དེ་རིང་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ཤེས་རིག་ཚོགས་ཆེན་སྟེང་གསུང་བཤད་གནང་སྟེ། ཤེས་ཡོན་སྲིད་བྱུས་ལག་ལེན་བྱེད་རྒྱུར་དགེ་རྒན་དང་ཕ་མ་སློབ་ཕྲུག་གསུམ་གལ་ཆེ་ཤོས་ཆགས་ཡོད་པ་དང་། ཁོང་གསུམ་རྡོག་སྒྲིལ་བ་ཡིན་ན་འཛིན་སྐྱོང་ལ་འདོད་མོས་མེད་ཀྱང་བྱེད་ཐབས་ཆེན་པོ་མེད་སྐོར་གསུངས་སོང་།
དེ་རིང་ཤེས་རིག་ཚོགས་ཆེན་ཐེངས་དྲུག་པའི་ཉིན་མཐའ་མའི་སྟེང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ངྷ་ཤོས་བོད་ཁྱིམ་ཚོགས་ཁང་དུ་ཕེབས་ཏེ། ཤེས་རིག་ལས་ཁུངས་ཀྱི་དྲུང་ཆེ་གཙོས་པའི་མཛད་གཙོ་རྣམ་པ་དང་། བོད་སློབ་འཛིན་ཚོགས་དང་བོད་ཁྱིམ་གཉིས། བལ་ཡུལ། སམ་བྷོ་ཊ། སྒེར་གྱི་སློབ་གྲྭ་ཁག་བཅས་ནས་ཕེབས་པའི་ཚོགས་བཅར་བ་ ༢༡༥ ལྷག་ལ། ཤེས་
ཟམ་གདོང་རིན་པོ་ཆེ་མཆོག་གིས་ང་ཚོའི་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ནང་། ཤེས་ཡོན་གྱི་དགོས་པ་དང་ཤེས་ཡོན་བསྐྲུན་པའི་དམིགས་ཡུལ། ཤེས་ཡོན་གྱི་ངོས་འཛིན་བཅས་གསལ་བོ་སྟོན་པའི་ཐབས་ཤེས་གནང་ཡོད་པ་དང་། རང་དབང་དང་གཞན་ཕན། རྒྱུད་འཛིན། གསར་གཏོད་བཅས་ནུས་པ་ ༤ ཆ་ཚང་བ་མི་ཞིག་གི་གཤིས་རྒྱུད་ལ་འཇགས་པ་ཡིན་ན། སློབ་སྦྱོང་བྱས་པའི་དམིགས་ཡུལ་ཚང་ཡོད་པ་དང་། དེ་ཡང་ཐོག་མར་སློབ་ཚན་གྱི་འཆར་གཞི་དང་འཛིན་གྲྭའི་ནང་གི་སློབ་ཁྲིད། ཕྲུ་གུ་གསོ་སྐྱོང་བྱེད་སྐབས། ཕ་མའི་ལས་འགན་བཅས་གསལ་བོ་ཆགས་པ་ཡིན་ན། ཤེས་ཡོན་དེ་དགོས་པ་ཡོད་པ་ཞིག་ཆགས་ཀྱི་ཡོད་སྟབས། ཤེས་ཡོན་སློབ་སྦྱོང་ཐོན་པའི་མི་ཞིག་ལ་བཟང་སྤྱོད་དང་ཡ་རབས་ཀྱི་སྤྱོད་སྟངས་དེ་ཟུར་དུ་བསླབ་དགོས་པ་ཞིག་ཆགས་པ་ཡིན་ན། མི་དེའི་རང་བྱུང་གི་ཁམས་དང་འབྲེལ་བ་ཞིག་ཡོང་རྒྱུ་ཁག་པོ་ཡིན་སྐོར་གསུངས་སོང་།
