ཉེ་ཆར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཨ་རིའི་ནང་གི་བོད་མི་གནས་ཡུལ་ཁག་ཏུ་སྐོར་སྐྱོད་དང་། དེའི་སྔོན་ལ་ཚོགས་གཙོ་མཆོག་གི་སྣེ་ཁྲིད་འོག་སྤྱི་འཐུས་ ༥ ཡུ་རོབ་ཀྱི་རྒྱལ་ཁབ་ལྔའི་ནང་བོད་དོན་ཞུ་གཏུག་ཏུ་བསྐྱོད་པ་བཅས་ཀྱི་སྐོར་ལ་བཅར་འདྲི་ཞུས་ཡོད།
དྲི་བ། ཉེ་སྔོན་ཨ་རིའི་ནང་ཕྱོགས་སྐྱོད་གནང་བའི་སྐོར་ངོ་སྤྲོད་ཅིག་གནང་རོགས།
ལན། ཐེངས་འདིར་ཉིན་གྲངས་ ༡༠ རིང་ཨ་རིའི་མི་ནི་སོ་ཊ་ནས་མགྲོན་འབོད་གནང་བ་ལྟར། མི་ནི་སོ་ཊ་དང་ཅི་ཀ་གོ ཝ་ཤིན་ཊོན་ཌི་སི། ནེའུ་ཡོག ཀོ་ནེ་ཊི་ཀཊ། ནིའུ་འཇར་སི། ཝར་མོན་ཊི་བཅས་ས་ཁུལ་ཁག་ ༧ ལ་ཕྱིན་པ་ཡིན། ད་རེབ་མི་ནི་སོ་ཊ་ས་གནས་སུ་༧གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་ཕུལ་བའི་དུས་དྲན་མཛད་སྒོ་དེ་ལས་རིམ་གཙོ་བོ་རེད། དེའི་ཞོར་དུ་བོད་རིགས་སྤྱི་མཐུན་ཚོགས་པ་ཁག་ལ་བོད་ནང་གི་ཆབ་སྲིད་གནས་སྟངས་དང་རྒྱལ་སྤྱིའི་ཆབ་སྲིད་གནས་བབ། ལྷག་པར་དུ་བར་ལམ་བྱུང་བའི་གནས་ཚུལ་ཁག་གི་ཐོག་གསལ་བཤད་བྱེད་པའི་གོ་སྐབས་བྱུང་སོང་། དུས་རྒྱུན་༧གོང་ས་མཆོག་གིས་དྲི་བ་དྲིས་ལན་ཡག་པོ་བྱུང་སོང་ངམ་ཞེས་བཀའ་འདྲི་གནང་གི་འདུག་སྟབས། ཚོགས་གཙོས་མང་པོ་མ་བཤད་པར་མི་མང་གི་སེམས་ལ་དོགས་གཞི་སོགས་དྲི་བ་གང་ཡོད་པ་གཞིར་བཞག་སྟེ་དྲི་བ་དྲིས་ལན་བྱས་པ་ཡིན་ལ། མང་ཚོགས་ནང་དོགས་གཞི་གང་ཡོད་པ་དེ་སངས་ཐུབ་ཡོད་བསམ་པ་བྱུང་སོང་། དེ་བཞིན། ས་གནས་བོད་རིགས་སྤྱི་མཐུན་ཚོགས་པ་ཁག་གི་གོ་སྒྲིག་ལྟར། ཝར་མོན་ཊི་སྤྱི་ཁྱབ་འཛིན་སྐྱོང་གི་མགོ་ཁྲིད་དང་མི་ནི་སོ་ཊ་མངའ་སྡེའི་འགྲོ་བ་མིའི་ཐོབ་ཐང་གི་འགན་འཛིན། དེ་བཞིན་གྲོས་ཚོགས་འཐུས་མི་ཁག་ཅིག་བཅས་ལ་མཇལ་འཕྲད་ཀྱིས་བོད་དོན་ངོ་སྤྲོད་ཀྱི་གོ་སྐབས་བྱུང་སོང་།
