མིག་མི་འཛུམ།
ངྷ་སའི་གནམ་ངོ་གནག་ཅིང་སྐྱི་སེར་རླུང་བུ་ལྡང་བའི་དགུན་དུས་ཀྱི་ཕྱི་དྲོ་འདིར། བདག་གིས་བོད་སྐྱོད་གོམ་བགྲོད་པ་གླིང་ཚ་ཚེ་བརྟན་རྡོ་རྗེ་ལགས་གློ་བུར་དུ་དྲན་བྱུང་། ཁོང་དྲན་པ་ལ་རྒྱུ་རྐྱེན་དུ་མ་ཡོད་ཀྱང་དེའི་ནང་གི་རེ་གཉིས་ཤིག་ཆེད་དུ་གླེང་ན། ཚང་མར་རྒྱུས་མངའ་ཡོད་པ་བཞིན་ཁོང་གིས་གོམ་བགྲོད་གནང་ནས་དུས་ཡུན་ག་ཚོད་ཕྱིན་མིན་དང་དཀའ་སྡུག་ཅི་ཙམ་མྱངས་མིན་དྲ་རྒྱ་སོགས་སུ་གང་འཚམ་བཀོད་ཡོད་པ་སོགས་དང་། དེའི་ནང་ནས་ཀྱང་བོར་བརླག་ཏུ་སོང་ནས་ཅི་ཙམ་འགོར་བ་དེ་བཞིན་དུ་གླེང་མཁན་དང་འཚོལ་མཁན། ཡང་ན་དེ་ལ་གདུང་སེམས་མཉམ་སྐྱེད་བྱ་མཁན་ཅི་ཙམ་ཡོད།
གཅིག འདས་ལོའི་གསུམ་བཅུའི་དུས་དྲན་ཉིན་ནས་བསྐྱར་དུ་ཁོང་ཉིད་རང་གི་རི་ལྟར་བརྟན་པའི་དམ་བཅའ་དེའི་འཕྲོར་འཇུས་ནས་ལམ་ལ་ཆས་ཏེ་ད་བར་ཟླ་ངོ་ཧྲིལ་བོ་བཅུ་ཏག་ཏག་ཕྱིན་ཡོད། གོམ་བགྲོད་རྗེས་མ་འདི་སྔར་ལོའི་ཉམས་མྱོང་གི་སྟེང་ནས་ལམ་ཁ་སོགས་བརྗེ་ནས་ཕྱིན་ཡོད་ལ། ཁོང་ཉིད་ཀྱི་ཞུམ་པ་མེད་པའི་སྙིང་སྟོབས་ཀྱིས་ཐག་བཅད་པའི་དམིགས་ཡུལ་ལྟར་ས་མཚམས་བརྒལ་ནས་དགྲ་བོའི་མེ་མདའི་རྩེ་གྲི་ལ་བྲང་གཏད་སོང་བ་ཚང་མས་ཤེས་གསལ་ཡིན། དེ་ལྟར་ས་མཚམས་ནས་བོར་བརླག་ཕྱིན་པའི་གནས་ཚུལ་ཡང་བཤད་ག་ལ་དགོས། དེས་ན་ད་བར་འུ་ཅག་གི་གཞུང་ཕྱོགས་ནས་ཅིའི་ཕྱིར་དཔའ་བོ་ཁོང་གི་ཛ་དྲག་གི་གནས་སྟངས་ལ་དོ་འཁུར་བྱེད་ཀྱི་མེད་དམ།