ཡང་ཤེས་ཡོན་སྲིད་བྱུས་ལག་ལེན་ཁྲོད་དགེ་རྒན་ཚོས་ཐབས་ལམ་ག་རེ་བསྟེན་དགོས་མིན་ཐད། “ང་ཚོའི་སྲོལ་རྒྱུན་ནང་ཐབས་ལམ་མང་པོ་གསུངས་ཡོད་པ་རེད། དེ་དག་ལས་གལ་ཆེ་ཤོས་འདུལ་བའི་དངོས་པོ་བཞིའི་ནང་ནས་དོན་མཐུན་པ་དང་དོན་སྤྱོད་པ་ཞེས་པ་དེ་ཆགས་ཡོད། ཕྲུ་གུར་རང་དབང་ཡོད་པའི་སློབ་སྦྱོང་ཞིག་སྤྲོད་དགོས་ན། དགེ་རྒན་རང་ཉིད་བསམ་སྤྱོད་རང་དབང་ཡོད་པ་ཞིག་དགོས་ཀྱི་ཡོད་པ་རེད། ཕྲུ་གུ་ལ་གཞན་ཕན་གྱི་ནུས་པ་སྤྲོད་དགོས་ཀྱི་ཡོད་ན། དགེ་རྒན་རང་ཉིད་རང་ལ་གཞན་གཙོ་བོར་འཛིན་མཁན་དང་ལྷག་བསམ་རྣམ་དག་ཡིན་མཁན་ཞིག་དགོས་ཀྱི་ཡོད་པ་རེད། དེ་བཞིན། སྲུང་སྐྱོབ་དང་དམིགས་ཡུལ་གཞན་ཚང་མ་ཡང་དགེ་རྒན་རང་གི་མི་ཚེ་ནང་འགྲུབ་མེད་པ་ཡིན་ན། སློབ་ཕྲུག་ལ་དེ་དགོས་པ་རེད་ཅེས་ལབ་པ་ཡིན་ན་ཨ་ཅོག་ལ་འགྲོ་བ་ཞིག་ཆགས་ཀྱི་མེད་སྟབས། དོན་མཐུན་པ་དང་དོན་སྤྱོད་པ་ཞེས་གང་གཞན་ལ་བདག་སྤྲོད་བྱས་པ་དེ་རང་ཉིད་ཀྱི་ཉམས་ལེན་དུ་ཡོད་པ་རེད། གང་གཞན་ལ་བདག་སྤྲོད་བྱས་པ་དེ་དང་མཐུན་པར་རང་གི་མི་ཚེ་སྐྱེལ་སྟངས་མཐུན་པ་དགོས་པ། དེ་འདྲ་མ་བྱུང་བ་ཡིན་ན། རང་ཉིད་གང་སློབ་སྟོན་བྱས་པའི་ཡོན་ཏན་དེའི་ནང་དམིགས་པ་ཞིག་མ་བྱུང་བ་ཡིན་ན། བུམ་པ་སྟོང་པ་ནས་བུམ་པ་གཞན་ལ་ལྡུག་རྒྱུ་ལྷག་གི་མེད་སྟབས། གལ་ཆེ་ཤོས་དོན་མཐུན་པ་དང་དོན་སྤྱོད་པའི་གནས་སྟངས་ཀྱི་ཆ་ཤས་ལེན་རྒྱུ་དང་། རྒྱུན་དུ་སློབ་ཕྲུག་དང་འདུ་ཤེས་ལེན་པའི་སྐབས་སུ། ཐོག་མར་སློབ་ཕྲུག་གི་སེམས་ལ་ཞུམ་པ་མེད་པ་བཟོ་རྒྱུ་དང་། དེའི་རྗེས་སུ་སློབ་ཚན་བསླབ་རྒྱུ། བསླབ་པའི་རྗེས