དྲི་བ། ས་གནས་བོད་རིགས་སྤྱི་མཐུན་ཚོགས་པ་ཁག་ནས་ཕྱག་ལས་གནང་ཕྱོཊ་ལ་གཟིགས་ཚུལ་ག་འདྲ་བྱུང་སོང་།
ལན། སྤྱིར་བཏང་ཁེ་ན་ཌ་ཚུད་པའི་བྱང་ཨ་རིའི་ནང་དུ་བོད་རིགས་སྤྱི་མཐུན་ཚོགས་པ་ ༣༠ ཙམ་ཡོད་པ་རེད། ད་རེབ་སྤྱི་མཐུན་ཚོགས་པ་བདུན་ཞིག་ལ་ཐུག་པ་རེད། བོད་རིགས་སྤྱི་མཐུན་ཚོགས་པ་ཁག་མི་མང་ཉུང་ལ་མ་ལྟོས་པར་ལས་དོན་ཚགས་ཚུད་པོ་གནང་གི་འདུག ལྷག་པར་དུ་བར་ལམ་ཞིག་ལ་ཅི་ཀ་གོ་ས་གནས་བོད་རིགས་ནང་ཁུལ་དུམ་བུ་གཉིས་ཆགས་ཏེ་ལོ་ཤས་ཕྱིན་ཡོད་ཀྱང་། ད་རེབ་ང་ཕྱིན་པའི་སྐབས་སུ་ཁོ་ཚོ་ཚང་མ་རྡོག་རྩ་ཆིག་སྒྲིལ་ཡག་པོ་ཞེ་དྲག་ཆགས་འདུག ནམ་རྒྱུན་གནད་དོན་མང་པོ་ཞིག་གླེང་སློང་བྱས་ཏེ་བསམ་ཚུལ་མ་འདྲ་བ་ཁུར་མཁན་འགའ་རེ་ཡོད་ཀྱང་། ད་རེབ་དྲི་བ་དྲིས་ལན་སྐབས་དེ་འདྲ་བྱུང་མ་སོང་ལ། གོ་སྐབས་ཆ་ཚང་ཕུལ་ཡང་དྲི་བ་འདྲི་མཁན་བྱུང་མ་སོང་། ཡིན་ནའང་། སྤྱི་ཚོགས་ཡར་རྒྱས་ལ་མཐའ་མེད་དུས་ད་དུང་བོད་མིའི་སྒྲིག་འཛུགས་ནས་མཐུན་རྐྱེན་ཅི་ཙམ་སྦྱོར་དགོས་ཀྱི་ཡོད་མེད་ཐད་སྤྱི་མཐུན་ཚོགས་པ་ཁག་ནས་རེ་བ་རྒྱག་གི་འདུག འོན་ཀྱང་དཔལ་འབྱོར་མཐུན་རྐྱེན་སོགས་གནས་སྟངས་མང་པོ་ཞིག་གི་འོག བོད་མིའི་སྒྲིག་འཛུགས་རང་ནས་ཐད་ཀར་རྒྱབ་སྐྱོར་བྱེད་ཐུབ་ཀྱི་ཡོད་མེད་དེ་རིམ་པས་བལྟ་དགོས་པ་ཞིག་རེད།
དྲི་བ། བོད་མིའི་སྒྲིག་འཛུགས་ཀྱི་འཛིན་སྐྱོང་གི་ཁྱབ་ཚད་ཐོག་དགོངས་ཚུལ་གཙོ་བོ་ག་རེ་བསླེབས་སོང་།