འདི་ནི་རྒྱལ་ཁབ་ཅིག་དང་མི་རིགས་ཤིག་གི་ལྷད་མེད་དྭངས་གཙང་གི་དཔའ་བོ་བཤའ་མ་ཞིག་བོར་བརླག་ཏུ་སོང་བ་མ་རེད་དམ། སྤྱིར་བཏང་དཔའ་བོ་ཁོང་ལ་མཚོན་ན་བོད་གཞུང་དམངས་གཉིས་ཀའི་ར་མདའ་ལྟ་བུ་མེད་ཀྱང་ཆོག་རུང་། གཞན་པའི་མཐོང་སྣང་དང་རྒྱུ་འབྲས་ལ་མི་རུང་ཨང་། ( མི་རུང་བར་བརྗོད་དགོས་དོན་ནི། རྒྱབ་རྩ་དང་ལག་འབྲེལ་ཡོད་པའི་མི་ཞིག་ཡིན་ན་འདི་ལྟར་འཇོག་མིན་དང་། ལྷག་དོན་སྔོན་ཆད་ཟློས་གར་དང་གཞས་སྣ་འཚོལ་བསྡུར་ཕྱིན་པའི་ངག་དབང་ཆོས་འཕེལ་ལོ་ངོ་ཁ་ཤས་ལ་བཙོན་དུ་སྡོད་སྐབས། བོད་གཞུང་དང་འབྲེལ་ཡོད་ཚོགས་སྡེ་ཁག་གིས་ཇི་ལྟར་མར་ལས་སྤུ་བཏོན་པ་བཞིན་ཁོང་བདེ་བླག་ངང་ཕྱི་རྒྱལ་དུ་བླངས་པ་སོགས་ལ་གཞིག་ནས་བཤད་ཀྱི་ཡོད། )
གཉིས། ཡང་རྒྱུ་རྐྱེན་གཞན་ཞིག་ནི། འུ་ཅག་གི་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་ལས་འགུལ་དང་འཐབ་རྩོད་ཀྱི་ངོས་ནས། དགྲ་བོར་འཇིགས་སྣང་ཕར་ཟད་རང་སྡེ་རང་གིས་འཇིག་པར་བྱེད་ཀྱིན་པ་དང་ཤིན་ཏུ་འདྲ་ སྟེ། དཔེར་ན། འདས་པའི་ཉིས་སྟོང་བརྒྱད་ནས་གཞིས་བཞུགས་སྤུན་ཟླ་དག་གི་སྙིང་སྟོབས་ཀྱིས་བཏེགས་པའི་བོད་དོན་འཐབ་རྩོད་ཅི་ཙམ་ཤུགས་ཆེ་བ་དེ་བཞིན་ཕྱི་ཕྱོགས་ས་ལ་ཉལ་ཞིང་ས་ནས་གཏིང་ལ་འཛུལ་གྱིན་པ་ལྟ་བུའི་རྣམ་སྣང་ཞིག་མི་འདུག་གམ། དེ་བས་ཀྱང་འབུར་དུ་ཐོན་པའི་བོད་དོན་འཐབ་རྩོད་ཀྱི་དཔའ་རྒོད་རེ་རེ་བཞིན་ཏེ། དཔེར་ན་སྤྲུལ་སྐུ་བསྟན་འཛིན་བདེ་ལེགས་དང་བློ་བཟང་བསྟན་འཛིན། བྱ་བྲལ་རིན་པོ་ཆེ་ལ་སོགས་པ་སྐབས་ཐོག་གི་ལས་འགུལ་དང་སྐབས་ཐོག་གི་འབོད་སྒྲ་ཙམ་ལས་ཁོང་ཅག་གི་དམིགས་འབེན་བཞིན་རྒྱུན་མཐུད་པའི་ལས་འགུལ་ཞིག་ཕར་ཟད། ཐ་ན་འུ་ཅག་གི་ལས་ཀྱི་སྣེ་མོ་བ་ཚོས་ཁ་ཚིག་ཙམ་ཡང་གླེང་གི་མེད་དོན་དེའོ།།