་སུ་དགེ་ཕྲུག་ལ་དོགས་པ་དང་དཀའ་ངལ་ཡོད་པ་ཡིན་ན། དེ་དག་འཛིན་གྲྭའི་ནང་སློབ་ཚན་བསླབ་ཚར་བ་ཙམ་གྱི་འཐུས་པར་མ་གཟིགས་པར། ག་དུས་ཡིན་ཡང་དེའི་རྒྱུན་འཁྱོངས་ཀྱི་དཀའ་ངལ་སེལ་ཐུབ་པ་ཡིན་ན། རྣམ་པ་ཀུན་ཏུ་དགེ་རྒན་གྱི་མཚན་ཉིད་ཚང་བ་ཞིག་ཆགས་ཐུབ་པའི་རེ་བ་ཡོད་པ་རེད་ལ། ཤེས་ཡོན་སྲིད་བྱུས་ནང་དམིགས་ཡུལ་བཞག་པ་ལྟར། འགྲུབ་ཐུབ་པའི་གནས་བབ་ཀྱང་ཡོད་པ་རེད། རེ་བ་ཡང་རྒྱག་ཆོག་གི་རེད། ” ཅེས་གསུངས་བྱུང་།
དྲི་བ་དྲིས་ལན་སྐབས་ཁོང་གིས། ཤེས་ཡོན་སྲིད་བྱུས་དེ་ཐབས་ལམ་ཚང་མ་ཡོད་པའི་ལམ་སྟོན་གྱི་སྒྲོམ་གཞི་ཡིན་པའི་ཁུལ་རེད། དེ་བརྒྱ་ཆ་ཁ་ཤས་ལག་ལེན་བསྟར་ཐུབ་པ་ཡིན་ན་གྲུབ་འབྲས་བརྒྱ་ཆ་ཁ་ཤས་དང་། བརྒྱ་ཆའི་བརྒྱ་ལག་ལེན་བསྟར་ཐུབ་པ་ཡིན་ན་གྲུབ་འབྲས་བརྒྱ་ཆའི་བརྒྱ་ཐོན་ངེས་པ་རེད། ལམ་སྲོལ་གང་ཞིག་ཡིན་ཡང་བརྒྱ་ཆའི་བརྒྱ་ལག་ལེན་བསྟར་རྒྱུ་ཧ་ཅང་ཁག་པོ་ཡིན་ནའང་། གཞན་དབང་སྟབས་བསྟུན་བྱེད་མི་དགོས་པའི་གནས་བབ་ལ་བསླེབ་སྐབས། ང་རང་ཚོར་སྲིད་བྱུས་ལག་ལེན་བསྟར་བའི་འདུན་པ་ཡོད་པ་ཡིན་ན། གཞི་རྩ་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་ལ་ཕབ་པའི་ཤེས་ཡོན་སྲིད་བྱུས་དེ། གཞན་དབང་སྟབས་བསྟུན་བྱེད་མི་དགོས་པའི་སྐབས་སུ་གང་འདྲ་ཞིག་ལག་ལེན་བསྟར་ཐུབ་མིན་དང་། གཞན་དབང་སྟབས་བསྟུན་བྱེད་མི་དགོས་པ་ཙམ་གྱིས་བརྒྱ་ཆའི་བརྒྱ་བསྟར་ཆོག་ཆོག་ཆགས་ཀྱི་རེད་དམ་ཅེ་ན། དེ་ལ་ཕྱོགས་མང་པོར་བལྟ་དགོས་པ་ཞིག་རེད། ཤེས་ཡོན་སྲིད་བྱུས་ལག་ལེན་བསྟར་མ་བསྟར་ཟེར་བ་དེ་འཛིན་སྐྱོང་ལ་རག་ལས་བ་རེད་དེ། རག་ལས་ས་གཙོ་བོ་དེ་དགེ་རྒན་དང་ཕ་མ། ཕྲུ་གུ་གསུམ་རེད། དགེ་རྒན་དང་སློབ་ཕྲུག་གི་མངོན་འདོད་ཆ་མཉམ་པ་བྱུང་བ་ཡིན་ན། ཕ་མའི་མངོན་འདོད་མ་མཐུན་པ་ཡིན་ནའང་། ཉེན་ཁ་ཆུང་བ་ཡོད་པ་རེད། ཕ་མ་དང་ཕྲུ་གུའི་མངོན་འདོད་གཅིག་པ་ཆགས་ཏེ། དགེ་རྒན་གཅིག་པུས་དེའི་ཁ་གཏད་གཅོག་དགོས་འཁེལ་ན་དཀའ་ལས་ཁག་པོ་ཡོད་པ་རེད། དགེ་རྒན་དང་སློབ་ཕྲུག་གཉིས་གཅིག་པ་ཆགས་པ་ཡིན་ན། མཉམ་རུབ་ཐོག་ཕ་མར་ཁ་གཏད་གཅོག་བདེ་བ་ཡོད་པ་རེད། དེ་གསུམ་གྱི་ནང་ནས་དགེ་རྒན་གཙོ་བོ་རེད། དགེ་རྒན་ཚད་ལྡན་ཞིག་དང་འདང་ངེས་ཤིག་བྱུང་བ་ཡིན་ན། དགེ་རྒན་གྱིས་སློབ་ཕྲུག་གི་ཁ་ལོ་བསྒྱུར་ཐུབ་ཀྱི་རེད། དེ་བསྒྱུར་ཐུབ་པ་ཡིན་ན་ཕྲུ་གུས་ཕ་མའི་ཁ་ལོ་བསྒྱུར་ཐུབ་ཀྱི་རེད་བསམ་གྱི་འདུག ད་ལྟའི་གནས་སྐབས་སུ་དགེ་རྒན་ཚོར་ཤེས་ཡོན་སྲིད་བྱུས་ལག་བསྟར་བྱ་རྒྱུའི་འདུན་པ་ཡོད་ནའང་། དེ་དང་མཐུན་པ་ཞིག་སློབ་ཕྲུག་མི་འགྲོ་བ་དེ། སློབ་ཕྲུག་ཚོའི་ནང་གི་ཁོར་ཡུག་དང་ཕ་མའི་ལམ་སྟོན་བྱེད་སྟངས་ཀྱི་ཐོག་ནས་འགོག་རྐྱེན་འཕྲད་བསྡད་པ་མང་པོ་ཡོད་པ་རེད། འཛིན་སྐྱོང་གི་བྱེད་སྟངས་འགྲིག་མ་འགྲིག་དེ། དགེ་རྒན་དང་ཕ་མ། ཕྲུ་གུ་གསུམ་གྱི་འདུན་པ་གཅིག་གྱུར་བྱུང་བ་ཡིན་ན། དམངས་གཙོའི་སྤྱི་ཚོགས་ནང་འཛིན་སྐྱོང་དེའི་མཉམ་དུ་འགྲོ་དགོས་པ་ཞིག་ཆགས་པ་ལས། འཛིན་སྐྱོང་གི་འགོག་རྐྱེན་བཟོ་བའི་གནས་སྟངས་ཤིག་ཡོང་གི་མ་རེད་བསམ་གྱི་འདུག ཡང་དག་པའི་ཤེས་ཡོན་སྤྲོད་པ་ལ་ཤེས་ཡོན་སྲིད་བྱུས་ལག་ལེན་བསྟར་དགོས་ཀྱི་ཡོད་པ་རེད། དེ་ལག་ལེན་བསྟར་བའི་ལག་ཆ་དང་པོ་དགེ་རྒན་རེད། དགེ་རྒན་གྱིས་སྲིད་བྱུས་མཁྱེན་པ་དང་ཡིད་ཆེས་ཡོད་པ། ལག་ལེན་བསྟར་བའི་ནུས་པ་ཡོད་པ་ཡིན་ན། དགེ་རྒན་གྱི་སློབ་ཕྲུག་དང་ཕ་མས་ཁ་ལོ་བསྒྱུར་ཐུབ་ཀྱི་རེད། གལ་ཆེ་ཤོས་གཉིས་པ་སློབ་ཕྲུག་རེད། སློབ་ཕྲུག་གང་དུ་འཁྲིད་མིན་དེ་དགེ་རྒན་དང་ཕ་མ་གཉིས་ལ་རག་ལས་ཡོད་པ་རེད། ཅེས་གསུངས་བྱུང་།
