི་རྒྱལ་ཡོངས་འོས་བསྡུ་ཆེན་མོའི་དེབ་སྐྱེལ་བྱེད་སའི་མཐའ་བསྐོར་ཏེ་གཞུང་ལ་ངོ་རྒོལ་བྱེད་ཀྱིན་ཡོད་འདུག  

དེ་རིང་ཐེ་ལན་ཌིའི་ཕྱོགས་འགལ་ཚོགས་པའི་མགོ་ཁྲིད་ཟུར་པ་སོ་ཐེབ་ ( Suthep Thaugsuban) ཀྱི་སྣེ་ཁྲིད་འོག་མི་མང་ཁྲི་གཅིག་ལྷག་ཐེ་ལན་ཌིའི་རྒྱལ་ས་བྷེང་ཁཱོག་གི་གཞུང་ལམ་ཐོག་ཐོན་ཏེ། ད་ལྟའི་གཞུང་སྒོ་རྒྱག་དགོས་པའི་རྔམ་སྟོན་ཁྲོམ་སྐོར་ཤུགས་ཆེན་བྱེད་ཀྱི་ཡོད་ཅིང་། ལས་འགུལ་དེ་རྒྱ་ཁྱབ་ཏུ་མི་འགྲོ་ཆེད་སྲིད་བློན་ལྕམ་ཡིང་ལོག་ ( Yingluck Shinawatra )ལགས་ཀྱིས། ཁོ་མོའི་ཆབ་སྲིད་ཚོགས་པ་པེའུ་ཐེ་ (Pheu Thai Party) ཡིས་མང་མོས་འོག་ཡོད་པའི་གྲོས་ཚོགས་དེ་རྩ་གྲོལ་བཏང་སྟེ། ལོ་རྗེས་མའི་ཕྱི་ཟླ་ ༢ ཚེས་ ༢ ཉིན་རྒྱལ་ཡོངས་འོས་བསྡུ་ཆེན་མོ་མགོ་ཚུགས་བྱ་རྒྱུ་ཡིན་སྐོར་དང་། ཆབ་སྲིད་ཚོགས་པ་ཚོས་ཟླ་འདིའི་ཕྱི་ཚེས་ ༢༧ ནང་ཚུད་དུ་སོ་སོའི་འོས་མི་དེབ་སྐྱེལ་ཐོ་འགོད་བྱེད་དགོས་སྐོར་གསལ་བསྒྲགས་སྤེལ་འདུག

དམངས་གཙོ་ཚོགས་པའི་རྒྱབ་སྐྱོར་བ་ཚོས་ཐེ་ལན་ཌིའི་རྒྱལ་ཡོངས་འོས་བསྡུ་ཆེན་མོའི་ཐོ་འགོད་བྱེད་སའི་ཚོགས་ཁང་མཐའ་བསྐོར་ཏེ། མང་ཚོགས་དང་ཆབ་སྲིད་ཚོགས་པ་ཁག་ལ་དེབ་སྐྱེལ་བྱེད་པར་འགོག་རྐྱེན་བཟོ་བཞིན་ཡོད་ཅིང་། ད་ལྟ་མང་ཚོགས་དང་ཆབ་སྲིད་ཚོགས་པ་ཁག་གིས་ཐེ་ལན་ཌིའི་ཉེན་རྟོག་པའི་ས་ཚིགས་སུ་འོས་བསྡུའི་དེབ་སྐྱེལ་བྱེད་ཀྱིན་ཡོད་འདུག