དཔེ་དེ་བཞིན་དུ་གླིང་ཚ་ཡང་འཇིག་རྟེན་ནས་བོར་བ་བཞིན་དུ་འུ་ཅག་གི་གཞུང་མང་ལས་འགུལ་གྱི་ཁྲོད་ནས་ཀྱང་བོར་འདུག་པ་ཅི་འདྲའི་ཐབས་སྐྱོ་བ་ལ་ཨང་། ( ཐབས་སྐྱོ་བ་ཟེར་དོན་ནི་ཡུལ་འདིའི་ཆབ་སྲིད་ཀྱི་ཚིག་ཅིག་ལྟར་བཤད་ན། སྐབས་འཚོལ་བའི་བྱ་སྤྱོད་ཙམ་ལས་དོན་དངོས་ཀྱིས་འཐབ་རྩོད་ཅིག་གུད་ན་མེད་པ་དང་། གོང་དུ་དྲངས་པའི་གནས་སྟངས་དེའི་སྟབས་ཀྱིས་སྐབས་འཚོལ་བ་ཞེས་པའི་མིང་ཚིག་འདི་ཡང་རང་སྟེང་ལ་འབབ་ཀྱིན་ཡོད། དེ་ལྟར་རང་གི་རྒྱལ་གཅེས་དཔའ་བོ་རང་གིས་མི་གླེང་བ་ནི་རང་ཉིད་རང་གིས་བསྒགས་གསོད་གཏོང་བ་དང་འདྲའོ།།)
གསུམ། དེ་ལྟར་འཇིག་རྟེན་ནས་བོར་སོང་བའི་གླིང་ཚ་ནི་ང་ཚོའི་སེམས་ནས་དུས་གཏན་ཏུ་འབོར་མི་འོས་ཏེ། མ་མཐའ་ཡང་ཁོང་དགྲ་ལག་ཏུ་ལྷུང་ཡོད་མེད་ཙམ་ཤེས་དགོས། དེའི་འོས་འགན་ནི་བོད་གཞུང་ཁོ་ན་ལ་ཡོད། ངས་ཆབ་སྲིད་ཟེར་བའི་གཞུང་ལུགས་ཟབ་མོ་གང་ཡང་མི་ཤེས་ཏེ། མི་ཚང་མས་མ་རབས་ཐ་ཤལ་དང་ངོ་ཚ་མེད་པ། རྒྱུ་འབྲས་གོ་ལྡོག་པར་བསྙད་པའི་ཁ་ཆེའི་དྲག་སྤྱོད་པ་དང་རྒྱ་ནག་ལྟ་བུར་མཚོན་ནའང་། རང་གི་མི་རིགས་དང་རྒྱལ་ཁབ་ཀྱི་དཔའ་བོ་ཚོའི་ཆེད་དུ་གང་ཡང་བྱེད་པ་དང་། དེའི་རིན་ཐང་ལ་གདེང་འཇོག་བྱེད་ཀྱིན་པ་དེབ་དང་ཚགས་ཤོག་བརྒྱུད་ལམ་སྣ་ཚོགས་ནས་མཐོང་གསལ་ལྟར་ཡིན་སྟབས། བདག་གིས་ནམ་དུ་ཡང་རང་གི་གཞུང་འདི་ལ་བློ་དཀར་གཞུངས་དྲང་གི་ངོས་ནས་གནད་དོན་འདིའི་ཐད་ནས་སྐྱོན་བརྗོད་དང་འཁང་ར་བྱེད་ཀྱིན་ཡོད། དཔའ་བོའི་རིན་ཐང་དཔལ་འབྱོར་གྱི་འདུ་འགོད་ཙམ་དུ་ཟད་པ་ནི་ཅི་འདྲའི་སྐྱོ་ཞིང་གདུང་བ་ལ་ཨང་།
གླིང་ཚ་ཚེ་བརྟན་རྡོ་རྗེ་དེ་ལྟར་བོར་རྗེས། ཁོང་གི་བཀའ་དྲིན་ཆེ་བའི་ནད་གཅོང་ཅན་གྱི་ཕ་མ་དང་སྲིང་མོ། བཟའ་ཟླ་བུ་ཕྲུག་སོགས་ནང་མིའི་དཀའ་སྡུག་དག་བརྗོད་ལས་འདས་ཀྱང་འདིར་ཚིག་ཚོགས་སྤུངས་པའི་ངལ་བ་སྤངས་ཏེ་བརྗོད་འདོད་པ་གཅིག་ནི། གླིང་ཚ་ང་ཚོའི་མིག་མདུན་ནས་མི་སྣང་བར་གྱུར་རྗེས་ཁོང་གི་ཕ་རྒན་གྱིས་བུ་གཡུལ་དུ་ཕྱིན་པའི་གཞུག་ལ་ལྟད་མོར་ལྟ་བའི་སྡར་མའི་རང་གཤིས་དོར་ནས་ཐད་ཀར་བོད་དུ་ཕྱིན་ཡོད། དེ་ལྟར་འགྲོ་བ་ཡང་ཅི་འདྲའི་གཉེན་འཕྲང་ཞིག་མ་རེད་དམ། ཕ་བུ་གཉིས་དེ་ལྟར་སོང་ཤུལ་གྱི་ཁེར་རྐྱང་གི་ཨ་མ་དེའི་སྡུག་བསྔལ་བའི་འཚོ་བ་ལ་ གཞུང་ངོས་ནས་ལྟ་རྟོག་ཅི་ཞིག་བྱེད་ཀྱིན་ཡོད། སྐྱི་སེར་རླུང་བུ་ལྡང་ཞིང་བར་སྣང་ན་ལོ་མ་སེར་པོས་སྐྱོ་བའི་ཟློས་གར་བསྒྱུར་བའི་ཕྱི་དྲོ་འདིར་རང་དབང་མེད་པར་ཐལ་བའི་ལྷག་བསམ་རྣམ་དག་གི་བསམ་ཚུལ་ཙམ་མོ།།
སྐད་ཆ་དེ་ལ་བལྟས་ན་བདེན་པ་མིན་པར་མ་ཟད་རྒྱལ་སྲས་ཤིག་དེ་བས་ཀྱང་མ་རེད། ཁོང་གིས་ཕྱི་གསལ་ནང་གསལ་བྱས་ནས་ལས་འགུལ་དེ་ཇི་ལྟར་བརྩམས་པའི་འཆར་གཞི་ཡོད་ཚད་ཁོ་རང་ཉིས་ཀྱི་བསམ་བློ་ཡིན་ཞེས་བསྒྲགས་ཡོད།
མ་གཞི་ནས་ང་རང་ཚོ་སྒོར་འབུད་མི་ཐུབ་པ་ཚོས་ལུས་སྲོག་ལོངས་སྤྱོད་བོད་དོན་བདེན་པའི་འཐབ་རྩོད་ཆེད་དུ་བློས་གཏོང་མཁན་སུ་ལ་ཡང་དམའ་འབེབས་བྱེད་པའི་ཐོབ་ཐང་མེད།
དོན་ངོ་མ་་བཤད་ན་གླིང་ཚ་དཔའ་རྒོད་ཀྱི་ལས་འཆར་དགོངས་དོན་ལ་ང་ཚོས་ཕན་ཐོགས་མེད་གནོད་བསྐྱལ་ཡོད། ཉེས་པ་འདི་ང་ཚོས་ནམ་ཞིག་ལ་ངོས་ལེན་ཐུབ་བམ།
རྩ་བའི་ཆ་ནི་ཁོང་གི་ལྷག་བསམ་དང་སྙིང་སྟོབས་བརྗོད་ཀྱིས་མི་ལང་བ་ཞིག་རེད། ཡིན་ན་སྔོན་མ་ཤར་ཁུག་དང་། ཟླ་ཚེ་སོགས་ཀྱིས་ལོགས་ལམ་དུ་འཁྲིད་པའི་རྐྱེན་གྱིས། ཁོང་ལ་མཐོང་མེད་པ་ཆག་རེད། ཕྱིས་སུ་ཐེངས་གཉིས་པའི་གོམ་འགྲོད་སྐབས་ཁོང་གིས་མི་ངན་ཁོང་ཚོ་ཁ་ལ་ཉན་མེད་པས། ཁོང་ནད་མེད་བདེ་ཐང་ཡིན་པར་སྨོན་ལམ་ཚང་མས་རྒྱབ་བཞིན་ཡོད་རེད།