བཀའ་ཟུར་མཆོག་གིས་སློབ་སྦྱོང་གི་བརྒྱུད་ལམ་ཐོག་རང་གི་སྐད་ཡིག་གལ་ཆེན་རང་བཞིན་ཐད། “ སློབ་སྦྱོང་གི་བརྒྱུད་ལམ་རང་གི་ཕ་སྐད་ལས་མེད་པ་དེ་སྲོལ་རྒྱུན་པ་ཚོས་འདོད་ཀྱི་ཡོད་པ་རེད་ལ། དེང་རབས་ཀྱི་ཤེས་ཡོན་པ་ཚོས་ཀྱང་དེ་ལྟར་ཁས་ལེན་གྱི་ཡོད་པ་རེད། སྔོན་མ་དབྱིན་ཇིའི་འོག་ལོ་མང་བསྡད་པའི་རྒྱ་གར་ལྟ་བུའི་ནང་ད་དུང་ཡང་ཤེས་ཡོན་གྱི་བརྒྱུད་ལམ་གཞན་སྐད་ནང་ལྷག་ཡོད་པ་རེད་མ་གཏོགས། ཡར་ཐོན་ཆེན་པོ་ཕྱིན་ཟིན་པའི་རྒྱལ་ཁབ་གང་ཡིན་ཡང་། ཤེས་ཡོན་གྱི་བརྒྱུད་ལམ་རང་སྐད་ལས་སྐད་ཡིག་གཞན་པའི་ནང་ཧ་ལམ་མེད་བསྡད་པ་ཞིག་རེད། ལར་ནས་མི་རིགས་ཀྱི་དབྱེ་བ་དེ་སྐད་ཡིག་གི་ཐོག་ནས་བྱས་པ་རེད་མ་གཏོགས་གཞན་ཡོད་པ་མ་རེད། མི་རིགས་ཤིག་ལ་ངོས་འཛིན་བྱེད་དགོས་ཀྱི་ཡོད་ན། རང་གི་སྐད་ཡིག་གཙོ་བོ་དང་སློབ་སྦྱོང་གི་བརྒྱུད་ལམ་ཚང་མར་སྤྱོད་དགོས་པ་དེ་གལ་ཆེན་པོ་རེད། སྐད་དང་བསམ་བློ་གཉིས་མཉམ་དུ་འགྲོ་ཡི་ཡོད་པ་རེད། བེད་སྤྱོད་བྱས་པའི་སྐད་དེ་མི་རིགས་གཞན་པའི་སྐད་ཡིག་བེད་སྤྱོད་བྱས་པ་ཡིན་ན། བོད་པའི་རིགས་རྒྱུད་ལས་སྐྱེས་ཀྱང་། ཁོའི་ལུས་ཀྱི་གྲུབ་ཆ་བོད་པའི་ཤ་ཁྲག་ལས་གྲུབ་ཡོད་ཀྱང་། སེམས་ཀྱི་གྲུབ་ཆ་དེ་བོད་པའི་སེམས་ཀྱི་གྲུབ་པ་ཞིག་ཆགས་ཀྱི་ཡོད་པ་མ་རེད། དེར་བརྟེན། སྤྱིར་སློབ་སྦྱོང་གི་བརྒྱུད་ལམ་དང་། ལྷག་པར་དུ་དམའ་རིམ་དང་གཞི་རིམ་གྱི་སློབ་སྦྱོང་གི་བརྒྱུད་ལམ་དེ་བོད་སྐད་ཡིག་ཁོ་ན་ཡིན་དགོས་པ་རེད། ང་ཚོ་འགྱུར་བ་འགྲོ་དགོས་ཀྱི་ཡོད་ན། དེ་དག་ཚང་མ་བོད་ཀྱི་སྐད་ཡིག་གི་ཐོག་མ་བསྒྱུར་བ་ཡིན་ན་འགྲུབ་ཐབས་མེད་པ་གསལ་བོ་རེད། ” ཅེས་གསུངས་བྱུང་།
