ཁ་སང་སྨར་ཁམས་གཞིས་བྱེས་མི་མང་གིས་༧གོང་ས་མཆོག་ལ་བརྟན་བཞུགས་ཕུལ་སྐབས་ཁོང་གིས་དགའ་ལྡན་ཁྲི་པ་དང་ཆོས་བརྒྱུད་ཁག་གི་བླ་མ་དགེ་བཤེས་ཡོངས། བོད་ནང་དཀའ་སྡུག་མྱོང་མཁན་དག དེ་བཞིན་འཛམ་གླིང་ཐོག་ལས་དོན་གལ་ཆེན་སྒྲུབ་མཁན་ཡོངས་ནད་མེད་ཚེ་རིང་ཡོང་བའི་སྨོན་ལམ་རྒྱག་དགོས་སྐོར་གསུངས་འདུག
ཉིན་འདི་གར་༧གོང་ས་མཆོག་གིས་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་གི་ཆོས་རྭར་ལམ་རིམ་ཁྲིད་ཆེན་བཅོ་བརྒྱད་ཀྱི་ཆོས་འབྲེལ་སྩོལ་བཞིན་ཡོད་པ་ལྟར། ཁ་སང་ཕྱི་ཚེས་ ༡ ཉིན་གྱི་སྔ་དྲོར་སྨར་ཁམས་གཞིས་བྱེས་གཉིས་ཀྱིས་༧གོང་ས་མཆོག་ལ་བརྟན་བཞུགས་བསྟར་འབུལ་དང༌། ༧གོང་ས་མཆོག་ལ་བཀའ་དྲིན་རྗེས་དྲན་ཆེད་༼ཀུན་ཁྱབ་མཛད་ཆེན༽ཞེས་པའི་གཟེངས་རྟགས་ཤིག་ཀྱང་འབུལ་ལམ་ཞུས་ཡོད་འདུག སྐབས་དེར་༧གོང་ས་མཆོག་གིས་ཕྱི་རྒྱལ་བ་ཚོར་ཕྱི་ལོ་གསར་པར་འཚམས་འདྲི་དང་སྦྲགས། གསར་དུ་བཞད་པའི་ལོ་འདི་སྤྲོ་སྣང་ལྡན་པ་ཞིག་དང་སྡུག་བསྔལ་གྱི་ལོ་ཞིག་ཡོང་མིན་ང་ཚོར་རག་ལས་ཡོད་སྟབས། ང་ཚོ་མི་སྒེར་སོ་སོའི་ངོས་ནས་སེམས་པ་བཟང་པོ་ཞིག་དང་འཚེ་བ་མེད་པ། ཡ་རབས་སྤྱོད་བཟང་བྱས་པ་ཡིན་ན་བདེ་སྐྱིད་ལྡན་པའི་ལོ་ཞིག་ཡོང་ཐུབ་རྒྱུ་ཡིན་སྐོར་གསུངས་འདུག
༧གོང་ས་མཆོག་གིས་ཐེངས་འདིའི་བརྟན་བཞུཊ་ཀྱི་ཐོག་མའི་སྐུལ་མ་སྨར་ཁམས་གཞིས་བྱེས་གཉིས་ཡིན་ཡང༌། གདན་ས་གསུམ་གཙོས་པའི་རིས་སུ་མ་ཆད་པའི་ཆོས་སྒར་ཁག་གི་རབ་བྱུང་ཕོ་མོ་དང༌། ཕྱོགས་མཐའ་ཁག་ནས་ཕེབས་པའི་སེར་སྐྱ་ཐུན་མོང་ཐོག་ངོས་རང་ཚེ་རིང་དུ་འཚོ་རྒྱུར་སྐྱབས་འཇུག་གནང་བ་དང་མཉམ་དུ། འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་དང༌། རིས་སུ་མ་ཆད་པའི་བསྟན་འཛིན་གྱི་སྐྱེས་ཆེན་རྣམས་དང་བླ་མ་སྤྲུལ་སྐུའི་མིང་ཡོད་པ། མཁན་པོ་ལས་ཟུར་དཔེ་ཁྲིད་སླད་དུ་གདན་བཞུགས་པ་ཡོངས་ཀྱི་སྐུ་ཚེ་ཡུན་དུ་གནས་རྒྱུ་ཧ་ཅང་གལ་ཆེན་ཡིན་སྟབས་དགེ་འདུན་འདུས་པ་རྒྱ་མཚོས་ཐུགས་སྨོན་གནང་ན་ཡག་པོ་ཡོད་པ་མ་ཟད། ལོ་འདིའི་ནང་འཛམ་གླིང་སྤྱིས་བརྩི་བཞིན་པའི་མི་སྣ་གཞན་ཕན་དང་སྤྱི་སེམས་ཀྱི་བླ་ཡོད་ལ་བྱ་བ་དངོས་སུ་སྒྲུབ་མཁན་དེ་དག་ཚང་མ་ཚེ་རིང་བ་དང་ནད་མེད་བྱ་བ་ལམ་འགྲོ་ཡོང་བར་ཚང་མས་སྨོན་ལམ་བརྒྱབ་ན་ཡག་པོ་ཡོད་ཚུལ་གསུངས་འདུག
༧གོང་ས་མཆོག་གིས་བོད་ནང་དཀའ་སྡུག་མྱོང་བཞིན་པ་ཚོར་སྨོན་ལམ་རྒྱག་དགོས་སྐོར་གསུངས་པ་དང་སྦྲགས་རང་ལུས་མེར་བསྲེགས་སྐོར་ལ། “འུ་ཐུག་སྟེ་རང་ལུས་མེར་བསྲེགས་གཏོང་མཁན་མང་པོ་ཞིག་བྱུང་བ་རེད། དེ་དག་ཆེད་ངེས་པར་དུ་སྨོན་ལམ་རྒྱག་དགོས། གནས་ཚུལ་བྱུང་ཟིན་པ་རེད། དེས་བོད་བསྟན་སྲིད་ལ་ཕན་དང་མི་ཕན་ཞེས་པ་དེ་དྲི་བ་ཆེན་པོ་ཞིག་རེད། ང་ཚོས་དབུ་མའི་ལམ་གྱི་ཐོག་ནས་འབད་བརྩོན་བྱེད་ཀྱི་ཡོད། གང་ལྟར་རྒྱ་དང་གྲོགས་པོ་བསྒྲིགས་ཏེ་བོད་དོན་བསྒྲུབ་རྒྱུའི་བསམ་བློ་གཏོང་གི་ཡོད། དངོས་ཡོད་གནས་ཚུལ་དེའི་ཐོག་ནས་བསྒྲུབ་དགོས་པ་རེད། གང་ལྟར་སྙིང་སྟོབས་འདི་ཙམ་ཞིག་གི་ཐོག་ནས་སོ་སོའི་སྲོག་བློས་གཏོང་བྱས་ཡོད། དེ་དག་གིས་སོ་སོའི་སྲོག་བློས་གཏོང་ཐུབ་མཁན་གྱི་མི་ཞིག་གིས་སོ་སོ་ཤི་བ་དང་ཆབས་ཅིག་རོགས་པ་འགའ་འཁྲིད་ཐུབ་རྒྱུ་ཏན་ཏན་ཡོང་གི་རེད། འོན་ཀྱང་འདི་མི་བྱེད་པ་དེ་ནི་བོད་ཆོས་ལྡན་གྱི་ཞིང་འདི་འཚེ་བ་མེད་པའི་ལྟ་སྤྱོད་ཀྱི་ཐོག་ནས་སྙིང་ཁོང་རུས་པའི་གཏིང་ནས་ཡིད་ཆེས་དང་ལག་ལེན་བསྟར་གྱི་ཡོད་པ་གསལ་པོ་རེད” ཞེས་གསུངས་འདུག