གནས་ཚུལ་དེ་ནི་ཟླ་སྔོན་མའི་ཕྱི་ཚེས་ ༢༤ ཉིན་ནས་བཟུང་ཉིན་ ༡༠ རིང་ཐེ་ལན་ཌིའི་ཕྱོགས་འགལ་ཚོགས་པའི་མགོ་ཁྲིད་ཟུར་པ་སོ་ཐེབ་ཀྱི་སྣེ་ཁྲིད་འོག་མི་མང་ ༡༥༠༠༠༠ ལྷག་གིས་ཐེ་ལན་ཌིའི་རྒྱལ་ས་བྷེང་ཁཱོག་གྲོང་ཁྱེར་དུ། ད་ལྟའི་གཞུང་ནང་ལྐོག་ཟ་རུལ་སུངས་ཤུགས་ཆེན་པོ་ཡིན་པ་སོགས་ཀྱི་རྒྱུ་མཚན་ཁ་ཤོས་འོག་ངོ་རྒོལ་ཤུགས་ཆེན་བྱས་སྟབས། ཟླ་འདིའི་ཚེས་ ༩ ཉིན་སྲིད་བློན་ལྕམ་ཡིང་ལོག་ལགས་ཀྱིས་ཐེ་ལན་ཌིའི་གྲོས་ཚོགས་རྩ་གྲོལ་གྱིས་ལོ་རྗེས་མར་རྒྱལ་ཡོངས་འོས་བསྡུ་གནང་རྒྱུ་གལ་བསྒྲགས་སྤེལ་བ་ཞིག་ཆགས་ཡོད་སྟབས། དེར་དམངས་གཙོ་ཚོགས་པ་དང་ཚོགས་པའི་རྒྱབ་སྐྱོར་པ་ཚོ་འདོད་པ་མ་ཁེངས་སྟབས། རྩ་ཁྲིམས་དང་གཞུང་འཛིན་ལམ་ལུགས་ཁག་ལ་བཅོས་བསྒྱུར་མ་བཏང་བར་རྒྱལ་ཡོངས་འོས་བསྡུ་བྱ་མི་དགོས་སྐོར་བརྗོད་དེ། གཞུང་ལ་ངོ་རྒོལ་གྱིས་འོས་བསྡུའི་དེབ་སྐྱེལ་བྱེད་སའི་ས་ཚིགས་ཁག་བཙན་བཀག་བྱས་པ་ཞིག་ཡིན་འདུག 

ཐེ་ལན་ཌིའི་ཕྱོགས་འགལ་ཚོགས་པའི་མགོ་ཁྲིད་ཟུར་པ་དང་། ཐེངས་འདིའི་རྔམ་སྟོན་ཁྲོམ་སྐོར་སྣེ་ཁྲིད་བྱེད་མཁན་སོ་ཐེབ་ཀྱིས། གལ་ཏེ། ད་ལྟའི་གཞུང་གིས་ ༢༠༡༤ ལོའི་ཕྱི་ཟླ་ ༢ ནང་བྱ་འཆར་ཡོད་པའི་ཐེ་ལན་ཌིའི་རྒྱལ་ཡོངས་འོས་བསྡུ་དེ་མ་བསླེབས་གོང་གཞུང་འཛིན་ལམ་ལུགས་ཁག་ལ་ཡིད་ཆེས་འཕེར་བའི་བཅོས་བསྒྱུར་ཞིག་མ་བཏང་བ་ཡིན་ན། ང་ཚོས་རྒྱལ་ཡོངས་འོས་བསྡུ་དེར་ངོས་ལེན་གང་ཡང་བྱེད་མི་སྲིད་ཅེས་དང་། ཡང་། ཁོང་གིས་གལ་ཏེ་ཆབ་སྲིད་ཚོགས་པ་ཁག་གིས་རང་རང་གི་འོས་མི་ཚོ་དེབ་སྐྱེལ་བྱེད་དགོས་ན། ཐོག་མར་ང་ཚོས་ངོས་ལེན་མ་བྱས་པར་དེབ་སྐྱེལ་བྱ་ཐབས་མེད་ཅེས་སོགས་བརྗོད་འདུག

ཐེ་ལན་ཌིའི་སྲིད་བློན་ལྕམ་ཡིང་ལོག་ལགས་ཀྱིས་གསར་འགོད་གསལ་བསྒྲགས་ཤིག་གི་ཐོག ང་ཚོས་འོས་བསྡུ་དེ་ངེས་པར་དུ་བྱེད་དགོས་ཀྱི་ཡོད་སྟབས། གལ་ཏེ་ཕར་ཕྱོགས་ལ་འདོད་པ་མེད་ན་འོས་བསྡུའི་ཐོབ་ཐང་བེད་སྤྱད་དེ་ང་དང་ངའི་གཞུང་ལ་ཁ་གཏད་ལྕོགས་དགོས་པ་ལས། དམངས་གཙོའི་ཐོབ་ཐང་བཀོལ་སྤྱོད་བྱེད་སའི་ལམ་ལུགས་ལ་ངོ་རྒོལ་གྱིས་ཆབ་སྲིད་ཐོབ་ཐང་གཅིག་པུ་སྟེ། མི་རེ་འོས་རེ་ལྡུག་རྒྱུའི་རང་དབང་དེ་འཕྲོག་པ་ཡིན་ན་འགྲིག་གི་མེད་སྐོར་དང་།  ཁྱེད་ཚོས་གཞུང་འདི་ཁས་ལེན་ཡང་རུང་ལ་མ་བླངས་ཀྱང་རུང་གང་ལྟར་དམངས་གཙོའི་ལམ་ལུགས་ལ་བརྩི་སྲུང་དང་གུས་བཀུར་བྱེད་དགོས་ཞེས་བརྗོད་འདུག