ལན། འཛིན་སྐྱོང་རང་གི་ཐོག་འགྲིག་མིན་གྱི་སྐད་ཆ་མང་པོ་མི་འདུག ཡིན་ནའང་། ས་གནས་གང་དུ་ཕྱིན་ཡང་དྭང་བླང་དཔྱ་ཁྲལ་ལག་དེབ་དང་འབྲེལ་བའི་དཀའ་ངལ་མང་པོ་ཤོད་ཀྱི་འདུག སྤྱི་ཡོངས་ནས་བཤད་པ་ཡིན་ན། དྭང་བླང་དཔྱ་དངུལ་འབུལ་མཁན་ཉུང་ཉུང་རེད། དཔེར་ན། ནེའུ་ཡོག་ལྟ་བུ་ཡིན་ན་བོད་མི་ ༧༠༠༠ ཡོད་པའི་སྐད་ཆ་འདུག་ཀྱང་། དྭང་བླང་དཔྱ་དངུལ་ཕུལ་མཁན་ ༡༦༠༠ ལྷག་ལས་མི་འདུག ཡིན་ནའང་དེ་ཚོ་འཛིན་སྐྱོང་བཀའ་ཤག་གིས་ཆ་ཚང་མཁྱེན་གྱི་ཡོད་པ་རེད་ལ། སྲིད་སྐྱོང་མཆོག་གིས་འཆར་ལོའི་ཕྱི་ཟླ་ ༡ པོའི་ནང་དཀའ་ངལ་དེ་དག་སེལ་ཐུབ་པ་གནང་གི་ཡིན་གསུངས་ཡོད་ས་རེད། དེ་མིན། བོད་ཡིག་གཙོ་བོར་གྱུར་བའི་ཤེས་ཡོན་སྲིད་བྱུས་དང་བོད་རྒྱ་འབྲེལ་མོལ་སོགས་ཀྱི་སྐོར་ལའང་དྲི་བ་མང་ཙམ་བསླེབས་སོང་།
དྲི་བ། ཉེ་སྔོན་ཉིད་ཀྱི་སྣེ་ཁྲིད་འོག་སྤྱི་འཐུས་ལྔ་ཡུ་རོབ་ནང་སྐོར་སྐྱོད་གནང་བའི་སྐོར་ངོ་སྤྲོད་ཅིག་གནང་རོགས།
ལན། སྤྱི་ཡོངས་ནས་ཞུས་ན། ད་རེབ་ང་ཚོ་ཕྱོགས་ཕེབས་གནང་བའི་དུས་ཚོད་དེ་རན་པོ་བྱུང་སོང་བསམ་ཡོད། གང་ཡིན་ཟེར་ན། ཀྲུའུ་ཝེ་ཆོན་གྱིས་ཡུ་རོབ་ཀྱི་རྒྱལ་ཁབ་ཁག་ཏུ་སྐོར་བ་བརྒྱབ་ཚར་མ་ཐག་དང་། བོད་བསམ་ཡས་ནས་རེད་ཟེར་བའི་གྲྭ་བ་ཞིག་དང་སྤྱི་ཚོགས་ཚན་རིག་པ་ཞིག སྨན་པ་ཞིག་བཅས་མི་གསུམ་གྱིས་ཡུ་རོབ་ཏུ་སྐོར་སྐྱོད་བྱས་ཚར་མ་ཐག་རེད། དེ་བཞིན། ཆེད་མངག་གིས་དུས་ཚོད་བསྒྲིགས་པ་མིན་ཡང་ང་ཚོ་ཕར་ཕྱིན་པའི་སྐབས་སུ། ཧོ་ལན་ཌིའི་སྲིད་བློན་དང་དབྱིན་ཇིའི་སྲིད་བློན་གཉིས་རྒྱ་ནག་ནང་ཕེབས་རན་པའི་དུས་ཚོད་ལ་ཁེལ་འདུག