དེའི་རྗེས་སྨར་ཁམས་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་སྐལ་བཟང་རྒྱས་ཁྲི་ལགས་ཀྱིས། ༡༦༤༢ ལོར་ྋགོང་ས་ལྔ་པ་ཆེན་པོས་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་བཞེས་པ་ནས་བཟུང་སྨར་ཁམས་ཡུལ་གྱི་ཆབ་འབངས་ཡོངས་རྒྱལ་དབང་སྐུ་ཕྲེང་ན་རིམ་གྱི་བཀའ་དགོངས་འོག་ཤར་སྐྱོད་བྱས་ཡོད་པ་མ་ཟད། ༧གོང་ས་སྐུ་ཕྲེང་བཅུ་བཞི་བའི་དུས་ནས་དུས་སུ་ཕེབས་པའི་བཀའ་དགོངས་འོག་ཤར་བསྐྱོད་བྱས་དང་བྱེད་མུས་ཡིན་པ་དང༌། ༧གོང་ས་མཆོག་གིས་བོད་ཀྱི་ཆབ་སྲིད་ཀྱི་ཐུགས་འགན་བཞེས་མིན་ཇི་ལྟར་ཡང༌། གང་གིས་ཟབ་ཅིང་གསལ་བའི་ཆོས་སྲིད་ཀྱི་བཀའ་སློབ་དགོངས་དོན་དང༌། བཙན་བྱོལ་བོད་མིའི་སྒྲིག་འཛུགས་ཀྱི་ལངས་ཕྱོགས་འོག་ཡིད་གཉིས་ཐེ་ཚོམ་མེད་པར་མདུན་སྐྱོད་བྱ་རྒྱུར་དམ་བཅའ་གཙང་མ་ཡོད་པ་དང༌། ལྷག་པར་དུ་མགོན་པོ་ཉིད་ཀྱིས་དོལ་རྒྱལ་སྐོར་ལ་ཕེབས་པའི་བཀའ་དགོངས་བཞིན། སྨར་ཁམས་ཡུལ་དགོན་ཁག་གི་བླ་སྤྲུལ་རྣམ་པས་གཙོས་འབྲེལ་ཡོད་ལས་ཀྱི་སྣེ་མོ་བ་རྣམས་ཀྱིས་དུས་ནས་དུས་སུ་མི་མང་ལ་བླང་དོར་ལམ་སྟོན་གནང་བ་དང༌། ༢༠༠༠ ལོ་ཙམ་ནས་གཞིས་སྡོད་སྨར་ཁམས་ཁུལ་གྱི་བོད་མི་རང་ངོས་ནས་ཀྱང་དོལ་རྒྱལ་བསྟེན་གསོལ་བྱེད་མཁན་རྣམས་དང་ཆོས་དང་ཟང་ཟིང་གི་འབྲེལ་བ་བཅད་པ་སོགས་ལ་བརྟེན་ནས། ད་གཟོད་སྨར་ཁམས་ཁུལ་དུ་དོལ་རྒྱལ་བསྟེན་གསོལ་བྱེད་མཁན་བརྒྱ་ཆ་རེ་གཉིས་ཙམ་ལས་མེད་ཀྱང༌། ད་དུང་རེ་གཉིས་ཡོད་པ་དེ་དག་གིས་ཀྱང་ལམ་ནོར་ཟློག་ཤེས་ཡོང་ཐབས་ལ་དད་དམ་གཙང་མ་ལྡན་པའི་སྨར་ཁམས་ཡུལ་དགོན་ཡོངས་ཀྱིས་ཐབས་ཤེས་ཡོད་རྒུ་བྱས་ཏེ་གཙང་བཟོ་བྱ་རྒྱའི་དམ་བཅའ་ཡང་འཇོག་རྒྱུ་ཡིན་ཚུལ་དང་། ཅི་སྟེ་ཤེས་བཞིན་དུ་ཁྱད་གསོད་ཀྱིས་ཟློག་ཤེས་མེད་པར་མཁྲེགས་འཛིན་བྱེད་མཁན་བྱུང་ཚེ། སྔར་རྒྱུན་བཞིན་ཆོས་དང་ཟང་ཟིང་གི་འབྲེལ་བ་སྤངས་ཏེ། མི་རབས་རྒྱུད་བཅས་ཀྱིས་མུ་མཐུད་རྒྱུན་འཁྱོངས་ཞུ་རྒྱུ་དམ་བཅའ་འབུལ་རྒྱུ་ཡིན་སྐོར་བརྗོད་ཡོད་འདུག