ཐེ་ལན་ཌིའི་འོས་བསྡུ་ལྷན་ཁང་གི་ལས་བྱེད་སོམ་ཇྷ་ ( Somchai Srisutthiyakorn) ལགས་ཀྱིས། ཆབ་སྲིད་ཚོགས་པ་ ༩ ཙམ་ཞིག་གིས་རྒྱལ་ཡོངས་འོས་བསྡུ་ཆེན་མོའི་ནང་དེབ་སྐྱེལ་བྱེད་ཐུབ་པ་བྱུང་ཡང་། ད་དུང་། ཆབ་སྲིད་ཚོགས་པ་དང་མང་ཚོགས་མང་པོ་ཞིག་གིས་དེབ་སྐྱེལ་བྱ་ཐུབ་མེད་སྐོར་དང་། ད་ཐེངས་འོས་བསྡུ་དང་འབྲེལ་བའི་ངོ་རྒོལ་འདི་ནི་ཐེ་ལན་ཌིའི་འདས་པའི་ལོ་ ༡༠ ལྷག་གི་རིང་བྱུང་མྱོང་མེད་པའི་ངོ་རྒོལ་ཤུགས་ཆེ་ཤོས་དང་སྡུག་ཤོས་ཤིག་རེད་ཅེས་བརྗོད་འདུག

ཆབ་སྲིད་དབྱེ་ཞིབ་པ་ཚོས་བརྗོད་པ་ལྟར་ན། ཐེ་ལན་ཌིའི་ནང་གི་ངོ་རྒོལ་དེ་ནི་གཞུང་དང་ཁ་གཏད་ཚོགས་པའི་བར་གྱི་ལྟ་བ་དང་ལངས་ཕྱོགས་མི་མཐུན་པའི་དབང་ཆའི་འགྲན་རྩོད་ཅིག་ཡིན་པ་མ་ཟད། གྲོང་གསེབ་དང་གྲོང་ཁྱེར་ཁུལ་གྱི་མང་ཚོགས་ཚོའི་འགལ་ཟླ་ཞིག་ཆགས་ཡོད་སྟབས། མ་འོངས་པར་ཐེ་ལན་ཌིའི་རྒྱལ་ཁབ་ཀྱི་ཆབ་སྲིད་ལམ་ལུགས་ཇི་ལྟར་འཛིན་མིན་ཐད་ལའང་འགོག་རྐྱེན་འཕྲད་སྲིད་སྐོར་བརྗོད་འདུག

བྷེང་ཁཱོག་གཙུག་ལག་སློབ་གྲྭ་ཆེན་མོའི་ཆབ་སྲིད་ཚན་རིག་ཐོག་གི་སློབ་དཔོན་ཆེན་མོ (Thitinan Pongsudhirak)ལགས་ཀྱིས། ཐེ་ལན་ཌིའི་ནང་འཕྲད་བཞིན་པའི་ཆབ་སྲིད་ལས་འགུལ་དེ་ཕྱོགས་འགལ་ཚོགས་པ་དང་གཞུང་འཛིན་ཚོགས་པ་གཉིས་ཀྱི་གྲོས་མོལ་བརྒྱུད་སེལ་ཐབས་མ་བྱས་པ་ཡིན་ན། མ་འོངས་པར་ཐེ་ལན་ཌི་དམག་མིའི་སྟངས་འཛིན་འོག་འགྲོ་རྒྱུ་ཉག་ཅིག་ཡིན་སྐོར་བརྗོད་འདུག