ཤེས་ཡོན་སྲིད་བྱུས་ཀྱི་དགོས་པ་དང་དམིགས་ཡུལ་འགྲུབ་པར་འཛིན་སྐྱོང་གི་ངོས་ནས་གང་འདྲ་བྱ་དགོས་མིན་ཐད་ཁོང་གིས། “ སྤྱིར་བཏང་ཤེས་ཡོན་ལམ་སྲོལ་ནང་གལ་གནད་ཆུང་ཤོས་འཛིན་སྐྱོང་རེད། དགེ་རྒན་དང་ཕ་མ་སློབ་ཕྲུག་གསུམ་རྡོག་སྒྲིལ་བ་ཡིན་ན། འཛིན་སྐྱོང་ལ་མཐུན་རྐྱེན་བསྐྲུན་རྒྱུ་ལས་དམིགས་བསལ་བྱེད་རྒྱུ་ཡོད་པ་མ་རེད། དགེ་རྒན་ཕ་མ། སློབ་ཕྲུག་གསུམ་རྡོག་མ་སྒྲིལ་བ་ཡིན་ན། འཛིན་སྐྱོང་ལ་ཡང་བསྐྱར་བྱ་རྒྱུ་གང་ཡང་ཡོད་པ་མ་རེད། ཤེས་ཡོན་ལམ་སྲོལ་ཐོག་རང་དབང་དགོས་ལབ་པ་དེ་སྲོལ་རྒྱུན་དང་དེང་རབས་གཉིས་ཀྱིས་ལབ་བསྡད་པ་ཞིག་རེད། རྒྱ་གར་གྱི་མཐོ་རིམ་སློབ་གྲྭ་ཁག་ལ་མཚོན་ནའང་། སོ་སོ་རང་གིས་བྱེད་ཀྱི་ཡོད་པ་ལས། འཛིན་སྐྱོང་ལ་དམིགས་བསལ་ལས་རྒྱུ་ཡོད་པ་མ་རེད། གཙུག་ལག་ཁང་ཁ་ཤས་ལ་ཉེ་བའི་རིག་བདག་བསྐོ་བཞག་སོགས་མ་གཏོགས་རང་སྐྱོང་གི་གནས་བབ་རེད། དཀའ་ལས་གང་ནས་ལྷག་གི་རེད་ཅེ་ན། འཛིན་སྐྱོང་གི་ཕྱོགས་ལ་དགོས་པའི་དགོས་མཁོ་གཅིག་ཡོད་པ་དེ་ཆབ་སྲིད་ཀྱི་ཆོད་སེམས་རེད། འཛིན་སྐྱོང་གི་མི་ལ་ཤེས་ཡོན་སྲིད་བྱུས་ལག་ལེན་བསྟར་རྒྱུ་ཡིན་བསམ་པའི་ཆབ་སྲིད་ཀྱི་ཆོད་སེམས་མེད་པ་ཡིན་ན། འཐུས་ཤོར་འགྲོ་སྲིད་ཀྱི་རེད། དེ་ཡོད་པ་ཡིན་ན་འགྲིག་པ་རེད། ཤེས་ཡོན་སྲིད་བྱུས་ལག་ལེན་ཁྲོད་ཀྱི་འགན་ཆུང་ཤོས་འཛིན་སྐྱོང་རེད། མཐུན་རྐྱེན་སྦྱོར་བ་དང་སྒྲིག་འཛུགས་ཀྱི་རྣམ་གཞག་བཤད་པ་ལས། དངོས་སུ་ལག་ལེན་བྱེད་པར་འཛིན་སྐྱོང་ལ་བྱེད་ཐབས་ཡོད་པ་རེད། འཛིན་སྐྱོང་གི་བསམ་བློའི་ནང་རང་གི་གཏན་ལ་ཕབ་པའི་སྲིད་ཇུས་ལ་ཡིད་ཆེས་མེད་པ་དང་། དེ་ལག་ལེན་མ་བསྟར་ཐབས་མེད་ཡིན་བསམ་པའི་ཆོད་སེམས་བརྟན་པོ་མེད་པ་ཡིན་ན། དཀའ་ངལ་འཕྲད་ཀྱི་རེད། དེ་ལྟར་འཕྲད་ཀྱང་དགེ་རྒན་བརྟན་པོ་ཡིན་ན། འཛིན་སྐྱོང་ལ་དམིགས་བསམ་བྱ་རྒྱུ་ཡོད་པ་མ་རེད། དགེ་རྒན་སྡུག་ཅག་བྱུང་བ་ཡིན་ན་གནོད་ཆེན་པོ་སྐྱེལ་བའི་གོ་སྐབས་ཡོད་པ་རེད། ” ཅེས་གསུངས་བྱུང་།
གསར་འགོད་པ། དོན་གོ
མི་རྗེ་མཁས་དབང་མཆོག་གི་གསུངས་འཕྲིན་ནི་དངོས་གནས་བོད་འབངས་ཡོང་ནས་ངེས་པར་བློ་ངེས་དང་བསམ་གཞིག་བྱ་རྒྱུ་གལ་ཆེ་བར་མཐོང་། གལ་ཏེ་གསར་ལམ་གནས་ཚུལ་ཏག་ཏག་བཀོད་ཡོད་ན། འདིར་ང་རང་སྒེར་གྱི་བསམ་ཚུལ་འགའ་ཞིག་ཞུས་འདོད་བྱུང་།
ད་ལྟའི་ཤེས་ཡོན་སྲིད་བྱུས་ཀྱི་ལག་ལེན་དེ་ད་ལྟའི་བཀའ་ཤག་ལ་དེ་ཙམ་གྱི་ཆོད་སེམས་མེད་པ་དངོས་གནས་མཐོང་སོང་། གཅིག་གི་སྲིད་སྐྱོང་རང་ཅག་གི་རང་གནས་ཀྱི་སྙིང་བཅུད་ལ་གོམ་པ་མེད་པས་དབང་དང་གཉིས་ནས་ནུབ་ཕྱོགས་ཤེས་རིག་ལ་ལ་ཞེན་ཆེ་བས་རེད་སྙམ། དེ་ནི་སྲིད་སྐྱོང་གི་སྐྱོན་མིན་ལ་བྱེས་ཀྱི་བོད་མི་མང་ཆེ་བའི་བསམ་བློ་ཡང་སྲིད་སྐྱོང་དང་ཕྱོགས་མཚུངས་པས་སྤྱི་ཚོགས་རང་བཞིན་གྱི་སྐྱོན་ཞིག་ཏུ་མཐོང་། སོང་ཙང་མི་རྗེ་མཆོག་ནས་སྲིད་གཞུང་ལ་ཆོད་སེམས་མེད་པ་བཤད་དོན་དེ་རེད།
འོན་ཀྱང་སྲིད་གཞུང་ལ་དེ་ལྟར་ཆོད་སེམས་མེད་པ་ནི་ལྷག་པར་དུ་འང་མང་གཙོའི་སྤྱི་ཚོགས་ཞིག་གི་ནང་། སྲིད་གཞུང་དེ་མི་མང་གི་བདམས་པ་ཞིག་ཡིན་པས་སྲིད་གཞུང་གི་ལང་ཕྱོགས་དེ་འང་མི་མང་ལ་སྟབས་བསྟུན་བྱས་པ་ནི་ཆབ་སྲིད་དང་དངོས་ཡོད་གི་འགྲོ་སྟངས་ཤིག་ཀྱང་རེད།
