ལམ་རིམ་ཁྲིད་ཆེན་བཅོ་བརྒྱད་ཀྱི་ཆོས་འབྲེལ་དབུ་འཛུཊ།

ཐེངས་འདིའི་ཆོས་འབྲེལ་དེ་ནི་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་དང་། གདན་ས་ཆེན་མོ་གསུམ་ནང་ཡོད་པའི་གྲྭ་ཚང་དྲུག དེ་བཞིན་བཀྲ་ཤིས་ལྷུན་པོ་དང་། རྒྱུད་གྲྭ་སྟོད་སྨད། རྭ་སྟོད་གྲྭ་ཚང་། འབྲས་སྤུངས་བླ་སྤྱི། བླ་མ་བཟོད་པ་རིན་པོ་ཆེའི་ཆོས་ཚོགས། བྲག་རི་རིན་པོ་ཆེ་སོགས་ཆོས་སྡེ་ཁག་དང་གྲྭ་ཚང་ཁག་གིས་ཇི་ལྟར་གསོལ་འདེབས་ཞུས་དོན་ལྟར་༧གོང་ས་མཆོག་གིས་ཞལ་བཞེས་ཐོབ་ཏེ། རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་སེར་བྱེས་གྲྭ་ཚང་གི་ཆོས་རའི་ནང་གོ་སྒྲིག་གནང་གཏན་འཁེལ་བ་ཞིག་ཡིན་འདུག་ལ། གསུང་ཆོས་སྐབས་བྱང་ཆུབ་ལམ་རིམ་ཆེན་མོའི་གསུང་ཆོས་གོ་སྒྲིག་ཚོགས་ཆུང་གཙོས། ཆོལ་གསུམ་བོད་མི་གཙོ་བོར་གྱུར་བའི་གཞིས་ལས་ཁང་ཁག་དང་དགོན་སྡེ་ཁག གཞོན་ནུ་བུད་མེད་སོགས་ཚོགས་སྐྱིད་ཁག་གིས་ཀྱང་མཐུན་འགྱུར་རོགས་རམ་གནང་གི་ཡོད་འདུག

དེ་རིང་ཚེས་  ༢༥ ཉིན་༧གོང་ས་མཆོག་གིས་བོད་མི་གཙོ་བོར་གྱུར་བའི་དད་ལྡན་པ་ཁྲི་ ༣ ལྷག་ལ་ཆོས་འབྲེལ་དབུ་འཛུགས་གནང་ཡོད་པ་དང་། ༢༠༡༤ ལོའི་ཟླ་ ༡ ཚེས་ ༣ ཉིན་བར་ལོ་སྔོན་མའི་ལྷག་འཕྲོས་རྟོགས་བརྗོད་མདུན་ལེགས་མ་དང་ཡོན་ཏན་གཞིར་གྱུར་མ། ལམ་གཙོ་རྣམ་གསུམ། ལམ་རིམ་ལེགས་གསུངས་ཉིང་ཁུ། ལམ་རིམ་གསེར་གྱི་ཡང་ཞུན། ལམ་རིམ་བདེ་ལམ། ལམ་རིམ་འཇམ་དཔལ་ཞལ་ལུང་། ལྷོ་བརྒྱུད་ལམ་རིམ། ལམ་རིམ་མྱུར་ལམ། ལམ་རིམ་བདུད་རྩིའི་སྙིང་པོ། ཞྭ་དམར་ལམ་རིམ། ལྷག་མཐོང་དཀའ་འགྲེལ་སོགས་ཀྱི་ཆོས་འབྲེལ་གནང་རྒྱུ་ཡིན་འདུག་ལ། ཆོས་འབྲེལ་སྐབས་དབྱིན་སྐད་དང་རྒྱ་སྐད། ཨུ་རུ་སུ། སོག་པོ། ཨི་ཊ་ལི། ཧྥ་རན་སི། ཝེ་ཐི་ནམ། སི་པན། ཀོ་རི་ཡ། ཉི་ཧོང་བཅས་སྐད་རིགས་ ༡༠ ལྷག་ནང་གསུང་བསྒྱུར་གནང་རྒྱུ་ཡིན་པ་མ་ཟད། སྐུ་སྒེར་དྲ་རྒྱ་www. dalailama.com དང་། www. jangchuplamrim.org བོད་མིའི་སྒྲིག་འཛུགས་ཀྱི་དྲ་རྒྱ་ www.tibet.net བཅས་སུ་ཐད་ཀར་རྒྱང་སྲིང་གི་མཐུན་རྐྱེན་བསྐྲུན་ཡོད་འདུག

ཐེངས་འདིའི་ཆོས་འབྲེལ་དང་སྟབས་བསྟུན་ཏེ་སྨར་ཁམས་མི་མང་གིས་༧གོང་ས་མཆོག་ལ་བརྟན་བཞུགས་འབུལ་རྒྱུ་དང་། ༧གོང་ས་མཆོག་དབུ་བཞུགས་ཐོག་དགེ་ལུགས་རྒྱུགས་སྤྲོད་ཆེན་མོ་ཐོན་པའི་སློབ་གཉེར་བ་རྣམས་ལ་བསླབ་པ་མཐར་སོན་གྱི་མཛད་སྒོ་གོ་སྒྲིག་གནང་རྒྱུ།   ཉིན་མཐའ་མར་བྱང་ཆུབ་ལམ་རིམ་ཆེན་མོའི་གསུང་ཆོས་གོ་སྒྲིག་ཚོགས་ཆུང་གིས་༧གོང་ས་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག  

གསར་འགོད་པ། དོན་གོ