འབྲེལ་ཡོད་ཀྱི་ཕྱི་སྲིད་ལྷན་ཁང་དང་གྲོས་ཚོགས་འཐུས་མི་བརྒྱུད་སྲིད་བློན་ལས་ཁུངས་ལ་ཞུ་དགོས་པའི་གནད་དོན་དེ་ཚོ་གོ་བསྡུར་ལྷུག་པོ་བྱུང་སོང་། ལོ་མང་སྔོན་ནས་ཡུ་རོབ་སྤྱི་མཐུན་ནང་བོད་དོན་ཆེད་དམིགས་བསལ་འབྲེལ་མཐུད་པ་འཛུགས་དགོས་པའི་འབོད་སྐུལ་ཞུས་ཀྱང་། ཡུ་རོབ་རྒྱལ་ཁབ་ཁ་ཤས་ཀྱིས་དགག་བྱ་ལ་བརྟེན་ཏེ་འཛུགས་ཐུབ་ཡོད་པ་མ་རེད། ད་ལྟའི་ཆར་ཡུ་རོབ་སྤྱི་མཐུན་ཕྱི་སྲིད་ལས་ཁུངས་ཀྱི་ཁོངས་སུ་གཏོགས་པའི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་བསྐོ་བཞག་གནང་ཡོད་པ་མ་ཟད། ཉེ་ལམ་ཉིན་ལྔ་ཙམ་རིང་ཨ་མདོའི་ས་ཁུལ་ཁག་དང་ལྷ་ས་ཁུལ་དུ་གཟིགས་ཞིབ་གནང་ཡོད་པ་རེད། གནས་ཚུལ་དེ་གསར་པ་འདྲ་བོ་རེད། ང་ཚོ་ཡུ་རོབ་ཏུ་བསླེབས་རྗེས། ཡུ་རོབ་དང་རྒྱ་ནག་གི་ཚོགས་ཆེན་(EU-China Summits)ཟེར་བ་ཞིག་འཚོགས་བཞིན་ཡོད་སྟབས། ཚོགས་ཆེན་ཐོག་བོད་དོན་གླེང་སློང་གནང་རྒྱུའི་ཞལ་བཞེས་བྱུང་སོང་། ང་ཚོ་བོད་མི་མང་སྤྱི་འཐུས་ལྷན་ཚོགས་ཡིན་པའི་ཆ་ནས་ཕར་ཕྱོགས་ཀྱི་ཐུག་ས་ཡིན་ནའང་གྲོས་ཚོགས་འཐུས་མི་དང་གྲོས་ཚོགས་ཀྱི་ཚོགས་གཙོ་སོགས་རེད། ད་རེབ་བྷེལ་ཇམ་གྲོས་ཚོགས་གོང་མའི་ཚོགས་གཙོ་ཚོགས་གཞོན་དང་ཚོགས་མིར་མཇལ་རྒྱུ་བྱུང་བ་དང་། དབྱིན་ཇིའི་གྲོས་ཚོགས་འོག་མའི་ཚོགས་གཙོ་མཆོག་གིས་ཆེད་མངག་ང་ཚོར་ཐུག་འཕྲད་གནང་བྱུང་།
དྲི་བ། ཉེ་ཆར་ཡུ་རོབ་སྤྱི་མཐུན་ཕྱི་སྲིད་ལས་ཁུངས་ཁྱབ་ཁོངས་འགྲོ་བ་མིའི་ཐོབ་ཐང་གི་སྐུ་ཚབ་བོད་ནང་བསྐྱོད་སྐབས་མཐོང་སྣང་གང་འདྲ་བྱུང་འདུག
ལན། ཁོང་ཅག་གིས་ཐེངས་འདིར་བོད་རང་སྐྱོང་ལྗོངས་ཀྱི་མགོ་ཁྲིད་མཉམ་དུ་སྐད་ཆ་བཤད་པ་སོགས་ཀྱི་ཐོག་ནས་གནས་ཚུལ་མང་པོ་གསལ་པོ་ཆགས་འདུག ཡིན་ནའང་ཁོ་རང་གིས་དམིགས་བསལ་འབོད་སྐུལ་གནང་བ་ལྟར། རྒྱ་གཞུང་གི་ངོས་ནས་གནས་ཚུལ་དེ་ཕྱིར་བསྒྲགས་བྱས་མེད་ལ། ཡུ་རོབ་སྤྱི་མཐུན་ཕྱི་སྲིད་ལས་ཁུངས་ཀྱི་ངོས་ནས་ཀྱང་ཁྱབ་བསྒྲགས་བྱས་ཡོད་པ་མ་རེད། ངས་དེ་རིང་འདིར་ཞུ་དོན། བོད་ནང་ལ་ཡོད་པའི་བོད་མི་ཚོས་ཡུ་རོབ་སྤྱི་མཐུན་གྱིས་བོད་དོན་ལ་དོ་སྣང་ཤུགས་ཆེན་པོ་གནང་གི་ཡོད་པ་དང་སེམས་འཚབ་ཡོད་པ་དེ་ཧ་གོ་ན་བསམ་པ་ཡིན། གནས་ཚུལ་ཁག་ཅིག་འདིར་ཞུ་དགོས་དོན་མི་འདུག ཁོ་ཚོར་གནད་དོན་དེ་ཚོ་མཇུག་སྐྱོང་བྱེད་བའི་ཆོད་སེམས་བརྟན་པོ་ཡོད་སྟབས། མ་འོངས་པར་མཇུག་སྐྱོང་གི་ལས་གཞི་མང་པོ་ཡོང་སྲིད་པ་རེད།
དྲི་བ། སྤྱི་འཐུས་ཚོ་ཕྱི་རྒྱལ་ཁག་ཏུ་སྐོར་སྐྱོད་གནང་གི་ཡོད་པ་དེ་ཐག་གཅོད་བྱེད་སྟངས་གང་འདྲ་ཡོད་པ་དང་། དེ་ལ་འགྲོ་སོང་ཇི་ལྟར་གཏོང་གི་ཡོད་དམ།
ལན། ནམ་རྒྱུན་ཚོགས་གཙོ་ཚོགས་གཞོན་ཡིན་ན་རེད། སྤྱི་འཐུས་རྒྱུན་ལས་ཀྱི་སྐུ་ཚབ་ཚོགས་ཆུང་ཡིན་ནའང་རེད། མང་ཆེ་བ་ཞིག་ལ་གདན་ཞུ་གནང་མཁན་གྱི་ཕྱག་ཡིག་ཕུལ་གྱི་ཡོད་པ་དང་། དེ་ནས་སྤྱི་འཐུས་རྒྱུན་ལས་ནང་ལོགས་གྲོས་བསྡུར་བྱས་ཏེ་འགྲོ་དང་མི་འགྲོ་ཐག་གཅོད་ཀྱི་ཡོད་པ་རེད། འགྲོ་སོང་དེ། སྤྱི་འཐུས་ལྷན་ཚོགས་ཀྱི་ངོས་ནས་བང་མཛོད་ནས་གཏོང་མི་དགོས་པའི་ཐོག་ནས་འགྲོ་བཞིན་ཡོད་པ་རེད། གོང་དུ་ཞུས་པ་ལྟར། ད་རེབ་ཡུ་རོབ་རྒྱལ་ཁབ་ཁག་ལྔའི་ནང་འགྲོ་བའི་སྐབས་ལའང་རྒྱལ་སྤྱིའི་བོད་དོན་ལས་འགུལ་ཁང་གིས་འགྲོ་སོང་ཆ་ཚང་བཏང་བ་རེད། ༢༠༠༨ ལོའི་ཕྱི་ཟླ་ ༡༢ པའི་ནང་ང་ཚོགས་གཙོ་ཆགས་པ་ནས་བཟུང་ད་ལྟའི་བར་དུ་༧གོང་ས་མཆོག་གི་བཀའ་འབྲེལ་དང་བསྟུན་ཏེ་ཐེངས་གཉིས་གསུམ་ཙམ་ལ་བཅར་བ་དང་། སྐབས་དེའི་འགྲོ་སོང་བང་མཛོད་ནས་བཏང་བ་རེད་མ་གཏོགས་གཞན་པ་ཆ་ཚང་མགྲོན་འབོད་བྱེད་མཁན་ཚོའི་ངོས་ནས་བཏང་བ་རེད། མ་འོངས་པར་དཔལ་ལྡན་ཚོགས་གཙོ་གཞོན་པའི