ང་ཚོའི་སྤྱི་ཚོགས་ནས་ཞིབ་པར་དཔྱད་ན་ཤེས་ཡོན་སྲིད་བྱུས་ལ་རྒྱུན་དུ་དངོས་ཤུགས་རྒྱུད་གསུམ་ནས་རྒྱབ་སྐྱོར་གྱི་གསུངས་སྐད་བསྐྱོན་མཁན་མང་ཆེ་བ་ནི་རང་གི་སྲོལ་རྒྱུན་རིག་གཞུང་ལ་གོ་བ་ཆུང་ལོན་པ་མང་བ་རེད། སོང་ཙང་ཁོང་ཚོའི་ངོས་ནས་རྩོམ་དང་སྙན་ཞུ་ཙམ་འབྲི་བ་མ་ཡིན་པར་དངོས་སུ་སྤྱི་ཚོགས་དང་ལྷག་པར་སློབ་ཕྲུག་དང་ཕ་མ་རྣམས་ཀྱི་སེམས་ཁམས་ལ་བློ་ལ་བབ་པའི་སྔར་གྱི་སྲོལ་རྒྱུ་རིགས་གནས་དེ་དག་དེང་གི་དུས་ཀྱི་ཤེས་རིག་དང་འགལ་བ་མེད་པ་དང་། སྤྱི་ཚོགས་ཀྱི་འགྱུར་བ་དང་མཉམ་འགྲོས་ཐུབ་མཁན་ཞིག་ཡིན་པ་དངོས་སུ་སྟོན་ཐུབ་པ་ཞིག་དགོས། དེ་ནི་ཤེས་ཡོན་སྲིད་བྱུས་ལ་ཕྱོགས་རིས་ཅན་རྣམས་ཀྱི་ངེས་པར་དུ་འགྲུབ་དགོས།
མཐར་མི་རྗེ་མཆོག་དང་ཅུང་བསམ་ཚུལ་མི་མཐུན་པ་ཞིག་ཞུ་རྒྱུ་ནི། འཛིན་སྐྱོང་ནི་སྤྱི་ཚོགས་དེ་ལས་སྐྱེས་སྲིང་བྱས་པ་མི་མང་བང་དང་གཅིག་པ་རེད། འོན་ཀྱང་སྐབས་བབས་སུ་གཞུང་གི་དངུལ་གྲོན་གང་དུ་ཆེད་གཏོང་བྱེད་དང་མི་བྱེད་དེ་འཛིན་སྐྱོང་ལ་བརྟེན་པ་དང་། ལྷག་པར་འཛིན་སྐྱོང་ནས་ད་ལྟའི་ཤེས་ཡོན་སྲིད་བྱུས་དང་འབྲེལ་བའི་སྒྲུབ་དགོས་པའི་ཕྱག་ལས་གལ་ཆེ་ཤོས་གཅིག་ནི། ཤེས་ཡོན་དང་སྲོལ་རྒྱུན་རིག་གནས་ཁྱད་ལས་པའི་ཉམས་ཞིབ་ཀྱི་སྡེ་ཚན་ཞིག་ངེས་པར་དུ་དགོས་པར་མཐོང་། ད་ལྟའི་ཤེས་ལྷན་ནང་དེང་དང་སྲོལ་རྒྱུན་ཚན་པ་སོ་སོ་ལས་དེ་གཉིས་ཟུང་འབྲེལ་གྱི་ཤེས་ཡོན་སྲིད་བྱུས་དང་མཐུན་པའི་སློབ་གཞི། དགོ་འོས། སློབ་དེབ། སོགས་བསྐྲུན་རྒྱུའི་ལང་ཕྱོགས་ཤིག་ཕལ་ཆེར་མེད་པ་རེད། སོང་ཙང་འཛིན་སྐྱོང་དང་ཕ་མ་དང་དགེ་སློབ་ཚང་མ་འཕྱར་གྲུ་མཉམ་འདེགས་རེད་མ་གཏོགས་གཅིག་ལས་གཞན་གཙིགས་ཆེ་བ་བྱེད་པ་ནི་འོས་འཚམས་ཞིག་མཐོང་མ་སོང་།