མཇུག་ཏུ་༧གོང་ས་མཆོག་གིས། “ ཁྱེད་ཚོ་སྨར་ཁམས་གཞིས་བྱེས་གཉིས་ཐུན་མོང་ཐོག་བརྟན་བཞུགས་དང་གཟེངས་རྟགས་ཤིག་ཀྱང་འབད་བརྩོན་ཆེན་པོ་བྱས་ཏེ་བྱུང་བར་ཐུགས་རྗེ་ཆེ་ཟེར་རྒྱུ་ཡིན། ཁྱེད་ཚོས་སྔ་མོའི་ལོ་རྒྱུས་ནས་མར་བགྲང་ནས་ཁྱེད་རང་ཚོ་དེ་དག་དགའ་ལྡན་ཕོ་བྲང་གི་ཆབ་འབངས་སྨོས་མེད་ཞིག་ཡིན་པ་དང་རྒྱལ་བ་གོང་མ་ཚོས་གཟིགས་པ་ཆེན་པོ་ཡོད་སྐོར་ལོ་རྒྱུས་མར་བཤད་པ་དེར། བོད་སྤྱི་པའི་དོན་དུ་ལམ་སྟོན་ག་རེ་ཡོད་པ་དེ་དག་རྒྱབ་མདུན་ངོ་ལྐོག་མེད་པ་བྱས་ཏེ་འགྲོ་གི་ཡིན་ཞེས་བརྗོད་པར་ཧ་ཅང་དགའ་པོ་བྱུང་ཐུགས་རྗེ་ཆེ་ཟེར་རྒྱུ་ཡིན། ཁྱེད་ཚོས་ལོ་རྒྱུས་བརྗོད་སྐབས་ངོས་རང་ཆུང་ཆུང་སྐབས་ལ་གཟིམ་འགག་ཁྲི་པ་དེ་དགའ་ལྡན་བྱང་རྩེ་ནས་ཡིན་པ་བྱང་ཆུབ་ལགས་ཟེར་བ་སྐད་ཆ་སྙན་པོ་ཞེ་དྲག་གཅིག་ཡོད། རྒྱ་དཀར་པོ་ཞིག་ཡོད་པར་དང་འདོད་བྱས་ཏེ་ཁོང་ལ་རྒྱ་གར་ནས་ཐོན་པའི་སྐྲ་སེལ་རྒྱུ་ཞིག་ཡོད་པ་དེས་རྒྱ་དེ་བཟོ་བ་གནང་གི་རེད། ངོས་ནས་ཁོང་གི་པང་དུ་ཉལ་ནས་སྒྲུང་ཉན་ནས་སྡོད་མྱོང་ཡོད། ཕལ་ཆེར་ལོ་བདུན་བརྒྱད་སྐབས་ཡིན་པ་རེད། དེ་ནས་ཕྱིས་སུ་སྤོ་མདའ་སྟོབས་རྒྱལ་བོད་རང་སྐྱོང་ལྗོངས་ཀྱི་དྲུང་ཆེ་གཞོན་པའི་གྲས་ཤིག་རེད། ཁོ་རང་དངོས་ནས་ལྷག་བསམ་དང་སྙིང་སྟོབས་འགྱུར་བ་མེད་པ་རེད་འདུག སྐུ་མདུན་སྐུ་གོང་མར་སྨར་ཁམས་ཁུལ་ནས་སྤོ་མདའ་སྟོབས་རྒྱལ་གྱི་མགོ་ལྟ་བུ་འཁྲིད་དེ་སྐུ་མདུན་སྐུ་གོང་མ་གཤེགས་རྗེས་ཕྲན་བུ་ཟིང་ཙམ་ཞིག་བྱུང་བ་རེད། དེ་ཚོའི་གྲས་དེ་སྐུ་གོང་མ་དགོངས་པ་རྫོགས་རྗེས་སྤྱན་གསལ་ཀུན་འཕེལ་ལགས་སོགས་སུ་དཀའ་ངལ་འཕྲད་པ་རེད། དེ་ཚོའི་གྲས་ཀྱིས་སྐུ་གོང་མར་ཞེན་ཁོག་ལྟ་བུ་བྱས་པར་བརྟེན་གནས་ཚུལ་ཐོན་པའི་སྐོར་མང་པོ་ཤོད་མྱོང་ཡོད། ལྷག་བསམ་རྣམ་དག་ཧ་ཅང་ཡག་པོ་ཡིན། དེར་བརྟེན། ཁྱེད་ཚོ་སྨར་ཁམས་པས་བརྟན་བཞུགས་བྱེད་སྐབས་ངོས་ལ་དེ་དག་བསམ་བློ་འཁོར་བྱུང༌། ཞེ་དྲག་ཡག་པོ་ཡིན། “ཞེས་གསུངས་ཡོད་འདུག