་དབུས་སྤྱི་འཐུས་ཀྱི་སྐུ་ཚབ་ཚོགས་ཆུང་ཡུ་རོབ་ཤར་ངོས་ཀྱི་རྒྱལ་ཁབ་ཁག་གི་ནང་འགྲོ་རྒྱུའི་ལས་རིམ་དེའི་འགྲོ་སོང་ཡང་རྒྱལ་སྤྱིའི་བོད་དོན་ལས་འགུལ་ཁང་གིས་ཆ་ཚང་གཏོང་རྒྱུ་ཞལ་བཞེས་ཐོབ་ཡོད། གལ་སྲིད་ས་གནས་གཞན་པ་ཚོར་འགྲོ་སོང་གཏོང་མཁན་མ་བྱུང་བ་ཡིན་ན། གཞུང་གི་བང་མཛོད་ནས་གཏོང་དགོས་ཐུག་སྲིད་པ་རེད། དེ་ནས་ནམ་རྒྱུན་ལས་བྱེད་གཞན་པ་ཚོའི་ཟུར་ཕོགས་བང་མཛོད་ནས་གཏོང་གི་ཡོད་པ་རེད།
དྲི་བ། གཞུང་སྒེར་གཉིས་ངོས་ནས་ཕྱི་རྒྱལ་ཁག་ཏུ་བོད་མི་མང་པོ་གནས་སྤོ་བྱེད་ཀྱི་ཡོད་སྟབས། མ་འོངས་པར་བཙན་བྱོལ་སློབ་གྲྭ་དང་དགོན་སྡེ། གཞིས་ཆགས་ཁག་སྲ་བརྟན་ཡོང་མིན་ཐོག་དགོངས་འཆར་གང་འདྲ་ཡོད་དམ།
ལན། དེང་སང་ཁྲིམས་མཐུན་དང་ཁྲིམས་མཐུན་མ་ཡིན་པའི་ཐོག་ནས་བོད་པ་མང་པོ་ནུབ་ཕྱོགས་རྒྱལ་ཁབ་ཁག་ཏུ་འགྲོ་བཞིན་ཡོད་ཀྱང་། དེ་འགོག་ཐབས་ཡོད་པ་མ་རེད། དེའི་ཁར་བོད་མིའི་སྒྲིག་འཛུགས་ཀྱི་ངོས་ནས་ཀྱང་འཆར་གཞི་དང་ལྡན་པའི་ཐོག་ནས་ཁེ་ན་ཌར་བོད་མི་ཆིག་སྟོང་གཏོང་གི་ཡོད། དེ་བཞིན་དོན་དག་འགྲུབ་པ་ཡིན་ན། ཨ་རིར་ ༥༠༠༠ གཏོང་བའི་ལས་རིམ་ཡོད་པ་རེད། སྤྱིར་བཏང་གཞུང་གི་ལས་བྱེད་དང་དགེ་རྒན་མང་པོ་ཞིག་ཐོན་འགྲོ་ཡི་ཡོད་ཀྱང་། ཁོ་ཚོ་ཕྱི་རྒྱལ་དུ་བསླེབས་རྗེས་མུ་མཐུད་དུ་བོད་རིགས་སྤྱི་མཐུན་ཚོགས་པ་སོགས་ཀྱི་ནང་དུ་ཕྱག་ལས་གནང་སྟེ་ཕར་ཕྱོགས་སུ་ཡོད་པའི་བོད་པ་ཚོར་ཕན་ཆེན་པོ་ཐོགས་ཀྱི་འདུག ཕྱོགས་གཅིག་ལ་གནོད་པ་དང་ཕྱོགས་གཞན་ཞིག་ལ་ཕན་གྱི་ཡོད་པ་མང་པོ་ཡོང་གི་འདུག ད་ལྟའི་ཆར་རྒྱ་བལ་འབྲུག་གསུམ་ནང་གཞིས་ཆགས་ཁག་ཆེ་ཆུང་ ༥༤ ཡོད་པ་དང་། མ་འོངས་པར་ཁུངས་འཁྱོལ་ལ་མ་འཁྱོལ་ལ་བྱས་ཏེ་སྡོད་པ་ལས། གཞིས་ཆགས་ཆུང་བ་ཚོ་ཆེ་བ་དང་ཟླ་སྒྲིལ་བཏང་ན་གང་འདྲ་ཡོང་ས་རེད། དེ་བཞིན་སློབ་གྲྭ་ཁག་ཀྱང་ས་གནས་ཅིག་ལ་མང་པོ་མེད་པར་ཟླ་སྒྲིལ་གཏོང་བ་དང་། སྨན་ཁང་དང་རྒན་གསོ་ཁང་དེ་ཚོ་ཡང་རྒྱ་ཆེ་རུ་དང་མཐུན་རྐྱེན་ཡག་ཏུ་གཏོང་ཐུབ་ན། སྤྱི་ཚོགས་ཡུན་རིང་གནས་ཐུབ་པར་ཕན་ངེས་རེད་བསམ་གྱི་འདུག གང་ལྟར་འདས་པའི་ལོ་བཅུ་བཅོ་ལྔའི་ཉམས་མྱོང་ལ་བལྟས་ནས་འབྱུང་འགྱུར་གྱི་ལོ་བཅུ་བཅོ་ལྔའི་ནང་ང་ཚོའི་སྤྱི་ཚོགས་འདི་གང་འདྲ་ཆགས་ས་རེད། དེ་ལ་དཔག་པའི་འཆར་གཞི་ཞིག་བཟོ་བའི་དུས་ལ་བབ་འདུག་ཅེས་ངས་ཡང་ཡང་བཤད་ཀྱི་ཡོད། གཙོ་བོ་འགན་དེ་འཛིན་སྐྱོང་བཀའ་ཤག་གིས་འཁུར་དགོས་ཀྱི་ཡོད་ལ། ང་ཚོ་སྤྱི་འཐུས་ལྷན་ཚོགས་ནས་མཐུན་སྦྱོར་ག་རེ་ཞུ་དགོས་ཞུ་ཡི་ཡིན་ཞེས་རྗོད་ཀྱི་ཡོད། ཕྱི་རྒྱལ་ལ་ཡོད་པའི་བོད་རིགས་སྤྱི་མཐུན་ཚོགས་པ་དང་བོད་རིགས་ཚོགས་པ་དེ་ཚོ་རྩ་ཁྲིམས་ཀྱི་སྒྲོམ་གཞིའི་འོག་བཞག་ན་གནས་སྟངས་གང་འདྲ་ཡོང་ས་རེད། དྷ་རམ་ས་ལར་ཡོད་པའི་བོད་མིའི་སྒྲིག་འཛུགས་དང་ཁ་འཐོར་དུ་འགྲོ་བཞིན་པའི་བོད་པའི་སྤྱི་ཚོགས་ཕན་ཚུན་བར་གྱི་འབྲེལ་བ་དམ་ཟབ་ཡོང་ཐབས་ཆེད། སྤྱི་འཐུས་ལྷན་ཚོགས་ཀྱི་ངོས་ནས་ཚོགས་ཆུང་ཆེད་འཛུགས་བྱས་ཡོད་ལ། ད་ལྟ་ནས་འཛིན་སྐྱོང་གིས་མགོ་བཙུགས་ཏེ་ཉམས་ཞིབ་ཚད་ལྡན་བྱས་ནས་མ་འོངས་སྲིད་ཇུས་དང་ལས་འཆར་བང་འགྲིག་པོ་ཞིག་བཟོ་རྒྱུ་ཧ་ཅང་གལ་ཆེན་པོ་རེད།
གསར་འགོད་པ། པདྨ་མཚོ།
