སི་ཁྲོན་ཞིང་ཆེན་སྲིད་གྲོས་ཀྱི་མགོ་ཁྲིད་ལི་ཁྲོང་ཞི་ལ་ཁྲིམས་འགལ་གྱི་དོགས་གཞིའི་འོག་ཞིབ་བཤེར་བྱེད་བཞིན་ཡོད་འདུག
ཟླ་སྔོན་མའི་ཚེས་ ༢༩ རྒྱ་ནག་དབུས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་དྲ་བའི་ཐོག་གནས་ཚུལ་སྤེལ་བ་ལྟར་ན། སི་ཁྲོན་ཞིང་ཆེན་སྲིད་གྲོས་ཀྱི་མགོ་ཁྲིད་ལི་ཁྲོང་ཞི་ཡིས་དབང་ཆ་སྒེར་སྤྱོད་ཀྱིས་ཁྲིམས་འགལ་བྱ་སྤྱོད་སྤེལ་ཡོད་པའི་དོགས་གཞིའི་འོག་དངོས་སུ་ཞིབ་བཤེར་བྱེད་མགོ་བརྩམས་ཡོད་འདུག
གསར་ལམ་ཁག་ནས་གནས་ཚུལ་ཐོན་པ་ལྟར་ན། རྒྱ་ནག་དབུས་ཆབ་སྲིད་སྡེ་ཚན་གྱི་མགོ་ཁྲིད་ཟུར་པ་ཀྲུའུ་ཡོང་ཁང་སི་ཁྲོན་ཞིང་ཆེན་ཨུ་ཡོན་ལྷན་ཁང་གི་མགོ་ཁྲིད་ཡིན་སྐབས་ལི་ཁྲོང་ཞི་དྲུང་ཆེ་ཡིན་པ་དང་། ཁོ་གཉིས་ངན་འབྲེལ་བྱས་ནས་སི་ཁྲོན་ཞིང་ཆེན་གྱི་ངལ་རྩོལ་བསྒྱུར་བཀོལ་ཁང་དང་བཙོན་ཁང་། ཉེན་རྟོག་ཁང་སོགས་ལ་བཀའ་བཏང་སྟེ་ ༡༩༩༩ ནས་ ༢༠༠༦ ལོའི་བར་ཉུང་མཐར་ཆོས་འཁོར་རྩ་རླུང་སྒོམ་སྒྲུབ་པ་ ༣༠༠ ལྷག་གིས་མནར་གཅོད་སྣ་ཚོགས་འོག་ཚེ་སྲོག་ཤོར་ཡོད་པ་དང་། ཀྲུའུ་ཚང་གིས་རྒྱ་སྒོར་དུང་ཕྱུར་ ༡༠༠༠ ཙམ་ལྐོག་ཟ་བྱས་པའི་ཉེས་དོན་ཡང་གཙོ་བོ་སི་ཁྲོན་ནས་བྱུང་ཡོད་སྟབས། ལི་ཁྲོང་ཞི་དང་འབྲེལ་བ་ཆེན་པོ་ཡོད་པའི་དོགས་གཞི་ཡོད་པ་མ་ཟད། ལི་ཡིས་ལྐོག་ངན་འབོར་ཆེན་བླངས་ཡོད་ལུགས་བརྗོད་འདུག
གཞན། ལི་ཁྲོང་ཞི་སི་ཁྲོན་ཞིང་ཆེན་གྱི་མགོ་ཁྲིད་གཞོན་པ་ཡིན་སྐབས། ཁོ་རང་གིས་སྣེ་ཁྲིད་པའི་ཞིང་ཆེན་རིམ་པའི་འབྲེལ་ཡོད་ལས་ཁུངས་ཁག་མཉམ་འབྲེལ་གྱི་གཏེར་ཁའི་ཁེ་ལས་ལྟ་སྐུལ་ཚོགས་པས། ༢༠༠༣ ལོའི་ལོ་མཇུག་ནས་བཟུང་རིན་གོང་འཕར་ཚོང་གི་བྱེད་ཐབས་སྤྱད་དེ། སྒེར་གྱི་ཁེ་ལས་ཁག་ལ་གཏེར་ཁ་འཚོལ་ཞིབ་དང་སྔོག་འདོན་གྱི་དབང་ཆ་ཕྱིར་ཚོང་བྱས་ཡོད་པ་མ་ཟད། སྔ་གཞུག་ཏུ་རྒྱ་སྒོར་དུང་ཕྱུར་ ༡༥ ལྷག་གི་ཡོང་འབབ་བླངས་ཡོད་སྐོར་སོགས་བརྗོད་འདུག