ངས་ག་དུས་ཡིན་ཡང་དྲ་འབུ་དག་ལ་བཤད་རྒྱུར། ཁྱེད་ཚོས་བོད་སྤྱི་བའི་དོན་དུ་དང་། ཡང་ན་སྤྱི་ཚོགས་གང་ཡང་རུང་བར་འགན་ཁུར་ལྡན་པའི་སྐད་ཆ་བཤད་འདོད་ན་དང་པོར་རང་ཉིད་ཀྱིས་གནས་ལུགས་སྒྲིབ་བྱེད་དང་། དྲང་བདེན་གྱི་ལམ་བུ་སྒྲིབ་ཀྱི་མིག་ཤེལ་ནག་པོ་དེ་མར་ཕུད་ནས་སྐད་ཆ་རེ་ཤོད་དང་མི་བདེན་ཁ་སྦྱིན་སྲིད། དེ་མིན་ལོག་ཏམ་དེ་དག་ལ་སུ་གང་གིས་ཡིད་ཆེས་དང་བདེན་ཁ་སྦྱིན་མི་སྲིད། གཞིས་མི་ཕྱི་རྒྱལ་གནས་སྤོས་ལས་གཞི་འདི་ད་ལྟའི་སྲིད་སྐྱོང་གིས་འགོ་བཙུགས་པ་ཡིན་ནམ་སོམས་ཤིག ཁཐཡེད་ཚོས་སྨྱོས་ཆུ་ནི་མཐུང་ཡོད་ཚོད་མ་རེད།སྐབས་འདིར་ངས་ གོང་གསལ་གནས་ཚང་མིང་ཅན་དང་། འཇིག་མེད་སེང་གེ་གཉིས་ལ་ཟེར་གྱི་ཡོད།
ད་ཡིན་ན་གཞིས་ཆགས་དང་སློབ་གྲྭ དགོན་པ་གསུམ་ཟླ་སྒྲིལ་བཏང་ནས་མི་འབོར་ཇེ་མང་དང་། ཞལ་འདེབས་སྣ་མང་གི་ལམ་ཁ་ཞིག་ཡིན་སྲིད། གུང་ཁྲན་ཏང་གིས་ཀྱང་བོད་ནང་དེ་ག་རང་གནང་གི་ཡོད་པ་རེད།
ཚོགས་གཙོ་མཆོག་གིས་བཀའ་གནང་བ་ལྟར་གཞིས་ཆགས་དང་སློབ་གྲྭ་སོགས་ཚགས་ཚུད་ཡར་རྒྱས་གཏོང་རྒྱུ་དེ་གཙོ་བོ་འཛིན་སྐྱོང་གིས་འཆར་གཞི་དང་བང་རིམ་སྒྲིག་དགོས། འོན་ཀྱང་ད་ལྟའི་བཀའ་ཤག་གིས་གཞིས་ཆགས་སྲ་བརྟན་མི་གཏོང་བར་གཙོ་ཆེར་གཞིས་མི་ཕྱི་རྒྱལ་ལ་གཏོང་རྒྱུར་ཤུགས་སྣོན་རྒྱག་གི་ཡོད།
ཚོགས་གཙོ་མཆོག་གི་དགོངས་པར་གཞིས་ཆགས་དང་སློབ་གྲྭ་སོགས་སྲ་བརྟན་བྱས་ཏེ། བོད་ཀྱི་གནད་དོན་ལམ་སེང་ཡལ་མི་འགྲོ་བའི་ཕུགས་དམིགས་བཟུང་ཡོད་པ་དང་། སྲིད་སྐྱོང་གིས་གཞིས་མི་ཕྱི་རྒྱལ་ལ་བཏང་ནས་འཚོ་བའི་དཀའ་ངལ་སེལ་ཐབས་བྱེད་ཀྱི་ཡོད། འདི་གཉིས་ནི་དམིགས་ཡུལ་མི་འདྲ་བ་དང་བྱ་ཐབས་མི་འདྲ་བ་ཞིག་རེད།
ཡང་སྙིང་ང་ཚོར་ཅི་ཞིག་དགོས་མིན་བོད་མི་མི་རེ་ངོ་རེས་མནོ་བསམ་བཞེས་གལ།
འདི་ལྟར་བསམ་ཡོང་དུས། ཡུན་རིང་ཉམས་མྱོང་ཡོད་པའི་ཚོགས་གཙོ་མཆོག་གིས་ད་འཛིན་སྐྱོང་ནང་ཕྱག་ལས་གནང་རན་པའི་དུས་ལ་ཐོན་འདུག་དྲན།